Wanpela “Tok Bokis” i Helpim Yumi

EM I hatwok long kisimgut insait bilong sampela tok bilong Baibel sapos sampela narapela tok bilong Baibel i no helpim yumi, a? Yumi ken bilipim ol tok bilong Baibel i stori long ol man na ol samting i bin kamap bipo. Tasol sampela bilong ol dispela stori i gat bikpela insait bilong en i no kamap ples klia wantu tasol. Wanpela stori olsem em stori bilong tupela meri long famili bilong Abraham. Aposel Pol i kolim dispela tok olsem “tok bokis.”​​—Galesia 4:​24.

Yumi mas kisim gut save long dispela tok bokis, long wanem, ol samting dispela tok bokis i makim em i bikpela samting long olgeta man i laik kisim blesing bilong God Jehova. Paslain long yumi skelim as bilong dispela samting, em i gutpela long yumi tingim as na Pol i kamapim insait bilong dispela tok bokis.

Ol Kristen bilong Galesia long taim bilong ol aposel i gat wanpela hevi i stap namel long ol. Sampela bilong ol i bin strong long “bihainim ol lo bilong ol bikpela de bilong lotu na bilong ol nupela mun na bilong bikpela lotu bilong nupela yia”​—em samting Lo Bilong Moses i tok ol i mas bihainim. Ol dispela man i tok ol bilipman i mas bihainim tok bilong Lo bambai God i ken orait long ol. (Galesia 4:10; 5:​2, 3) Tasol Pol i save, ol Kristen i no gat wok long tingim ol dispela bikpela de na mun samting. Bilong kamapim klia dispela samting em i kamapim wanpela stori ol manmeri bilong Juda i save gut long en.

Pol i bin tokim ol Galesia olsem Abraham, em papa bilong lain Juda, em i bin kamapim Ismael na Aisak. Ismael i kamap long rot bilong wokmeri Hagar, na Aisak i kamap long meri i stap fri, em Sara. Ol dispela man long Galesia em ol i bin kirapim ol narapela long bihainim Lo Bilong Moses, ol i save long stori bilong Sara olsem pastaim em i no karim pikinini na em i givim wokmeri bilong em, Hagar, long Abraham bilong kamapim wanpela pikinini bilong em. Ol i save olsem Hagar i bin karim Ismael na bihain em i bikhet long Sara. Tasol olsem God i bin tok promis, taim em i lapun pinis Sara i karim Aisak. Bihain, Abraham i salim Hagar na Ismael i go, long wanem, Ismael i mekim nogut long Aisak.​​—Stat 16:​1-4; 17:​15-17; 21:​1-14; Galesia 4:​22, 23.

Tupela Meri, Tupela Kontrak

Pol i kamapim ol samting bilong dispela “tok bokis.” Em i tok: “Dispela tupela meri i makim tupela kontrak. Hagar i makim kontrak bilong maunten Sainai, na ol pikinini bilong en i kamap wokboi nating. Hagar . . . i makim dispela Jerusalem nau i stap. Dispela Jerusalem i stap wokmeri nating wantaim ol pikinini bilong en.” (Galesia 4:​24, 25) Hagar i makim Israel tru, na Jerusalem i nambawan biktaun bilong en. Ol lain Juda i mas i stap aninit long Jehova long rot bilong kontrak bilong Lo i kamap long maunten Sainai. Aninit long kontrak bilong Lo, long olgeta taim lo i kirapim ol Israel long tingim olsem ol i wokman nating bilong sin na ol i mas i gat man bilong kisim bek ol.​​—Jeremaia 31:​31, 32; Rom 7:​14-24.

Dispela “meri i stap fri,” em Sara, na pikinini man bilong em, Aisak, ol i makim husat? Pol i tok, dispela “tarangu meri i no save karim pikinini,” i makim meri bilong God, em hap bilong oganaisesen bilong em long heven. Dispela meri long heven i no bin karim pikinini, long wanem, paslain long taim Jisas i kamap, meri hia i no gat ol “pikinini” long graun em spirit bilong God i bin makim. (Galesia 4:27; Aisaia 54:​1-6) Tasol long Pentikos 33 C.E., holi spirit i kam daun long wanpela lain man na meri na long dispela rot ol i kamap nupela gen olsem pikinini bilong dispela meri long heven. Ol pikinini i kamap long dispela oganaisesen ol i bin kamap pikinini bilong God na ol bai mekim wok king wantaim Jisas Krais aninit long nupela kontrak. (Rom 8:​15-17) Wanpela bilong ol dispela pikinini, aposel Pol, em i tok: “Jerusalem i stap long heven, em i stap fri. Em i mama bilong yumi.”​​—Galesia 4:26.

