Bai Yu Kamapim Glori Bilong God?

“Yumi . . . stap olsem mira i kamapim glori bilong Jehova.”​—⁠2 KORIN 3:​18, NW.

 1. Moses i bin lukim wanem samting? Wanem samting i kamap bihain long dispela?

SAMTING Moses i lukim em i narapela kain tru. Em wanpis i stap antap long maunten Sainai na em i askim God long mekim wanpela samting long em. Jehova i larim em i lukim samting i no gat narapela man i bin lukim bipo​—⁠em glori bilong Jehova. Tasol Moses i no lukim Jehova tru tru. Lukluk bilong God i gutpela moa yet na man i no inap lukim em na stap laip. Olsem na Jehova i yusim “han” bilong em long karamapim Moses inap Em i go pinis; yumi ken ting olsem em i yusim wanpela ensel bilong mekim olsem. Nau Jehova i larim Moses long lukim hap lait bilong glori bilong em. Na tu Jehova i bin toktok wantaim Moses long rot bilong wanpela ensel. Baibel i stori long samting i bin kamap bihain long dispela: “Taim Moses i lusim maunten . . . em i bin toktok wantaim Bikpela, olsem na pes bilong Moses i lait moa yet.”​—⁠Kisim Bek 33:18–34:​7, 29.

 2. Aposel Pol i mekim wanem tok long glori bilong God em ol Kristen i kamapim?

² Piksaim long tingting olsem yu stap wantaim Moses antap long maunten. Bai yu amamas tru long lukim bikpela glori bilong God i Gat Olgeta Strong na harim tok bilong em! Bai yu amamas stret long wokabaut wantaim Moses, em namelman bilong Lo, taim em i wokabaut lusim maunten Sainai! Tasol ating yu no save olsem ol Kristen tru i kamapim glori bilong God long sampela rot i winim pasin Moses i bin mekim bilong kamapim glori bilong God. Aposel Pol i stori long dispela samting long wanpela pas em i raitim. Em i tok ol Kristen God i bin makim long holi spirit ol i “stap olsem mira i kamapim glori bilong Jehova.” (2 Korin 3:​7, 8, 18; NW ) Na tu, ol Kristen husat bai kisim laip long graun i save kamapim glori bilong God.

Rot na Ol Kristen i Kamapim Glori Bilong God

 3. Olsem wanem yumi bin kisim sampela save moa long Jehova em Moses i no bin kisim save long en?

³ Olsem wanem yumi inap kamapim glori bilong God? Yumi no bin lukim o harim Jehova long wankain pasin olsem Moses i bin lukim na harim. Tasol yumi bin kisim sampela save long Jehova em Moses i no bin save long en. Jisas i bin kamap Mesaia 1,500 yia bihain long indai bilong Moses. Olsem na Moses i no inap save olsem wanem ol samting bilong Lo bai kamap tru long rot bilong Jisas, em man i dai bilong kisim bek olgeta man long sin na indai. (Rom 5:​20, 21; Galesia 3:19) Na tu, Moses i no inap kliagut long olgeta gutpela samting Jehova i tingting pinis long mekim, em Kingdom Bilong God long han bilong Mesaia bai kamapim, na dispela Paradais long graun em Kingdom bai kamapim. Olsem na yumi lukim glori bilong Jehova, i no long ai tru tru, em long ai bilong bilip, em ol bilip Baibel i as bilong en. Na tu, yumi bin harim nek bilong Jehova, i no long rot bilong wanpela ensel, nogat, em long rot bilong Baibel, na moa yet long ol Gutnius, em ol i kamapim stori bilong wok autim tok bilong Jisas na ol samting em i lainim ol man long en.

 4. (a) Olsem wanem ol Kristen God i bin makim ol long holi spirit i save kamapim glori bilong God? (b) Ol manmeri bilong kisim laip long graun inap kamapim glori bilong God long wanem ol rot?

