Mekim Wok God i Laik Bai Yumi Mekim Long Nau

“[Krais] i mekim olsem bilong helpim yumi ol man i stap laip, bai yumi no ken tingting moa long yumi yet na wokabaut.”​​—2 KORIN 5:​15.

 1. Stori long ekspiriens bilong wanpela misineri long asainmen bilong em.

“TAIM pait i pinis, ka bilong mipela i namba wan ka long i go insait long dispela longwe ples long Afrika.” Dispela em tok bilong Aaron, em wanpela misineri.a Em i tok: “I gat wanpela liklik kongrigesen i stap long dispela ples, tasol mipela i no inap salim tok o kisim tok moa long ol brata long hap, na mipela i mas helpim ol brata long ol samting ol i sot long en. Mipela i bringim sampela kaikai, na klos, na ol buk na nius bilong Baibel, na tu, mipela i bringim wanpela vidio Jehovah’s Witnesses​​—The Organization Behind the Name.b Mipela i soim dispela vidio long wanpela haus kunai we i gat masin VCR na TV, na planti manmeri tru i kam long lukim dispela vidio, olsem na mipela i mas soim dispela vidio tupela taim. Planti manmeri i kirap stadi long Baibel bihain long ol i lukim dispela vidio. Hatwok bilong mipela i bin kamapim gutpela samting.”

 2. (a) Bilong wanem ol Kristen i tingting strong long yusim laip bilong ol long mekim wok bilong God? (b) Nau yumi bai skelim wanem ol askim?

² Wanem samting i kirapim Aaron na ol wanwok bilong em long mekim dispela wok i gat hatwok long en? Ol i mekim olsem, long wanem, ol i tenkyu long ofa bilong Jisas Krais, em ofa bilong baim bek man, olsem na ol i dediketim laip bilong ol long God na ol i laik yusim laip bilong ol long mekim ol samting God i laik bai ol i mas mekim. Olsem ol i bin mekim, olgeta Kristen em ol i dediket pinis, ol i tingting strong long ol i “no ken tingting moa long [ol] yet na wokabaut,” nogat, ol i laik mekim olgeta samting “bilong mekim gutnius bilong Jisas i kamap strong.” (2 Korin 5:​15; 1 Korin 9:​23) Ol i save olsem taim ol pasin nogut bilong nau i pinis, olgeta mani na biknem long graun i no inap helpim ol. Nau taim ol i stap laip na ol i gat gutpela helt, ol i laik yusim ol dispela samting long mekim ol samting i stret wantaim laik bilong God. (Saveman 12:1) Olsem wanem yumi inap yusim laip na helt bilong yumi long mekim ol samting i stret wantaim laik bilong God? Wanem samting inap strongim bel bilong yumi long mekim olsem? Na rot i op long yumi inap mekim wanem ol wok?

Ol Samting Yumi Ken Mekim

 3. Wanem ol samting i insait long mekim laik bilong God?

³ Ol Kristen tru i tingim pasin bilong mekim laik bilong God olsem samting ol i mas mekim long laip olgeta bilong ol. Pastaim ol i mekim ol samting olsem: ritim Baibel long olgeta de, insait long Skul Tiokratik Bilong Autim Tok, mekim wok autim tok, na winim ol mak bilong kisim baptais. Taim yumi wok long mekim ol dispela samting, yumi tingim tok bilong aposel Pol: “Oltaim yu mas lukautim gut ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru.” (1 Timoti 4:​15) Taim wok bilong yumi i kamap gutpela, dispela i no bilong litimapim nem bilong yumi yet, nogat. Em i kamapim klia olsem yumi laik givim bel olgeta long mekim laik bilong God. Taim yumi mekim olsem, dispela i soim olsem yumi larim God long stiaim olgeta samting yumi mekim long i stap bilong yumi, na pasin bilong em long stiaim yumi i gutpela moa winim pasin bilong yumi yet.​​—Song 32:8.

