Yumi Bilip na Wokabaut!
“Yumi bilip tasol long em na yumi wokabaut. Yumi no lukim em yet.”—2 KORIN 5:7.
1. Wanem samting i soim olsem aposel Pol i bilip na wokabaut?
EM YIA 55 C.E. Inap 20 yia i lus pinis bihain long taim wanpela man nem bilong em Sol—pastaim em i bin mekim nogut tru long ol Kristen—em i kamap Kristen. Planti yia i bin lus, tasol em i no larim dispela i daunim bilip bilong em long God, nogat. Maski, em i no bin lukim ol samting long heven long ai tru bilong em, em i bilip strong. Olsem na taim aposel Pol i raitim pas long ol Kristen God i bin makim—ol i bilong kisim laip long heven—em i tok: “Yumi bilip tasol long em na yumi wokabaut. Yumi no lukim em yet.”—2 Korin 5:7.
2, 3. (a) Olsem wanem yumi kamapim klia olsem yumi bilip na wokabaut? (b) Wanem mining bilong dispela hap tok olsem lukluk na wokabaut?
2 Bilong yumi ken bilip na wokabaut, yumi mas bilip tru olsem God inap stiaim wokabaut bilong yumi. Yumi mas bilip tru olsem em i save tru long ol samting i gutpela bilong helpim yumi. (Song 119:66) Taim yumi makim ol samting yumi laik mekim na yumi mekim ol dispela samting, yumi tingim tu ol samting em “ai bilong yumi i no lukim.” (Hibru 11:1) Wanpela samting olsem em tok promis bilong “nupela skai na nupela graun.” (2 Pita 3:13) Tasol pasin bilong lukluk na wokabaut i makim olsem, ol samting yumi lukim long ai, dispela tasol i stiaim wokabaut bilong yumi. Dispela inap nogutim yumi, long wanem, em inap pulim yumi long givim baksait olgeta long laik bilong God.—Song 81:12; Saveman 11:9.
3 Maski yumi bilong “liklik lain sipsip,” em ol bai kisim laip long heven, o yumi bilong lain “arapela sipsip,” em ol bai kisim laip long graun, yumi olgeta wan wan i mas bihainim dispela tok bilong Pol long bilip na wokabaut, na no ken lukluk tasol na wokabaut. (Luk 12:32; Jon 10:16) Orait nau yumi ken stori long olsem wanem pasin bilong bihainim dispela tok bai helpim yumi long sakim pasin bilong sin, na abrusim pasin bilong laikim tumas mani kago, na yumi no ken lusim tingting olsem pinis bilong ol pasin bilong nau i klostu. Na tu, yumi bai stori long ol samting nogut inap kamap taim yumi bihainim pasin bilong lukluk tasol na wokabaut.—Hibru 11:25.
No Ken “Bihainim Pasin Bilong Sin”
4. Moses i ting mobeta em i kisim wanem samting? Bilong wanem em i mekim olsem?
4 Tingim sindaun em Moses, pikinini bilong Amram, em inap kisim. Em i bin kamap bikpela wantaim ol pikinini long famili bilong king long Isip bilong bipo, olsem na em i gat rot long kisim namba, planti mani, na bikpela strong. Moses inap tingting olsem: ‘Mi bin kisim bikpela skul long ol gutpela save bilong ol Isip, na mi inap mekim ol strongpela toktok na ol strongpela wok. Sapos mi stap yet wantaim lain bilong king, mi inap yusim namba bilong mi long helpim ol brata bilong mi bilong lain Hibru, em ol Isip i wok long mekim nogut long ol!’ (Aposel 7:22) Tasol Moses i no mekim olsem, nogat. Em i ting, mobeta em i “kisim hevi wantaim ol lain bilong God.” Bilong wanem em i mekim olsem? Wanem samting i kirapim Moses long givim baksait long ol samting bilong Isip? Baibel i tok: “Moses i bilip long God, olsem na em i kirap na i lusim Isip. King bilong Isip i belhat long em, tasol em i no pret long dispela king. Tru, yumi man i no inap lukim God long ai, tasol Moses i mekim wankain pasin olsem man i bin lukim God, na em i stap strong tru.” (Hibru 11:24-27) Moses i bilip olsem Jehova bai praisim man i bihainim stretpela pasin, na dispela i helpim em long sakim pasin bilong sin na kisim amamas bilong sotpela taim tasol.
