Tok Bilong Jehova i Gat Laip
Sampela Bikpela Tok Bilong Ol Pas i Go Long Ol Galesia, Ol Efesus, Ol Filipai na Ol Kolosi
SAMPELA Kristen i bin pundaun na lusim lotu i tru, long wanem, ol i bihainim tok bilong ol man husat i strong long bihainim lotu Juda. Taim aposel Pol i harim tok long dispela samting, em i raitim wanpela pas i gat ol strongpela tok long en na salim i go long “ol sios i stap long provins Galesia.” (Ga. 1:2) Pol i bin raitim dispela pas long yia 50-52 C.E., na em i tokaut stret long ol samting ol manmeri long dispela sios, o kongrigesen, i mas mekim na em i givim ol strongpela tok long ol.
Inap olsem 10-pela yia bihain, Pol i stap kalabus long Rom, long wanem, em i save “mekim wok bilong Krais Jisas.” Long dispela taim em i raitim ol pas i go long ol kongrigesen long Efesus, long Filipai, na long Kolosi, na em i kamapim sampela gutpela tok bilong helpim na strongim ol. (Ef. 3:1) Long nau, yumi inap kisim helpim sapos yumi skelim gut ol tok i stap long ol dispela buk bilong Baibel, em Buk Galesia, Buk Efesus, Buk Filipai, na Buk Kolosi.—Hi. 4:12.
KAMAP “STRETPELA MAN” —OLSEM WANEM?
Ol man husat i strong long bihainim lotu Juda, ol i wok long daunim Pol, olsem na Pol i stori long sampela samting long laip bilong em bilong kamapim klia olsem em i wanpela aposel. (Ga. 1:11–2:14) Pol i daunim tok giaman bilong ol na i tok: “God i no ting long man i bihainim lo bilong Moses, na long dispela as em i kolim em stretpela man. Nogat. Man i bilip long Krais Jisas, em tasol God i save kolim stretpela man.”—Ga. 2:16.
Pol i tok, Krais i bin ‘baim bek ol manmeri i stap aninit long lo’ na ol i kisim pasin bilong i stap fri olsem ol Kristen i bin kisim. Em i givim strongpela tok long ol Galesia olsem: “Yupela i mas sanap strong. Yupela i no ken larim ol man i mekim yupela i kamap olsem ol wokboi nating gen.”—Ga. 4:4, 5; 5:1.
Bekim Bilong Ol Askim Bilong Baibel:
3:16-18, 28, 29—Olsem wanem? Kontrak bilong Abraham i stap yet? Yes, em i stap yet. God i skruim kontrak bilong Lo i go long kontrak bilong Abraham; kontrak bilong Lo i no senisim kontrak God i bin mekim wantaim Abraham. Olsem na kontrak bilong Abraham i bin i stap yet taim Krais i “rausim” kontrak bilong Lo. (Ef. 2:15) Ol tok promis bilong dispela kontrak bai kamap tru long “pikinini” bilong Abraham—Krais Jisas em i namba wan hap bilong dispela “pikinini,” na namba tu hap bilong en em ol manmeri husat i “stap lain bilong Krais.”
6:2—“Lo bilong Krais” em wanem samting? Dispela lo i makim olgeta samting em Jisas i bin skulim ol man long en na tokim ol long mekim. Na moa yet em dispela lo bilong “laikim tru ol arapela.”—Jo. 13:34.
6:8—Olsem wanem yumi inap “bihainim pasin bilong Holi Spirit”? Yumi inap mekim olsem taim yumi larim holi spirit i stiaim ol samting yumi mekim long i stap bilong yumi. Na tu, yumi inap bihainim pasin bilong en taim yumi givim bel olgeta long insait long ol wok i opim rot long holi spirit i ken stiaim yumi.
Skul Yumi Kisim:
1:6-9. Taim hevi i kamap insait long kongrigesen, ol elda Kristen i mas stretim kwiktaim. Sapos ol i bihainim gutpela tingting na kamapim ol tok bilong Baibel, ol inap daunim kwik ol tingting giaman.
2:20. Pe bilong baim bek man i olsem wanpela presen God i givim long yumi wan wan. Yumi mas pilim tru dispela samting.—Jo. 3:16.
5:7-9. Ol poroman nogut inap ‘pasim rot na yumi no bihainim moa tok i tru.’ Yumi bihainim savepasin sapos yumi sakim ol.
6:1, 2, 5. Ol strongpela brata inap helpim yumi long karim wanpela hevi, olsem sapos yumi no save na yumi mekim wanpela rong na long dispela samting hevi i kamap. Tasol dispela tok olsem “olgeta man wan wan bai i karim hevi bilong pasin ol yet i mekim,” dispela i makim ol wok Kristen em yumi wan wan i mas mekim.