⁴ Tru, glori bilong God i no mekim na pes bilong ol Kristen i sutim lait, tasol pes bilong ol i lait taim ol i tokaut long ol narapela long ol gutpela pasin bilong Jehova na long ol samting em i tingting pinis long kamapim. Profet Aisaia i bin tok profet olsem, ol manmeri bilong God long taim bilong yumi bai “ol i go long ol manmeri bilong ol longwe kantri na tokaut long biknem na strong [“glori,” NW ] bilong [God].” (Aisaia 66:19) Na 2 Korin 4:​1, 2, i tok: “God i bin . . . givim dispela wok long mipela, olsem na . . . mipela i givim baksait pinis long olkain pasin nogut ol man i save hait na mekim. Mipela i no save wokabaut long pasin bilong giaman. Na mipela i no save senisim tok bilong God. Nogat. Mipela i save autim tok tru long ples klia, bai olgeta man i ken skelim pasin bilong mipela na long bel bilong ol, ol i ken save olsem mipela i mekim stretpela wok long ai bilong God.” Tok Pol i mekim i go moa yet long ol Kristen God i bin makim, em ol “wokman bilong nupela kontrak.” (2 Korin 3:⁠6) Tasol wok autim tok bilong ol i bin helpim planti man tru husat i kisim bilip long i stap laip oltaim hia long graun. Long wok autim tok bilong ol, ol i mas kamapim glori bilong Jehova long ol samting ol i lainim ol man long en, na tu, long pasin bilong ol. Yumi mas kamapim glori bilong God Antap Tru na em i wanpela gutpela wok tru yumi laik mekim!

 5. Yumi stap gut tru long samting bilong spirit, na dispela i kamapim klia wanem samting?

⁵ Long nau ol i autim gutnius bilong Kingdom Bilong God long olgeta hap, olsem Jisas i bin tok profet long en. (Matyu 24:14) Sampela manmeri bilong olgeta lain, kantri, skin, na tok ples i bin amamas moa yet long harim dispela gutnius na ol i bin senisim laip bilong ol bilong mekim laik bilong God. (Rom 12:2; KTH 7:⁠9) Olsem ol Kristen bilong pastaim, ol i no inap pasim maus long ol samting ol i bin lukim na harim. (Aposel 4:20) Winim 6 milion pipel i kamapim glori bilong God long nau, dispela i winim olgeta narapela taim bipo. Olsem wanem? Yu wanpela bilong ol? Ol manmeri bilong God ol i stap gut tru long samting bilong spirit na dispela i kamapim klia olsem Jehova i blesim na lukautim ol. Yumi klia tru olsem spirit bilong Jehova i stap wantaim yumi, long wanem, maski ol samting i gat bikpela strong i laik biruaim yumi, yumi stap gut tru long samting bilong spirit. Nau bai yumi skelim olsem wanem dispela tok em i tru.

No Inap Pasim Maus Bilong Ol Manmeri Bilong God

 6. Bilong wanem yumi mas i gat bilip na strongpela bel bilong sanap long sait bilong Jehova?

⁶ Tingim: Sapos ol i singautim yu long tokaut long kot long rong wanpela raskol nogut tru i bin mekim. Yu save olsem dispela raskol i gat wanpela strongpela lain bilong em na em bai mekim olgeta samting em inap mekim bilong pasim yu long tokaut long kot. Bilong tokaut long kain raskol olsem yu mas i gat strongpela bel na tu yu mas bilip strong olsem gavman bai lukautim yu. Sindaun bilong yumi i kain olsem. Taim yumi autim tok long nem bilong Jehova na ol samting em i tingting pinis long mekim i kain olsem yumi tokaut long kot long rong bilong Satan, yumi kamapim olsem em man bilong kilim i dai man na man bilong tok giaman, na em i giamanim olgeta man long graun. (Jon 8:44; KTH 12:⁠9) Bilong sanap long sait bilong Jehova na sakim Satan yumi mas i gat bilip na strongpela bel.

 7. Satan i gat wanem namba? Em i laik mekim wanem?

⁷ I no gat narapela man i winim Jehova. Strong bilong em i winim tru strong bilong Satan. Yumi bilip tru olsem Jehova inap lukautim ol man i stap gut long em na em i gat laik tru long mekim olsem. (2 Stori 16:⁠9) Tasol maski i olsem, Satan em i bos bilong ol spirit nogut na bilong ol manmeri bilong dispela graun em ol i stap longwe long God. (Matyu 12:​24, 26; Jon 14:30) Satan i stap hia long graun na em i “belhat nogut tru,” na em i biruaim tru ol wokboi bilong Jehova. Em i save yusim ol manmeri em i bosim bilong traim long pasim maus bilong ol manmeri husat i save autim gutnius. (KTH 12:​7-9, 12, 17) Em i save mekim olsem wanem? Em i gat 3-pela rot.