5. Olsem wanem pasin bilong Moses i kirapim yumi?
5 Sampela taim yumi tu yumi gat wok long makim ol bikpela samting yumi mas mekim, olsem: ‘I stret mi lusim sampela pasin i no stret tumas wantaim ol stiatok bilong Baibel? I stret mi mekim wok mani em inap helpim mi long ol samting bilong skin, tasol em inap pasim mi long kamap strong long ol samting bilong spirit?’ Pasin bilong Moses i kirapim yumi long tingim olsem taim yumi laik makim ol samting yumi laik mekim, yumi no ken bihainim pasin bilong ol man bilong graun long lukluk long ol samting bilong nau tasol, nogat; yumi mas bilip long gutpela tingting na save bilong dispela Man em “yumi man i no inap lukim [em] long ai,” em God Jehova, em man husat i save lukluk i go long ol samting bilong bihain. Olsem Moses i bin mekim, i gutpela yumi tingim moa yet pasin pren bilong Jehova, winim olgeta samting bilong dispela graun.
6, 7. (a) Olsem wanem Iso i kamapim olsem em i laik bihainim pasin bilong lukluk na wokabaut? (b) Pasin bilong Iso i tok lukaut long yumi long wanem samting?
6 Yumi ken skelim Moses wantaim Iso, pikinini man bilong Aisak. Iso i laik inapim laik bilong em wantu tasol. (Stat 25:30-34) Iso i “givim baksait long God,” na long rot bilong “baim kaikai wanpela taim tasol,” em i tromoi namba bilong em olsem namba wan pikinini. (Hibru 12:16) Em i no bin skelim gut ol samting dispela bai mekim long ol lain pikinini bilong em i kamap bihain o long pasin bilong em long pas gut wantaim Jehova. Em i no tingim ol samting bilong spirit. Iso i tingim ol gutpela tok promis bilong God olsem ol i liklik samting tasol. Em i bihainim pasin bilong lukluk na wokabaut, na em i no bilip na wokabaut.
7 Pasin bilong Iso i stap olsem tok lukaut bilong yumi long nau. (1 Korin 10:11) Taim yumi mas makim ol samting yumi bai mekim, maski ol i bikpela samting o liklik samting, yumi no ken larim dispela tingting bilong graun bilong Satan olsem nau tasol yumi mas kisim samting yumi laikim, i pulim yumi. I gutpela yumi askim yumi yet: ‘Mi kamapim sampela tingting olsem bilong Iso long ol samting mi makim bilong mekim? Sapos mi mekim ol samting mi laik mekim nau, dispela bai mekim na mi putim ol samting bilong spirit i stap namba tu? Ol samting mi makim i nogutim pasin bilong mi long i stap pren bilong God na prais mi bai kisim bihain? Mi makim wanem pasin em ol narapela i ken bihainim?’ Sapos ol samting yumi makim i kamapim klia olsem yumi tingim ol samting bilong spirit, Jehova bai mekim gut long yumi.—Sindaun 10:22.
Abrusim Pasin Bilong Laikim Tumas Mani Kago
8. Jisas i givim wanem tok lukaut long ol Kristen long Laodisia? Bilong wanem yumi mas tingim dispela tok lukaut?
8 Klostu long yia 100 C.E., Jisas Krais—em i kisim biknem pinis long heven—em i givim wanpela tok long aposel Jon, na dispela tok i bilong kongrigesen i stap long Laodisia, Esia Maina. Em i wanpela tok lukaut long pasin bilong laikim tumas mani kago samting. Ol Kristen long Laodisia ol i gat planti mani kago, tasol ol i stap rabis tru long ol samting bilong spirit. Ol i larim mani kago i pasim ol long tingim ol samting bilong spirit, na ol i lusim pasin bilong bilip na wokabaut. (KTH 3:14-18) Long nau tu, pasin bilong laikim tumas mani kago i mekim wankain samting long ol man. Em i daunim bilip bilong yumi na pasim yumi long “strongim bel na ran strong long dispela resis” bilong kisim laip. (Hibru 12:1) Sapos yumi no was gut, ‘ol amamas bilong dispela graun’ inap daunim ol wok yumi mekim long ol samting bilong spirit na em inap “karamapim” olgeta.—Luk 8:14.