 4. Olsem wanem yumi inap daunim pasin bilong tingting planti?

⁴ Taim yumi mekim wok bilong God, pasin bilong tingting planti o tingim yumi yet tasol inap pasim wok bilong yumi long kamap gutpela moa. (Saveman 11:4) Sapos yumi laik kisim amamas long mekim wok bilong God na helpim ol narapela, yumi mas daunim pasin bilong tingting planti. Olsem: Erik i tingting long i go mekim wok long wanpela kongrigesen i mekim narapela tokples. Tasol em i tingting olsem: ‘Kongrigesen bai orait long mi? Mi bai laikim ol bratasista? Ol bai laikim mi?’ Em i tok: “Bihain mi luksave olsem mobeta mi tingim ol brata, na mi no ken tingim mi yet. Mi pasim tok long bel long mi mas tingting tasol long mekim ol wok bilong helpim ol arapela na mi no ken tingting planti long ol dispela narapela samting. Mi beten long God i ken helpim mi na mi mekim samting mi tingting pinis long mekim. Nau mi amamas tru long wok mi mekim long dispela kongrigesen.” (Rom 4:​20) Yes, sapos yumi givim yumi yet olgeta long mekim wok bilong God na helpim ol arapela, yumi bai kisim amamas na stap belgut.

 5. Bilong wanem yumi mas skelim gut ol samting taim yumi laik mekim laik bilong God? Stori long dispela.

⁵ Na tu, bilong mekim gut laik bilong God, yumi mas stretim ol samting long i stap bilong yumi. Yumi no ken hipim planti dinau em inap mekim yumi stap wokboi bilong dispela graun na yumi no stap fri long mekim wok bilong God. Baibel i tokim yumi: “Ol man i gat dinau, ol i stap olsem wokboi nating bilong ol man i givim dinau.” (Sindaun 22:7) Taim yumi bilip long Jehova na putim ol wok bilong lotu i stap namba wan, dispela bai helpim yumi long putim tingting i go long mekim laik bilong God. Olsem: Wanpela man, em Guoming, na tupela susa bilong em ol i stap wantaim mama bilong ol long wanpela hap we pe bilong haus i antap tru na i hatwok long kisim wok mani. Maski taim i no olgeta bilong ol i mekim wok mani, ol i save yusim gut mani na helpim narapela narapela long baim ol samting, na dispela i helpim ol long stap gut. Guoming i tok: “Sampela taim, wanpela o tupela tasol i mekim wok mani. Maski i olsem, mipela inap mekim yet wok painia, na lukautim gut mama bilong mipela. Mipela i tenkyu tru olsem Mama i no laik bai mipela i lusim wok painia na mekim wok mani na bai mipela inap givim em ol gutpela gutpela samting em ol i no samting tru bilong helpim em.”​​—2 Korin 12:14; Hibru 13:5.

 6. Wanem eksampel i kamapim olsem wanem yumi inap stretim sindaun bilong yumi na mekim ol samting i stret wantaim laik bilong God?

⁶ Sapos yu insait tru long mekim ol wok bilong skin​​—wok mani o ol narapela wok​​—ating bai yu mas mekim sampela bikpela senis bambai yu inap putim laik bilong God i stap namba wan. Ol dispela senis i no inap kamap wantu tasol, na sapos sampela popaia i kamap taim yu mekim ol dispela senis, orait no ken givap. Tingim wanpela man, em Koichi. Em i gat hevi long lusim bikpela haptaim long kisim amamas. Taim Koichi i yangpela yet em i bin stadi long Baibel, tasol inap planti yia em i save lusim bikpela hap taim long pilaim ol vidio gem. Wanpela taim Koichi i tokim em yet: ‘Mi mekim wanem? Mi winim pinis 30 krismas, na mi no mekim wanpela wok we i gat as tru bilong en!’ Koichi i kirap gen long mekim Baibel stadi na em i kisim helpim long kongrigesen. Senis i no kamap hariap, tasol em i no givap. Em i beten planti taim na ol narapela tu i strongim em, na dispela i helpim em long daunim pasin bilong pilaim ol vidio gem. (Luk 11:9) Long nau Koichi i amamas long mekim wok olsem kongrigesen sevan.