“BUNGIM OLGETA SAMTING LONG KRAIS”
Long pas Pol i salim i go long ol Efesus, em i stori long samting i mekim na ol Kristen i stap wanbel wantaim. Em i stori long tingting bilong God long “bungim olgeta samting long Krais, ol samting bilong heven na bilong graun tu.” Krais i bin givim ol man olsem “ol presen” bilong helpim ol manmeri long “bilip tru na . . . stap wanbel tru.”—Ef. 1:10; 4:8, 13.
Bilong litimapim nem bilong God na kamapim pasin wanbel, ol Kristen i mas “kamap ol nupela manmeri” na ol i mas ‘ting long Krais na stap aninit long ol arapela manmeri bilong God.’ Na tu, ol i mas “sakim olgeta kain pasin bilong trik na giaman Satan i save hait na mekim.” Bilong mekim olsem ol i mas pasim olgeta klos pait bilong spirit.—Ef. 4:24; 5:21; 6:11.
Bekim Bilong Ol Askim Bilong Baibel:
1:4-7—Olsem wanem God i makim ol Kristen long holi spirit paslain tru long mama i karim ol? God i makim ol olsem wanpela lain, em i no makim ol wan wan. Dispela samting i bin kamap paslain long tupela tumbuna papamama bilong yumi, Adam na Iv, i kamapim ol pikinini. Tok profet i stap long Stat 3:15, em God i mekim paslain long ol man i gat sin i kamap, i makim olsem God i tingting pinis long sampela disaipel bilong Krais bai mekim wok king wantaim em long heven.—Ga. 3:16, 29.
2:6—Olsem wanem ol Kristen em God i makim, ol i “sindaun pinis . . . long heven,” tasol tru tru ol i stap yet long graun? Dispela tok “heven” i no makim samting God i bin promis long ol bai kisim long heven, nogat. Em i makim bikpela namba ol i kisim long ol samting bilong spirit. Dispela samting i bin kamap taim “God i bihainim promis em i bin mekim bipo na em i givim Holi Spirit long [ol], olsem mak bilong [ol] i stap lain manmeri bilong em stret.”—Ef. 1:13, 14.
Skul Yumi Kisim:
4:8, 11-15. Jisas Krais i “kisim bikpela lain kalabus i go wantaim em,” olsem em i kisim ol man em bipo Satan i bosim ol na em i mekim wok long ol olsem ol presen bilong strongim kongrigesen Kristen. “Yumi mas bihainim pasin bilong laikim tru ol arapela . . . olsem bai yumi kamap strongpela manmeri na bai yumi pas tru wantaim Krais” long rot bilong stap daun na bihainim tok bilong ol man i go pas long yumi na sapotim ol wok bilong kongrigesen.—Hi. 13:7, 17.
5:22-24, 33. Meri marit i mas daun long man bilong em na rispektim em. Em i mekim olsem long rot bilong “stap belgut na i stap bel isi,” na tu, long pasin bilong litimapim nem bilong man long rot bilong mekim ol gutpela tok long em na sapotim ol disisen em i mekim.—1 Pi. 3:3, 4; Ta. 2:3-5.
5:25, 28, 29. Man i save “givim kaikai” long em yet, na olsem tasol em i mas lukautim gut meri bilong em—long ol samting bilong skin, bel na tingting, na long ol samting bilong spirit. Na tu, em i mas soim olsem em i tingim tru meri bilong em. Bilong mekim olsem, em i mas lusim haptaim bilong i stap wantaim meri na mekim gut long em long rot bilong ol tok na pasin em i mekim.
6:10-13. Bilong sakim ol spirit nogut, yumi mas givim bel olgeta long pasim klos pait bilong spirit em God i givim yumi.
‘HOLIMPAS STRONG GUTPELA PASIN’
Long pas Pol i raitim i go long ol Filipai em i stori planti long pasin laikim. Em i tok: “Oltaim mi save beten olsem, pasin bilong laikim tru ol narapela na stretpela save na gutpela tingting em i ken pulap moa yet long yupela.” Em i kamapim ol tok bilong helpim ol long sakim pasin bilong bilip long save bilong ol yet, na em i tok: “Yupela i mas wok strong long mekim ol samting bambai God i ken kisim bek yupela, na mekim long pasin bilong pret na guria.”—Fl. 1:9; 2:12, NW.
Pol i kirapim ol strongpela Kristen long ol i mas ‘ran strong bilong kamap long mak na kisim prais. Dispela prais em i olsem. God i singautim ol bilong i go antap.’ Em i tok: “Gutpela pasin yumi kisim pinis, em yumi mas holimpas strong.”—Fl. 3:14-16.