9. Taim yumi pilim tru na belgut long ol kaikai bilong spirit, olsem wanem dispela bai lukautim yumi?
9 Wanpela rot bilong stap gut long ol samting bilong spirit em long belgut long ol samting yumi holim pinis, na yumi no ken tingting long kisim planti samting bilong dispela graun. (1 Korin 7:31; 1 Timoti 6:6-8) Sapos yumi bilip na wokabaut na yumi no bihainim pasin bilong lukluk na wokabaut, yumi bai kisim amamas long dispela paradais bilong spirit i stap long nau. Taim yumi kisim ol gutpela kaikai bilong spirit, dispela i kirapim yumi long “singim ol song bilong amamas.” (Aisaia 65:13, 14) Na tu, yumi amamas long bung wantaim ol man i kamapim ol pasin em holi spirit i as bilong en. (Galesia 5:22, 23) Em i bikpela samting long yumi mas kisim amamas na nupela strong long ol samting bilong spirit em Jehova i givim long yumi!
10. I gutpela yumi givim wanem ol askim long yumi yet?
10 I gutpela yumi askim yumi yet olsem: ‘Mi gat wanem tingting long mani kago? Mi yusim mani kago bilong mi bilong amamasim mi yet o bilong helpim lotu i tru? Wanem samting i save helpim mi long i stap belgut moa? Mi belgut moa taim mi insait long Baibel stadi na bung wantaim ol bratasista long ol miting Kristen, o mi belgut moa taim mi no mekim ol wok Kristen long ol wiken? Mi save makim planti wiken bilong kisim amamas na mi no yusim dispela haptaim bilong autim tok na mekim ol narapela wok bilong helpim lotu i tru?’ Pasin bilong bilip na wokabaut i makim olsem yumi wok strong long mekim wok bilong Kingdom, na yumi bilip tru long ol tok promis bilong Jehova.—1 Korin 15:58.
Tingim Olsem Taim Bilong Pinis i Klostu
11. Taim yumi bilip na wokabaut, olsem wanem dispela i helpim yumi long tingim olsem pinis i klostu?
11 Taim yumi bihainim pasin bilong bilip na wokabaut, dispela i helpim yumi long abrusim ol tingting olsem pinis i longwe yet o i no inap kamap. Sampela man i daunim ol tok profet bilong Baibel, tasol yumi no mekim olsem. Yumi luksave olsem ol samting i kamap long graun i truim ol tok profet bilong Baibel long ol samting bai kamap long taim bilong yumi. (2 Pita 3:3, 4) Olsem: Tingting na pasin bilong ol man long nau i kamapim klia olsem yumi stap long “taim bilong las de.” (2 Timoti 3:1-5) Yumi bilip na i olsem yumi luksave olsem ol samting i kamap nau long graun, ol i no ol wankain samting i bin kamap bipo, nogat. Ol i insait long dispela “mak bai kamap bilong makim olsem [Krais i] kam i stap na pasin bilong dispela graun i laik pinis.”—Matyu 24:1-14, NW.
12. Olsem wanem tok bilong Jisas long Luk 21:20, 21 i kamap tru long taim bilong ol aposel?
12 Yumi ken skelim wanpela samting i bin kamap long taim bilong ol aposel na wankain samting olsem i kamap long taim bilong yumi tu. Taim Jisas Krais i bin i stap long graun, em i tok lukaut long ol disaipel bilong em: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau. Long dispela taim ol manmeri i stap long distrik Judia ol i mas ranawe i go long ples maunten. Na ol man i stap insait long Jerusalem ol i mas lusim taun na i go long narapela hap.” (Luk 21:20, 21) Dispela tok profet i kamap tru taim ol ami bilong Rom em Sestius Galus i bosim, ol i go banisim Jerusalem long 66 C.E. Tasol wantu ol ami i lusim na i go bek, na dispela i stap olsem mak ol Kristen inap luksave long en, na tu, em i givim rot long ol i ken “ranawe i go long ples maunten.” Long 70 C.E., ol ami bilong Rom i kam bek na ol i go pait long taun Jerusalem na bagarapim tempel bilong en. Josifas i tok olsem winim wan milion Juda i dai, na ol i kisim 97,000 manmeri i go kalabus. Em nau, strafe bilong kot bilong God i painim lain Juda. Ol manmeri em ol i bin bilip na wokabaut na ol i bihainim tok lukaut bilong Jisas, ol i abrusim bagarap.
