Wokabaut Wantaim God Long Dispela Taim Nogut
“God i kisim em na ol man i no lukim em moa, . . . oltaim [Enok] i bin i stap pren tru bilong God.”—STAT 5:24.
1. Wanem sampela samting long taim bilong yumi i givim hatwok long yumi?
TAIM NOGUT! Dispela tok i makim stret ol yia bilong kros na pait i bin kirap long taim Kingdom Bilong Mesaia i kamap long 1914 na i kam inap nau. Insait long dispela haptaim, ol man i stap long “taim bilong las de.” Ol hevi olsem bikpela hangre, sik, guria, na pait i mekim save long ol man winim ol narapela taim bipo. (2 Timoti 3:1; KTH 6:1-8) Ol dispela samting i save painim tu ol man i lotuim Jehova. Yumi olgeta i karim sampela hevi long nau. Sot long mani, gavman i no stap strong, pasin raskol, na sik em sampela samting i givim bikpela hatwok long yumi.
2. Wanem hevi i bin painim ol wokboi bilong Jehova?
2 Na tu, planti wokboi bilong Jehova i bin karim hevi planti taim long ol man i mekim nogut tru long ol, as bilong dispela em Satan i no malolo long pait long “ol dispela manmeri i save bihainim ol lo bilong God, na ol i save autim tok bilong Jisas.” (KTH 12:17) Maski yumi olgeta i no bin karim hevi long ol man i mekim nogut long yumi, olgeta trupela Kristen i mas wok strong long sakim Satan na spirit, o tingting, bilong dispela graun em i kirapim ol man long bihainim. (Efesus 2:2; 6:12) Oltaim yumi mas was i stap na bai dispela tingting i no ken pulim yumi long ples wok, long skul, na long ol narapela hap we yumi save bungim ol man i no laik save long lotu i tru.
Wokabaut Wantaim God, No Ken Wokabaut Wantaim Ol Haiden
3, 4. Olsem wanem ol Kristen i narapela kain long ol man bilong graun?
3 Ol Kristen long taim bilong ol aposel, ol tu i bin pait strong long sakim tingting bilong dispela graun, na dispela i mekim ol i stap narapela kain tru long ol man i no insait long kongrigesen Kristen. Pol i stori long dispela olsem: “Olsem na mi laik mekim wanpela tok long yupela. Long nem bilong Bikpela mi tokaut strong olsem, yupela i no ken wokabaut moa long pasin bilong ol haiden. Tingting bilong ol i paul olgeta, na save bilong ol i olsem tudak. Ol i no gat save tru, na bel bilong ol i pas, olsem na ol i stap ausait long laip bilong God. Ol i no save sem moa long pasin ol i save mekim. Ol i go insait tru long pasin nogut, na bel bilong ol i kirap tru long mekim ol kain kain pasin doti.”—Efesus 4:17-19.
4 Dispela tok i kamapim klia tru bikpela tudak bilong spirit na pasin nogut i stap long graun—long taim bilong Pol na long taim bilong yumi tu! Wankain olsem ol Kristen bilong pastaim, ol Kristen long nau i no ‘wokabaut long pasin bilong ol haiden.’ Ol i amamas long wokabaut wantaim God. Tru, ating sampela man i no ting man nating i gat sin inap wokabaut wantaim Jehova. Tasol Baibel i soim olsem ol inap. Na tu, Jehova i tok ol i mas mekim olsem. Long 700 B.C.E. samting, profet Maika i tok: ‘Bikpela i laik bai yumi mas bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim [“wokabaut wantaim,” NW ] God bilong yumi.’—Maika 6:8.
Olsem Wanem na Bilong Wanem Ol i Wokabaut Wantaim God?
