Sapta 5
Bilip Bilong Ol i Winim Traipela Paia
1. Planti man i gat wanem tingting long pasin bilong givim bel long God na kantri bilong ol?
OLSEM WANEM? Yumi mas givim bel long God o long kantri yumi sindaun long en? Planti bai bekim olsem, ‘Mi save daun na givim biknem long tupela wantaim. Mi save lotu long God long pasin lotu bilong mi i save makim; na tu, mi save tok tru antap long stap gut long kantri bilong mi.’
2. Olsem wanem king bilong Babilon i insait long lotu na politik wantaim?
2 Long nau i hatwok liklik long luksave long olsem wanem pasin bilong givim bel long lotu i narapela kain long pasin bilong givim bel long kantri, tasol long Babilon bilong bipo i hatwok moa yet. Tru tumas, ol samting bilong gavman na samting bilong lotu i pas tru wantaim, olsem na long sampela taim yu no inap luksave olsem em samting bilong gavman o bilong lotu. Profesa Charles F. Pfeiffer i tok: “Long Babilon bilong bipo king i stap Hetpris na het bilong gavman. Em i wokim ol ofa na makim lotu bilong ol man i stap aninit long em.”
3. Wanem samting i kamapim klia olsem Nebukatnesar em i man bilong tingim tru lotu?
3 Tingim King Nebukatnesar. Mining bilong nem bilong em i olsem “Nebo, Lukautim Man Bilong Kisim Wok King!” Nebo em i god bilong gutpela tingting na save na bilong kamapim kaikai. Nebukatnesar em i man bilong tingim tru lotu. Olsem yumi stori pinis, em i bin wokim na bilasim ol tempel bilong planti god bilong Babilon na em i givim bel moa yet long Marduk, em dispela god Nebukatnesar i tok i helpim ami bilong em long winim ol pait.a Na tu, i luk olsem Nebukatnesar i save mekim kain kain pasin bilong glasman bilong kisim save olsem ami bilong em i mas mekim wanem bilong winim pait.—Esekiel 21:18-23.
4. Stori long pasin lotu bilong ol Babilon.
4 Tru tumas, pasin bilong lotu i strong tru long Babilon. Dispela taun i gat planti tempel, olsem 50 samting, na ol i lotuim kain kain god na god meri. Wanpela god triwan bilong ol em Anu (god bilong skai), Enlil (god bilong graun, win, na bikpela win na ren), na Ea (god bilong ol wara). Narapela god triwan bilong ol em Sin (god bilong mun), Samas (god bilong san), na Ista (god meri bilong kamapim planti pikinini). Long lotu bilong Babilon ol i save mekim planti wok long majik, marila posin samting, na pasin bilong lukluk long ol sta bilong painim save.
5. Pasin lotu bilong ol Babilon i givim wanem bikpela hatwok long ol Juda i kalabus long Babilon?
5 Ol Juda i stap kalabus long Babilon, ol i stap namel long ol manmeri i save lotuim planti god, na dispela i givim bikpela hatwok tru long ol. Planti handet yia paslain, Moses i bin givim tok lukaut long lain Israel long wanem ol samting bai painim ol sapos ol i bikhet long God. Moses i tokim ol olsem: “Bikpela bai i kisim yupela wantaim king bilong yupela i go long wanpela kantri we yupela na ol tumbuna bilong yupela i no bin i go bipo. Na bai yupela i stap long dispela ples na lotu long ol giaman god bilong ol, em ol i bin wokim long diwai na ston.”—Lo 28:15, 36.
6. Bilong wanem em i bikpela hatwok long Daniel, Hanania, Misael, na Asaria long i stap long Babilon?
6 Nau ol Juda i stap wankain olsem Moses i bin tok. Em bai hatwok long Daniel, Hanania, Misael, na Asaria long i stap gut long Jehova. King i bin makim dispela 4-pela Hibru long kisim bikpela skul long mekim wok bilong gavman. (Daniel 1:3-5) Ol i bin givim nem bilong Babilon long ol—Beltesasar, Satrak, Mesak, na Abetnego—ating bilong kirapim ol long bihainim pasin bilong Babilon.b Ol i holim bikpela namba, na taim ol i tok nogat long lotuim ol god bilong Babilon dispela bai stap ples klia na i luk olsem ol i laik birua long gavman.
IMIS GOL I KAMAPIM BIRUA
7. (a) Dispela imis Nebukatnesar i sanapim i luk olsem wanem? (b) Dispela imis i gat wanem wok?
