Yu Save Bihainim Pasin Bilong Jehova Long Tingim Tru Ol Narapela?

“GOD i save wari long yupela. Olsem na olgeta hevi yupela i karim, yupela i mas putim long han bilong en.” (1 Pita 5:⁠7) Em wanpela gutpela tok tru, a? God Jehova i save tingim tru lain bilong em. Yumi ken stap bel isi aninit long lukaut bilong em.

Yumi mas kisim na kamapim wankain pasin bilong tingim tru ol narapela. Yumi no gutpela olgeta, olsem na yumi mas was gut long sampela hevi inap kamap taim yumi kamapim pasin bilong tingim ol narapela. Paslain long yumi stori long sampela hevi olsem, yumi ken skelim sampela rot em Jehova i save lukautim lain bilong em.

Man bilong raitim song, Devit, em i mekim tok piksa long wasman bilong sipsip bilong stori long pasin bilong God long lukautim man. Em i tok: “Bikpela em i wasman bilong mi. Olsem na mi no inap sot long wanpela samting. Em i mekim mi i slip long gutpela gras. Na em i bringim mi i go long ol liklik wara na mi dring na mi malolo. Em i givim mi nupela strong. . . . God, maski mi wokabaut long ples nogut na bikpela tudak, mi no ken pret long samting nogut, long wanem, yu stap wantaim mi.”​—⁠Song 23:​1-4.

Devit em i wasman bilong ol sipsip, olsem na em i save long wok bilong lukautim lain sipsip. Wasman i save lukautim ol sipsip long ol birua, olsem ol laion, weldok, na bea. Em i was long ol na bai ol i no ken go nabaut, em i painim ol sipsip i lus, karim ol sipsip i taiet long bros bilong em, na lukautim ol sipsip i sik o i kisim bagarap. Long olgeta de em i save givim wara long ol. Dispela i no makim olsem wasman i bosim olgeta samting ol sipsip i mekim. Ol sipsip i stap fri, tasol i gat man bilong lukautim ol.

Jehova i save mekim olsem bilong lukautim lain bilong em. Aposel Pita i tok: “God i save lukautim yupela long strong bilong em.” Dispela tok “lukautim” i makim olsem narapela i “was” long narapela. (1 Pita 1:⁠5) Jehova i save tingim tru yumi, olsem na oltaim em i save was long yumi, na long olgeta taim em i redi long helpim yumi taim yumi askim em long mekim olsem. Tasol Jehova i wokim yumi long i stap fri long makim rot yumi laik bihainim, olsem na em i no insait long olgeta samting yumi mekim o wokim disisen long en. Olsem wanem yumi ken bihainim pasin bilong Jehova long dispela samting?

Bihainim Pasin Bilong God Taim Yu Lukautim Ol Pikinini

“God i mekim gut long yumi na givim yumi ol pikinini olsem presen.” Olsem na ol papamama i mas sambai na lukautim ol pikinini bilong ol. (Song 127:⁠3) Bilong mekim olsem, ating papamama i mas kirapim ol pikinini long kamapim tingting i stap long bel bilong ol, na nau papamama i mas tingim dispela samting taim ol i toktok wantaim ol. Sapos papamama i traim long bosim olgeta samting pikinini i mekim, na i no putim yau taim pikinini i kamapim laik bilong em, dispela i wankain olsem wasman bilong sipsip i paitim ol sipsip bilong bosim ol. Ol wasman bilong sipsip i no save lukautim ol sipsip long kain pasin olsem, nogat, na Jehova tu i no save mekim olsem long yumi.