5. Olsem wanem man i gat sin inap wokabaut wantaim God?
5 Olsem wanem yumi inap wokabaut wantaim God i gat olgeta strong em yumi no inap lukim? I no long wankain pasin olsem yumi save wokabaut wantaim wanpela man i stap long graun. Long Baibel dispela tok “wokabaut” inap makim “wanpela kain pasin man i bihainim.”a Olsem na yumi save man i wokabaut wantaim God em i bihainim ol pasin God i makim na i amamas long en. Kain wokabaut olsem i mekim yumi stap narapela kain long ol manmeri yumi stap namel long ol. Dispela tasol em i stretpela rot bilong wanpela Kristen long makim bilong bihainim. I gat planti as na mipela i tok olsem.
6, 7. Bilong wanem pasin bilong wokabaut wantaim God em i nambawan gutpela rot long bihainim?
6 Namba wan, Jehova em i Man Bilong Wokim yumi, em i As bilong laip bilong yumi, na Man Bilong Givim yumi ol samting yumi mas i gat bilong stap laip. (KTH 4:11) Olsem na em tasol i gat rait long tokim yumi long olsem wanem yumi mas wokabaut. Pasin bilong wokabaut wantaim God em i nambawan gutpela rot long bihainim. Jehova i stretim pinis rot bilong lusim sin bilong ol man i wokabaut wantaim em, na em bai givim laip oltaim long ol. Na tu, gutpela Papa bilong yumi long heven i kamapim ol savetok i helpim ol man i wokabaut wantaim em long kisim gutpela sindaun long nau maski ol i gat sin na ol i stap long graun em Satan i bosim. (Jon 3:16; 2 Timoti 3:15, 16; 1 Jon 1:8; 2:25; 5:19) Narapela as na yumi wokabaut wantaim God em long wanem, pasin bilong yumi long amamas long mekim olsem i helpim bel isi na pasin wanbel bilong kongrigesen.—Kolosi 3:15, 16.
7 Nambawan bikpela samting, taim yumi wokabaut wantaim God, yumi kamapim tingting bilong yumi long bikpela tok i bin kamap long gaden Iden long husat i mas i stap nambawan bos. (Stat 3:1-6) Pasin yumi bihainim i soim olsem yumi stap strong olgeta long sait bilong Jehova, na yumi no pret long autim tok olsem i stret em tasol i stap King. (Song 83:18) Long dispela rot yumi mekim pasin i stret wantaim beten bilong yumi olsem nem bilong God i mas stap holi na laik bilong em i mas kamap. (Matyu 6:9, 10) Ol man i wokabaut wantaim God i bihainim tru savetingting! Ol i ken save olsem ol i bihainim stretpela rot, long wanem, Jehova “tasol i gat save tru.” Em i no save popaia.—Rom 16:27.
8. Olsem wanem haptaim Enok na Noa i bin stap long en i wankain liklik olsem taim bilong yumi?
8 Tasol olsem wanem man inap wokabaut olsem wanpela Kristen long dispela taim bilong hevi na klostu olgeta manmeri i no gat laik long mekim wok bilong Jehova? Yumi kisim bekim bilong dispela askim taim yumi tingim ol bilipman bilong bipo tru em ol i bin holimpas bilip long taim nogut. Tupela bilong ol em Enok na Noa. Tupela wantaim i bin i stap long wanpela haptaim i wankain liklik olsem taim bilong yumi. Pasin nogut i bikpela tru. Long taim bilong Noa pasin bilong bagarapim man na pasin pamuk i bikpela tru. Tasol Enok na Noa i bin sakim ol tingting nogut ol man i bihainim long taim bilong ol na ol i wokabaut wantaim Jehova. Olsem wanem ol inap mekim olsem? Bilong bekim dispela askim, long dispela stadi bai yumi skelim ol samting Enok i bin mekim. Na long stadi i kamap bihain, bai yumi skelim ol samting Noa i bin mekim.
