Ol Samting De Bilong Jehova Bai Kamapim

“De bilong Bikpela bai i kamap wantu tasol olsem ol stilman i save kam . . . na graun wantaim olgeta samting ol i wokim i stap long en, ol bai i no i stap moa.”​—⁠2 PI. 3:⁠10.

1, 2. (a) Ol pasin nogut i stap long nau bai pinis olsem wanem? (b) Bai yumi skelim wanem ol askim?

TOK giaman, olsem ol man inap bosim sindaun bilong ol yet maski Jehova, dispela i as bilong ol pasin nogut i stap long nau. (Sng. 2:​2, 3) Yu ting ol samting em tok giaman i as bilong en inap i stap oltaim? Nogat tru, a? Tasol yumi no gat wok long wet inap long taim we ol samting bilong dispela graun bilong Satan bai bagarap em yet. Nogat. God bai bagarapim ol dispela samting long taim na long rot em yet i bin makim. Samting God bai mekim bilong pinisim dispela pasin nogut bilong nau i kamapim long ples klia stretpela pasin na pasin laikim bilong em.​—⁠Sng. 92:7; Snd. 2:​21, 22.

² Aposel Pita i tok: “Tasol De bilong Bikpela bai i kamap wantu tasol olsem ol stilman i save kam. Long dispela De skai bai i pairap bikpela na i pinis olgeta. Na olgeta liklik samting God i bin wokim graun long en, paia bai i kukim ol na ol bai i pinis. Olsem na graun wantaim olgeta samting ol i wokim i stap long en, ol bai i no i stap moa.” (2 Pi. 3:10) “Skai” na “graun” long dispela ves i makim wanem samting? “Olgeta liklik samting” em ol bai i pinis, i makim wanem samting? Na wanem mining bilong tok bilong Pita olsem “graun wantaim olgeta samting ol i wokim i stap long en” ol bai “i no i stap moa”? Taim yumi save long bekim bilong ol dispela askim, dispela bai helpim yumi long redi long ol samting klostu nau bai kamap, em ol samting bilong mekim ol man i pret nogut tru.

Skai na Graun Bai Pinis Olgeta

 3. “Skai” em 2 Pita 3:​10 i stori long en i makim wanem samting? Em bai pinis olsem wanem?

³ Taim Baibel i tok piksa long “skai,” olsem heven, planti taim dispela i makim ol gavman bilong graun em ol i stap antap, olsem bosim ol manmeri i stap aninit long en. (Ais. 14:​13, 14; KTH 21:​1, 2) ‘Skai bai pinis olgeta’ i makim ol gavman em ol i bosim ol manmeri i stap longwe long God. Em bai “pairap bikpela,” na dispela i makim olsem dispela skai bai pinis hariap.

 4. “Graun” i makim wanem samting? Em bai bagarap olsem wanem?

⁴ “Graun” i makim ol manmeri bilong dispela graun em ol i stap longwe long God. Kain graun olsem i bin stap long taim bilong Noa, na God i tok na Bikpela Tait i bagarapim dispela graun. “Long wankain tok bilong God tasol, skai na graun i stap na i wetim paia i kamap na i bagarapim ol. Skai na graun i wetim de bilong bikpela kot i kamap, na ol man i bin givim baksait long God, ol bai i bagarap olgeta.” (2 Pi. 3:⁠7) Bikpela Tait i bin bagarapim olgeta manmeri i givim baksait long God long wankain taim, tasol long “bikpela hevi tru” klostu bai kamap, bagarap bai i no kamap long wankain taim. (KTH 7:​14, NW ) Long namba wan hap bilong dispela bikpela hevi, God bai kirapim ol hetman politik bilong dispela graun long bagarapim ‘Bikpela Babilon,’ na long dispela rot em bai kamapim olsem em i no orait liklik long dispela pamukmeri bilong lotu. (KTH 17:​5, 16; 18:⁠8) Orait bihain, long taim bilong pait bilong Armagedon, em laspela hap bilong bikpela hevi tru, Jehova yet bai pinisim olgeta narapela samting bilong graun bilong Satan.​—⁠KTH 16:​14, 16; 19:​19-21.