8, 9. Olsem wanem Satan i yusim pasin bilong laikim samting long paulim yumi? Bilong wanem yumi mas tingting gut na makim ol man yumi laik poroman wantaim?

⁸ Wanpela rot bilong Satan long pulim nabaut tingting bilong yumi em long ol samting yumi mekim long ol wan wan de. Ol manmeri i stap nau long taim bilong las de i save laikim tumas mani, ol yet, na ol samting bilong amamas. Ol i no laikim God. (2 Timoti 3:​1-4) Planti manmeri ol i tingting tasol long ol samting ol i mas mekim long ol wan wan de, olsem na ol i no tingim gutnius yumi bringim i go long ol. Ol i no gat laik long lainim tok i tru bilong Baibel. (Matyu 24:​37-39) Em i isi tru long kain tingting i kisim yumi tu na mekim yumi slip long samting bilong spirit. Sapos yumi kisim pasin bilong laikim tumas ol samting bilong skin na pasin bilong painim amamas, pasin bilong yumi long laikim tumas God bai no strong moa.​—⁠Matyu 24:⁠12.

⁹ Long dispela as na ol Kristen i save skelim gut husat ol i laik poroman wantaim. King Solomon i bin tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Yumi laik “wokabaut” wantaim ol man em ol i kamapim glori bilong God. Yumi amamas long mekim olsem! Taim yumi bung wantaim ol bratasista spirit long ol miting na long ol narapela taim, pasin laikim, bilip, amamas, na savetingting bilong ol i save strongim yumi. Pasin bilong bung wantaim ol gutpela poroman olsem i save strongim yumi long mekim yet wok autim tok.

10. Long wanem ol rot Satan i bin yusim pasin bilong tok bilas bilong biruaim ol man i kamapim glori bilong God?

¹⁰ Namba tu rot Satan i yusim bilong pasim ol Kristen long kamapim glori bilong God, em long rot bilong tok bilas. Yumi no kirap nogut long dispela. Taim Jisas Krais i bin autim tok hia long graun ol man i bin tok bilas long em​—⁠ol i lap nogut tru long em, mekim nogut long em, na spetim em. (Mak 5:40; Luk 16:14; 18:32) Na tu, ol i bin tok bilas long ol Kristen bilong bipo. (Aposel 2:13; 17:32) Wankain samting i painim ol wokboi bilong Jehova long nau. Olsem aposel Pita i bin tok, ol man bai tok ol dispela Kristen ol i profet giaman. Pita i tok profet olsem, “Long taim bilong las de, ol man bilong tok bilas bai i kamap, na ol bai i bihainim laik nogut bilong bel bilong ol. Bai ol i tok bilas olsem, ‘Em i bin tok olsem em bai i kam bek gen, a? Orait em i stap we? . . . Olgeta samting i stap wankain olsem bipo tru, taim graun i kamap.’ ” (2 Pita 3:​3, 4) Ol man i tok bilas long ol manmeri bilong God olsem tingting bilong ol i no stret wantaim ol samting tru tru i wok long kamap long nau. Ol i tok ol lo bilong stretpela pasin em Baibel i as bilong en, ol i samting bilong bipo yet na i no bilong nau. Long tingting bilong planti man tok yumi autim em i kranki toktok tasol. (1 Korin 1:​18, 19) Ating ol i tok bilas long ol Kristen long skul, ples wok, na sampela taim insait long famili. Tasol dispela i no pasim yumi, yumi wok yet long kamapim glori bilong God long rot bilong autim tok, long wanem, olsem Jisas yumi save Baibel em i tok i tru.​—⁠Jon 17:⁠17.

