Yupela i Mas Tingting Gut, Pinis i Kam Klostu
1 Planti tok bilong Baibel i stori long de bilong Jehova bai kam “olsem stilman”—em bai kam wantu, kwiktaim, na isi tasol. (1 Te. 5:2; Mt. 24:43; 2 Pi. 3:10; KTH 3:3; 16:15) Olsem na Jisas i tok: “Yupela tu i mas redi. Pikinini Bilong Man bai i kam long wanpela taim yupela i no ting em bai i kam.” (Mt. 24:44) Olsem wanem yumi inap was i stap long ol samting bilong spirit taim pinis i kam klostu? Wanpela bikpela rot bilong mekim olsem i stap long dispela tok em holi spirit i as bilong en, olsem: “Yupela i mas tingting gut.”—1 Pi. 4:7.
2 Bilong tingting gut, yumi mas kisim tingting bilong Jehova long ol samting. (Ef. 5:17) Dispela i helpim yumi long tingim yumi yet i olsem “ol man bilong narapela ples, na olsem ol tripman” namel long ol manmeri bilong dispela graun. (1 Pi. 2:11) Em i helpim yumi long skelim wanem samting i bikpela samting tru, na putim ol bikpela samting i go pas, na long bihainim gutpela tingting taim yumi makim ol samting yumi laik mekim.—Fl. 1:10.
3 Putim Mak Long Ol Samting Bilong Spirit: Taim yumi putim na winim ol mak long ol samting bilong spirit, dispela bai helpim yumi long tingting gut. Olsem wanem? Yu gat sampela mak long ol samting bilong spirit em yu wok strong long winim? Yu save wok strong long ritim Baibel long olgeta de, go long olgeta miting Kristen, ritim ol nupela Wastaua na Kirap!, o mekim bikpela wok moa long wok autim tok? Sapos yu putim ol mak i stret long yu, na yu wok strong long winim, na askim Jehova long blesim ol wok yu mekim, ating bai yu kirap nogut long ol gutpela samting i kamap.
4 Wanpela elda i askim tupela yangpela marit long ol mak bilong spirit ol i laik winim. Dispela askim i helpim ol long luksave olsem sapos ol i stretim ol samting long sindaun bilong ol na pinisim bikpela dinau bilong ol, ol inap mekim wok painia. Ol i pasim tok long putim dispela olsem mak ol i laik winim. Ol i givim bel long pinisim dinau bilong ol na painim ol rot bilong lusim ol samting i pulim nating taim na strong bilong ol. Bihain stret long wanpela yia, ol i winim dispela mak bilong ol. Dispela i kamapim wanem samting? Man i tok: “Sapos mipela i no bin putim ol mak, mipela bai i no inap stap olsem nau mipela i stap. Mipela i stap amamas moa. Mipela i save stap bel isi na i stap bilong mipela i gutpela moa. Nau laip bilong mipela i gat as tru bilong en.”
5 Taim yumi wetim de bilong Jehova i kamap, i gutpela yumi holimpas pasin bilong was i stap long ol samting bilong spirit, long rot bilong tingting gut, na tingting strong long mekim laik bilong God.—Ta. 2:11-13.