Ol Famili Kristen—Bihainim Pasin Bilong Jisas!
“Krais . . . i soim yupela pinis dispela pasin bilong em, bai yupela i ken bihainim.”—1 PI. 2:21.
1. (a) Wanem wok bilong Pikinini Bilong God taim God i wokim ol samting? (b) Jisas i gat wanem tingting long ol manmeri?
TAIM God i wokim heven na graun, namba wan Pikinini bilong em i stap wantaim em olsem “saveman i bosim wok.” Na tu, Pikinini Bilong God i wok gut wantaim Papa bilong em taim Jehova i wokim ol kain kain animal na diwai samting hia long graun na redim Paradais bilong ol manmeri i ken stap long en. Pikinini Bilong God, em bihain em i kisim nem Jisas, em i laikim tru ol manmeri.—Snd. 8:27-31; Stt. 1:26, 27.
2. (a) Jehova i bin givim wanem ol samting bilong helpim ol man i gat sin? (b) Wanem wanpela samting long i stap bilong man we Baibel i givim ol stiatok long en?
2 Taim namba wan man na meri i mekim sin, wok bilong baim bek ol sinman i kamap wanpela bikpela samting insait long samting Jehova i tingting pinis long mekim. Jehova i givim Krais olsem ofa bilong baim bek ol man. (Ro. 5:8) Na tu, Jehova i givim Baibel, em Tok bilong em, bilong soim rot long ol man na bai ol i ken stap gut, maski ol i gat sin. (Sng. 119:105) Long Baibel, Jehova i givim ol stiatok bilong helpim ol famili long pas gut wantaim na stap amamas. Long sait bilong marit, Buk Stat i tok man i mas “pas wantaim meri bilong en, na tupela i [mas] kamap wanpela bodi tasol.”—Stt. 2:24.
3. (a) Jisas i mekim wanem tok long marit? (b) Bai yumi stori long wanem samting long dispela stadi?
3 Taim Jisas i mekim wok bilong em long graun, em i kamapim klia olsem taim man na meri i marit, marit bilong ol i bilong i stap oltaim. Em i kolim ol stiatok em taim ol wan wan long famili i bihainim, dispela bai helpim ol long sakim ol tingting na pasin em inap bagarapim marit na amamas insait long famili. (Mt. 5:27-37; 7:12) Dispela stadi bai stori long olsem wanem ol tok na pasin Jisas i mekim taim em i stap long graun inap helpim ol maritman, ol maritmeri, ol papamama, na ol pikinini long stap amamas na belgut.
Pasin Em Man Kristen i Bihainim Long Givim Ona Long Meri Bilong Em
4. Wanem samting long wok bilong Jisas na ol maritman Kristen i wankain?
4 God i makim man long stap het bilong famili, olsem Jisas i stap Het bilong kongrigesen. Aposel Pol i tok: “Man em i het bilong meri bilong en, olsem Krais em i het bilong sios. Sios em i bodi bilong Krais, na Krais i bin kisim bek em. Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios.” (Ef. 5:23, 25) Pasin Jisas i mekim long ol disaipel bilong em i stap gutpela piksa bilong pasin em man Kristen i mas mekim long meri bilong em. Orait nau yumi ken skelim sampela pasin Jisas i bihainim taim em i mekim wok long namba God i bin givim long em.
5. Jisas i het bilong ol disaipel bilong em na em i mekim dispela wok long wanem kain pasin?
5 Jisas i “save mekim pasin isi long ol man na [em i] save daunim [em] yet.” (Mt. 11:29) Na tu, em i man bilong wok. Em i no surik long mekim ol wok bilong em. (Mk. 6:34; Jo. 2:14-17) Taim em i givim skultok long ol disaipel bilong em, em i mekim long gutpela pasin na em i no les long mekim gen na gen taim i gat wok long mekim olsem. (Mt. 20:21-28; Mk. 9:33-37; Lu. 22:24-27) Tasol Jisas i no tok kros long ol o semim ol, na em i no mekim ol i pilim olsem em i no laikim ol o ol i no inap mekim ol wok em i skulim ol long mekim, nogat. Em i save givim gutpela tok amamas long ol na strongim bel bilong ol. (Lu. 10:17-21) Em i save mekim pasin laikim na pasin sori long ol, olsem na ol i rispek long em!