“Olgeta Liklik Samting . . . Ol Bai i Pinis”

 5. Wanem ol samting i insait long “olgeta liklik samting”?

⁵ “Olgeta liklik samting” em “ol bai i pinis,” i makim wanem samting? Dispela tok “olgeta liklik samting” em Pita i stori long en i makim ol bikpela samting i kirapim ol manmeri long kamapim ol pasin, tingting, na laik i no stret long ai bilong God. “Spirit bilong dispela graun” i mekim wok “insait long bel bilong ol man i sakim tok bilong God,” dispela tu i insait long “olgeta liklik samting.” (1 Ko. 2:​12; ritim Efesus 2:​1-3.) Dispela spirit i stap insait long olgeta samting bilong dispela graun bilong Satan. Na dispela spirit i stiaim tingting, toktok, na ol samting ol man i makim bilong mekim, em ol samting i kamapim tingting bilong Satan, em man i gat pasin antap, na em i bikhet “hetman bilong ol spirit nogut i stap long skai.”

 6. Olsem wanem spirit bilong dispela graun i kamap ples klia?

⁶ Olsem na ol manmeri husat i larim spirit bilong dispela graun i bosim ol​—⁠maski ol i save long dispela o nogat​—⁠ol i larim Satan i stiaim tingting na bel bilong ol, na ol i kamapim tingting na laik bilong em. Olsem na ol i mekim ol samting ol yet i laikim, na ol i no tingim laik bilong God. Pasin antap na pasin bilong tingim ol yet tasol i as bilong ol pasin bilong ol, ol i bikhet long wok bos, na ol i bihainim tru “pasin bilong bel kirap na aigris.”​​—⁠Ritim 1 Jon 2:​15-​17.a

 7. Bilong wanem yumi mas “was gut tru long tingting bilong [yumi]”?

⁷ Olsem na em i bikpela samting long yumi “was gut tru long tingting bilong [yumi]” long rot bilong bihainim gutpela tingting i kam long God taim yumi makim ol poroman bilong yumi, ol samting yumi ritim, ol amamas, na ol Web-sait yumi lukim long Intenet! (Snd. 4:23) Aposel Pol i tok: “Yupela i mas lukaut gut, nogut wanpela man i autim olkain giaman save na toktok nating long yupela na em i mekim yupela i bihainim tingting bilong en. Ol dispela kain man i save kisim tingting bilong ol tumbuna na bilong ol spirit i save bosim ol samting bilong skai na graun. Ol i no save bihainim tingting bilong Krais.” (Kl. 2:⁠8) Dispela tok i bikpela samting moa long nau taim de bilong Jehova i wok long i kam klostu, long wanem, “paia” bilong en bai pinisim “olgeta liklik samting” bilong dispela graun bilong Satan, na kamapim long ples klia olsem ol dispela samting i no gat strong long sakim belhat bilong God. Dispela samting i kirapim yumi long tingim tok bilong Malakai 4:1: “Wanpela De bai i kamap na bai paia i kukim olgeta manmeri bilong bikhet na olgeta manmeri nogut, olsem paia i save kukim kunai i drai. Long dispela De bai ol i bagarap long paia na bai ol i pinis olgeta.”