7 Bilong strongim pasin wanbel long gavman bilong em, Nebukatnesar i sanapim wanpela imis gol long ples stret bilong Dura. Longpela bilong en em 60 kubit (27 mita) na braitpela bilong en em 6 kubit (2.7 mita).c Sampela i ting em i wanpela raunpela pos, o wanpela pos i gat 4-pela sait na het bilong en i gat sap. O ating antap tru long dispela pos i gat imis bilong wanpela man i sanap, ating imis i makim Nebukatnesar o god Nebo. Tasol maski em i luk olsem wanem, dispela imis i makim Gavman Babilon. Na em i samting bilong ol man i mas lukluk long en na lotuim.—Daniel 3:1.
8. (a) King i singautim husat long kam bung long dediketim dispela imis? Olgeta man i stap long dispela bung i mas mekim wanem? (b) Man i no laik brukim skru long imis em bai kisim wanem strafe?
8 Olsem na Nebukatnesar i stretim wanpela bung bilong dediketim dispela imis. Em i bungim olgeta ofisa na bikman bilong gavman, na ol jas na majistret na ol man bilong bosim ol provins. Wanpela man bilong autim tok bilong gavman i singaut strong olsem, “Yupela manmeri bilong olgeta kantri na bilong olgeta lain na bilong olgeta tok ples. Yupela bai i harim biugel i krai wantaim ol arapela kain musik. Orait taim yupela i harim dispela musik, yupela i mas brukim skru na lotu long dispela piksa King Nebukatnesar i bin sanapim. Sapos wanpela man i no brukim skru na lotu long piksa, wantu bai mipela i kisim em na tromoi em i go daun insait long bikpela stov i gat paia i hat tumas.”—Daniel 3:2-6.
9. Taim ol i brukim skru long dispela imis Nebukatnesar i bin sanapim, dispela i makim wanem samting?
9 Sampela i ting Nebukatnesar i kamapim dispela bung bilong subim ol Juda long mekim samting i no stret wantaim lotu bilong Jehova. Tasol ating dispela i no as bilong dispela bung, long wanem, em i singautim ol ofisa bilong gavman tasol. Olsem na ol Juda i mekim wok gavman ol tasol bai stap long dispela bung. Ating pasin bilong brukim skru long dispela imis em bilong strongim pasin wanbel namel long ol man i mekim wok gavman. Saveman John F. Walvoord i tok: “Taim ol ofisa i mekim ol dispela samting, dispela i soim strong bilong gavman bilong Nebukatnesar, na tu, em i bikpela samting bilong litimapim ol god bilong ol. Ol Babilon i ting ol dispela god i as na ol i winim ol pait.”
OL WOKBOI BILONG JEHOVA I NO LAIK LOTUIM IMIS
10. Bilong wanem i no hatwok long ol haiden long bihainim tok bilong Nebukatnesar?
10 Klostu olgeta man i bung long ai bilong dispela imis bilong Nebukatnesar, bel bilong ol bai i no gat tok long lotuim dispela imis, maski ol i givim bel long ol narapela god. Wanpela saveman bilong Baibel i tok: “Ol i save lotu long ol imis, na maski ol i lotu long wanpela god dispela i no pasim ol long daun long narapela.” Em i tok moa olsem: “Dispela i stret wantaim tingting bilong ol man i lotuim ol imis olsem i gat planti god . . . na i no gat rong long daun long god bilong ol narapela lain o kantri.”
11. Bilong wanem Satrak, Mesak, na Abetnego i no laik brukim skru long dispela imis?
11 Tasol ol Juda i gat narapela tingting. God bilong ol Jehova i bin tokim ol olsem: “Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em, long wanem, mi Bikpela, mi God bilong yupela, na mi no inap larim wanpela giaman god i senisim mi. Nogat tru.” (Kisim Bek 20:4, 5) Olsem na taim musik i kirap na ol man i brukim skru long dispela imis, 3-pela yangpela Hibru—Satrak, Mesak, na Abetnego—ol i sanap i stap.—Daniel 3:7.
