“Givim Bel Bilong Yupela Long Ol Arapela”
“Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret.”—ROM 12:10.
1, 2. Olsem wanem wanpela misineri na aposel Pol i pas gut wantaim ol brata bilong ol?
LONG wok misineri bilong em insait long 43 yia, Don i gat nem olsem em i laikim tru ol man em i wok long helpim ol. Taim em i sik na slip long bet na i laik dai, sampela man em i bin stadi wantaim ol long Baibel ol i kam long longwe hap tru inap sampela tausen kilomita bilong tok, “Kamsahamnida, kamsahamnida!”—“Tenkyu, tenkyu!” long tok Korea. Ol i bin pilim tru pasin bilong Don long givim bel bilong em long ol.
2 I gat planti stori i wankain olsem dispela stori bilong Don. Long taim bilong ol aposel, aposel Pol i kamapim olsem em i tingim tru ol man em i mekim wok bilong helpim ol. Pol i no tingim ol samting bilong em yet. Em i man bilong bilip strong long ol samting, tasol em i gat pasin isi na pasin bilong tingim narapela, “olsem meri i givim susu long ol pikinini bilong en.” Em i raitim pas long kongrigesen long Tesalonaika na tok: “Mipela i laikim yupela tumas, olsem na mipela i laik givim gutnius bilong God long yupela. Na mipela i redi tu long givim laip bilong mipela bilong helpim yupela, long wanem, yupela i bin kamap pren tru bilong mipela.” (1 Tesalonaika 2:7, 8) Bihain, taim Pol i tokim ol brata long Efesus olsem bai em i no lukim ol gen, “olgeta i krai planti, na ol i holimpas Pol na i givim kis long em.” (Aposel 20:25, 37) Pol na ol brata ol i wanbilip, dispela tasol i no as na ol i pas gut wantaim. Narapela i givim bel bilong em long narapela.
Brata i Givim Bel Bilong Em Long Ol Arapela na Pasin Laikim
3. Olsem wanem pasin bilong brata long givim bel bilong em long ol arapela i poroman wantaim pasin laikim?
3 Long Baibel, pasin sori, pilim tru hevi bilong man, na pasin bilong brata i givim bel bilong em long ol arapela, olgeta i poroman wantaim nambawan gutpela pasin Kristen—pasin laikim. (1 Tesalonaika 2:8; 2 Pita 1:7) Ol dispela pasin bilong God i wok gut wantaim na kamapim ol gutpela samting. Ol i mekim na ol Kristen i pas gut moa long ol arapela Kristen na long Papa bilong ol long heven. Olsem na aposel Pol i tokim ol wanbilip: “No ken giaman. . . . Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret.”—Rom 12:9, 10.
4. Wanem mining bilong tok “yupela i mas givim bel bilong yupela long ol arapela”?
4 Tok Grik Pol i yusim taim em i tok long “yupela i mas givim bel bilong yupela long ol arapela” i gat tupela hap bilong en, mining bilong wanpela hap em pasin pren na mining bilong narapela hap em pren long ol wanblut. Wanpela saveman bilong Baibel i tok dispela i makim olsem ol Kristen “i mas kamapim kain pasin bilong givim bel bilong ol long ol arapela olsem i save kamap insait long wanpela famili i gat pasin laikim, ol i pas gut wantaim na narapela i helpim narapela.” Yu pilim olsem long ol brata na sista Kristen bilong yu? Pasin pren—kain olsem yupela i wanblut—i mas stap long kongrigesen Kristen. (Galesia 6:10) Olsem na Baibel The New Testament in Modern English, bilong J. B. Phillips, i tanim Rom 12:10 olsem: “Yumi mas givim bel bilong yumi long ol arapela, kain olsem brata i givim bel bilong em long brata.” Na The Jerusalem Bible i tok: “Laikim tru ol arapela kain olsem brata i mas laikim tru brata.” Yes, pasin laikim namel long ol Kristen i no olsem wanpela wok tasol o samting bilong tingting tasol. Yumi “laikim tru ol arapela manmeri bilong God,” olsem na yumi mas ‘givim bel bilong yumi olgeta long ol.’—1 Pita 1:22.
“God i Skulim Yupela Pinis Long Dispela Pasin”
5, 6. (a) Olsem wanem Jehova i yusim ol kibung intenesenel bilong skulim lain bilong em long pasin laikim Kristen? (b) Olsem wanem pasin bilong ol brata long wok wantaim inap longpela taim liklik i mekim ol i pas gut moa wantaim?