‘Graun Wantaim Olgeta Samting Long En Bai i No Stap Moa’

 8. Olsem wanem graun na ol samting i stap long en bai “i no i stap moa”?

⁸ Wanem mining bilong tok bilong Pita olsem ‘graun wantaim olgeta samting i stap long en, ol bai i no i stap moa’? Dispela tok “i no i stap moa” inap makim tu olsem “painimaut,” o “kamapim long ples klia.” Pita i laik tok olsem long taim bilong bikpela hevi tru, Jehova bai kamapim long ples klia ol samting bilong dispela graun bilong Satan. Jehova bai kamapim olsem dispela graun i birua long Em na Kingdom bilong Em, olsem na i stret em i mas bagarap. Aisaia 26:21 i tok profet long dispela taim na i tok: “Bikpela i lusim pinis ples bilong em long heven na i kam nau, bilong mekim save long ol manmeri bilong graun, na bekim asua bilong ol sin bilong ol. Na graun bai i no inap haitim moa blut bilong ol man ol arapela i bin kilim i dai. Nogat. Em bai i kamapim olgeta pasin nogut ol man i bin mekim.”

 9. (a) Yumi mas sakim wanem samting? Bilong wanem yumi mas sakim? (b) Yumi mas kisim wanem pasin? Bilong wanem?

⁹ Long de bilong Jehova, ol manmeri husat i bin larim dispela graun na ol pasin nogut bilong en i stiaim ol, ol bai kamapim long ples klia pasin tru bilong ol, na narapela bai kilim i dai narapela. Yumi ken ting olsem ol muvi na vidio gem samting em ol i save kamapim ol pasin bilong pait na kilim man i dai, ol i redim tingting bilong planti manmeri long dispela taim bai kamap we “ol man bai i holimpas ol man i stap klostu long ol na kilim ol i dai.” (Sek. 14:13) Olsem na em i bikpela samting long yumi sakim olgeta samting​—⁠ol muvi, buk, vidio gem, na ol samting olsem⁠—​em inap kirapim bel bilong yumi long mekim ol pasin em God i nolaik tru long en, olsem pasin antap na pasin bilong laikim pait na bagarapim man! (2 Sml. 22:28; Sng. 11:⁠5) Mobeta yumi wok long kisim ol pasin em holi spirit bilong God i save kamapim, long wanem, ol kain pasin olsem em bai i no inap pinis long bikpela de bilong Jehova.​—⁠Ga. 5:​22, 23.

“Nupela Skai na Nupela Graun”

10, 11. “Nupela skai” na “nupela graun” i makim wanem samting?

¹⁰ Ritim 2 Pita 3:13. “Nupela skai” em Kingdom Bilong God long heven, em i kamap long 1914, long “taim God i bin makim bilong ol arapela lain” i bosim graun, em i pinis. (Lu. 21:24) Krais Jisas na ol 144,000 manmeri i wok king wantaim em ol i insait long dispela gavman. Planti bilong ol i kisim pinis gutpela pe bilong ol long heven. Buk Kamapim Tok Hait i stori long ol dispela manmeri God i bin makim olsem “taun bilong God, em nupela Jerusalem . . . i stap wantaim God, na i lusim heven na i kam daun. Em i gat gutpela bilas, olsem meri i laik marit na i putim gutpela bilas na i redi long maritim man bilong en.” (KTH 21:​1, 2, 22-24) Wankain olsem taun Jerusalem i bin stap olsem as bilong gavman bilong Israel bilong bipo, Nupela Jerusalem na Man bilong en ol i dispela gavman bilong nupela taim bai kamap long graun. Dispela taun i stap long heven bai “lusim heven na i kam daun,” em bai mekim olsem long rot bilong bosim ol samting bilong dispela graun.

¹¹ “Nupela graun” i makim nupela lain manmeri bilong graun em ol i soim pinis olsem ol i amamas long i stap daun long Kingdom Bilong God. Nau ol manmeri bilong God i stap long paradais bilong spirit, na bihain dispela paradais bai i stap long gutpela “nupela graun God bai i mekim kamap bihain.” (Hi. 2:⁠5) Olsem wanem yumi inap i stap insait long dispela nupela graun bai kamap?