12. Sampela man bilong Babilon i kotim 3-pela Hibru long wanem samting? Wanem as na ol i mekim olsem?
12 Sampela man bilong Babilon i belhat stret taim 3-pela ofisa Hibru i no brukim skru long dispela imis. Wantu ol i kam long king na ol i “kotim tripela man bilong Juda.”d Ol i no laik save long as na ol i no brukim skru. Ol i laik bai ol dispela Hibru i mas kisim strafe, long wanem, ol i no stap gut long king na ol i bikhet long gavman, olsem na ol i tok: “Dispela tripela Juda, Satrak na Mesak na Abetnego, em yu bin makim ol bilong bosim Babilon, ol i sakim tok bilong yu. Ol i no save lotu long ol god bilong yu, na tu ol i no brukim skru long piksa yu bin sanapim.”—Daniel 3:8-12.
13, 14. Nebukatnesar i mekim wanem long dispela pasin Satrak, Mesak, na Abetnego i bihainim?
13 Ating Nebukatnesar i mas bel nogut stret taim 3-pela Hibru i sakim tok bilong em! I klia tru olsem olgeta samting em i bin mekim long Satrak, Mesak, na Abetnego bambai ol i ken bihainim ol pasin bilong Gavman Babilon i no wok. Em i bin skulim ol long ol save bilong Babilon na em i bin senisim nem bilong ol tu! Tasol sapos Nebukatnesar i ting bikpela skul bai lainim ol long nupela pasin bilong lotu, o pasin bilong senisim nem bilong ol bai senisim pasin bilong ol, tingting bilong em i kranki olgeta. Satrak, Mesak, na Abetnego ol i stap gut long Jehova na mekim wok bilong em.
14 King Nebukatnesar i kros nogut tru. Wantu em i singautim Satrak, Mesak, na Abetnego i kam. Em i askim ol olsem: “Satrak na Mesak na Abetnego, ol i tok yupela i no save lotu long ol god bilong mi na tu yupela i no brukim skru long piksa mi bin sanapim. Em i tru, a?” Ating Nebukatnesar i kirap nogut tru na em i mekim dispela tok. Ating em i tingting olsem, ‘Olsem wanem 3-pela man i gat gutpela tingting ol inap sakim dispela tok—na em wanpela tok i gat bikpela strafe bilong en, sapos ol i no bihainim?’—Daniel 3:13, 14.
15, 16. Nebukatnesar i givim rot long 3-pela Hibru long mekim wanem?
15 Nebukatnesar i laik givim rot gen long 3-pela Hibru long lotuim dispela imis. Olsem na em i tok: “Orait taim yupela i harim musik, yupela i mas brukim skru na lotu long dispela piksa. Na sapos yupela i no mekim olsem, nau tasol bai mi tokim ol man na bai ol i tromoi yupela i go long bikpela paia. Na wanem god inap helpim yupela na kisim bek yupela?”—Daniel 3:15.
16 I luk olsem ol save Nebukatnesar i bin kisim long driman bilong imis (em Daniel sapta 2 i stori long en) i no pas long tingting na bel bilong em. Ating em i lusim tingting pinis long tok em yet i bin mekim long Daniel olsem: “God bilong yu i winim olgeta arapela god. Em i Bikpela bilong olgeta king.” (Daniel 2:47) Nau i olsem Nebukatnesar i bikhet na i no laik daun long Jehova, na em i tok olsem Jehova i no inap kisim bek ol dispela Hibru long strafe em bai givim ol.
17. Satrak, Mesak, na Abetnego i bekim wanem tok long king?
17 Satrak, Mesak, na Abetnego ol i no gat wok long tingting gen olsem ol bai mekim samting king i tok long mekim o nogat. Wantu ol i bekim tok olsem: “King, mipela i no gat tok long dispela samting yu laik mekim long mipela. Mipela i save lotu long God tru. Sapos yu mekim long mipela olsem yu tok, orait God bilong mipela em inap long helpim mipela long abrusim paia na strong bilong yu, na em bai i helpim mipela. Tasol sapos em i no helpim mipela, maski, mipela i no inap lotu long ol god bilong yu, na tu mipela i no inap brukim skru long dispela piksa gol yu bin sanapim.”—Daniel 3:16-18.
TROMOI OL I GO LONG BIKPELA PAIA!
18, 19. Wanem samting i kamap taim ol i tromoi 3-pela Hibru long bikpela stov?
18 Nebukatnesar i belhat nogut tru, olsem na em i tokim ol wokman bilong em long mekim paia i kamap hat tru. Bihain em i tokim “ol strongpela soldia” long pasim Satrak na Mesak na Abetnego long baklain na tromoi tripela “i go long paia.” Ol i bihainim tok bilong king, na ol i tromoi 3-pela Hibru wantaim klos bilong ol i go long paia—ating ol i mekim olsem bambai paia i kukim ol hariap moa. Tasol paia i kilim i dai ol wokman bilong king yet.—Daniel 3:19-22.