5 Maski ‘planti man i lusim pasin bilong laikim ol arapela,’ Jehova i wok long skulim lain bilong em long nau long narapela i mas laikim tru narapela. (Matyu 24:12; 1 Tesalonaika 4:9) Ol kibung intenesenel bilong ol Witnes Bilong Jehova i gutpela rot tru bilong skulim ol olsem. Long ol dispela kibung, ol asples Witnes i bungim ol brata i kam long ol kantri i stap longwe, na planti i singautim ol dispela brata i kam stap long haus bilong ol. Long wanpela kibung i no longtaim i go pinis, sampela i kam long ol kantri we ol man i no save kamapim samting ol i pilim long bel. Wanpela Kristen i wok long dipatmen bilong rum slip i tok: “Taim ol dispela brata i kam kamap, ol i tingting planti na ol i sem. Tasol long 6-pela de bihain taim ol i tok gutbai, ol yet wantaim lain ol i bin stap wantaim ol, narapela i holimpas narapela na ol i krai. Ol i pilim tru pasin laikim i stap namel long ol Kristen i narapela kain na ol bai i no inap lusim tingting long en.” Pasin bilong mekim gut long ol brata bilong yumi, maski ol i bilong wanem wanem lain, dispela i helpim ol brata na i helpim lain i lukautim ol.—Rom 12:13.
6 Ol kibung olsem i kamapim bikpela amamas, tasol ol Kristen i save pas gut moa yet taim ol i mekim wok bilong Jehova wantaim inap longpela taim liklik. Taim yumi save gut tru long ol brata bilong yumi, yumi pilim moa yet ol gutpela pasin bilong ol—ol i save tok tru, yumi inap trastim ol, ol i save stap gut long man, mekim gut long man, givim ol samting, tingim arapela, mekim pasin sori, na ol i no tingim ol yet tasol. (Song 15:3-5; Sindaun 19:22) Mark i bin mekim wok misineri long Is Afrika, em i tok: “Pasin bilong wok wantaim ol brata bilong yumi i mekim yumi pas strong tru wantaim.”
7. Yumi mas mekim wanem sapos yumi laik insait long pasin laikim Kristen bilong kongrigesen?
7 Bilong ol brata i ken pas gut wantaim na dispela pasin i no ken pinis, narapela i mas wok long go klostu long narapela insait long kongrigesen. Taim yumi go oltaim long ol miting Kristen, yumi strongim pasin laikim namel long yumi na ol brata na sista. Taim yumi stap na mekim ol samting paslain, namel, na bihain long miting, yumi strongim ol brata long “laikim ol arapela na mekim ol gutpela pasin long ol.” (Hibru 10:24, 25) Wanpela elda long Amerika i tok: “Mi inap tingim taim mi stap olsem pikinini, oltaim famili bilong mi i laspela lain long lusim Haus Kingdom, mipela amamas long toktok gut wantaim ol arapela i go i go.”
Yu Ting Yu Gat Wok Long Mekim “Moa Yet”?
8. (a) Pol i laik bai ol Korin i mekim wanem taim em i tokim ol long mekim “moa yet” pasin laikim? (b) Wanem samting inap helpim pasin laikim insait long kongrigesen?
8 Bilong insait tru long pasin laikim olsem, ating yumi gat wok long mekim “moa yet.” Aposel Pol i raitim pas long kongrigesen long Korin na tok: “Mipela i givim bel bilong mipela moa yet long yupela. Mipela i no pasim bel bilong mipela. Nogat. Mipela i laikim tumas yupela.” Pol i tok ol tu i mas mekim “moa yet” dispela pasin. (2 Korin 6:11-13) Olsem wanem? Yu tu inap mekim “moa yet” pasin laikim? No ken wetim ol arapela long prenim yu. Long pas em i raitim long ol Rom, Pol i tok olsem ol i mas givim bel bilong ol long ol arapela na “strong long litimapim nem bilong ol.” (Rom 12:10) Bilong litimapim nem bilong ol arapela, yu ken go pas long tok gude long ol long miting. Na tu, yu inap singautim ol long wok wantaim yu long autim tok o long redim ol samting bilong miting wantaim. Dispela i helpim pasin laikim long i go bikpela moa.
9. Sampela i bin mekim wanem bilong pren gut moa wantaim ol wanbilip Kristen? (Stori tu long samting i kamap long hap bilong yu.)