Enok i Bin Wokabaut Wantaim God Long Taim Bilong Hevi
9. Yumi gat wanem save long Enok?
9 Enok em i namba wan man em Baibel i tok olsem em i wokabaut wantaim God. Baibel i tok: “Enok em i pren tru bilong God [“wokabaut wantaim God,” NW ].” (Stat 5:22) Bihain long Baibel i kamapim hamas yia Enok i stap laip—long yumi yet em i longpela taim, tasol long taim em i stap long en, em i sotpela taim—Baibel i tok oltaim Enok i bin wokabaut wantaim God, na bihain “God i kisim em na ol man i no lukim em moa.” (Stat 5:24) I luk olsem Jehova i kisim laip bilong Enok na em i dai na bai ol birua i no inap bagarapim em. (Hibru 11:5, 13; NW ) Baibel i no stori planti long Enok, ol dispela sotpela ves tasol i stori long em. Tasol ol samting yumi save long en na ol narapela samting i olsem as na yumi ken ting Enok i stap long taim nogut.
10, 11. (a) Olsem wanem pasin nogut i bin go bikpela bihain long Adam na Iv i bikhet? (b) Enok i autim wanem tok profet? Yumi ken ting ol man i mekim wanem taim ol i harim dispela tok?
10 Tingim olsem wanem pasin nogut i bin go bikpela kwiktaim bihain long Adam i mekim sin. Baibel i tok namba wan pikinini bilong Adam, Kein, i kamap namba wan man bilong kilim i dai narapela long taim em i kilim i dai brata bilong em Abel. (Stat 4:8-10) Bihain long Abel i dai, Adam na Iv i karim narapela pikinini man, na ol i kolim em Set. Baibel i tok long em olsem: “Bihain Set i gat pikinini man, nem bilong en Enos. Long dispela taim ol man i stat long kolim nem bilong Bikpela.” (Stat 4:25, 26) Sori tru, taim ol i “kolim nem bilong Bikpela,” ol i mekim long pasin i makim olsem ol i tromoi lotu i tru.b Planti yia bihain long mama i karim Enos, wanpela tumbuna pikinini bilong Kein, em Lamek, em i wokim wanpela singsing bilong tupela meri bilong em, na singsing i tokaut olsem em i bin kilim i dai wanpela yangpela man husat i bin paitim em. Em i mekim dispela tok lukaut tu: “Sapos wanpela man i kilim Kein orait em bai i kisim bikpela hevi moa. Tasol man i paitim mi, em bai i kisim bikpela hevi moa moa yet.”—Stat 4:10, 19, 23, 24.
11 Ol dispela sotpela tok i soim olsem kwiktaim pasin nogut Satan i bin kirapim long gaden Iden i go bikpela namel long ol tumbuna pikinini bilong Adam. Long dispela taim Enok i mekim wok olsem profet bilong Jehova, na strongpela tok Jehova i kirapim em long kamapim i bikpela samting long nau tu. Jut i tok Enok i tok profet olsem: “Mi lukim Bikpela i kam wantaim ol planti tausen ensel bilong en. Em i laik kotim olgeta man na mekim save long ol. Em i laik mekim ol man i no save bihainim em i pilim tru asua bilong olgeta pasin nogut ol i bin mekim. Sampela man bilong mekim sin, ol i save givim baksait long God moa yet. Olsem na God i laik mekim ol dispela man i pilim tru asua bilong ol kain kain tok nogut ol i bin mekim long em.” (Jut 14, 15) Dispela tok bai i gat laspela truim bilong en long Armagedon. (KTH 16:14, 16) Tasol yumi ken save gut olsem long taim bilong Enok tu, i bin i gat planti ‘man bilong sin i givim baksait long God’ em ol i bin kros long tok profet bilong Enok. Gutpela tru Jehova i bin kisim dispela profet na bai ol i no inap bagarapim em!
Wanem Samting i Bin Strongim Enok Long Wokabaut Wantaim God?
