Ol Yangpela—Bungim Planti Samting Bilong Helpim Yupela Bihain
1 Wanem nambawan bikpela samting long tingting bilong yu? Yu save tingting long wanem ol samting? Ol nambawan laik bilong yu em long ol samting i stap nau, o ol samting bai kamap bihain, em ol samting God i bin tok promis long en? (Mt. 6:24, 31-33; Lu. 8:14) Pasin bilong Abraham na Moses i kamapim klia olsem yumi mas i gat strongpela bilip bambai yumi inap bihainim ol tok bilong God. (Hi. 11:8-10, 24-26) Olsem wanem yu inap kisim kain bilip olsem na bungim “planti samting bilong helpim [yu] bihain”?—1 Ti. 6:19.
2 Painim Jehova: Sapos yu save mekim ol wok bilong spirit wantaim famili bilong yu, dispela em i gutpela. Tasol no ken ting olsem dispela tasol bai helpim yu long kisim strongpela bilip. Bilong “save gut long God,” yu yet i mas painim Jehova. (Snd. 2:3-5; 1 Sto. 28:9) Yangpela King Josaia i bin mekim olsem. Maski em i kamap bikpela insait long famili i no stap gutpela piksa long ol samting bilong spirit, “em i stat long lotu long God bilong tumbuna bilong en, King Devit” taim em i gat 15 krismas.—2 Sto. 34:3.
3 Olsem wanem yu inap painim Jehova? Yu inap mekim olsem long rot bilong skelim ol samting yu bilip long en bambai yu inap “save tru” olsem em tok i tru. (Ro. 12:2) Olsem: Yu inap stori gut long ol tok Baibel i mekim long blut o yu inap kamapim klia olsem Kingdom bilong God i kirap mekim wok pinis long heven long 1914? Pasin bilong kisim “save long as bilong tok tru” i bikpela samting long wok bilong bungim ol samting bilong helpim yumi bihain.—1 Ti. 2:3, 4.
4 Pasin bilong Josaia long painim God i kamapim ol gutpela samting. Paslain long em i winim 20 krismas, em i strongim bel long rausim ol pasin bilong lotu giaman. (2 Sto. 34:3-7) Olsem Josaia, taim yu wok long kamap strong long ol samting bilong spirit, pasin bilong yu bai kamapim klia dispela samting. (1 Ti. 4:15) Sapos yu wanpela pablisa i no baptais yet, wok strong long mekim wok autim tok bilong yu i kamap gutpela moa. No ken amamas long tilim ol nius tasol, nogat. Putim mak long yusim Baibel long toktok gut wantaim ol man, na long kirapim laik bilong man i laik harim tok. (Ro. 12:7) Dispela bai helpim yu long kamap strong long ol samting bilong spirit.
5 Givim Ol Gutpela Samting Tru Long Jehova: Taim yu kamapim klia dediket bilong yu long Jehova long rot bilong baptais, yu kisim namba long i stap wokman bilong God. (2 Ko. 3:5, 6) Dispela i opim rot long yu inap wok fultaim long mekim wok bilong Jehova. Yu inap mekim ol kain wok olsem wok painia, wok long Betel, na wok bilong sanapim ol Haus Kingdom. Na tu, yu ken lainim narapela tok ples o go mekim wok long hap i sot tru long ol man bilong autim tok.
6 Tru, i no olgeta inap mekim ol dispela gutpela wok, tasol yumi wan wan inap givim gutpela samting tru long Jehova. (Mt. 22:37) Maski yu gat wanem kain sindaun, pasin bilong mekim wok bilong Jehova i mas i stap nambawan samting long laip bilong yu. (Sng. 16:5) Taim yu mekim olsem, yu bai bungim ol samting bilong helpim yu bihain.
[Askim Bilong Stadi]
1. Bilong wanem ol yangpela Kristen i mas kisim strongpela bilip?
2. Pasin bilong King Josaia i skulim yumi long wanem samting?
3. Olsem wanem ol yangpela Kristen long nau inap painim Jehova?
4. Olsem wanem ol pablisa i no baptais yet ol i ken kamapim klia olsem ol i wok long kamap strong?
5. Ol Kristen i baptais pinis ol i gat wanem ol rot bilong mekim wok autim tok bilong ol i kamap bikpela moa?
6. Olsem wanem yumi olgeta inap bungim ol samting bilong helpim yumi bihain?