Ol Hevi Bilong Ol Man—Klostu Nau Bai Pinis!
“OL WOK ol man i mekim bilong helpim ol narapela bai i helpim ol man liklik tasol sapos dispela wok i no insait long sampela narapela bikpela wok na wok politik bilong traim stretim as bilong ol pait. Ol samting i kamap pinis i kamapim long ples klia olsem planti taim ol wok bilong helpim ol man i no inap stretim ol hevi em wok politik i as bilong en.”—Buk The State of the World’s Refugees 2000.
Maski ol man i mekim bikpela wok bilong helpim ol man, ol hevi bilong ol man i wok long i go bikpela. Yu ting i gat rot bilong stretim tru ol hevi long rot bilong wok politik? Ating nogat, a? Tasol i gat wanem narapela rot bilong stretim ol hevi? Long sapta wan long pas aposel Pol i raitim long ol Kristen long Efesus, em i tokaut long wanem rot God bai pinisim ol hevi bilong ol man. Em i kamapim tu dispela lain God bai mekim wok long en bilong mekim olsem—dispela lain bai stretim as bilong ol hevi i wok long bagarapim yumi long nau. Gutpela sapos yumi skelim tok bilong Pol, a? Tok bilong em i stap long Efesus 1:3-10.
“Bungim Olgeta Samting Long Krais”
Aposel Pol i tok, dispela samting God i laik mekim em olsem: “Em i laik stiaim olgeta samting i go i go, na long dispela taim em i makim pinis, em bai i bungim olgeta samting long Krais.” Wanem insait bilong dispela tok? Insait bilong en i olsem God i makim pinis taim bilong em long “bungim olgeta samting long Krais, ol samting bilong heven na bilong graun tu.” (Efesus 1:10) Em nau, God i kirapim pinis wanpela wok bilong mekim olgeta samting long heven na long graun i ken i stap wanbel gen aninit long wok bos bilong em. Long dispela tok “bungim olgeta samting,” wanpela saveman bilong Baibel, J. H. Thayer, i tok: “Bungim olgeta samting long em yet . . . olgeta samting na olgeta man (em sin i mekim na ol i no i stap wanbel i kam inap long nau) na ol i kamap wanpela lain tasol wantaim Krais.”
Dispela i makim olsem God i gat wok long mekim dispela samting, na dispela i stret taim yumi tingting long olsem wanem pasin bilong brukim lain i bin kamap long pastaim tru. Long bipo yet, tupela tumbuna bilong yumi bilong pastaim tru, Adam na Iv, ol i bihainim Satan long mekim pasin bikhet long God. Ol i laik bosim wokabaut bilong ol yet, olsem ol yet i laik makim wanem samting i gutpela na wanem samting i nogut. (Stat 3:1-5) God i bihainim stretpela lo bilong em na rausim tupela long famili bilong em na ol i no pas gut moa wantaim em. Rong bilong tupela i putim sin long olgeta man na i kamapim ol bikpela hevi tru i save painim yumi long nau.—Rom 5:12.
Larim Pasin Nogut i Stap Inap Sotpela Taim
Ating sampela man i gat askim olsem: ‘Bilong wanem God i larim ol man i mekim olsem?’ ‘Bilong wanem em i no mekim wok long bikpela strong bilong em na kamapim laik bilong em, na long dispela rot bai i no gat ol dispela pen na hevi i save painim yumi long nau?’ Ating em pasin bilong yumi ol man long ting olsem. Tasol sapos God i mekim wok long bikpela strong bilong em olsem, dispela bai kamapim wanem samting? Olsem wanem? Yu amamas o yu orait long wanpela man i gat bikpela strong em i bagarapim tasol ol man taim em i lukim olsem ol i laik bikhet? Ating nogat, a?
Ol dispela bikhetman i no bin sutim tok long bikpela strong bilong God, nogat. Ol i sutim tok long God olsem i no stret em i stap bos na em i no bihainim stretpela pasin long bosim ol man. Bilong stretim dispela bikpela tok i go inap oltaim oltaim, Jehova i givim hap taim long ol man long bosim ol yet—God yet i no bosim ol. (Saveman 3:1; Luk 21:24) Taim dispela hap taim i pinis, em bai pinisim wok bilong ol man long bosim ol yet na em bai kirap gen na bosim dispela graun. Long dispela taim ol samting bai kamap ples klia olsem pasin bilong em long mekim wok bos, dispela pasin tasol inap kamapim bel isi, na amamas, na gutpela sindaun long olgeta man bilong graun. Orait long dispela taim olgeta hatpela bos bilong dispela graun bai pinis olgeta.—Song 72:12-14; Daniel 2:44.