13, 14. (a) Wanem ol samting bai kamap long bihain? (b) Bilong wanem yumi mas was i stap long lukim truim bilong ol tok profet bilong Baibel?
13 Wankain samting olsem i laik kamap long taim bilong yumi. Sampela lain insait long Yunaitet Nesen bai insait long wok bilong givim strafe bilong kot bilong God. Long taim bilong ol aposel, ol ami bilong Rom i stap olsem rot bilong kamapim gutaim. Olsem tasol, ol man i tingim Yunaitet Nesen olsem rot bilong kamapim gutaim. Maski ol ami bilong Rom i bin wok strong long kamapim gutaim, ol yet i kirap bagarapim Jerusalem. Long nau tu, tok profet bilong Baibel i makim olsem ol lain ami insait long Yunaitet Nesen bai tingim ol lotu olsem birua na ol bai kirap na bagarapim lain Kristendom—em Jerusalem i piksa bilong en—na olgeta arapela lain bilong Bikpela Babilon. (KTH 17:12-17) Yes, klostu nau bai olgeta lotu giaman i bagarap olgeta.
14 Taim bagarap i painim ol lotu giaman, dispela bai makim kirap bilong taim bilong bikpela hevi tru. Long laspela hap bilong bikpela hevi tru, ol narapela samting long graun bilong Satan em i no bagarap long pastaim, God bai pinisim olgeta. (Matyu 24:29, 30; KTH 16:14, 16) Taim yumi bilip na wokabaut, dispela i helpim yumi long was i stap long lukim truim bilong ol tok profet bilong Baibel. Yumi no larim wanpela samting i giamanim yumi long ting olsem God i yusim wanpela oganaisesen bilong ol man, olsem Yunaitet Nesen, long kamapim bel isi na gutaim, nogat. Olsem na i stap bilong yumi i mas kamapim klia strongpela bilip bilong yumi olsem “de bilong Bikpela i mekim kot bilong en, em i klostu.”—Sefanaia 1:14.
Lukluk na Wokabaut—Em Inap Nogutim Yumi Olsem Wanem?
15. Maski God i bin mekim gut long lain Israel, ol i bin mekim wanem rong?
15 Ol samting i bin painim ol Israel bilong bipo i kamapim klia ol samting nogut inap kamap taim yumi larim pasin bilong lukluk na wokabaut i daunim bilip bilong yumi. Maski ol Israel i bin lukim tenpela hevi i daunim ol giaman god bilong ol Isip na bihain ol i lukim God i helpim ol long brukim solwara Retsi, ol i sakim tok na wokim wanpela bulmakau gol na ol i kirap lotu long en. Skin bilong ol i les na ol i no laik wet moa taim ol i lukim olsem Moses “i stap longpela taim long maunten na em i no kam daun kwik.” (Kisim Bek 32:1-4) Pasin bilong les kwik i kirapim ol long lotuim wanpela imis ol inap lukim long ai. Ol i bihainim pasin bilong lukluk na wokabaut, na dispela i nogutim nem bilong Jehova na em i kilim i dai “samting olsem 3,000 man.” (Kisim Bek 32:25-29) Sori tru sapos long nau wanpela man i lotuim Jehova em i mekim samting i soim olsem em i no bilip long Jehova na long strong bilong em long truim ol tok promis bilong em!
16. Pasin bilong tingim ol samting man inap lukim long ai i mekim wanem long lain Israel?
16 Pasin bilong tingim ol samting man inap lukim long ai i bin nogutim ol Israel long ol narapela rot tu. Em i mekim na ol i pret long ol birua bilong ol. (Namba 13:28, 32; Lo 1:28) Em i kirapim ol long sutim tok long namba em God i bin givim long Moses na ol i toktok planti long ol samting i painim ol. Ol i no gat bilip, na dispela pasin i kirapim ol long ting olsem kantri Isip—em ol spirit nogut i bosim—i gutpela moa winim graun em God i tok promis long givim. (Namba 14:1-4; Song 106:24) Yumi ken ting olsem Jehova i bin bel hevi tru taim em i lukim lain bilong em i mekim pasin i soim olsem ol i no daun long King bilong ol em ol i no inap lukim!