Ol Pikinini Bilong Ol Meri

Olsem Baibel i tok, Ismael i bin mekim nogut long Aisak. Olsem tasol, long taim bilong ol aposel, ol pikinini bilong Jerusalem i no stap fri, ol i tok bilas na mekim nogut long ol pikinini bilong Jerusalem i stap long heven. Pol i tok: “Dispela pikinini [Ismael] i bin kamap long rot ol manmeri i save kamapim pikinini long en, em i bin mekim nogut long dispela arapela pikinini [Aisak] i bin kamap long strong bilong Holi Spirit. Na nau tu wankain pasin tasol i stap.” (Galesia 4:29) Taim Jisas Krais i kamap long graun na i kirap autim tok bilong Kingdom, ol hetman bilong lotu Juda i mekim wankain pasin olsem Ismael, pikinini bilong Hagar, i bin mekim long pikinini tru bilong Abraham, em Aisak. Ol i tok bilas na mekim nogut long Jisas Krais; ating ol i ting ol yet i pikinini tru bilong Abraham na Jisas i olsem pikinini nating.

Paslain liklik long ol hetman bilong lain Israel tru i kilim i dai Jisas, em i tok: “Jerusalem, Jerusalem, yu save kilim ol profet i dai, na yu save kisim ol man God i salim i kam long yu na tromoi ston long ol bilong kilim ol i dai. Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik. Harim. Nau ples bilong yupela bai i bagarap na i stap nating.”​​—Matyu 23:​37, 38.

Tok bilong Baibel long ol samting i bin kamap long taim bilong ol aposel i kamapim olsem lain Israel bilong skin em Hagar i makim em i no bin kamapim ol pikinini em ol bai mekim wok king wantaim Jisas. Ol Juda i hambak na bilip olsem ol i gat rait long kisim dispela wok, long wanem, ol i pikinini bilong Abraham, tasol Jehova i sakim ol. Tru, sampela Israel bilong skin i wok king wantaim Krais. Tasol ol i kisim dispela wok, long wanem, ol i bilip long Jisas na i no long wanem ol i bilong lain Israel bilong skin, nogat.

Long Pentikos 33 C.E., ol samting i kamapim klia olsem husat bai mekim wok king wantaim Krais. Bihain Jehova i makim sampela narapela olsem pikinini bilong Jerusalem i stap long heven.

As na Pol i kamapim insait bilong dispela “tok bokis” em bilong soim olsem nupela kontrak i winim kontrak bilong Lo em Moses i namelman bilong en. Pasin bilong mekim ol wok bilong Lo Bilong Moses i no mekim na God bai orait long man, long wanem, olgeta manmeri i gat sin na Lo i kamapim ples klia olsem ol i kalabus long sin. Tasol olsem Pol i tok, Jisas i bin kam “bilong baim bek yumi ol manmeri i stap aninit long lo.” (Galesia 4:​4, 5) Olsem na bilip long ofa bilong Krais i helpim ol manmeri long kamap fri​—ol i no ken kisim bagarap olsem Lo i tok.​​—Galesia 5:​1-6.

Tok Bokis i Helpim Yumi

Bilong wanem yumi mas i gat laik long save long insait bilong dispela tok bokis em Pol i kamapim? Wanpela as i olsem: Long dispela rot yumi kisim insait bilong sampela tok bilong Baibel em yumi no inap save long en sapos yumi no kliagut long dispela tok bokis. Insait bilong dispela tok bokis i strongim bilip bilong yumi olsem olgeta tok bilong Baibel i stret wantaim.​​—1 Tesalonaika 2:13.

Na tu, ol samting dispela tok bokis i makim i bikpela samting bilong helpim yumi long i stap amamas long bihain. Sapos ol dispela pikinini i no kamap long Jerusalem i stap long heven, bai yumi kalabus long sin na indai, na i no gat rot bilong abrusim. Tasol aninit long gutpela wok bos bilong Krais na ol manmeri i insait long promis God i bin givim long Abraham, “olgeta lain bilong graun bai kisim blesing.” (Stat 22:​18, NW) Dispela bai kamap taim sin, ol pasin kranki, bel hevi, na indai, i no inap bagarapim ol moa. (Aisaia 25:​8, 9) Man! Dispela bai i gutpela taim tru, a?

[Piksa long pes 11]

Jehova i wokim kontrak bilong Lo long maunten Sainai

[Kredit Lain]

Pictorial Archive (Near Eastern History) Est.

[Piksa long pes 12]

Wanem insait bilong “tok bokis” aposel Pol i stori long en?