“Mi Laikim Tru Lo Bilong Yu”
“Mi laikim tru lo bilong yu. Mi save tingting long en long san na long nait.” —SONG 119:97.
1, 2. (a) Wanem samting i painim man bilong raitim Song 119? (b) Em i mekim wanem long dispela? Olsem wanem na em i mekim olsem?
BIKPELA hevi i painim man bilong raitim Song 119. Ol bikhetman i no bihainim lo bilong God, ol i mekim tok bilas nogut na planti tok giaman long em. Ol hetman i bung na wokim toktok bilong mekim nogut long em. Ol man nogut i raunim em, na ol i tok long kilim em i dai. Olgeta dispela samting i mekim na ‘bel bilong em i hevi tru.’ (Song 119:9, 23, 28, 51, 61, 69, 85, 87, 161) Tasol maski i gat dispela hevi, man bilong raitim song i tok: “Mi laikim tru lo bilong yu. Mi save tingting long en long san na long nait.”—Song 119:97.
2 I gutpela yu askim yu yet, “Olsem wanem lo bilong God inap mekim gut bel bilong man bilong raitim song?” Em i bilip strong olsem Jehova i tingim em na dispela i strongim em. Man bilong raitim song i save sapos em i bihainim ol lo bilong God dispela bai helpim em na i mekim em i amamas, maski ol birua i givim planti hevi long em. Em i luksave olsem Jehova i bin mekim gut long em. Na pasin bilong larim ol lo bilong God i stiaim em i mekim na save bilong man bilong raitim song i winim tru save bilong ol birua bilong em na i helpim em long abrusim bagarap. Pasin bilong bihainim dispela lo i mekim na em i stap bel isi na bel bilong em i no gat tok.—Song 119:1, 9, 65, 93, 98, 165.
3. Bilong wanem i hatwok long ol Kristen long bihainim ol lo bilong God long nau?
3 Long nau tu, ol bikpela hevi i save traim bilip bilong sampela long lain bilong God. Ating i no gat wanpela i laik kilim yumi i dai olsem ol i laik kilim i dai man bilong raitim song, tasol yumi stap long taim bilong “planti hevi nogut tru.” Planti manmeri yumi stap namel long ol, ol i no save tingim wanem samting i gutpela o i nogut long ai bilong God—ol i tingim ol yet tasol na ol i laikim planti mani kago, na ol i gat pasin antap na i bikhet long God. (2 Timoti 3:1-5) Long olgeta taim ol samting i laik traim stretpela pasin bilong ol yangpela Kristen. Long kain taim olsem i hatwok long holimpas pasin bilong laikim tru Jehova na stretpela pasin. Olsem wanem yumi inap lukautim yumi yet?
4. Olsem wanem man bilong raitim song i soim olsem em i laikim tru lo bilong God? Olsem wanem? Ol Kristen i mas mekim wankain pasin?
4 Samting i bin helpim man bilong raitim song long sanap strong long taim ol hevi i painim em, em i lusim haptaim bilong stadi gut na tingim tingim long bel ol lo bilong God. Dispela i mekim na em i kirap laikim tru ol lo bilong God. Klostu olgeta ves long Song 119 i stori long lo na tok bilong Jehova.a Ol Kristen long nau i no stap aninit long Lo Bilong Moses, em God i givim long lain Israel bilong bipo. (Kolosi 2:14) Tasol ol stiatok i stap long dispela Lo ol i gutpela long nau tu. Ol dispela stiatok i bin mekim gut bel bilong man bilong raitim song, na ol inap mekim gut bel bilong ol wokman bilong God em ol i mas karim ol hevi bilong nau.
5. Bai yumi skelim wanem samting long Lo Bilong Moses?
5 Orait nau yumi ken skelim 3-pela samting long Lo Bilong Moses em inap strongim yumi: lo bilong Sabat, pasin bilong lusim hap kaikai i stap long gaden, na lo olsem no ken mangal. Long dispela 3-pela samting, bai yumi luksave olsem sapos yumi kliagut long ol stiatok i stap long ol dispela lo, dispela bai helpim yumi long karim ol hevi bilong dispela taim nau.
Larim God i Stiaim Yumi
6. Olgeta man i mas kisim wanem samting?
6 God i wokim ol man na ol i mas kisim kain kain samting. Kaikai, dring, na haus, ol i bikpela samting na bai man i ken i stap gut long ol samting bilong skin. Tasol man i mas kisim tu “save long God.” Em i no inap i stap amamas tru sapos em i no mekim olsem. (Matyu 5:3, NW) Jehova i ting pasin bilong kisim dispela save em i bikpela samting, olsem na em i givim wanpela lo long lain bilong em olsem inap wanpela de olgeta long olgeta wan wan wik ol i mas lusim wok skin bilong ol na tingim ol samting bilong lotu.