17. Wanem samting i kirapim ol Israel long sakim tok bilong Jehova long taim bilong Samuel?
17 Bihain gen, long taim bilong profet Samuel, lain Israel i bihainim pasin bilong lukluk na wokabaut. Ol man i laikim wanpela king em ol inap lukim em long ai. Maski Jehova i bin kamapim olsem em i King bilong ol, ol i no larim dispela i kirapim ol long bilip na wokabaut. (1 Samuel 8:4-9) Ol i mekim longlong pasin na ol i sakim stretpela tok bilong Jehova, long wanem, ol i laik stap wankain olsem ol narapela lain, na dispela pasin i givim hevi long ol yet.—1 Samuel 8:19, 20.
18. Yumi inap kisim wanem save long ol hevi inap kamap long pasin bilong lukluk na wokabaut?
18 Yumi ol wokboi bilong Jehova long nau, yumi tingim tru pasin bilong yumi long pas gut wantaim God. Yumi laik bai ol samting i bin kamap bipo i ken givim gutpela save long yumi, na yumi laik bihainim dispela save long i stap bilong yumi. (Rom 15:4) Taim ol Israel i bihainim pasin bilong lukluk na wokabaut, ol i lusim tingting olsem God i stiaim ol long rot bilong Moses. Sapos yumi no was gut, yumi tu inap lusim tingting olsem God Jehova na Jisas Krais, em Man i Winim Moses, ol i stiaim kongrigesen Kristen long nau. (KTH 1:12-16) Yumi mas lukaut gut, nogut yumi larim tingting bilong ol man bilong graun i stiaim tingting yumi holim long oganaisesen bilong Jehova i stap long graun. Sapos yumi kisim tingting bilong ol, dispela inap kirapim yumi long toktok planti na yumi no pilim wok bilong ol man Jehova i makim na kaikai bilong spirit em “wokboi i gat gutpela tingting” i redim bilong yumi.—Matyu 24:45.
Tingting Strong Long Bilip na Wokabaut
19, 20. Yu tingting strong long mekim wanem? Bilong wanem?
19 Baibel i tok: “Yumi no save pait long ol manmeri. Nogat. Yumi pait long ol strongpela spirit na ol gavman na ol kain kain samting i gat strong, ol i save bosim graun long dispela taim bilong tudak. Yumi pait long olgeta spirit nogut i stap antap.” (Efesus 6:12) Nambawan birua bilong yumi em Satan. Em i laik bagarapim pasin bilong yumi long bilip long Jehova. Em bai mekim wok long olgeta kain rot bilong pulim yumi na bai yumi no ken mekim wok bilong God. (1 Pita 5:8) Wanem samting bai lukautim yumi na ol samting long graun em Satan i bosim i no ken pulim yumi? Yumi mas bilip na wokabaut, no ken lukluk na wokabaut! Pasin bilong bilip tru long ol tok promis bilong Jehova bai lukautim yumi na bilip bilong yumi i no ken bagarap olgeta olsem sip i bruk long rip. (1 Timoti 1:19) Olsem na i gutpela sapos yumi tingting strong long bihainim yet pasin bilong bilip na wokabaut, na save tru olsem Jehova bai mekim gut long yumi. Na yumi ken wok yet long beten olsem yumi bai abrusim olgeta dispela samting em klostu nau bai kamap.—Luk 21:36.
20 I gat wanpela Man i stap gutpela piksa yumi ken bihainim long pasin bilong bilip na wokabaut, na i no long lukluk na wokabaut. Baibel i tok: “Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (1 Pita 2:21) Stadi i kamap bihain long dispela bai stori long olsem wanem yumi inap bihainim yet pasin em i bin mekim.
Yu Inap Tingim?
• Pasin bilong Moses na Iso i givim wanem save long yu long pasin bilong bilip na wokabaut, na i no lukluk na wokabaut?
• Wanem samting inap helpim yumi long abrusim pasin bilong laikim tumas mani kago?
• Taim yumi bilip na wokabaut, olsem wanem dispela i helpim yumi long abrusim dispela tingting olsem taim bilong pinis i longwe yet?
• Bilong wanem pasin bilong lukluk na wokabaut inap nogutim yumi?
[Piksa long pes 17]
Moses i bin bilip na wokabaut
[Piksa long pes 18]
Olsem wanem? Ol amamas i save pasim yu long mekim ol wok tiokratik?
[Piksa long pes 20]
Taim yu bihainim Tok Bilong God, dispela bai lukautim yu olsem wanem?