Redi Long Bikpela De Bilong Jehova

12. Bilong wanem ol man bilong dispela graun bai kirap nogut long de bilong Jehova?

¹² Aposel Pol na Pita i bin tok profet long de bilong Jehova bai kam “olsem stilman”​—⁠em bai kam isi tru, long taim man i no ting em bai kamap. (Ritim 1 Tesalonaika 5:​1, 2.) Ol Kristen tru, em ol i wetim dispela de, ol tu bai kirap nogut long em i kamap wantu tasol. (Mt. 24:44) Tasol ol man bilong dispela graun bai kirap nogut moa yet. Pol i tok: “Ol manmeri [em ol i stap longwe long Jehova] bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol, olsem pen i save kamap long meri i laik karim pikinini. Na ol bai i no inap abrusim dispela samting.”​—⁠1 Te. 5:⁠3.

13. Wanem samting inap helpim yumi na dispela tokaut olsem ‘nau em i gutpela taim tru, yumi stap gut’ i no ken giamanim yumi?

¹³ Dispela tokaut, ‘nau em i gutpela taim tru, yumi stap gut,’ i narapela giaman em ol spirit nogut i kamapim; tasol dispela tok bai i no giamanim ol wokman bilong Jehova. Pol i tok: “Yupela i no i stap long tudak, na yupela bai i kirap nogut long lukim dispela de i kamap, olsem man i kirap nogut long lukim stilman i kam. Nogat. Yupela olgeta i man bilong lait na bilong san.” (1 Te. 5:​4, 5) Olsem na i gutpela yumi stap long lait, longwe long tudak bilong dispela graun bilong Satan. Pita i tok: “Ol pren tru, yupela i save pinis long ol dispela samting bai i kamap bihain. Olsem na yupela i mas lukaut gut long yupela yet. Nogut giaman bilong ol man bilong sakim lo [ol tisa giaman insait long kongrigesen Kristen] em bai i pulim yupela na yupela i no sanap strong moa long bilip.”​—⁠2 Pi. 3:⁠17.

14, 15. (a) Olsem wanem Jehova i save tingim tru yumi? (b) Yumi mas tingim tru wanem tok bilong Baibel?

¹⁴ Tingim, Jehova i no tokim yumi olsem yumi “mas lukaut gut,” na em tasol. Nogat. Em i tingim tru yumi na i givim “save” long yumi long samting bai kamap bihain.

¹⁵ Tasol sori tru, sampela i no tingim ol dispela tok o ol i tok bilas long ol tok olsem yumi mas was i stap. Ating ol i tok, ‘Yumi harim pinis ol dispela tok inap planti yia tru.’ Tasol ol dispela manmeri i mas tingim olsem taim ol i mekim ol dispela kain tok, ol i no sutim tok tasol long lain gutpela wokboi, nogat, ol i sutim tok tu long Jehova na Pikinini bilong em. Jehova i tok, “wet liklik na em bai i kamap.” (Hab. 2:⁠3) Olsem tasol, Jisas i tok: “Yupela i mas was gut. Yupela i no save wanem de Bikpela bilong yupela bai i kam.” (Mt. 24:42) Na tu, Pita i tok: “Orait yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap, na yupela i mas wok strong long hariapim dispela De, bai em i kamap kwiktaim.” (2 Pi. 3:​11, 12) Lain gutpela wokboi na Gavening Bodi bilong en ol i ting dispela tok i bikpela samting tru!