Bihainim Stretpela Tingting

 7. Bilong wanem yumi mas bihainim stretpela tingting taim yumi mekim wok bilong God?

⁷ I stret yumi givim yumi yet olgeta long mekim laik bilong God. Yumi no ken les long mekim olsem. (Hibru 6:​11, 12) Tasol Jehova i no laik bai yumi pinisim olgeta strong bilong yumi, olsem yumi givim hevi long bodi bilong yumi o tingting na bel i bagarap, nogat. Taim yumi daunim yumi yet na tokaut olsem yumi no inap mekim wok bilong God long strong bilong yumi yet, dispela i litimapim nem bilong God, na tu, em i soim olsem yumi gat stretpela tingting. (1 Pita 4:​11) Jehova i tok promis long givim strong long yumi bambai yumi inap mekim laik bilong em, tasol yumi no ken fosim yumi yet long abrusim skel bilong yumi na mekim ol samting em God i save yumi no inap long mekim. (2 Korin 4:7) Sapos yumi laik mekim yet wok bilong God na yumi no pinisim strong bilong yumi, orait yumi mas skelim strong bilong yumi.

 8. Wanpela yangpela Kristen i laik givim bikpela hap taim na strong na save long mekim wok bilong graun na wok bilong Jehova wantaim, na wanem samting i kamap? Em i mekim wanem senis?

⁸ Olsem: Ji Hye, em wanpela meri i stap long Is Esia, em i mekim wok painia na long wankain taim em i mekim wanpela wok i pulim bikpela hap taim bilong em. Em i mekim olsem inap 2-pela yia. Em i tok: “Mi laik givim bel tru long mekim wok bilong Jehova na wok mani wantaim, tasol long nait mi save slip 5-pela aua tasol. Isi isi mi no tingim moa tok i tru, na mi no amamas moa long ol samting bilong lotu.” Ji Hye i laik mekim wok bilong Jehova long ‘bel na spirit na tingting na strong’ olgeta bilong em, olsem na em i painim wanpela wok we i no inap pulim bikpela hap taim na strong bilong em. (Mak 12:30) Em i tok: “Maski famili bilong mi i strong long mi mas bungim planti mani, mi wok strong long putim laik bilong God i stap namba wan. Long nau mi kisim mani inap long mi ken baim ol samting mi mas i gat, olsem gutpela klos samting. Na mi amamas long mi inap slip gut! Mi kisim amamas long wok autim tok, na mi strong moa long ol samting bilong lotu, long wanem, mi no lusim bikpela hap taim olsem bipo long ol samting bilong graun i pulim tingting bilong mi.”​​—Saveman 4:6; Matyu 6:​24, 28-​30.

 9. Wok bilong yumi inap mekim wanem long ol man taim yumi mekim wok autim tok?

⁹ I no olgeta man inap mekim wok autim tok fultaim. Sapos yu karim hevi bilong lapun, o sik, o ol narapela samting, orait yu mas save olsem Jehova i tingim tru pasin bilong yu long stap gut long em na em i tingim wanem wanem wok yu givim bel olgeta long mekim. (Luk 21:​2, 3) Olsem na yumi wan wan i no ken ting olsem wok yumi mekim, maski em i liklik wok tasol, em i samting nating na i no inap helpim ol narapela, nogat. Tingim: Ating yumi go long sampela haus na i no gat wanpela man i amamas long harim tok yumi laik autim. Tasol taim yumi lusim ol dispela haus na i go, ol haus lain inap stori planti long yumi bin go long haus bilong ol, maski ol i no bin opim dua long yumi! Yumi save olsem ol man i harim gutnius, i no olgeta bilong ol bai bihainim tok ol i harim, tasol sampela bai bihainim. (Matyu 13:​19-​23) Ating sampela bai bihainim tok taim ol samting long graun o ol samting long i stap bilong ol yet i senis. Tasol maski ol man i harim o nogat, yumi mekim wok bilong God taim yumi autim tok inap long skel bilong yumi. Yumi stap olsem ol “wanwok bilong God.”​​—1 Korin 3:9.

10. Olgeta long kongrigesen inap mekim wanem ol wok?

¹⁰ Na tu, yumi olgeta inap helpim ol wanfamili bilong yumi na ol bratasista bilong yumi long kongrigesen Kristen. (Galesia 6:​10) Gutpela pasin bilong yumi inap helpim tru ol narapela. (Saveman 11:​1, 6) Taim ol elda na ol kongrigesen sevan i mekim gut wok bilong ol, ol i helpim kongrigesen long stap gut na stap strong long ol samting bilong lotu, na wok Kristen i kamap bikpela moa. Yumi ken bilip olsem taim yumi “wok strong long mekim wok bilong Bikpela,” hatwok bilong yumi “bai i no inap lus nating.”​​—1 Korin 15:58.

