Ol Meri Marit—Rispektim Man Bilong Yupela
“Yupela meri, yupela i mas aninit long ol man bilong yupela.”—EFESUS 5:22.
1. Bilong wanem planti taim i hatwok long ol meri long rispektim man bilong ol?
LONG planti kantri, taim man na meri i marit, meri i save mekim wanpela tok promis olsem em bai rispektim tru man bilong em. Tasol pasin planti man marit i mekim long ol meri bilong ol, dispela bai mekim na i hatwok long ol meri long bihainim dispela tok promis o nogat. Long bipo tru marit i gat gutpela kirap bilong en. God i kisim bun bilong Adam, em namba wan man, na wokim meri. Adam i bin tok: “Em nau. Em i poroman tru bilong mi. Bun bilong em i kamap long bun bilong mi, na mit bilong em i kamap long mit bilong mi.”—Stat 2:19-23.
2. Long nau, wanem samting i kamap long ol meri na long marit?
2 Tru, marit i gat gutpela kirap bilong en, tasol long 1962 samting, long Amerika, ol meri i kirap mekim ol samting bilong ol man i no ken bosim ol? Long dispela taim, long olgeta 300 man i lusim famili i gat wanpela meri tasol i lusim famili, tasol i kam inap long 1969 dispela i senis, long olgeta 100 man i lusim famili i gat wanpela meri i lusim famili. Long nau, ol meri i save tok swea, dring, smok, na mekim pasin pamuk, wankain olsem ol man. Olsem na yu ting ol meri i amamas moa long nau? Nogat. Long sampela kantri, inap 50 pesen bilong ol marit i save katim marit. Olsem wanem? Ol samting sampela meri i mekim bambai sindaun bilong ol olsem marit i kamap gutpela moa, dispela i helpim ol o nogat?—2 Timoti 3:1-5.
3. Wanem samting i as bilong ol hevi insait long marit?
3 Wanem samting i as bilong ol hevi? Ating wanpela as em dispela hevi i kirap long taim wanpela ensel i bikhet na i giamanim Iv; ensel hia em “dispela snek bilong bipo yet, na ol i kolim em Satan.” (KTH 12:9; 1 Timoti 2:13, 14) Satan i bin daunim ol tok God i bin skulim ol man long en. Olsem: Long ol samting bilong marit, Satan i bin mekim na ol manmeri i ting marit i pasim ol tumas na i mekim nogut long ol. Ol tingting Satan i kamapim long rot bilong ol buk na TV samting bilong dispela graun em i bosim, ol i mekim na ol manmeri i ting ol tok bilong God i no bilong helpim ol na ol i samting bilong bipo tasol. (2 Korin 4:3, 4) Tasol sapos yumi skelim gut ol tok bilong God long wok bilong ol meri insait long marit, bai yumi kisim save olsem Tok Bilong God i gutpela na i helpim yumi.
Tok Lukaut Long Ol Lain i Laik Marit
4, 5. (a) Bilong wanem meri i mas tingting gut sapos em i laik marit? (b) Meri i mas mekim wanem paslain long em i marit?
4 Baibel i givim sampela tok lukaut. Baibel i tok long dispela graun em Satan i bosim, ol gutpela marit tu bai i gat “planti hevi.” Tru, God i kamapim marit, tasol Baibel i givim tok lukaut long ol man na meri i laik marit. Wanpela man bilong raitim Baibel i tok long ol meri em man bilong ol i dai na ol i stap fri long marit gen, olsem: “Sapos em i no marit gen, em bai i stap amamas tasol.” Jisas tu i tok, sapos “man em inap” long i stap singel, orait i gutpela em i stap olsem. Tasol sapos meri i laik marit, em i mas “maritim man i bilip long Bikpela,” olsem man i lotuim God na i dediket na baptais pinis.—1 Korin 7:28, 36-40; Matyu 19:10-12.