16. Yumi mas abrusim wanem kain tingting, na bilong wanem?

¹⁶ Tru tumas, em dispela ‘wokboi nogut’ tasol husat i ting Bikman i no inap kamap kwiktaim. (Mt. 24:48) Dispela wokboi nogut i hap bilong wanpela lain em 2 Pita 3:​3, 4 i stori long en. Pita i tok: “Long taim bilong las de, ol man bilong tok bilas bai i kamap, na ol bai i bihainim laik nogut bilong bel bilong ol,” na ol bai tok bilas long ol manmeri i ting olsem de bilong Jehova i klostu. Tru tumas, ol dispela manmeri i no putim tingting i go long ol samting bilong Kingdom, nogat, ol i tingim ol yet tasol na ol laik nogut bilong ol. Yumi no ken tru kisim kain tingting olsem na sakim tok! Nogat tru. Yumi mas wok strong long autim tok bilong Kingdom na kamapim ol disaipel, na long dispela rot yumi soim olsem yumi tingim pasin bilong Bikpela long ‘wet na isi long yumi’ olsem rot bilong kisim bek yumi. Yumi no ken wari tumas long wanem taim ol samting bai kamap, dispela em samting bilong God Jehova.​—⁠2 Pi. 3:15; ritim Aposel 1:​6, 7.

Bilip Long God Bilong Kisim Bek Ol Man

17. Ol gutpela Kristen i mekim wanem long tok lukaut bilong Jisas long ranawe lusim Jerusalem? Bilong wanem ol i mekim olsem?

¹⁷ Bihain long ami bilong Rom i kam insait long Judia long 66 C.E., ol gutpela Kristen i bihainim tok bilong Jisas long ol i mas ranawe lusim Jerusalem long namba wan taim rot i op. (Lu. 21:​20-​23) Bilong wanem ol i bihainim gutpela tingting na ranawe hariap? Ol i bin tingim gut tok lukaut bilong Jisas. Ol i bin save olsem samting ol i mekim bai givim hatwok long ol, olsem Krais i bin toksave long en. Tasol tu, ol i bin save olsem Jehova i no inap lusim ol man i stap gut long em.​—⁠Sng. 55:⁠22.

18. Ol tok bilong Jisas long Luk 21:​25-​28 i mas mekim wanem long tingting bilong yu long bikpela hevi tru klostu bai kamap?

¹⁸ Yumi tu i mas bilip tru long Jehova, long wanem, em wanpela tasol inap kisim bek yumi long taim bikpela hevi tru i kamap, i no gat narapela bikpela hevi olsem i bin kamap bipo. Bihain liklik long taim bikpela hevi tru i kirap, tasol paslain long Jehova i kamapim strafe bilong em long ol narapela samting bilong dispela graun, ol manmeri “bai i pret tru na ai bilong ol bai i raun, long wanem, ol strongpela samting bilong skai bai i guria.” Ol birua bilong God bai i pret na guria, tasol ol man i stap gut long Jehova ol bai i no pret. Nogat tru. Ol bai amamas, long wanem, ol i save olsem klostu nau God bai kisim bek ol.​​—⁠Ritim Luk 21:​25-​28.

19. Bai yumi skelim wanem samting long stadi i kamap bihain long dispela?

¹⁹ Tru tumas, gutpela samting tru i wetim ol manmeri i stap longwe long ol samting bilong dispela graun na “olgeta liklik samting” bilong en! Tasol olsem stadi i kamap bihain long dispela bai i kamapim, sapos yumi laik kisim laip, yumi no ken abrusim tasol ol samting nogut, nogat, yumi mas mekim sampela samting moa. Yumi mas kisim ol pasin em Jehova i amamas long en na mekim ol wok em i orait long en.​—⁠2 Pi. 3:⁠11.

[Futnot]

Yu Inap Stori Long Dispela?

• Wanem samting i makim . . .

‘skai na graun’ bilong nau?

“olgeta liklik samting”?

“nupela skai na nupela graun”?

• Bilong wanem yumi bilip tru long God?

[Piksa long pes 5]

Olsem wanem yu inap “was gut tru long tingting bilong [yu]” na stap longwe long ol pasin bilong dispela graun?

[Piksa lon pes 6]

Olsem wanem yumi ken soim olsem yumi tingim pasin bilong Bikpela long ‘wet na isi long yumi’ olsem rot bilong kisim bek yumi?