9 Na ol famili na ol wan wan bilong kongrigesen i ken mekim “moa yet” dispela pasin long rot bilong visitim ol arapela, olsem kisim liklik kaikai wantaim o painim gutpela amamas wantaim. (Luk 10:42; 14:12-14) Sampela taim Hakop i stretim rot bilong ol liklik grup i ken piknik wantaim. Em i tok: “I gat ol yangpela wantaim ol lapun i bung, na ol papamama wanpis tu. Olgeta i kisim amamas, ol i pilim olsem ol i pas gut moa wantaim ol arapela.” Yumi ol Kristen i wok strong long stap wanbilip, tasol yumi mas wok strong tu long stap olsem ol gutpela pren.—3 Jon 14.
10. Yumi ken mekim wanem taim yumi hatwok long stap wanbel wantaim arapela?
10 Tasol sampela taim pekato inap mekim na yu hatwok long givim bel bilong yu long arapela o kirap pren gut wantaim. Yumi ken mekim wanem? Namba wan, yumi ken beten long yumi inap stap wanbel wantaim ol brata bilong yumi. God i laik bai ol wokboi bilong em i stap wanbel, na em bai harim ol kain beten olsem. (1 Jon 4:20, 21; 5:14, 15) Na tu, yumi mas mekim ol samting i stret wantaim prea bilong yumi. Ric, wanpela wasman raun long Is Afrika, i tingim wanpela brata em hatpela pasin bilong em i mekim na i hatwok long stap wanbel wantaim em. Ric i tok: “Mi no laik abrusim dispela brata, mi pasim tok long bel olsem mi mas save gut moa long em.” Ric i stori gut olsem: “Mi bin kisim save olsem papa bilong dispela brata i bin stap olsem hatpela bos. Taim mi bin kliagut long bikpela hatwok brata i bin mekim bilong sakim dispela pasin em i lainim kirap long taim em i liklik yet, na long ol senis em i bin mekim pinis, mi rispek tru long em. Mipela bin kamap gutpela pren tru.”—1 Pita 4:8.
Kamapim Bel na Tingting Bilong Yu!
11. (a) Wanem samting bai helpim pasin laikim long go bikpela insait long kongrigesen? (b) Bilong wanem pasin bilong surik long kamapim bel na tingting bilong yu inap bagarapim yu long samting bilong spirit?
11 Long nau planti manmeri ol i no save pren gut wantaim narapela inap long laip olgeta bilong ol. Tarangu! Dispela tok i no ken makim ol lain insait long kongrigesen Kristen. Trupela pasin laikim bilong ol brata i no makim olsem ol i mekim nating ol gutpela tok na pasin long ol arapela; na i no olsem ol i abrusim mak na mekim planti samting tumas bilong kamapim olsem ol i laikim ol arapela. Nogat. Yumi mas redi long kamapim bel na tingting bilong yumi olsem Pol i bin mekim long ol Korin, na kamapim olsem yumi tingim tru i stap bilong ol wanbilip bilong yumi. Tru, laik long bung wantaim ol arapela o stori planti i no pasin bilong olgeta man, tasol pasin bilong surik long ol arapela inap kamapim hevi. Baibel i tok: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.”—Sindaun 18:1.
12. Olsem wanem pasin bilong toktok gut wantaim em i bikpela samting bilong helpim pasin pren insait long kongrigesen?
12 Pasin bilong toktok gut wantaim i mas i stap namel long ol pren tru. (Jon 15:15) Yumi olgeta i mas i gat sampela pren em yumi inap kamapim tingting na filings i stap insait tru long bel bilong yumi. Na tu, taim yumi save gut long ol arapela, em i isi moa long givim helpim i stret long ol. Taim yumi kamapim klia yumi tingim ol arapela olsem, yumi helpim pasin laikim i go bikpela, na yumi pilim tru dispela tok bilong Jisas: “Amamas bilong man i givim samting long ol arapela man, dispela i winim amamas bilong man i kisim samting bilong em yet.”—Aposel 20:35; Filipai 2:1-4.