5 Wanpela as na ol meri i mas tingting gut long husat ol bai maritim, em tok lukaut bilong Baibel olsem: “Meri i marit na man bilong en i stap laip yet, orait lo i pasim em wantaim man bilong en.” Taim man i dai o mekim pasin pamuk na ol i katim marit, long dispela taim tasol “lo i no pasim em moa.” (Rom 7:2, 3) Sapos wantu wanpela meri i kirap laikim wanpela man, ating dispela em inap long tupela i pren wantaim, tasol dispela i no mekim na marit i ken stap amamas. Olsem na meri singel i mas askim em yet, ‘Mi redi long marit na bai mi kam aninit long lo bilong dispela man?’ Meri i mas tingim dispela askim paslain long em i marit, na i no bihain long marit.
6. Planti meri long nau inap makim wanem samting? Bilong wanem em i bikpela samting?
6 Long planti hap long nau, meri inap makim olsem em i laik maritim wanpela man i askim em long marit o nogat. Tasol ating i hatwok tru long meri long bihainim gutpela tingting, long wanem, em i gat strongpela laik long pas gut na laikim tru wanpela man. Wanpela man bilong raitim ol buk samting i tok: “Sapos yumi gat strongpela laik long mekim wanpela samting—maski em marit o go antap long wanpela maunten—bai yumi ting ol samting i orait tasol na bai yumi tingim tasol ol tok yumi gat laik long harim.” Sapos man i laik go antap long maunten em i no tingting gut, em inap i dai; olsem tasol sapos man o meri i no tingting gut na em i marit, dispela inap bagarapim em.
7. Sampela i bin givim wanem gutpela tok long pasin bilong painim poroman marit?
7 Meri i mas tingim gut wanem ol samting i insait long pasin bilong i stap aninit long lo bilong man i laik maritim em. Sampela yia i go pinis, long pasin daun wanpela yangpela meri India i bin tok: “Krismas na savetingting bilong papamama bilong yumi i winim yumi, na i no isi long giamanim ol olsem man inap giamanim yumi. . . . Mi inap popaia.” Gutpela helpim ol papamama na ol narapela inap givim long ol yangpela em i bikpela samting. Inap planti yia wanpela man i gat savetingting em i kirapim ol yangpela long kisim save long papamama bilong man o meri ol i laik maritim, na long skelim gut pasin man o meri ol i laik maritim i mekim long papamama na ol narapela long famili.
Jisas i Aninit Long God
8, 9. (a) Jisas i ting olsem wanem long pasin bilong i stap aninit long God? (b) Wanem gutpela samting i kamap long pasin bilong stap aninit long wok bos?
8 Tru, pasin bilong i stap aninit long narapela i hatwok, tasol ol meri inap tingim dispela samting olsem wanpela gutpela wok, olsem Jisas i bin mekim. Bilong i stap aninit long God em i mas karim pen, na em i dai long diwai pos, tasol em i amamas long i stap aninit long God. (Luk 22:41-44; Hibru 5:7, 8; 12:3) Ol meri i ken tingim Jisas olsem gutpela piksa, long wanem, Baibel i tok: “Het bilong meri em man bilong en, na het bilong Krais em God.” (1 Korin 11:3) Tasol ol meri i no aninit long ol man taim ol i marit tasol, nogat.
9 Baibel i tok ol meri, maski ol i marit o singel, ol i mas aninit long wok bos bilong ol man i winim ol mak bilong spirit na i lukautim kongrigesen Kristen. (1 Timoti 2:12, 13; Hibru 13:17) Taim ol meri i bihainim ol tok bilong God long dispela samting, ol i olsem gutpela piksa long ol ensel insait long oganaisesen bilong God. (1 Korin 11:8-10) Na tu, long gutpela pasin na long ol gutpela tok ol lapun meri marit inap skulim ol yangpela meri long “aninit long ol man bilong ol.”—Taitus 2:3-5.