Bekim Bilong Ol Askim Bilong Baibel:
1:23—Pol i gat “tupela bel” long wanem samting, na em i laik tru long mekim wanem? Ol samting i kamap long Pol i mekim na tupela samting inap painim Pol: em inap i stap laip o em inap i dai. (Fl. 1:21) Em i no tokaut long wanem samting em bai makim, tasol em i tokaut long samting em i gat laik tru long en—em i “laik tru long i go i stap wantaim Krais.” (Fl. 3:20, 21; 1 Te. 4:16) Dispela samting bai kamap taim Krais i kam i stap na Pol bai kisim presen em Jehova i bin redim bilong em.—Mt. 24:3.
2:12, 13—Olsem wanem God i save ‘kirapim laik bilong yumi bilong mekim ol pasin em i laikim’? Holi spirit bilong Jehova inap kirapim bel na tingting bilong yumi long givim bel tru long mekim wok bilong em. Olsem na yumi gat helpim taim yumi mekim ol samting bambai ‘God i kisim bek yumi.’
Skul Yumi Kisim:
2:5-11. Pasin bilong Jisas i kamapim klia olsem pasin daun i no makim olsem man i no gat strong, nogat. Em i makim olsem man i strong long bihainim pasin i stret. Na tu, Jehova i save litimapim ol man i gat pasin daun.—Snd. 22:4.
3:13. “Olgeta samting bilong bipo” inap makim ol kain samting olsem gutpela wok mani, stap insait long famili i gat planti mani kago, na em inap makim tu olsem bipo yumi bin mekim sampela bikpela rong na yumi bin tanim bel na ‘God i wasim yumi pinis’ na yumi kamap klin. (1 Ko. 6:11) Yumi mas lusim tingting long ol dispela samting, olsem yumi no ken tingim tumas, na yumi mas “wok strong long kisim dispela samting bai i kamap bihain.”
4:14-16. Maski ol Filipai i bin i stap rabis long ol samting bilong skin, ol i stap gutpela piksa long pasin bilong givim ol samting bilong helpim ol arapela.—2 Ko. 8:1-6.
“BILIP STRONG”
Long pas Pol i raitim i go long ol Kolosi, em i kamapim klia ol tingting kranki bilong ol tisa giaman. Em i tok yumi mas “holimpas bilip” bambai God i ken kisim bek yumi, na i no bihainim tasol ol tok bilong Lo. Pol i strongim ol Kolosi long ol i mas wok yet long ‘wokabaut wantaim Krais. Ol i mas sanap strong long em, olsem diwai i sanap strong long graun, na olsem haus i sanap strong antap long strongpela pos. Ol i mas bilip strong.’ Taim ol i stap strong olsem, dispela i mas kirapim ol long mekim wanem?—Kl. 1:23; 2:6, 7.
Pol i tok: “Yupela i mas givim bel bilong yupela long ol arapela manmeri. Dispela pasin i winim tru olgeta arapela pasin, na em i save mekim ol arapela gutpela pasin i kamap strong na i wok bung wantaim. Krais i save givim bel isi long yumi na mekim yumi i stap wanbel, na dispela bel isi i ken bosim tru bel bilong yupela.” Aposel Pol i tokim ol olsem: “Olgeta samting yupela i mekim, yupela i mas wok strong na mekim. I no olsem yupela i mekim wok bilong ol man. Nogat. Yupela i mekim wok bilong Bikpela.” Long pasin ol Kristen i mas mekim long ol man i stap ausait long kongrigesen, em i tok: “Yupela i mas bihainim gutpela tingting na mekim ol stretpela pasin” long ol.—Kl. 3:14, 15, 23; 4:5.
Bekim Bilong Ol Askim Bilong Baibel:
2:8—Ol dispela ‘samting bilong graun’ em Pol i tok lukaut long en, em wanem ol samting? Em ol samting bilong graun bilong Satan—ol tingting i save stiaim na kirapim ol man long mekim ol samting. (1 Jo. 2:16) Sampela bilong ol dispela samting em, save bilong ol man, mani kago, na ol lotu giaman.
4:16—Bilong wanem pas i go long ol Laodisia i no kamap olsem wanpela hap bilong Baibel? Ating dispela pas i no gat ol tok we yumi mas kisim long nau. O ating dispela pas i gat ol wankain tok olsem i stap pinis long ol narapela pas bilong Baibel.
Skul Yumi Kisim:
1:2, 20. God i mekim bikpela pasin helpim long yumi na em i redim pe bilong baim bek man, na dispela pe inap helpim maus bilong bel long i stap klin na yumi inap kisim bel isi.