11. Olsem wanem Satan i bin yusim pasin birua bilong pasim ol Kristen long autim tok?

¹¹ Namba tri samting Satan i yusim bilong pasim yumi long autim tok em pasin birua na pasin bilong mekim nogut long yumi. Jisas i tokim ol disaipel: “Bai ol i kisim yupela bilong givim pen na hevi long yupela, na bai ol i kilim yupela i dai. Na olgeta lain manmeri bai ol i bel nogut tru long yupela, long wanem, nem bilong mi em i stap long yupela.” (Matyu 24:⁠9) Tru tumas, long planti hap bilong graun ol man i bin mekim nogut tru long yumi ol Witnes Bilong Jehova. Yumi save olsem longtaim i go pinis Jehova i bin tok profet olsem dispela pasin birua bai stap namel long ol man i lotuim God na ol man i mekim wok bilong Satan. (Stat 3:15) Na tu, yumi save taim yumi bihainim stretpela pasin taim traim i painim yumi, i olsem yumi tokaut i stret Jehova i stap nambawan bos bilong heven na graun. Dispela save i mekim na yumi stap strong maski bikpela traim tru i painim yumi. Sapos yumi stap strong long kamapim glori bilong God, pasin birua i no inap pasim maus bilong yumi long autim tok.

12. Bilong wanem yumi mas amamas taim Satan i mekim nogut long yumi na yumi stap gut long God?

¹² Olsem wanem? Yu save sakim ol samting bilong dispela graun i laik pulim yu na yu stap gut long God maski ol man i biruaim yu na mekim nogut long yu? Sapos olsem, orait i gat as na yu ken amamas. Jisas i tokim ol man husat bai bihainim em: “Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas. Yupela i ken belgut na amamas tru, long wanem, bikpela pe i wetim yupela long heven. Ol man i bin mekim ol wankain pasin nogut long ol profet i bin i go paslain long yupela.” (Matyu 5:​11, 12) Pasin bilong yu long sanap strong na karim hevi i kamapim klia olsem holi spirit bilong Jehova i stap long yu, na i givim strong long yu long kamapim glori bilong em.​—⁠2 Korin 12:⁠9.

Pasin Bilong Sanap Strong i Kam Long Jehova

13. Wanem wanpela as na yumi sanap strong na mekim yet wok Kristen bilong yumi, em wok autim tok?

¹³ Wanpela as na yumi sanap strong na mekim yet wok autim tok em yumi laikim tumas Jehova na yumi amamas long kamapim glori bilong em. Ol man i save bihainim pasin bilong ol man husat ol i laikim tumas na ol i rispektim ol​—⁠na i stret tru yumi laik bihainim pasin bilong God Jehova. Bikpela pasin laikim bilong em yet i kirapim em long salim Pikinini bilong em i kam daun long graun bilong autim tok i tru na bilong kisim bek ol man i bihainim tok. (Jon 3:16; 18:37) Olsem God, yumi laik bai ol kain kain man i ken tanim bel na God i ken kisim bek ol; em long dispela as na yumi autim tok long ol. (2 Pita 3:⁠9) Dispela laik, wantaim strongpela laik bilong yumi long bihainim pasin bilong God, i save kirapim yumi long wok long kamapim glori bilong God long rot bilong autim tok.

14. Olsem wanem Jehova i save strongim yumi long sanap strong na mekim yet wok autim tok?

¹⁴ Tasol strong yumi kisim bilong sanap strong na mekim yet wok autim tok i save kam long Jehova. Em i save lukautim na strongim yumi long rot bilong spirit bilong em, oganaisesen, na Tok bilong em, em Baibel. Jehova i save helpim ol man i laik kamapim glori bilong em long “sanap strong.” Em i save harim ol prea bilong yumi na em i givim savetingting long yumi na bai yumi inap winim ol traim. (Rom 15:5; Jems 1:⁠5) Na tu, Jehova i no save larim traim i kamap long yumi em yumi no inap winim. Sapos yumi bilip long Jehova, em bai wokim rot bilong helpim yumi na bai yumi inap wok yet long kamapim glori bilong em.​—⁠1 Korin 10:⁠13.