10. Olsem wanem Jisas i olsem gutpela piksa long pasin bilong i stap aninit long wok bos?
10 Jisas i luksave olsem pasin bilong i stap aninit long wok bos em i gutpela samting. Wanpela taim, em i tokim aposel Pita long baim takis bilong tupela long gavman, na em i givim mani long Pita bilong baim dispela takis. Bihain Pita i tok: “Yupela i mas tingting long Bikpela na bihainim [“aninit long,” NW ] tok bilong olgeta kain gavman.” (1 Pita 2:13; Matyu 17:24-27) Jisas i stap olsem gutpela piksa tru long pasin bilong i stap aninit long wok bos, na Baibel i tok long dispela olsem: “Em i kamap olsem wokboi nating. Em i kamap olsem man na ol man i lukim em i stap man tru. Na em i daunim em yet na i bihainim tok bilong God, i go inap long em i dai.”—Filipai 2:5-8.
11. Bilong wanem Pita i kirapim ol meri marit long i stap aninit long man bilong ol, maski ol man i no wanbilip?
11 Pita i kirapim ol Kristen long i stap aninit long ol gavman maski ol i mekim hatpela pasin na ol i no bihainim stretpela pasin, na em i tok: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (1 Pita 2:21) Pita i stori long ol bikpela hevi Jisas i bin karim na olsem wanem em i bin karim ol dispela hevi long pasin daun, na bihain Pita i kirapim ol meri marit em man bilong ol i no wanbilip, olsem: “Olsem tasol, yupela maritmeri, yupela i mas aninit long ol man bilong yupela. Na sapos sampela bilong ol dispela man i no save bihainim tok bilong God, orait ol i ken lukim gutpela pasin bilong yupela meri bilong ol. Na maski yupela i no mekim wanpela tok long ol, bai ol i inap tanim bel, long wanem, ol i lukim yupela meri i save wokabaut stret na aninit tru long ol.”—1 Pita 3:1, 2.
12. Wanem gutpela samting i kamap long pasin bilong Jisas long stap aninit long God?
12 Sampela i ting, sapos yu aninit long man i tok bilas na i mekim nogut long yu, dispela i makim olsem yu no gat bun. Tasol Jisas i no tingting olsem. Pita i tok: “Ol i bin tok nogut long em, tasol em i no bekim tok nogut bilong ol. Em i karim pen, tasol em i no tok long bagarapim ol. Nogat.” (1 Pita 2:23) Sampela man em ol i lukim olsem Jisas i karim bikpela pen na hevi, ol i kamap bilipman. Olsem wanpela stilman i hangamap long pos klostu long Jisas na wanpela kepten bilong ol soldia husat i bin lukim Jisas i dai. (Matyu 27:38-44, 54; Mak 15:39; Luk 23:39-43) Na Pita i kamapim olsem sampela man marit i no bilip—maski ol i bin mekim nogut long meri—ol bai kamap Kristen taim ol i lukim gutpela pasin bilong meri long i stap aninit long ol. Yumi lukim pinis olsem dispela samting i bin kamap long nau.
Pasin Ol Meri i Ken Mekim
13, 14. Olsem wanem pasin bilong aninit long man i no wanbilip i kamapim gutpela samting?
13 Sampela meri marit em ol i kamap bilipmeri, ol i bihainim pasin Krais i makim na dispela i helpim man bilong ol long kamap bilipman. I no longtaim i go pinis, long wanpela Kibung Distrik bilong ol Witnes Bilong Jehova, wanpela man marit i tok long meri Kristen bilong em: “Mi mekim longlong pasin stret long meri bilong mi. Tasol em i rispek tru long mi. Em i no bin daunim mi. Em i no fosim mi long kisim bilip bilong em. Em i lukautim mi long gutpela pasin. Taim em i go long wanpela kibung, em i wok hat long kukim kaikai bilong mi paslain long kibung i kamap na em i mekim ol wok bilong haus. Pasin bilong em i mekim na mi laik save long Baibel. Olsem na nau mi stap wanpela Witnes!” Yes, ‘maski [meri] i no mekim wanpela tok,’ pasin bilong meri i helpim em.