Marikoa i tok: “Inap planti yia mi save tokim ol pikinini bilong mi, ‘Yu mas mekim olsem’ na ‘No ken mekim olsem.’ Mi ting dispela em i wok bilong mi olsem mama. Mi no mekim wanpela tok amamas long ol pikinini, na mi no toktok gut wantaim ol.” Pikinini meri bilong Mariko i toktok inap planti aua long telefon wantaim ol pren bilong em, tasol em i no save toktok longpela taim wantaim mama bilong em. Mariko i tok moa: “Orait bihain mi luksave long wanem samting i narapela kain. Taim pikinini meri bilong mi i toktok wantaim ol pren bilong em, em i save kamapim ol tok i soim olsem em i pilim tok bilong narapela, em bai tok ‘Yes, mi wanbel’ o ‘Mi tu i ting olsem.’ Mi kirap yusim ol wankain tok bilong kirapim pikinini meri long kamapim tingting bilong em, na i no longtaim na mitupela i toktok wantaim inap longpela taim na mipela i amamas long mekim olsem.” Dispela i kamapim klia olsem pasin bilong toktok gut wantaim em i bikpela samting, olsem i no wanpela tasol i toktok, tupela wantaim i mas toktok.

Ol papamama i mas kirapim ol pikinini long kamapim tingting bilong ol, na ol pikinini i mas kliagut long as na pasin bilong papamama long lukautim ol i olsem banis. Baibel i tok ol pikinini i mas bihainim tok bilong papamama bilong ol, na i gat wanem as na ol i mas mekim olsem. Baibel i tok: “Sapos yu mekim olsem, orait olgeta wok samting yu mekim i ken kamap gutpela, na bai yu stap longpela taim long dispela graun.” (Efesus 6:​1, 3) Ol pikinini husat i bilip tru olsem pasin bilong daun long papamama i helpim ol, ol i no hatwok tumas long bihainim tok bilong papamama.

Taim Yu Lukautim Lain Sipsip Bilong Jehova

Gutpela pasin bilong Jehova long tingim ol narapela i kamap ples klia insait long kongrigesen Kristen. Jisas Krais em i Het bilong kongrigesen, olsem na em i tokim ol elda long lukautim lain sipsip bilong em. (Jon 21:​15-​17) Tok Grik ol i tanim olsem wasman i kam long wanpela tok i makim “lukautim gut.” Pita i kamapim klia rot bilong mekim olsem taim em i tokim ol elda: “Yupela i mas lukautim gut ol manmeri bilong God. Ol i stap olsem ol sipsip long han bilong yupela. Na yupela i mas amamas long mekim dispela wok, . . . yupela i no ken mekim dispela wok bilong kisim pe tasol. Nogat. Yupela i mas i gat laik tru long mekim dispela wok. Yupela i no ken i stap olsem ol bikman na daunim dispela ol manmeri God i bin putim long han bilong yupela. Nogat. Yupela i mas mekim gutpela pasin tasol, bai ol i ken lukim na bihainim.”​—⁠1 Pita 5:​2, 3.

Em nau, wok bilong ol elda i wankain olsem wok bilong ol wasman bilong sipsip. Ol elda Kristen i mas lukautim ol man i gat sik bilong spirit na stretim ol bambai ol i ken bihainim ol stretpela lo long laip bilong ol. Ol elda i gat wok long stretim ol wok bilong kongrigesen, stretim ol miting, na mekim ol samting na bai ol samting insait long kongrigesen i ken wok stret.​—⁠1 Korin 14:​33, 34.

Tasol ol tok bilong Pita i stap antap, i kirapim yumi long tingim wanpela hevi inap kamap​—⁠ol elda inap “i stap olsem ol bikman” insait long kongrigesen. Wanpela rot bilong mekim olsem, em elda i kamapim sampela lo i no gat as bilong en. Elda i tingting strong olsem em i mas lukautim gut lain sipsip, na em i strong tumas long mekim olsem. Long wanpela kongrigesen long Esia, ol elda i putim sampela lo long pasin bilong tok gude long ol narapela insait long Haus Kingdom, olsem husat i mas toktok pastaim. Ol i ting pasin bilong bihainim ol dispela lo bai helpim kongrigesen long stap bel isi. Ating astingting i kirapim ol dispela elda long mekim olsem i gutpela, tasol yu ting ol i bihainim pasin bilong Jehova long lukautim lain bilong em? Aposel Pol i kamapim tingting bilong em taim em i tok: “Mi no tok olsem mipela i bosim bilip bilong yupela. Nogat. Long bilip yupela i sanap strong pinis. Mipela i save wok wantaim bilong kamapim amamas bilong yupela.” (2 Korin 1:24) Jehova i save bilip long lain bilong em.