7, 8. (a) Olsem wanem God i soim olsem de Sabat i narapela kain long ol narapela de? (b) De Sabat i gat wanem wok?
7 Lo bilong Sabat i kamapim klia olsem em i bikpela samting long lusim haptaim bilong mekim ol wok bilong pas gut moa wantaim God. Namba wan taim Baibel i toktok long “sabat” em long taim Baibel i stori long God i givim mana long ples drai nating. God i tokim ol Israel long ol i mas kisim dispela kaikai inap 6-pela de. Long de namba 6 ol i mas kisim “kaikai inap long tupela de,” long wanem, long de namba 7 bai i no gat kaikai. De namba 7 bai stap olsem “de Sabat, na em i de bilong Bikpela yet,” na olgeta wan wan i mas i stap long haus bilong ol. (Kisim Bek 16:13-30) Wanpela bilong ol Tenpela Lo i tokaut olsem ol i no ken mekim tru wanpela wok long Sabat. Dispela de i holi. Sapos man i no bihainim dispela lo em i mas i dai.—Kisim Bek 20:8-11; Namba 15:32-36.
8 Lo bilong Sabat i kamapim klia olsem Jehova i save tingim lain bilong em long ol samting bilong skin na long ol samting bilong spirit. Jisas i tok: “God i . . . putim de Sabat bilong helpim ol manmeri.” (Mak 2:27) Sabat i opim rot long ol Israel i ken malolo, na tu, ol i ken go klostu long Man Bilong Wokim ol na soim olsem ol i laikim tru em. (Lo 5:12) Em wanpela de ol i dediketim olgeta bilong mekim ol wok bilong spirit. Sampela wok olsem em ol famili i tingim ol samting bilong lotu, beten, na tingim tingim long bel Lo Bilong God. Dispela lo i helpim ol Israel na ol i no ken yusim olgeta taim na strong bilong ol long tingim ol samting bilong skin. De Sabat i helpim ol long tingim olsem pasin bilong pas gut wantaim Jehova em i nambawan bikpela samting long i stap bilong ol. Jisas i kamapim gen dispela stiatok i no save senis taim em i tok: “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’ ”—Matyu 4:4.
9. Lo bilong Sabat i skulim ol Kristen long wanem samting?
9 Lain bilong God i no gat moa wok long bihainim de Sabat i gat 24 aua long en, tasol lo bilong Sabat inap skulim yumi long sampela samting. (Kolosi 2:16) Em i helpim yumi long tingim olsem yumi tu i mas putim ol wok bilong spirit olsem nambawan bikpela samting. Ol wok bilong skin o amamas i no ken karamapim ol wok bilong lotu. (Hibru 4:9, 10) Olsem na yumi ken askim yumi yet: “Wanem samting i olsem nambawan samting long i stap bilong mi? Mi save putim stadi, beten, pasin bilong go long ol miting Kristen, na wok bilong autim gutnius bilong Kingdom olsem nambawan samting long i stap bilong mi? O sampela narapela samting i save kisim ples bilong ol dispela samting?” Sapos yumi putim ol samting bilong spirit i nambawan long i stap bilong yumi, Jehova i tok promis long yumi i no inap sot long wanpela samting.—Matyu 6:24-33.
10. Olsem wanem yumi ken kisim gutpela samting sapos yumi lusim haptaim long mekim ol wok bilong spirit?
10 Haptaim yumi lusim bilong stadi long Baibel na ol buk na nius bilong Baibel, na pasin bilong tingim tingim long bel ol samting ol buk i stori long en, dispela inap helpim yumi long i go klostu moa long Jehova. (Jems 4:8) Inap 40 yia i go pinis Susan i kirap lusim haptaim bilong stadi oltaim long Baibel na em i tok, pastaim em i no amamas long en, em i hatwok. Tasol pasin bilong stadi planti taim i mekim na em i amamas moa long en. Nau, sapos wanpela samting i kamap na em i no inap stadi, em i bel hevi. Em i tok: “Stadi i helpim mi long go klostu moa long Jehova na tingim em olsem wanpela Papa. Mi inap bilip tru long em, na amamas long beten long em. Em i gutpela samting tru long lukim olsem Jehova i save laikim tru ol wokman bilong em, na em i save tingim mi, na em i bin helpim mi.” Yumi ken kisim bikpela amamas sapos long olgeta taim yumi tingim ol samting bilong spirit!