6. (a) Ol maritman inap lainim wanem samting long pasin Jisas i mekim long ol disaipel? (b) Pita i givim wanem gutpela tok long ol maritman?
6 Pasin bilong Jisas i lainim ol maritman olsem ol i no ken bosim meri bilong ol long hatpela pasin. Ol i mas mekim long pasin i soim rispek na long pasin laikim na redi long daunim sampela laik bilong ol yet. Aposel Pita i strongim ol maritman long bihainim pasin bilong Jisas na “mekim gutpela pasin” long ol meri bilong ol, olsem givim ona long ol. (Ritim 1 Pita 3:7.) Orait olsem wanem maritman inap stap het bilong meri na long wankain taim givim ona long em?
7. Maritman i ken mekim wanem bilong givim ona long meri bilong em? Stori long dispela.
7 Wanpela samting maritman i ken mekim bilong givim ona long meri, em long rot bilong harim na pilim laik na tingting bilong meri paslain long em i wokim disisen long ol samting bilong famili. Sapos em i tingting long kisim famili i go sindaun long narapela hap, o senisim wok mani bilong em, o kisim famili i go limlimbur long wanpela hap, o stretim baset bilong famili na bai ol i no tromoi bikpela mani tumas, orait gutpela sapos em i harim tingting bilong meri bilong em na bai em i ken wokim gutpela disisen. Long dispela rot meri bai i no hatwok long sapotim em. (Snd. 15:22) Taim ol maritman Kristen i givim ona long meri bilong ol, meri bai laikim na rispek long ol, na bikpela samting moa, Jehova yet bai orait long ol.—Ef. 5:28, 29.
Pasin Em Maritmeri i Bihainim Bilong Soim Rispek Long Man Bilong Em
8. I gat wanem as na yumi no ken bihainim pasin bilong Iv?
8 Long pasin bilong stap daun long wok bos, Jisas i stap gutpela piksa ol maritmeri Kristen i ken bihainim. Tingting bilong Jisas long wok bos em i narapela kain tru long tingting bilong namba wan meri marit. Iv i no stap gutpela piksa bilong ol maritmeri i ken bihainim. God i makim man bilong Iv, em Adam, olsem het bilong Iv, na long rot bilong Adam, Jehova i tokim Iv long ol samting em i mas mekim. Tasol Iv i no rispektim Adam olsem het bilong em. Em i no bihainim tok Adam i givim long em. (Stt. 2:16, 17; 3:3; 1 Ko. 11:3) Tru, Iv i bin bilipim tok giaman, tasol i gutpela moa sapos em i bin askim man bilong em pastaim olsem i stret long em i ken bihainim dispela nek i bin tokim em long samting God i “save” long en, laka? Tasol em i no mekim olsem, em i kirap tokim man bilong em, Adam, long samting Adam i mas mekim.—Stt. 3:5, 6; 1 Ti. 2:14.
9. Olsem wanem Jisas i stap gutpela piksa long pasin bilong daun long het bilong em?
9 Tasol Jisas i stap gutpela piksa tru long pasin bilong daun long Het bilong em. Tingting na wokabaut bilong em i soim olsem “em i no ting long holimpas dispela pasin bilong i stap wankain olsem God. Nogat. Em i lusim dispela pasin, na em i kamap olsem wokboi nating.” (Fl. 2:5-7) Long nau Jisas i stap King na em i holim wankain tingting yet. Em i save daun na aninit long Papa bilong em long olgeta samting na em i save sapotim wok bos bilong Em.—Mt. 20:23; Jo. 5:30; 1 Ko. 15:28.
10. Olsem wanem meri inap sapotim wok bos bilong man bilong em?
10 Meri Kristen i mas bihainim pasin bilong Jisas na sapotim wok bos bilong man bilong em. (Ritim 1 Pita 2:21; 3:1, 2.) Tingim wanpela rot we em inap mekim olsem. Pikinini man i askim mama long larim em i mekim wanpela samting, em samting papa tu i mas orait long en. Papa na mama i no bin toktok wantaim long dispela samting, olsem na i gutpela sapos mama i askim pikinini, “Yu askim papa tu?” Sapos pikinini i tok nogat, orait mama i mas toktok pastaim wantaim papa long dispela samting. Na tu, meri Kristen i no ken kalapim tok bilong man bilong em o daunim tok bilong man long ai bilong ol pikinini. Sapos em i no wanbel wantaim man bilong em long wanpela samting, em i mas toktok wantaim em taim tupela tasol i stap.—Ef. 6:4.