12. Wanem samting i mekim na Enok i no wankain olsem ol arapela man i stap long taim bilong em?
12 Long gaden Iden, Adam na Iv i bin harim tok bilong Satan, na Adam i bin sakim Jehova. (Stat 3:1-6) Pikinini bilong ol, Abel, em i bihainim narapela rot, na Jehova i amamas long em. (Stat 4:3, 4) Sori tru, klostu olgeta pikinini bilong Adam i no olsem Abel. Tasol Enok, em i kamap sampela handet yia bihain, em i wankain olsem Abel. Wanem samting i mekim na Enok i narapela kain long planti arapela tumbuna pikinini bilong Adam? Aposel Pol i bekim dispela askim taim em i tok: “Enok i bilip long God, olsem na God i kisim em i go . . . bai em i no ken i dai. Ol man ol i wok long painim em, tasol ol i no lukim em, long wanem, God i kisim em pinis. Na buk bilong God i tok, taim God i no kisim Enok yet, pasin bilong Enok i gutpela long ai bilong God.” (Hibru 11:5) Enok i insait long dispela bikpela lain “manmeri bilong bipo [paslain long taim bilong ol Kristen] ol i sanap na raunim yumi i stap olsem bikpela klaut,” em ol i nambawan gutpela piksa long pasin bilong bilip. (Hibru 12:1) Bilip i bin helpim Enok long sanap strong na mekim pasin i stret insait long dispela 300 yia em i stap laip—dispela i winim tru haptaim bilong yumi yet long stap laip!
13. Enok i gat wanem kain bilip?
13 Pol i stori long bilip bilong Enok na ol arapela witnes taim em i tok: “Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.” (Hibru 11:1) Yes, pasin bilong bilip i olsem yumi save gut tru, na ol tok promis i as bilong dispela, em ol samting yumi wetim bai kamap tru. Em i strongpela tingting tru, em i stiaim samting yumi makim olsem nambawan bikpela samting long laip bilong yumi. Dispela kain bilip i bin inapim Enok long wokabaut wantaim God maski em i stap namel long ol man i no bin mekim olsem.
14. Ating wanem stretpela save i bin stap olsem as bilong bilip bilong Enok?
14 Stretpela save em i as bilong trupela pasin bilong bilip. Enok i gat wanem save? (Rom 10:14, 17; 1 Timoti 2:4) Em i bin save long ol samting i bin kamap long Iden. Na ating em i bin harim stori long i gat wanem kain sindaun long gaden Iden—long taim bilong em ating gaden i stap yet, tasol i tambu long ol man i go insait. (Stat 3:23, 24) Na em i save long tingting bilong God olsem ol pikinini bilong Adam bai pulapim dispela graun na mekim graun olgeta i kamap wankain olsem Paradais long Iden. (Stat 1:28) Na tu, Enok i bin tingim tru promis bilong Jehova long kamapim wanpela Pikinini, dispela pikinini bai krungutim het bilong Satan na stretim olgeta samting pasin giaman bilong Satan i bin kamapim. (Stat 3:15) Tru tumas, tok profet bilong Enok, i stap long Buk Jut, i stori long bagarap bilong lain bilong Satan. Enok i gat bilip, olsem na yumi save em i lotuim Jehova na bilip olsem Jehova em i “save mekim gut tru long ol man i wok long painim em.” (Hibru 11:6) Tru, Enok i no save long ol samting yumi save long en, tasol save em i gat em inap na bai i gat as long strongpela bilip bilong em. Kain bilip olsem i helpim em long stap gut long God long taim nogut.
Bihainim Pasin Bilong Enok
15, 16. Olsem wanem yumi ken bihainim rot Enok i makim?
15 Olsem Enok, yumi laik amamasim Jehova long dispela taim nogut bilong nau, olsem na i gutpela yumi bihainim pasin bilong Enok. Yumi mas kisim stretpela save long Jehova na long ol samting em i tingting pinis long mekim na holimpas dispela stretpela save. Tasol yumi mas mekim sampela samting moa. Yumi mas larim stretpela save i bosim wokabaut bilong yumi. (Song 119:101; 2 Pita 1:19) Tingting bilong God i mas stiaim yumi, oltaim yumi laik bai olgeta tingting na pasin yumi mekim i givim amamas long em.