13. Yumi ken mekim wanem bilong soim olsem yumi laikim tru ol brata bilong yumi?
13 Bilong pasin laikim bilong yumi i ken karim bikpela kaikai moa, yumi mas kamapim dispela pasin. (Sindaun 27:5) Taim pasin laikim bilong yumi em i samting tru, planti taim pes bilong yumi i soim klia dispela samting, na em inap kirapim ol arapela long kamapim dispela pasin. Man i gat savetingting i tok: “Sapos yu lukim pes bilong man i gutpela na em i amamas i stap, orait bai yu belgut.” (Sindaun 15:30) Ol samting yumi mekim bilong tingim narapela i helpim pasin laikim. Tru, yu no inap baim narapela long laikim yu, tasol wanpela presen em bel i kirapim yu long givim inap mekim bikpela samting long narapela. Wanpela pas yu raitim na “i autim klia tru wanpela gutpela tingting,” dispela inap kamapim olsem yu laikim tru narapela. (Sindaun 25:11; 27:9) Taim yumi gat ol pren pinis, yumi mas lukautim dispela pasin pren long rot bilong mekim yet pasin bilong tingim ol na no ken tingim yumi yet tasol. Moa yet long taim ol i gat hevi, yumi redi long helpim ol pren bilong yumi. Baibel i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.”—Sindaun 17:17.
14. Yumi ken mekim wanem sapos i luk olsem wanpela i no tingim tumas pasin laikim yumi mekim long em?
14 Yumi no ken ting yumi bai pas gut tru wantaim olgeta long kongrigesen. Sampela bai yumi pas gut tru wantaim ol, na sampela bai i no tumas. Olsem na sapos i luk olsem wanpela i no mekim pasin pren long yu olsem yu laikim, no ken kisim tingting wantu olsem i gat wanpela samting i rong long yu o long em. Na no ken strong long em i mas pas gut wantaim yu. Sapos yu mekim pasin pren long em, ating bihain rot bai op long yutupela i kamap gutpela pren.
“Bel Bilong Mi Em i Amamas Long Yu”
15. Man i pilim olsem wanem taim wanpela i tok amamas long em? Em i pilim olsem wanem taim i no gat wanpela i mekim tok amamas long em?
15 Jisas i mas amamas tru long taim em i baptais na em i harim wanpela tok i kam long heven: “Bel bilong mi em i amamas long yu”! (Mak 1:11) Ating dispela tok amamas i helpim Jisas long bilip strong moa olsem Papa bilong em i laikim em tru. (Jon 5:20) Sori tru, sampela i no bin harim tok amamas olsem i kam long man ol i laikim na rispektim tru. Ann i tok: “Planti yangpela olsem mi, ol i no gat sampela long famili i wanbel long bilip Kristen bilong ol. Long haus mipela harim ol tok bilong daunim mipela tasol. Dispela i mekim mipela i bel hevi tru.” Tasol taim ol i kam insait long kongrigesen, ol i pilim pasin laikim bilong wanpela famili spirit i laik helpim ol—ol papa na mama na ol brata na sista, em ol wanbilip.—Mak 10:29, 30; Galesia 6:10.
16. Bilong wanem pasin bilong painim painim ol popaia long ol wok samting narapela i mekim i no gutpela helpim?
16 Long sampela ples, ol papamama, lain i bikpela pinis, na ol tisa ol i no save kamapim olsem ol i amamas tru long ol yangpela, ol i ting sapos ol i litimapim yangpela olsem, ol yangpela bai i no wok strong o ol bai hambak. Kain tingting olsem inap stap insait long famili Kristen na long kongrigesen. Taim ol i stori long wanpela tok o wok samting yangpela i mekim, ating man i bikpela pinis bai tok: “Wok i orait liklik, tasol yu inap mekim gutpela moa!” O long narapela rot, ating bai ol i kamapim olsem ol i no amamas long yangpela. Planti i mekim, long wanem, ol i ting ol i kirapim ol yangpela long kamapim tru strong bilong ol. Tasol planti taim dispela samting i no wok gut, em inap kirapim yangpela long surik long ol man o pilim olsem ol i no inap winim mak.
17. Bilong wanem yumi mas painim rot long tok amamas long ol arapela?
17 Tasol tok amamas i no ken stap olsem tok nating bilong kamapim paslain long mekim tok kaunsel. Pasin bilong tok amamas tru long narapela i kamapim pasin laikim insait long famili na long kongrigesen, na i kirapim ol yangpela long go na kisim gutpela tok long ol brata na sista i gat gutpela tingting. Olsem na no ken larim pasin bilong ples i bosim pasin yumi mekim long ol arapela, yumi laik “kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.” Tok amamas long man olsem Jehova i save mekim.—Efesus 4:24.
18. (a) Ol yangpela i mas ting wanem long tok kaunsel i kam long ol man i bikpela long ol? (b) Bilong wanem ol man bikpela pinis i mas tingim gut pasin bilong ol long givim tok kaunsel?