19 Tasol samting i narapela kain olgeta i wok long kamap. Satrak, Mesak, na Abetnego i stap namel long dispela bikpela stov i gat paia i hat tumas, tasol paia i no kukim ol. Nebukatnesar i mas kirap nogut tru! Ol i bin pasim tripela strong na tromoi ol long traipela paia, tasol ol i stap laip yet. Baklain i no pasim ol moa na ol i wokabaut insait long paia! Tasol Nebukatnesar i lukim narapela samting tu. Em i askim ol ofisa bilong em olsem: “Yumi bin pasim tripela man na tromoi ol long paia, o nogat?” Na ol i tokim em, “Yes, bikman, yumi bin mekim olsem.” Orait Nebukatnesar i tok: “Olsem wanem na mi lukim 4-pela man i wokabaut insait long paia? Na dispela baklain yumi bin pasim ol long en, em i no moa i stap long skin bilong ol. Na paia tu i no kukim ol. Na namba 4 man i luk olsem wanpela god.”—Daniel 3:23-25.
20, 21. (a) Taim Satrak, Mesak, na Abetnego i lusim bikpela paia i kam ausait, Nebukatnesar i luksave long wanem samting? (b) Nebukatnesar i mas tokaut long wanem samting?
20 Nebukatnesar i go klostu long dua bilong stov na em i singaut olsem: “Satrak na Mesak na Abetnego, yupela wokman bilong God Antap Tru, yupela kam ausait.” Orait, 3-pela i lusim paia na i kam ausait. Olgeta man i bin lukim dispela mirakel, em ol ofisa na bikman bilong king na sampela moa, ating ol i kirap nogut tru. Ol i lukluk long 3-pela na i olsem 3-pela i no bin go insait long bikpela paia! Smel bilong smok i no stap long skin na klos bilong ol, na paia i no bin kukim gras bilong ol liklik.—Daniel 3:26, 27.
21 Nau King Nebukatnesar i mas tokaut olsem Jehova em i God Antap Tru. Em i tok: “Yumi olgeta i mas litimapim nem bilong God bilong Satrak na Mesak na Abetnego. Em i salim ensel bilong en na i helpim dispela tripela man i save lotu na bilip long em. Ol i sakim lo bilong mi na ol i no pret long i dai. Na ol i no lotu long narapela god. Nogat. Ol i lotu tasol long God bilong ol yet.” Bihain, king i mekim dispela strongpela tok lukaut: “Nau mi laik mekim dispela tok. I tambu tru long ol man i tok bilas long dispela God. Sapos ol man bilong wanem kantri o wanem lain o wanem tok ples i mekim olsem, orait bai mi brukim nabaut bodi bilong ol na bai ol i dai. Na bai mi mekim haus bilong ol i kamap pipia nating.” Orait, king i givim 3-pela Hibru “nupela wok long provins Babilon, i winim wok ol i bin mekim bipo.”—Daniel 3:28-30.
BILIP NA TRAIPELA PAIA LONG NAU
22. Olsem wanem ol wokboi bilong Jehova long nau ol i painim wankain hevi olsem Satrak, Mesak, na Abetnego?
22 Long nau, kain hevi i bin painim Satrak, Mesak, na Abetnego i save painim ol man i lotuim Jehova. Tru, ol manmeri bilong God ol i no kalabus long wanpela ples. Tasol Jisas i tok ol disaipel bilong em “ol i no bilong dispela graun.” (Jon 17:14) Ol i stap olsem man bilong narapela ples, long wanem, ol i no save bihainim ol pasin bilong ples, na tingting, na pasin em Baibel i tambuim, em ol samting ol man ol i stap namel long ol i save bihainim. Olsem aposel Pol i tok, ol Kristen “i no ken wokabaut wankain olsem ol man bilong dispela graun.”—Rom 12:2.
23. Olsem wanem 3-pela Hibru i bin sanap strong, na olsem wanem ol Kristen bilong nau i ken bihainim gutpela pasin bilong ol?
23 Tripela Hibru i no laik bihainim pasin bilong ol Babilon. Maski ol i bin kisim bikpela skul long tingting na save bilong ol Babilon, dispela i no kirapim ol long senisim tingting. Ol i no inap senisim lotu bilong ol, na ol i stap gut long Jehova na givim bel long em. Ol Kristen long nau i mas bihainim wankain pasin. Ol i no ken sem long stap narapela kain long ol manmeri bilong dispela graun. Tingim, “dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim.” (1 Jon 2:17) Olsem na sapos yumi bihainim pasin bilong dispela graun i laik pinis, em i pasin longlong tru na em i no inap helpim yumi.