Jisas i Stap Gutpela Piksa Bilong Ol Papamama
11. Olsem wanem Jisas i stap gutpela piksa bilong ol papamama?
11 Maski Jisas i no marit o kamapim pikinini, em i stap gutpela piksa bilong ol papamama Kristen i ken bihainim. Long rot bilong ol tok na pasin bilong em, Jisas i skulim ol disaipel. Em i soim ol olsem wanem ol inap mekim dispela wok em i givim long ol. (Lu. 8:1) Tingting Jisas i gat long ol disaipel bilong em na pasin em i mekim long ol, dispela i skulim ol long pasin ol i mas mekim long ol wanbilip.—Ritim Jon 13:14-17.
12, 13. Olsem wanem papamama inap helpim ol pikinini long kamap man o meri i pret long God?
12 Ol pikinini i save bihainim pasin bilong papamama—ol gutpela pasin bilong ol na ol pasin nogut tu bilong ol. Olsem na yupela ol papamama, askim yupela yet: ‘Ol aua mipela i lusim long lukim TV na long painim amamas, na ol aua mipela i lusim long mekim Baibel stadi na wok autim tok, dispela i givim wanem skul long ol pikinini bilong mipela? Wanem ol samting i bikpela samting long tingting bilong famili bilong mipela? Mipela i stap gutpela piksa long rot bilong putim lotu i tru i stap nambawan bikpela samting long laip bilong mipela?’ Bilong papamama i ken helpim ol pikinini long kamap man o meri i pret long God, pastaim lo bilong God i mas stap long bel bilong papamama yet.—Lo 6:6, NW.
13 Sapos papamama i wok strong long bihainim ol stiatok bilong Baibel long ol samting ol i save mekim long olgeta wan wan de, ol pikinini bai luksave long dispela samting. Ol tok na skul papamama i givim long ol pikinini bai i gat strong long stiaim ol. Tasol sapos ol pikinini i lukim olsem papamama yet i no bihainim ol tok ol i givim long ol, ating ol pikinini bai kisim tingting olsem ol stiatok bilong Baibel i no bikpela samting na i no inap helpim ol. Dispela inap mekim na ating ol pikinini i no inap sanap strong taim ol traim bilong dispela graun i painim ol.
14, 15. Ol papamama i mas helpim ol pikinini bilong ol long kisim wanem laik? Bilong mekim olsem, wanem wanpela samting ol papamama i ken mekim?
14 Ol papamama Kristen i save olsem taim ol i mekim bikpela long ol pikinini, ol i no ken lukautim ol long ol samting bilong skin tasol. Olsem na i no savepasin long skulim ol pikinini long putim ol mak i bilong helpim ol long sait bilong skin tasol. (Sav. 7:12) Jisas i skulim ol disaipel long tingim pastaim ol samting bilong spirit. (Mt. 6:33) Olsem Jisas i bin mekim, ol papamama Kristen i mas wok strong tu long helpim ol pikinini long kisim laik long mekim wok bilong God.
15 Wanpela samting ol papamama i ken mekim, em long painim rot bilong ol pikinini i ken bung wantaim ol bratasista i insait long fultaim sevis. Taim ol yangpela i save long ol painia na ol wasman sekit na meri bilong ol, dispela inap strongim ol yangpela. Ol misineri na ol lain i wok long Betel na long intenesenel konstraksen, ol inap kamapim amamas bilong ol long mekim wok bilong Jehova. Ating ol i gat ol gutpela ekspiriens ol i ken kamapim. Gutpela pasin bilong ol long lusim sampela laik bilong ol yet bilong mekim wok bilong God, dispela inap helpim gut ol pikinini long wokim ol gutpela disisen, na tingim sampela wok bilong God ol i laik mekim, na kisim ediukesen inap long ol i ken lukautim ol yet taim ol i insait long fultaim sevis.
Ol Pikinini—Wanem Samting Bai Helpim Yupela Long Bihainim Pasin Bilong Jisas?
