Baibel i Tok Wanem?
Yu Ting Ol Kristen i Mas i Stap Rabis?
WANPELA taim Jisas i tokim wanpela yangpela maniman i gat namba long em i mas salim olgeta samting bilong em, na dispela mani em i kisim em i mas givim long ol rabisman. Baibel i tok taim em i harim dispela tok bilong Jisas, pes bilong em i kamap nogut na bel bilong em i hevi, long wanem, “em i gat planti samting tru.” Jisas i tokim ol disaipel: “Ol man i gat planti samting ol bai i hatwok tru long i go insait long kingdom bilong God.” Na Jisas i tok moa: “Kamel i laik i go insait long hul bilong nil bilong samap, em i no gat hatwok olsem maniman i laik i go insait long kingdom bilong God.”—Mak 10:21-23; Matyu 19:24.
Wanem mining bilong dispela tok bilong Jisas? Yu ting pasin bilong holim planti mani i no stret wantaim trupela lotu? Sapos Kristen i gat planti mani, bel bilong em i mas i gat tok long dispela? God i laik bai Kristen i mas sakim ol gutpela samting bilong skin?
God i Amamas Long Olgeta Kain Man
Long bipo, God i no tokim ol Israel long ol i mas i stap rabis, nogat. Tingim: Taim ol i kisim pinis graun God i givim long ol, ol i save mekim wok gaden na insait long sampela wok bisnis bilong lukautim ol yet na famili bilong ol. Tasol ol samting olsem sik, o bikpela hevi bilong mani, o no gat ren, o sot long save long lukautim bisnis, ol dispela samting inap mekim na hatwok bilong ol inap lus nating. Lo Bilong Moses i tokim ol Israel long mekim pasin sori long man sapos em i kisim hevi long mani na i kamap rabisman. (Wok Pris 25:35-40) Tasol sampela Israel i kamap maniman. Baibel i tok Boas—em wanpela bilipman i bihainim stretpela pasin na i kamap wanpela tumbuna bilong Jisas Krais—em i “wanpela man i gat planti mani.”—Rut 2:1, NW.
Na i wankain tu long taim bilong Jisas. Taim Jisas i toktok wantaim dispela maniman, em yumi toktok long em long kirap bilong dispela stori, Jisas i no gat tingting long kirapim ol man long sakim ol gutpela samting bilong skin, nogat. Em i laik skulim ol man long wanpela bikpela samting. Long tingting bilong ol man bilong graun, ating i luk olsem ol maniman i no inap mekim pasin daun na bilip long rot God i bin wokim bilong kisim bek ol man. Tasol Jisas i tok: “Ol man i no inap. Tasol God em inap long mekim olgeta samting.”—Matyu 19:26.
Kongrigesen Kristen long taim bilong ol aposel i save amamas long “olgeta [kain] manmeri.” (1 Timoti 2:4) Insait long lain Kristen, sampela i maniman, na sampela i gat gutpela sindaun, na planti i stap rabis. Ating sampela i bin bungim planti mani taim ol i no kamap Kristen yet. Na sampela, taim ol i kamap Kristen pinis, ating ol i stap long gutpela taim na bihainim gutpela tingting long wok bisnis na dispela i bin helpim ol long kisim planti mani.
Na olsem tasol, insait long lain brata Kristen long nau, sampela i gat planti mani na sampela nogat. Tasol olgeta i wok strong long bihainim ol tok Baibel i kamapim long ol samting bilong mani, long wanem, pasin bilong laikim tumas mani inap kisim olgeta kain man. Samting Jisas i bin skulim ol man long en long rot bilong stori bilong yangpela maniman, em i mas kirapim olgeta Kristen long save olsem mani na kago i gat bikpela strong na inap pulim man.—Mak 4:19.
Tok Lukaut i Go Long Ol Maniman
Baibel i no tambuim mani yet, nogat. Samting Baibel i tambuim, em pasin bilong laikim tumas mani. Man bilong raitim Baibel, em Pol, i tok: “Pasin bilong laikim tumas mani em i as bilong olgeta pasin nogut.” Em i tok sampela man i bin givim baksait long ol samting bilong spirit na ol i wok long kisim planti mani, na “dispela pasin i [bin] pulim ol na ol i lusim bilip pinis, na ol i karim bikpela hevi moa.”—1 Timoti 6:10.
Sampela tok bilong Pol i bilong ol maniman. Em i tok: “Tokim ol man i gat planti mani samting bilong dispela graun long ol i no ken bikhet na litimapim nem bilong ol yet. Ol i no ken bilip long ol dispela kain samting i save bagarap kwik. Nogat. Ol i mas bilip tru long God, em God i save givim yumi planti gutpela samting bilong mekim yumi amamas.” (1 Timoti 6:17) Dispela tok i makim olsem ol maniman i mas was gut—nogut ol i hambak na ting ol i winim ol narapela. Na nogut ol i ting olsem planti mani samting inap givim bel isi tru long ol—God tasol inap givim dispela samting long ol.
Ol Kristen i gat planti mani ol inap was gut olsem sapos ol i “mekim planti gutpela pasin bilong helpim ol arapela manmeri.” Ol i ken “givim planti samting long ol manmeri i sot” na “mekim gut long ol arapela.” (1 Timoti 6:18) Na ol Kristen—maski ol i maniman o rabisman—ol inap mekim wok long sampela hap mani bilong ol long helpim wok bilong autim gutnius bilong Kingdom bilong God, em wanpela bikpela wok bilong ol trupela Kristen long nau. Taim ol i mekim olsem, ol i kamapim klia ol i gat stretpela tingting long mani kago samting, na God Jehova na Jisas Krais bai laikim ol—ol i save laikim man i amamas na i givim ol samting.—Matyu 24:14; Luk 16:9; 2 Korin 9:7.
Ol Samting i Bikpela Samting Tru
Tru tumas, i no olsem ol Kristen i mas i stap rabis, nogat. Tasol ol i no ken “laikim tumas long kisim planti mani samting.” (1 Timoti 6:9) Ol i wok strong bambai ol i ken kisim mani inap long lukautim ol yet. Tasol i gat kain kain samting inap mekim na hatwok bilong ol inap kamapim gutpela samting o nogat.—Saveman 11:6.
Maski ol Kristen i gat planti mani o nogat, ol i mas “skelim gut wanem ol samting i bikpela samting tru.” (Filipai 1:10, NW ) Taim ol i putim ol samting bilong spirit i go pas, ol i wok long “bungim planti samting bilong helpim ol bihain, na ol bai i kisim dispela laip em i laip tru.”—1 Timoti 6:19.