Laik Bilong God​—Putim Olsem Wok Yu Laik Mekim Oltaim

11. Yumi inap wok wantaim kongrigesen bilong yumi yet, tasol rot inap op long yumi ken mekim wanem ol narapela wok?

¹¹ Yumi ol Kristen i amamas long stap laip, na yumi laik litimapim nem bilong God long olgeta samting yumi mekim. (1 Korin 10:31) Taim yumi givim yumi yet long autim gutnius bilong Kingdom na skulim ol narapela long bihainim ol tok em Jisas i tokim yumi long en, rot bai op long yumi inap mekim planti narapela wok bilong God na dispela bai mekim yumi amamas. (Matyu 24:14; 28:​19, 20) Yumi inap wok wantaim kongrigesen bilong yumi yet, tasol rot inap op tu long yumi ken mekim wok long hap we ol i sot tru long ol man bilong autim gutnius, ating long narapela teritori, o long kongrigesen i mekim narapela tokples, o long narapela kantri. Ol elda na ol kongrigesen sevan em ol i stap singel yet na ol i winim ol mak, ol inap i go long Ministerial Trening Skul. Taim ol i grediuet pinis, ol bai i go mekim wok long ol kongrigesen i sot long ol strongpela Kristen, ating long kantri bilong ol yet o long narapela kantri. Ol marit em ol i mekim wok autim tok fultaim, ol inap winim ol mak bilong i go long Skul Gileat bilong kamap misineri, na bihain ol i go mekim wok long narapela kantri. Na oltaim ol i nidim ol volantia long mekim wok long Betel na long sanapim na stretim ol Haus Kingdom na ol brens ofis.

12, 13. (a) Olsem wanem yu inap makim ol wok yu laik mekim? (b) Save yu kisim long wanpela asainmen inap helpim yu long mekim wok long ol narapela asainmen. Stori long dispela.

¹² Yu inap mekim wanem wok? Sapos yu dediket pinis long Jehova, orait oltaim yu mas lukluk i go long em na long oganaisesen bilong em long stiaim yu. “Gutpela spirit” bilong em bai helpim yu long mekim gutpela disisen. (Nehemia 9:​20) Taim yu kisim wanpela asainmen, dispela inap opim rot long yu kisim narapela asainmen, na ol save yu kisim long wanpela asainmen inap helpim yu long mekim narapela asainmen.

¹³ Olsem: Dennis na meri bilong em Jenny, oltaim tupela i save helpim wok bilong sanapim ol Haus Kingdom. Taim Saiklon Katrina i kamap long hap saut bilong Yunaitet Stets, tupela i volantia long helpim ol manmeri i kisim hevi. Dennis i tok: “Save em mipela i bin kisim long wok bilong sanapim ol Haus Kingdom, mipela i yusim dispela save long helpim ol brata bilong mipela, na dispela i givim bikpela amamas long mipela. Ol brata em mipela i helpim, ol i tenkyu long mipela na dispela i mekim gut bel bilong mipela. Ol haus em sampela lain i wokim gen long dispela hap ol i no planti tumas. Ol Witnes Bilong Jehova i stretim pinis na wokim gen planti haus, winim 5,300, na planti Haus Kingdom tu. Ol manmeri i lukim dispela na nau ol i amamas long harim tok mipela i autim.”

14. Yu ken mekim wanem sapos yu laik insait long wok autim tok fultaim?

¹⁴ Olsem wanem? Yu inap mekim laik bilong God, olsem makim wok bilong autim tok fultaim olsem wanpela wok yu laik mekim oltaim? Sapos yu mekim olsem, orait yu bai kisim planti blesing. Sapos sindaun bilong yu long nau i pasim yu long mekim olsem, orait ating yu ken mekim sampela senis. Bihainim pasin bilong Nehemia, em i bin beten taim em i laik mekim wanpela bikpela wok. Em i tok: “Mi laik bai yu harim dispela prea nau mi mekim.” (Nehemia 1:​11) Taim yu beten pinis, yu mas bilip long dispela Man bilong “harim beten,” na mekim samting i stret wantaim beten bilong yu. (Song 65:2) Yu mas mekim ol dispela samting bambai Jehova i ken blesim ol hatwok yu mekim bilong mekim bikpela wok bilong em. Taim yu mekim disisen pinis long insait long wok autim tok fultaim, orait yu mas bihainim disisen bilong yu. Taim yu mekim wok inap sampela taim pinis, yu bai kisim planti save moa long pasin bilong mekim wok, na amamas bilong yu bai kamap bikpela.