Lo Bilong God Long Larim Hap Kaikai i Stap
11. Pasin bilong larim hap kaikai i stap em i wok olsem wanem?
11 Namba tu samting long Lo Bilong Moses i kamapim olsem God i save tingim tru lain bilong em, em lo bilong larim hap kaikai i stap long gaden. Jehova i tok taim wanpela fama long Israel i kisim kaikai long gaden, em i mas larim ol man i sot long ol i ken kisim hap kaikai ol wokman i bin lusim long gaden. Ol fama i no ken kisim kaikai i stap long arere bilong gaden, na ol i no ken kisim olgeta pikinini bilong diwai wain o diwai oliv. Taim ol i katim kaikai na abrusim sampela ol i no ken go bek na kisim. Dispela i wanpela gutpela samting bilong helpim ol rabisman, ol manmeri bilong ol arapela lain, ol pikinini papa bilong ol i dai pinis, na ol meri, em man bilong ol i dai pinis. Tru, bilong kisim hap kaikai ol dispela lain i mas hatwok, tasol long dispela rot ol i ken abrusim pasin bilong singaut long narapela i helpim ol.—Wok Pris 19:9, 10; Lo 24:19-22; Song 37:25.
12. Pasin bilong larim hap kaikai i stap long gaden i opim rot long ol fama i ken mekim wanem?
12 Lo bilong larim hap kaikai i stap long gaden i no tokaut long hamas kaikai fama i mas lusim long gaden na bai ol man i sot i ken kisim. Ol yet i ken makim olsem ol i lusim bikpela o liklik kaikai long arere bilong gaden. Long dispela rot ol Israel i ken lainim pasin bilong amamas long givim ol samting long narapela. Em i opim rot long ol fama long kamapim olsem ol i tenkyu long Man Bilong Givim kaikai bilong gaden, long wanem, “pasin bilong mekim gut long ol rabisman, em i pasin bilong givim biknem long God.” (Sindaun 14:31) Boas em wanpela man i bin mekim olsem. Em i stretim rot bambai Rut, em wanpela meri wanpis i save kisim kaikai long gaden bilong em, em i ken kisim planti kaikai. Jehova i blesim tru Boas long gutpela pasin bilong em.—Rut 2:15, 16; 4:21, 22; Sindaun 19:17.
13. Lo bilong bipo long larim hap kaikai i stap long gaden i skulim yumi long wanem samting?
13 Stiatok i stap long lo bilong larim hap kaikai i stap long gaden i no senis. Jehova i laik ol wokman bilong em i gat pasin bilong givim planti samting long ol narapela, na moa yet long ol man i sot. Sapos yumi givim planti samting, bai yumi kisim planti gutpela samting. Jisas i tok: “Yupela i mas givim ol samting long ol arapela, na bai God i givim ol samting long yupela. Em bai i skelim gutpela moa long yupela, na em bai i pulapim tru, na sakim i go daun, na pulapim moa yet, inap long ol samting i kapsait, na givim long yupela. Skel yupela i save givim long ol arapela man, long dispela skel tasol God bai i bekim long yupela.”—Luk 6:38.
14, 15. Olsem wanem yumi ken soim olsem yumi amamas long givim ol samting? Dispela pasin i mekim wanem gutpela samting long yumi yet na long ol man yumi helpim?
14 Aposel Pol i kirapim yumi long “mekim gutpela pasin long ol arapela . . . Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:10) Olsem na yumi mas tingim tru olsem ol wanwok Kristen i mas kisim helpim long ol samting bilong spirit taim ol hevi i traim bilip bilong ol. Tasol olsem wanem? Ol i mas kisim tu sampela helpim long ol samting bilong skin, olsem yumi helpim ol long kam long Haus Kingdom o yumi go long stua bilong baim kaikai bilong ol? Olsem wanem? Long kongrigesen bilong yupela i gat sampela lapun, sik, o bratasista i no ken lusim haus na ol bai amamas long yupela i go lukim ol bilong strongim ol o helpim ol long mekim sampela wok? Sapos yumi wok strong long tingim ol bratasista bilong yumi long kain samting olsem, Jehova inap mekim wok long yumi bilong bekim beten bilong ol man i sot long ol samting. Tru, pasin bilong helpim ol narapela em wanpela wok Kristen, tasol em i helpim tu man i mekim dispela wok. Pasin bilong laikim tru wanlotu inap givim bikpela amamas long yumi na bel bilong yumi bai gutpela tru na Jehova bai orait long yumi.—Sindaun 15:29.
15 Narapela bikpela samting ol Kristen i ken mekim bilong soim olsem ol i no tingim ol yet tasol em ol i ken yusim taim na strong bilong ol long tokaut long laik bilong God. (Matyu 28:19, 20) Olgeta manmeri em ol i bin helpim pinis wanpela man long dediketim laip bilong em long Jehova ol i save olsem tok bilong Jisas i tru, em i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.”—Aposel 20:35.
Lukaut Long Pasin Mangal
16, 17. Namba 10 lo i tambuim wanem pasin? Bilong wanem lo i tambuim dispela pasin?