15. Wanem samting i save helpim yumi long sanap strong?

¹⁵ Pasin bilong yumi long stap strong long mekim wok autim tok i kamapim klia olsem spirit bilong God i stap long yumi. Yumi ken tok piksa olsem: Sapos wanpela man i askim yu long raun long ol wan wan haus bilong tilim wanpela kain bret, i no gat pe bilong en. Na dispela man i tok, bilong mekim dispela wok yu mas yusim mani na taim bilong yu yet. Na tu, i no longtaim na bai yu kisim save olsem wan wan man tasol i laik kisim bret bilong yu; sampela man bai birua long wok bilong yu long tilim dispela bret. Yu ting wanem? Bai yu mekim yet dispela wok long olgeta mun na yia i go i go? Nogat, a? Tasol inap planti yia ating yu bin givim bel tru long autim gutnius na yu bin yusim taim na mani bilong yu yet. Bilong wanem? Long wanem, yu laikim tumas Jehova na em i bin blesim hatwok bilong yu long rot bilong holi spirit bilong em na dispela i bin helpim yu long sanap strong.

Wanpela Wok Ol Man Bai Tingim Oltaim Bihain

16. Taim yumi stap strong long mekim wok autim tok, dispela bai mekim wanem long yumi yet na long ol man i harim tok bilong yumi?

¹⁶ Ol wok Kristen bilong nupela kontrak i wanpela gutpela presen tru. (2 Korin 4:⁠7) Wok autim tok Kristen, em ol arapela sipsip i save mekim long olgeta hap, em tu i wanpela gutpela samting. Olsem Pol i bin tokim Timoti, taim yu sanap strong na mekim yet wok autim tok, “orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Timoti 4:16) Tingim mining bilong dispela tok. Gutnius yu autim inap helpim ol manmeri long kisim laip oltaim. Yu inap kamap pren tru bilong ol manmeri em yu bin helpim ol long samting bilong spirit. Tingim bikpela amamas yu bai kisim long i stap oltaim long Paradais wantaim ol manmeri em yu bin helpim ol long kisim save long God! Ol i no inap lusim tingting long ol samting yu bin mekim bilong helpim ol. Em bai samting bilong amamas tru long en!

17. Bilong wanem taim bilong yumi i narapela kain long taim bilong ol man bilong bipo?

¹⁷ Yumi stap long wanpela taim em i narapela kain long ol narapela taim bipo. No gat narapela taim we wok autim tok bilong gutnius bai kamap namel long ol man em ol i stap longwe long God. Noa i bin stap long kain taim olsem, na em i lukim ol manmeri i kisim bagarap. Em i mas amamas tru long save olsem em i bin stap gut long mekim wok God i tokim em long mekim, em long wokim wanpela sip, na long dispela rot em na famili bilong em i bin abrusim bagarap! (Hibru 11:⁠7) Yu tu inap kisim kain amamas olsem. Tingim amamas yu bai pilim taim yu stap long nupela taim na yu tingim ol samting yu bin mekim long nau long dispela taim bilong las de, taim yu save olsem yu bin mekim olgeta samting yu inap long mekim bilong helpim wok bilong Kingdom.

18. Jehova i tok wanem bilong strongim bel bilong ol wokboi bilong em?

¹⁸ Olsem na yumi laik kamapim yet glori bilong God. Bai yumi tingim dispela wok yumi mekim inap oltaim oltaim. Jehova tu i save tingim wok yumi mekim. Bilong strongim yumi Baibel i tok: “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em. Na yupela i save mekim olsem yet. Na mipela i laikim tumas bai yupela olgeta i mas wok strong olsem tasol, na holimpas bilip bilong yupela, na wetim dispela taim God i makim bilong mekim gut long yumi. Yupela i no ken les. Yupela i mas bihainim pasin bilong ol man i bilip tru na i no les kwik, na ol i kisim olgeta samting bipo God i tok long givim long ol pikinini bilong em.”​—⁠Hibru 6:​10-12.

Yu Inap Stori Long Dispela?

• Olsem wanem ol Kristen i kamapim glori bilong God?

• Satan i save mekim wanem ol samting taim em i laik traim long pasim ol manmeri bilong God long autim tok?

• Wanem samting i makim olsem spirit bilong God i save stap long yumi?

[Piksa long pes 15]

Pes bilong Moses i kamapim glori

[Ol Piksa long pes 16, 17]

Yumi kamapim glori bilong God long wok autim tok bilong yumi