“Taim God i No Mekim Graun i Kamap Yet”
Inap longtaim pinis Jehova i tingting long mekim ol dispela samting. Pol i tok: “Taim God i no mekim graun i kamap yet.” (Efesus 1:4) Dispela i no makim olsem paslain long em i wokim dispela graun o paslain long em i wokim Adam na Iv. Long dispela taim bipo, graun i “gutpela,” na pasin bikhet i no kamap yet. (Stat 1:31) Orait, aposel Pol i toktok long wanem “graun?” Dispela i makim ol pikinini bilong Adam na Iv—em ol man bilong graun i gat sin na i no gutpela olgeta na God inap kisim bek ol. Taim wanpela pikinini i no kamap yet, Jehova i save pinis long samting em bai mekim bilong helpim ol tumbuna pikinini bilong Adam em ofa bilong Krais inap baim bek ol.—Rom 8:20.
Dispela i no makim olsem King bilong heven na graun em i mas mekim ol samting olsem ol man i save mekim. Ol man i save sampela hevi inap kamap, olsem na ol i redim kain kain samting bilong stretim dispela hevi. God i gat olgeta strong i no gat wok long mekim olsem, em i tokaut long laik bilong em na em i kamapim tru. Tasol Pol i stori long olsem wanem Jehova i laik stretim ol samting bilong helpim tru ol manmeri. Em i laik mekim wanem?
Husat Bai Helpim Ol Man?
Pol i tok ol disaipel bilong Krais em God i bin makim long spirit holi ol bai mekim bikpela wok bilong pinisim ol hevi em sin bilong Adam i bin kamapim. Pol i tok, Jehova i “makim yumi pinis long pas wantaim Krais,” bilong mekim wok king wantaim Jisas long Kingdom bilong em long heven. Pol i tok moa long dispela olsem Jehova “i makim yumi bilong kamap pikinini bilong em yet long wok Jisas Krais bai i mekim bilong kisim bek yumi.” (Efesus 1:4, 5) Jehova i no makim olgeta wan wan insait long dispela lain taim ol i no kamap yet. Tasol taim ol i no kamap yet em i makim wanpela lain i givim bel tru long stap gut long God, em ol bai wok wantaim Krais long pinisim ol samting nogut em Satan, na Adam na Iv, i bin kamapim long ol man.—Luk 12:32; Hibru 2:14-18.
Man! Dispela em i narapela kain samting tru! Long nambawan tok Satan i sutim long wok bilong Jehova long bosim ol man, i olsem em i tokaut olsem ol manmeri God i bin wokim i no gutpela olgeta—olsem sapos ol i gat planti hevi o ol samting bilong pulim ol, ol bai bikhet long wok bos bilong God. (Jop 1:7-12; 2:2-5) Long gutpela pasin tru Jehova i kamapim olsem em i “marimari moa yet” long ol man, na bihain em i soim olsem em i bilip tru long ol manmeri em i bin wokim taim em i kisim sampela long lain bilong Adam i gat sin na ol i kamap pikinini spirit bilong em. God bai kisim ol manmeri bilong dispela liklik lain bilong mekim wok long heven. Ol bai mekim wanem wok?—Efesus 1:3-6; Jon 14:2, 3; 1 Tesalonaika 4:15-17; 1 Pita 1:3, 4.
Aposel Pol i tok, ol dispela manmeri God i bin kisim olsem pikinini bilong em, ol bai stap king wantaim Krais long Kingdom bilong em long heven. (Rom 8:14-17) Ol bai wok olsem king na pris na helpim ol man long kamap fri long ol pen na hevi ol i kisim long nau. (KTH 5:10) Tru, “olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.” Tasol i no longtaim na ol dispela pikinini God i bin makim ol bai bihainim Jisas Krais long mekim wok, na olgeta man i bihainim tok bilong God ol bai lusim ‘dispela kalabus bilong bagarap nau olgeta samting i stap long en, na bai olgeta i stap gutpela tru olsem ol pikinini bilong God.’—Rom 8:18-22.