16 Namba 3 samting long Lo Bilong God long ol Israel em yumi bai skelim em namba 10 lo, em lo i tambuim pasin mangal. Lo i tok: “Yupela i no ken mangalim haus bilong narapela man. Na yupela i no ken aigris long meri bilong narapela man. Na yupela i no ken mangalim wokboi o wokmeri bilong en o bulmakau o donki o olgeta arapela samting bilong en tu.” (Kisim Bek 20:17) I no gat man inap skelim olsem narapela i bihainim dispela lo o nogat, long wanem, i no gat man inap save long samting i stap long bel bilong narapela man. Tasol dispela lo i mekim na Lo Bilong Moses i winim ol lo bilong ol man. Em i mekim na olgeta Israel i save olsem Jehova yet bai skelim ol, em Man inap save long ol samting i stap long bel bilong ol. (1 Samuel 16:7) Na tu, dispela lo i kamapim as bilong planti pasin nogut.—Jems 1:14.
17 Lo i tambuim pasin mangal i strongim lain bilong God long abrusim pasin bilong laikim tumas mani kago, na komplein long sindaun bilong ol. Na em i lukautim ol long ol i no ken stil o mekim pasin pamuk. Long olgeta taim bai i gat sampela man ol i gat ol samting bilong skin yumi save laikim o ol i winim yumi long sampela samting. Sapos long kain samting olsem yumi no bosim gut tingting bilong yumi, bai yumi bel hevi na jeles long ol narapela. Baibel i tok pasin bilong mangal i kamapim olsem man i “bihainim tingting nogut bilong [em] yet.” I gutpela moa long yumi no gat dispela pasin.—Rom 1:28-30.
18. Wanem tingting i stap long nau? Em inap kamapim wanem samting nogut?
18 Tingting bilong dispela taim long nau i kirapim ol man long laikim tumas mani kago na resis wantaim ol narapela. Long rot bilong ol toksave ol bisnis i save kirapim laik bilong ol man long kisim ol nupela samting na planti taim ol i kirapim yumi long ting olsem sapos yumi no kisim ol dispela samting bai yumi no inap i stap amamas. Lo Bilong Jehova i no orait liklik long dispela kain tingting. Na narapela tingting olsem, em laik bilong ol man long kisim bikpela namba na planti mani, maski wanem hevi i kamap long dispela. Aposel Pol i givim tok lukaut olsem: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta. Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.”—1 Timoti 6:9, 10.
19, 20. (a) Wanem ol samting i bikpela samting tru long man i laikim tru lo bilong Jehova? (b) Long stadi i kamap bihain long dispela bai yumi stori long wanem samting?
19 Ol man i laikim tru ol lo bilong God i luksave olsem pasin bilong laikim tumas mani kago inap givim hevi long ol, na dispela i lukautim ol. Man bilong raitim song i beten long Jehova olsem: “Kirapim bel bilong mi bai mi gat laik long bihainim tok bilong yu. Nogut bel bilong mi i kirap long mangalim olgeta samting. Mi no save laikim mani olsem mi laikim lo bilong yu.” (Song 119:36, 72) Sapos yumi bilip strong olsem dispela tok i tru, em bai helpim yumi long bihainim stretpela tingting na yumi abrusim pasin bilong laikim tumas mani kago, na bel hevi long sindaun bilong yumi. Sapos yumi “bihainim pasin bilong God” na i no pasin bilong kisim planti mani kago, bai yumi kisim ol samting i gutpela samting tru.—1 Timoti 6:6.
20 Ol stiatok bilong Lo em Jehova i bin givim long lain Israel bilong bipo ol i gutpela samting long taim nogut bilong yumi long nau, olsem ol i bin gutpela samting long taim Jehova i bin givim dispela Lo long Moses. Sapos yumi bihainim tru ol dispela stiatok, bai yumi kliagut tru long ol, na bai yumi laikim tru ol, na ol bai mekim yumi i amamas tru. Lo i skulim yumi long planti gutpela samting, na dispela i kamap ples klia long laip bilong ol man na meri em Baibel i stori long ol. Long stadi i kamap bihain long dispela bai yumi stori long sampela man na meri olsem.
[Futnot]
a Long tok ples Hibru, long ol 176 ves bilong dispela song, inap 4-pela ves tasol i no toktok long ol lo na tok bilong Jehova.
Bai Yu Bekim Olsem Wanem?
• Bilong wanem man bilong raitim Song 119 i laikim tru lo bilong Jehova?
• Lo bilong Sabat i skulim ol Kristen long wanem samting?
• Lo bilong larim hap kaikai i stap inap skulim yumi long wanem samting bilong helpim yumi long olgeta taim bihain?
• Olsem wanem lo bilong abrusim pasin mangal i lukautim yumi?
[Piksa long pes 21]
Lo bilong Sabat i kamapim klia wanem bikpela samting?
[Piksa long pes 23]
Lo bilong larim hap kaikai i stap i skulim yumi long wanem samting?