Bilong kamapim pasin bilong tingim tru ol narapela, ol elda i no ken putim ol lo em Baibel i no as bilong en, na tu, ol i no ken tokim ol narapela long ol tok hait. Ol i tingim dispela tok bilong God: “Sapos yu bin harim tok hait long dispela samting, yu no ken autim dispela tok.”​—⁠Sindaun 25:⁠9.

Aposel Pol i tok kongrigesen bilong ol Kristen God i bin makim i olsem bodi bilong man. Em i tok: “God i bin putim olgeta hap bilong bodi i stap wantaim. . . . Em i mekim olsem bai bodi i no ken bruk hap hap. Nogat. Olgeta hap wan wan ol i ken lukautim ol arapela hap long wankain pasin.” (1 Korin 12:​12, 24-​26) Long tok Grik dispela tok “olgeta hap wan wan ol i ken lukautim ol arapela hap” i makim olsem ‘narapela i mas tingim tru narapela.’ Olgeta insait long kongrigesen Kristen i mas tingim tru narapela narapela.​—⁠Filipai 2:⁠4.

Olsem wanem ol Kristen tru i ken soim olsem ‘narapela i tingim tru narapela’? Long rot bilong ol beten bilong ol na long helpim ol man i sot long ol samting, ol i ken kamapim pasin bilong ol long tingim tru ol bratasista insait long kongrigesen. Dispela i kirapim ol narapela long kamapim ol gutpela pasin bilong ol. Tingim olsem wanem gutpela pasin bilong ol narapela i bin helpim Tadataka. Em i kisim baptais taim em i gat 17 krismas, na em wanpela tasol long famili bilong em i lotuim Jehova. Em i tok: “Wanpela famili insait long kongrigesen i singautim mi planti taim long kam kaikai na bung wantaim ol. Long klostu olgeta moning taim mi go long skul, mi go long haus bilong ol bilong skelim teks bilong de wantaim ol. Mi kisim gutpela tok long olsem wanem mi ken karim ol hevi i kamap long skul, na mipela i beten wantaim long ol dispela samting. Dispela famili i lainim mi long pasin bilong givim samting long ol narapela.” Long nau Tadataka i bihainim pasin em i bin lainim na em i wok long wanpela brens ofis bilong ol Witnes Bilong Jehova.

Aposel Pol i givim tok lukaut long hevi inap kamap taim yumi tingim ol narapela. Em i toktok long sampela meri husat i “save laikim tumas long harim tok long ol samting ol arapela manmeri i mekim na ol i raun na tok baksait long ol. Olsem na ol i mekim planti tok i no stret long yumi mekim.” (1 Timoti 5:13) I stret yumi tingim ol samting ol narapela i mekim, tasol yumi mas was gut, nogut yumi go insait tumas long ol samting bilong ol. Sapos yumi mekim olsem, dispela inap kirapim yumi long “mekim planti tok i no stret long yumi mekim,” olsem skelim ol samting ol narapela i mekim na toktok planti long en.

Yumi mas tingim olsem ol Kristen i no gat wankain pasin long stretim ol samting bilong ol, o wanem kain kaikai ol i laik kisim, o wanem kain amamas ol i painim. Olgeta wan wan i stap fri long makim ol samting ol i laik mekim, tasol ol dispela samting i mas stret wantaim ol stiatok bilong Baibel. Pol i tokim ol Kristen long Rom olsem: “Yumi mas lusim pasin bilong skelim pasin bilong ol arapela brata na tingting nogut long ol. . . . Yumi mas bihainim olgeta pasin i save mekim yumi i stap wanbel, na olgeta pasin i save strongim bilip bilong ol arapela.” (Rom 14:​13, 19) Bilong soim olsem yumi tingim tru ol narapela insait long kongrigesen, yumi mas redi long helpim ol, tasol yumi no ken go insait tumas long ol samting bilong ol. Taim yumi tingim gut ol narapela long kain gutpela pasin olsem, pasin laikim na pasin wanbel bai kamap strong insait long famili na kongrigesen.

[Futnot]

[Piksa long pes 19]

Tok amamas na pilim tingting bilong pikinini, dispela bai kirapim pikinini long kamapim tingting bilong em