16 Yumi no save husat moa i mekim wok bilong Jehova long taim bilong Enok, tasol yumi ken ting em wanpela tasol i mekim o em i insait long wanpela liklik lain i mekim olsem. Yumi tu i stap olsem wanpela liklik lain long dispela graun, tasol yumi no bel hevi long dispela. Jehova i save sambai long yumi maski husat i birua long yumi. (Rom 8:31) Enok i no pret long mekim tok lukaut olsem ol man nogut bai bagarap. Yumi tu i no pret taim yumi autim “dispela gutnius bilong kingdom bilong God” maski ol man i tok bilas, birua, na mekim nogut long yumi. (Matyu 24:14) Enok i no bin stap laip longpela taim olsem ol arapela man long taim bilong em. Tasol hop bilong em i no long ol samting i stap long taim bilong em. Em i putim tingting bilong em i go long samting i gutpela moa. (Hibru 11:10, 35) Yumi tu i putim tingting bilong yumi i go long truim bilong ol samting Jehova i tingting pinis long mekim. Olsem na yumi no insait tumas long ol samting bilong dispela graun. (1 Korin 7:31) Nogat. Yumi yusim strong na mani samting bilong yumi long mekim wok bilong Jehova.
17. Yumi gat wanem save em Enok i no bin i gat? Dispela save i mas mekim wanem long yumi?
17 Enok i bilip olsem Pikinini em God i tok promis long en bai kamap long taim Jehova i makim. Long nau em i klostu 2,000 yia bihain long taim dispela Pikinini—Jisas Krais—i bin kamap, na em i givim pe bilong baim bek man, na opim rot long yumi na ol arapela gutpela witnes bilong bipo olsem Enok long kisim laip oltaim. Dispela Pikinini, nau em i stap King bilong Kingdom Bilong God, em i rausim Satan long heven i kam daun long graun, na yumi lukim ol bikpela hevi dispela i kamapim. (KTH 12:12) Yes, i gat planti samting yumi inap kisim save long en long nau, winim tru ol save Enok i gat rot long kisim. Olsem na bilip bilong yumi i mas strong, olsem bilip bilong Enok i strong. Pasin bilong bilip long truim bilong ol tok promis bilong God i mas bosim olgeta samting yumi mekim. Yumi laik stap olsem Enok na wokabaut wantaim God, maski yumi stap long taim nogut.
[Ol Futnot]
a Lukim Volium 1, pes 220, paragraf 6, bilong buk Insight on the Scriptures, em ol Witnes Bilong Jehova i wokim.
b Paslain long taim bilong Enos, Jehova i bin toktok wantaim Adam. Abel i bin givim ofa Jehova i amamas long en. Na God i bin toktok wantaim Kein paslain long pasin bilong bel nogut i bin kirapim em long kilim i dai man. Olsem na taim ol man i kirap “kolim nem bilong Bikpela,” ol i mekim nupela samting, ol i no mekim long pasin bilong lotu i tru.
Bai Yu Bekim Olsem Wanem?
• Wokabaut wantaim God i makim wanem samting?
• Bilong wanem pasin bilong wokabaut wantaim God em i nambawan gutpela rot long bihainim?
• Wanem samting i bin helpim Enok long wokabaut wantaim God maski em i stap long taim nogut?
• Olsem wanem yumi inap bihainim pasin bilong Enok?
[Piksa long pes 15]
Bilip i mekim na oltaim Enok i bin wokabaut wantaim God
[Piksa long pes 17]
Mipela bilip olsem ol tok promis bilong Jehova bai kamap tru
[Ol Piksa Kredit Lain long pes 13]
Woman, far right: FAO photo/B. Imevbore; collapsing building: San Hong R-C Picture Company