24. Olsem wanem pasin bilong ol Kristen tru i wankain olsem pasin bilong 3-pela Hibru?
24 Ol Kristen i mas was gut long olgeta kain pasin bilong lotuim ol god giaman, na long ol pasin hait bilong lotuim ol god giaman.e (1 Jon 5:21) Satrak, Mesak, na Abetnego ol i bihainim tok na long pasin daun ol i sanap long ai bilong dispela imis gol, tasol ol i save pasin bilong brukim skru long en i no makim pasin daun tasol. Bilong brukim skru i olsem ol i lotu, na sapos ol i mekim, Jehova bai belhat long ol. (Lo 5:8-10) John F. Walvoord i tok: ‘Dispela i olsem ol i salut long plak, tasol lotu na politik i pas strong wantaim, olsem na ating em i samting bilong lotu tu.’ Long nau ol Kristen tru ol tu i save sanap strong na i no lotuim ol god giaman.
25. Yu kisim wanem save long stori bilong ol samting tru tru i bin kamap long Satrak, Mesak, na Abetnego?
25 Stori bilong Satrak, Mesak, na Abetnego em i stap olsem gutpela piksa olgeta man i gat strongpela tingting long lotuim Jehova wanpela tasol ol i ken bihainim. Ating aposel Pol i tingting long dispela 3-pela Hibru taim em i stori long ol bilipman, na em i stori olsem “ol i mekim ol traipela paia i dai.” (Hibru 11:33, 34) Jehova bai praisim ol man i bihainim pasin bilong ol long sanap strong long bilip. Jehova i bin kisim bek 3-pela Hibru long bikpela paia, tasol yumi ken bilip olsem em bai kirapim bek olgeta man i bin stap gut long em na ol i dai na em bai givim blesing bilong laip oltaim long ol. Long tupela rot olsem, Jehova “i save lukautim gut ol manmeri bilong en na kisim bek ol long han bilong ol man nogut.”—Song 97:10.
[Ol Futnot]
a Ol i ting Marduk em i bin kamapim Gavman Babilon, na sampela i bilip olsem em i makim Nimrot taim em i kamap olsem wanpela god. Tasol ol i no klia olgeta long dispela tok.
b Mining bilong nem Beltesasar em “Lukautim Laip Bilong King.” Ating insait bilong nem Satrak i olsem “Lo Bilong Aku,” em i god bilong mun, em bilong ol Sumeria. Ating “Mesak” em nem bilong wanpela god bilong ol Sumeria, na nem Abetnego i olsem “Wokboi Bilong Nego,” o Nebo.
c Imis em i traipela, olsem na sampela saveman bilong Baibel i ting ol i bin wokim long diwai na bihain karamapim long gol.
d Mining bilong dispela tok Aram ol i tanim olsem “kotim,” i olsem ‘kaikai’ bodi bilong wanpela man—olsem brukbrukim gut long tit, olsem long rot bilong krungutim gutnem bilong em.
e Olsem: Baibel i tok pasin bilong kaikai planti tumas na pasin mangal i olsem pasin bilong lotu long god giaman.—Filipai 3:18, 19, NW; Kolosi 3:5.
YU BIN KISIM WANEM SAVE?
• Bilong wanem Satrak, Mesak, na Abetnego i no laik brukim skru long imis Nebukatnesar i bin sanapim?
• Nebukatnesar i mekim wanem taim 3-pela Hibru i no laik brukim skru long imis?
• Tripela Hibru i sanap strong long bilip na Jehova i praisim ol olsem wanem?
• Yu bin kisim wanem save taim yu putim yau long stori bilong ol samting tru tru i bin painim Satrak, Mesak, na Abetnego?
[Piksa i karamapim pes olgeta long pes 68]
[Ol Piksa long pes 70]
1. Taua bilong tempel (ziggurat) long Babilon
2. Tempel bilong Marduk
3. Piksa bilong Marduk (han kais) na Nebo (han sut) ol i sanap antap long tupela samting i kain olsem pukpuk
4. Piksa bilong Nebukatnesar, em i gat biknem long wokim ol haus samting
[Piksa i karamapim pes olgeta long pes 76]
[Piksa i karamapim pes olgeta long pes 78]