“Krais i Dai Pinis Bilong Baim Bek Yumi”
Ol dispela samting inap kamap long rot bilong narakain bikpela pasin marimari God i mekim long ol manmeri bilong graun—em long ofa bilong Jisas Krais bilong baim bek ol man. Pol i tok: “Marimari bilong God em i pulap tru. Krais i dai pinis bilong baim bek yumi, na long blut bilong en, God i lusim olgeta sin bilong yumi.”—Efesus 1:7.
Jisas Krais em i nambawan man God i mekim wok long em bilong kamapim laik bilong Em. (Hibru 2:10) Ofa bilong em i mekim na i gat as long lo na Jehova i ken kisim sampela tumbuna pikinini bilong Adam i kam long famili bilong Em long heven bilong helpim ol man long kamap fri long ol samting nogut em sin bilong Adam i kamapim, na dispela i no bagarapim bilip bilong ol man long ol lo na stiatok bilong Em. (Matyu 20:28; 1 Timoti 2:6) Jehova i bin mekim ol samting long wanpela rot i holimpas stretpela pasin bilong em na em inapim mak bilong pasin i stret olgeta.—Rom 3:22-26.
‘Tingting Hait’ Bilong God
Inap planti tausen yia, God i no bin kamapim klia long wanem rot stret em bai kamapim laik bilong em long graun. Long taim bilong ol aposel, em i kamapim “dispela tingting bilong en i bin i stap hait” long ol Kristen. (Efesus 1:9) Pol na ol wanlain Kristen em God i bin makim ol long spirit holi ol i bin save gut long nambawan gutpela wok God i givim long Jisas Krais bilong kamapim laik bilong God. Na tu, ol i wok long save long dispela narapela kain wok bilong ol olsem ol bai wok king wantaim Krais long Kingdom bilong em long heven. (Efesus 3:5, 6, 8-11) Tru tumas, dispela Kingdom, o gavman, long han bilong Jisas Krais na ol manmeri ol bai wok king wantaim em, dispela em i rot God i bin makim bilong kamapim bel isi i stap oltaim long heven na long graun. (Matyu 6:9, 10) Long rot bilong en, Jehova bai kamapim bek ol gutpela samting long graun em i gat laik long en long pastaim tru.—Aisaia 45:18; 65:21-23; Aposel 3:21.
Taim em i makim bilong pinisim ol pasin nogut bilong graun olsem pasin bilong daunim ol man na ol pasin i no stret, klostu nau dispela taim bai kamap. Tasol tru tru Jehova i bin kirap mekim dispela wok bilong stretim bek ol samting long Pentikos 33 C.E. Em i mekim olsem wanem? Long dispela taim em i kirap bungim “ol samting bilong heven,” em ol man bai mekim wok king wantaim Krais long heven. Ol Kristen bilong Efesus i insait long dispela lain. (Efesus 2:4-7) I no longtaim i go pinis, nau long taim bilong yumi, Jehova i wok long bungim ‘ol samting bilong graun.’ (Efesus 1:10) Long rot bilong wok autim tok i kamap long olgeta hap bilong graun, em i toksave long olgeta lain long gutnius bilong Kingdom, o gavman, bilong em long han bilong Jisas Krais. Long nau tu, Jehova i bungim ol man i laikim dispela tok long wanpela ples bilong lukautim ol long ol samting bilong spirit na bilong helpim ol. (Jon 10:16) Klostu nau, long wanpela klinpela ples paradais, ol bai kamap fri olgeta long ol pasin i no stret na ol pen na hevi.—2 Pita 3:13; KTH 11:18.
Sampela lain i bin mekim “bikpela wok tru” bilong helpim ol man em ol narapela i daunim ol. (Buk The State of the World’s Children 2000) Tasol klostu nau bikpela samting moa bai kamap taim Krais Jisas na ol manmeri i mekim wok king wantaim em long Kingdom bilong heven ol bai kirap mekim wok. Ol bai stretim tru as bilong ol pait na olgeta narapela samting nogut i wok long painim yumi. Ol bai pinisim olgeta hevi bilong ol man.—KTH 21:1-4.
[Ol Piksa long pes 4]
Ol wok bilong sampela lain long helpim ol man i no bin stretim olgeta hevi bilong graun
[Piksa long pes 6]
Ofa bilong Krais bai pinisim ol hevi bilong sin yumi bin kisim long Adam
[Piksa long pes 7]
Long nau yumi inap kisim ol samting bilong lukautim na helpim yumi long ol samting bilong spirit
[Ol Piksa long pes 7]
Klostu nau, long rot bilong Kingdom i stap long han bilong Mesaia, ol hevi bai pinis olgeta