18 Tasol yupela ol yangpela, no ken ting sapos ol man i bikpela long yu i laik stretim yu o givim sampela tok long yu, dispela i makim olsem ol i no laikim yu. (Saveman 7:9) Nogat tru! Ol i wari long yu na laikim yu tru na dispela i kirapim ol long mekim olsem. Sapos nogat, bilong wanem ol i lusim haptaim bilong toktok wantaim yu long dispela samting? Ol tok inap mekim bikpela samting long bel bilong man, olsem na ol man i bikpela pinis—moa yet ol elda bilong kongrigesen—ol i save lusim bikpela haptaim long tingting gut na beten paslain long ol i givim sampela tok long narapela, ol i laik mekim ol samting i gutpela long helpim yu tasol.—1 Pita 5:5.
‘Bikpela i Save Sori Moa Yet Long Yumi’
19. Bilong wanem ol man i bel hevi long samting i bin kamap bipo i ken kisim helpim long Jehova?
19 Ating sampela i bin givim bel bilong ol long ol arapela na hevi i bin kamap, olsem na ol i ting sapos ol i mekim gen dispela pasin ol bai bel hevi gen. Ol i mas i gat strongpela bel na strongpela bilip na bai ol i ken givim bel bilong ol gen long ol arapela. Tasol ol i no ken lusim tingting olsem Jehova “i no i stap longwe long yumi olgeta wan wan.” Em i singautim yumi long kam klostu long em. (Aposel 17:27; Jems 4:8) Na em i kliagut olsem yumi pret long man i bagarapim bel bilong yumi, na em i tok promis long sambai long yumi na helpim yumi. Man bilong raitim song, Devit, em i tok: “God i save stap klostu long ol manmeri i gat hevi. Na em i save helpim ol manmeri bilip [“bel,” NW ] bilong ol i bagarap.”—Song 34:18.
20, 21. (a) Olsem wanem yumi ken save olsem yumi inap pren gut wantaim Jehova? (b) Yumi mas mekim wanem bilong pas gut wantaim Jehova?
20 Yumi mas wok long mekim Jehova i kamap nambawan gutpela pren bilong yumi. Tasol i gat rot long yumi long pren gut olsem? Yes, i gat. Baibel i stori long ol stretpela man na meri em ol i bin pilim olsem ol i stap klostu tru long Papa bilong yumi long heven. Tok bilong ol i stap long Baibel bilong strongim yumi olsem yumi tu inap go klostu long Jehova.—Song 23, 34, 139; Jon 16:27; Rom 15:4.
21 Olgeta inap mekim samting Jehova i tok ol man i mas mekim bilong pas gut wantaim em. Devit i tok: “Bikpela, husat inap i stap long haus bilong yu?” Em “man i bihainim laik bilong God long olgeta samting, na i mekim stretpela pasin oltaim, na i save tok tru oltaim.” (Song 15:1, 2; 25:14) Taim yumi kliagut olsem pasin bilong mekim wok bilong God i karim gutpela kaikai na i kirapim em long stiaim yumi na lukautim yumi, yumi kisim save olsem “Bikpela em i save sori moa yet long yumi.”—Jems 5:11.
22. Jehova i laik bai ol lain bilong em i stap olsem wanem wantaim?
22 Em i gutpela samting tru olsem Jehova i laik pas gut wantaim ol man bilong graun i gat sin! Olsem na i stret yumi givim bel bilong yumi long ol arapela, a? Long rot bilong helpim Jehova i givim long yumi, yumi olgeta wan wan inap helpim na amamas long dispela pasin laikim i makim lain brata Kristen bilong yumi. Taim Kingdom Bilong God i bosim ol samting, olgeta man long graun bai kisim amamas long dispela pasin inap oltaim oltaim.
Yu Inap Stori Long Dispela?
• Wanem kain pasin i mas i stap insait long kongrigesen Kristen?
• Olsem wanem yumi olgeta wan wan i ken helpim pasin laikim insait long kongrigesen?
• Olsem wanem pasin bilong tok amamas long ol arapela i helpim pasin laikim Kristen?
• Olsem wanem pasin laikim bilong Jehova i sambai long yumi na strongim yumi?
[Piksa long pes 15]
Pasin laikim namel long ol Kristen i no olsem wanpela wok tasol ol i mas mekim
[Ol Piksa long pes 16, 17]
Yu inap mekim pasin laikim bilong yu i kamap bikpela “moa yet”?
[Piksa long pes 18]
Yu save painim painim ol popaia o yu save strongim ol arapela?