14 Olsem Pita i tok, i no ol tok ol meri i mekim, nogat, pasin meri i mekim, dispela i kamapim ol gutpela samting. Dispela i kamap ples klia long wanpela meri i kisim save long ol tok i tru bilong Baibel na i strong long i go long ol miting Kristen. Man bilong em i singaut: “Agnes, sapos yu go aut long dispela dua, no ken kam bek!” Meri i no go aut long “dispela dua,” nogat, em i go aut long narapela dua. Long neks miting man i tokim em: “Taim yu kam bek, bai mi no stap.” Orait, em i no stap—em i lusim meri inap 3-pela de. Taim em i kam bek, long gutpela pasin meri i askim em: “Yu laikim sampela kaikai?” Agnes i no surik long lotuim Jehova. Bihain man bilong em i stadi long Baibel, dediketim laip bilong em long God, na bihain em i mekim planti wok olsem wasman.
15. Ol meri Kristen i mas putim wanem kain “bilas”?
15 Aposel Pita i tok ol meri i mas putim wanpela samting, em ol meri yumi bin stori pinis long ol i bin putim, em “bilas,” tasol i no olsem ol i strong long “bilasim gras” na pasim “kain kain naispela klos.” Nogat, Pita i tok: “Mobeta yupela i bilasim insait bilong yupela tu long olkain bilas i no inap long bagarap. Dispela kain bilas em pasin bilong i stap belgut na i stap bel isi. Dispela kain pasin em i gutpela moa yet long ai bilong God.” Pasin bilong i stap belgut na bel isi i kamap ples klia long krai bilong nek na long gutpela pasin bilong meri, em i no ken toktok strong. Long dispela rot meri Kristen i soim olsem em i rispek tru long man bilong em.—1 Pita 3:3, 4.
Sampela Gutpela Piksa
16. Olsem wanem Sara i olsem gutpela piksa long ol meri Kristen?
16 Pita i tok: “Ol meri bilong bipo . . . i bin givim laip bilong ol yet long God na wetim em i mekim ol samting em i bin promis long mekim, ol i save bilasim ol yet long dispela kain pasin, na ol i stap aninit long man bilong ol.” (1 Pita 3:5) Ol dispela meri i bin luksave olsem pasin bilong amamasim Jehova long rot bilong bihainim ol tok bilong em inap mekim na famili i ken stap amamas na ol bai kisim laip oltaim. Pita i tok long Sara, em naispela meri bilong Abraham, na em i tok Sara “i bin bihainim tok bilong Abraham na i kolim em ‘bikman.’ ” Sara i helpim man bilong em i pret long God, em God i bin makim em long go long wanpela longwe ples. Em i bin lusim gutpela sindaun bilong em na em i redi long lusim laip bilong em. (Stat 12:1, 10-13) Pita i tok amamas long gutpela piksa tru bilong Sara olsem meri i gat strongpela bel, na Pita i tok: “Sapos yupela i save mekim gutpela pasin, na yupela i no pret long wanpela samting, orait yupela i olsem ol pikinini bilong Sara.”—1 Pita 3:6.
17. Bilong wanem Pita inap tingim Abigel olsem gutpela piksa long ol meri Kristen?
17 Abigel em narapela meri i gat strongpela bel na i bilip long God, na ating Pita i tingim em tu. Em i gat “planti gutpela tingting na save,” tasol man bilong em Nabal em “man bilong kros na pasin bilong en i no gutpela.” Taim Nabal i no laik helpim Devit na ol lain bilong em, ol i redi long pinisim Nabal na famili bilong em. Tasol Abigel i mekim ol samting bambai famili inap abrusim bagarap. Em i kisim ol kaikai na putim antap long sampela donki na i go bungim Devit na ol lain man bilong em i holim bainat. Taim em i lukim Devit, em i lusim donki na i kalap i go daun long graun na i go klostu long Devit na brukim skru na i askim Devit long em i no ken kirap kwik long mekim wanpela samting. Dispela i sutim tru bel bilong Devit. Em i tok: “God, Bikpela bilong yumi Israel, i bin salim yu i kam nau, na yu bungim mi. Mi tenkyu long God long gutpela tingting na tok bilong yu.”—1 Samuel 25:2-33.