16. Jisas i mekim wanem bilong givim ona long papamama bilong em long graun na long Papa bilong em long heven?
16 Yupela ol pikinini, Jisas i stap gutpela piksa bilong yupela tu. God i bin putim Jisas i stap long han bilong Josep na Maria, na Jisas i save bihainim tok bilong tupela. (Ritim Luk 2:51.) Em i luksave olsem, maski ol i gat sin, God i bin givim wok long tupela long lukautim em. Olsem na i stret Jisas i givim ona long ol. (Lo 5:16; Mt. 15:4) Taim Jisas i kamap bikpela pinis, oltaim em i mekim ol samting Papa bilong em long heven i laikim. Bilong mekim olsem, em i save sakim ol traim. (Mt. 4:1-10) Ating sampela taim yupela ol yangpela i no laik bihainim tok bilong papamama. Olsem na wanem samting inap helpim yupela long bihainim pasin bilong Jisas?
17, 18. (a) Wanem samting inap kamap long skul bilong traim ol yangpela? (b) Ol yangpela i ken tingim wanem samting na dispela inap helpim ol long sanap strong na sakim ol traim?
17 Ating planti wanskul bilong yu i no save bihainim ol stiatok bilong Baibel. Ating bai ol i laik pulim yu i go insait long sampela samting i gat rong long en o tok bilas long yu taim yu no laik mekim. Olsem wanem? Sampela taim ol wanskul i kolim kain kain nem long yu o tok bilas long yu, long wanem, yu no laik joinim ol long sampela samting? Sapos olsem, yu save mekim wanem? Yu save olsem sapos yu larim ol i pretim yu na yu bihainim ol, yu bai mekim papamama na Jehova i bel hevi. Wanem samting bai painim yu sapos yu bihainim ol wanskul? Ating yu bin putim sampela samting olsem mak bilong winim, olsem kamap painia o kongrigesen sevan, o go long wanpela hap we ol i sot long ol pablisa bilong Kingdom, o wok long Betel. Sapos yu poromanim ol wanskul bilong yu, yu ting dispela bai helpim yu long winim ol mak yu bin putim?
18 Yupela ol yangpela long kongrigesen Kristen, sampela taim ol samting i kamap i laik traim bilip bilong yupela? Sapos olsem, yu save mekim wanem? Tingim pasin bilong Jisas. Em i sakim ol traim na i stap strong long bihainim pasin i stret. Taim yu tingim dispela samting, dispela bai givim strong long yu long tokaut klia long ol wanskul olsem yu no laik poromanim ol long ol samting yu save i no stret. Olsem Jisas, tingting strong long amamas long mekim wok bilong Jehova long laip olgeta bilong yu na bihainim tok bilong Em.—Hi. 12:2.
Rot Bilong Famili i Ken Stap Amamas
19. Wanem samting bai helpim famili long i stap amamas tru?
19 God Jehova na Jisas Krais i laik bai gutpela samting tasol i painim ol manmeri. Maski yumi gat sin, yumi inap stap amamas. (Ais. 48:17, 18; Mt. 5:3) Jisas i skulim ol disaipel long ol stiatok em ol i bilong helpim ol manmeri long i stap amamas, tasol i no dispela samting tasol em i tokim ol disaipel long en, nogat. Jisas i skulim ol tu long nambawan gutpela rot long bihainim. Na tu, em i stap gutpela piksa long wokabaut bilong em na long stretpela tingting em i bihainim. Yumi olgeta, maski yumi mekim wanem wanem wok insait long famili, sapos yumi bihainim pasin bilong em, dispela bai helpim gut yumi. Olsem na yupela ol maritman, ol maritmeri, ol papamama, na ol pikinini, bihainim pasin bilong Jisas. Tru tumas, pasin bilong bihainim ol tok na ol pasin bilong Jisas, dispela em i rot tru bilong famili i ken stap amamas na belgut.
Bai Yu Bekim Olsem Wanem?
• Ol maritman i mas bihainim wanem kain pasin taim ol i mekim wok long namba God i bin givim long ol?
• Olsem wanem maritmeri inap bihainim pasin bilong Jisas?
• Papamama inap kisim wanem skul long pasin Jisas i mekim long ol disaipel bilong em?
• Ol yangpela inap kisim wanem skul long pasin bilong Jisas?
[Piksa long pes 8]
Paslain long mekim disisen long ol samting bilong famili, gutpela maritman bai mekim wanem?
[Piksa long pes 9]
Long wanem kain taim maritmeri i ken sapotim wok bos bilong man bilong em?
[Piksa long pes 10]
Ol pikinini i save bihainim gutpela pasin bilong papamama bilong ol