Wanpela Laip i Gat As Tru Bilong En

15. (a) Taim yumi toktok wantaim ol wokman bilong God em ol i mekim wok inap planti yia pinis o yumi ritim stori bilong ol, dispela bai helpim yumi olsem wanem? (b) Kamapim wanpela laip stori i bin strongim gut yu.

¹⁵ Wanem ol samting inap kamap taim yu mekim laik bilong God? Toktok wantaim ol wokman bilong Jehova em ol i mekim wok inap planti yia pinis, na moa yet em lain i mekim wok autim tok fultaim inap planti yia pinis. Laip bilong ol i gat as tru bilong en! (Sindaun 10:22) Ol bai tokim yu olsem oltaim Jehova i bin helpim ol long kisim ol samting ol i mas i gat, na ol i kisim planti samting moa, maski em long taim nogut. (Filipai 4:​11-​13) Inap planti yia ol Wastaua i bin kamapim laip stori bilong sampela bratasista em ol i bin stap gut long God. Olgeta wan wan laip stori i kamapim pasin bilong givim bel tru long mekim wok na amamas em man i kisim, na em i kain olsem ol stori i stap long Buk Aposel long Baibel. Taim yu ritim ol kain gutpela stori olsem, dispela bai kirapim yu long tok, ‘Mi laikim kain laip olsem!’

16. Wanem samting i mekim na laip bilong Kristen i gat as bilong en na em i stap amamas?

¹⁶ Aaron, em yumi bin stori long em long kirap bilong stori, em i tok: “Long Afrika, planti taim mi bin bungim ol yangpela em ol i raun bilong painim rot bilong mekim i stap bilong ol i gat as bilong en. Tasol planti i no painim dispela samting. Tasol mipela i wok long mekim laik bilong God long rot bilong autim gutnius bilong Kingdom, na mipela i gat planti wok bilong mekim na laip bilong mipela i gat as bilong en. Mipela yet i bin lukim klia tru olsem amamas bilong man i givim samting, dispela i winim tru amamas bilong man i kisim samting.”​​—Aposel 20:35.

17. Bilong wanem yumi mas mekim laik bilong God long nau?

¹⁷ Olsem wanem long yu? Yu wok long mekim wanem wok long i stap bilong yu? Sapos i no gat wanpela samting i stap olsem mak yu laik winim long samting bilong lotu, orait ol narapela wok bai pulim nating taim na strong bilong yu. Laip bilong yu em i gutpela samting, no ken larim ol samting long graun bilong Satan i pulim yu na yu tromoi nating laip bilong yu. Klostu nau bai “bikpela hevi tru” i kamap, na mani kago na biknem bilong graun bai i no inap helpim yu. Samting bilong helpim yumi em pasin bilong yumi long pas gut wantaim Jehova. Yumi bai tenkyu tru olsem yumi bin mekim wok bilong God na helpim ol narapela, na yumi bin givim bel tru long mekim laik bilong God long i stap bilong yumi!​​—Matyu 24:21; KTH 7:​14, 15.

[Ol Futnot]

Yu Inap Stori Long Dispela?

• Jehova i ting olsem wanem long wok bilong em yumi mekim?

• Taim yumi bihainim stretpela tingting, olsem wanem dispela i helpim yumi long mekim wok bilong God na helpim ol narapela?

• Rot i op long yumi inap mekim wanem ol wok?

• Yumi ken mekim wanem bambai i stap bilong yumi long nau i gat as tru bilong en?

[Ol Piksa long pes 23]

Yumi mas i gat stretpela tingting bambai yumi inap wok yet long givim bel olgeta long mekim wok bilong Jehova

[Ol Piksa long pes 24]

I gat planti kain kain wok yumi inap mekim long wok bilong God