18. Sapos wanpela man i laik grisim wanpela meri, ol meri i ken tingim husat olsem gutpela piksa long bihainim? Bilong wanem ol i ken tingim dispela meri?
18 Narapela gutpela piksa long ol meri marit em yangpela meri bilong Sunem husat i stap gut long wanpela wasman bilong sipsip em ol i makim em pinis bilong maritim. Em i laikim tru dispela man, maski wanpela king i gat planti mani i laik grisim em. Em i kamapim filings bilong em long yangpela wasman, na i tok: “Yu mas laikim mi wanpela tasol na yu no ken laikim narapela meri. Yu no ken holim narapela meri long han bilong yu. Yu mas holim mi tasol. Laik bilong mi i strong tumas long yu na bel bilong mi i kirap strong tumas long yu olsem dai i strong tumas long daunim man. . . . Wara i no inap mekim i dai dispela kain paia.” (Solomon 8:6, 7) Em i gutpela sapos olgeta meri em ol i orait long maritim wanpela man long ol i tingting strong long i stap gut na rispektim tru man bilong ol.
Sampela Tok Moa Bilong God
19, 20. (a) Bilong wanem ol meri i mas stap aninit long man bilong ol? (b) I gat wanem gutpela piksa ol meri marit i ken bihainim?
19 Orait nau yumi ken tingim ol tok i stap klostu long as skripsa bilong dispela stadi: “Yupela meri, yupela i mas aninit long ol man bilong yupela.” (Efesus 5:22) Bilong wanem ol i mas aninit long man bilong ol? Efesus 5 Ves 23 bihain i tok: “Long wanem, man em i het bilong meri bilong en, olsem Krais em i het bilong sios.” Olsem na aposel Pol i kirapim ol meri olsem: “Sios em i stap aninit long Krais. Olsem tasol yupela meri tu, oltaim yupela i mas aninit long ol man bilong yupela.”—Efesus 5:23, 24, 33.
20 Bilong bihainim dispela tok, ol meri marit i mas stadi na bihainim pasin bilong sios bilong Krais, em ol lain God i bin makim long holi spirit. Plis ritim 2 Korin 11:23-28, na long dispela rot bai yu kisim save long ol hevi wanpela man bilong dispela sios, em aposel Pol, i bin karim, long wanem, em i bin stap gut long Het bilong em, Jisas Krais. Olsem Pol, ol meri marit na ol narapela lain bilong sios i mas i stap aninit long Jisas. Ol meri marit i ken kamapim dispela long rot bilong i stap aninit long man bilong ol.
21. Wanem samting inap kirapim ol meri long stap aninit long man bilong ol?
21 Planti meri long nau i no amamas long i stap aninit long man bilong ol, tasol ol meri i gat gutpela tingting bai tingim gutpela samting i kamap long en. Olsem: Sapos man i no wanbilip, na meri i aninit long wok bos bilong em long olgeta samting i no brukim ol lo o ol stiatok bilong God, dispela inap kamapim gutpela samting tru, olsem man bilong em inap “kamap Kristen.” (1 Korin 7:13, 16) Na tu, em inap i stap amamas, long wanem, em i save olsem God Jehova i orait long pasin em i mekim na Em bai blesim pasin bilong em long bihainim gutpela piksa bilong Pikinini bilong Em.
Yu Inap Tingim?
• Bilong wanem em inap hatwok long meri long rispektim man bilong em?
• Bilong wanem meri i mas skelim gut olsem em bai maritim wanpela man o nogat?
• Olsem wanem Jisas i stap olsem gutpela piksa long ol meri marit? Wanem ol gutpela samting inap kamap sapos ol i bihainim pasin bilong em?
[Piksa long pes 19]
Bilong wanem meri i mas skelim gut olsem em bai maritim wanpela man o nogat?
[Piksa long pes 21]
Ol meri i ken kisim wanem skul long gutpela pasin bilong Abigel?