Jehova i Save Harim Beten Bilong Yumi

“Bikpela i save lukautim ol stretpela manmeri, na em i save harim beten bilong ol.”​—SNG. 34:15.

1, 2. (a) Planti man long nau i pilim olsem wanem? (b) Bilong wanem yumi no kirap nogut long dispela?

YU SAVE bel hevi na tingting planti? Sapos olsem, i no yu tasol i pilim olsem. Planti milion manmeri i hatwok long karim ol hevi i kamap long olgeta de long dispela taim nogut bilong nau. Sampela i pilim olsem ol i no inap karim ol dispela hevi. Ol i pilim wankain olsem man bilong raitim song, Devit, em i tok: “Mi bagarap tru na mi stap nogut, olsem wanpela samting i krungutim mi strong. Bel bilong mi i pilim nogut tru, na mi singaut long bikpela pen. Klok bilong mi i wok strong tumas, na strong bilong mi i pinis olgeta. Ai bilong mi i tudak na mi no moa lukluk gut.”​—Sng. 38:​8, 10.

² Yumi ol Kristen, yumi no kirap nogut long ol dispela presa bilong laip. Yumi save ‘ol samting em i olsem pen i save kamap long meri i laik karim pikinini’ em hap bilong mak Jisas i tok profet long en bilong makim olsem em i kam i stap. (Mk. 13:8; Mt. 24:3) Tok Grik em Buk Baibel i tanim olsem ‘pen i save kamap long meri i laik karim pikinini’ inap makim bagarap o taim bilong hevi. Dispela i makim stret bikpela pen ol man i pilim long dispela taim bilong “planti hevi nogut tru”!​—2 Ti. 3:1.

Jehova i Pilim Ol Hevi Bilong Yumi

 3. Ol manmeri bilong God i save gut long wanem samting?

³ Ol manmeri bilong Jehova i save gut olsem ol dispela hevi i save givim hatwok long ol tu, na i luk olsem ol dispela hevi bai go nogut moa. Ol hevi i save painim ol manmeri i save painim ol wokboi bilong God tu. Na “Satan, dispela birua” bilong yumi, i laik bagarapim bilip bilong yumi. (1 Pi. 5:8) Em i isi tru long pilim wankain olsem Devit, em i tok: “Dispela tok nogut i bagarapim tingting bilong mi, na mekim mi i bel hevi moa yet. Na mi no gat strong moa. Mi bin ting bai sampela man i sori long mi, tasol i no gat wanpela. Na mi ting bai sampela man i givim mi gutpela tok bilong strongim bel bilong mi, tasol i no gat”!​—Sng. 69:20.

 4. Wanem samting i save mekim gut bel bilong yumi taim ol hevi i painim yumi?

⁴ Yu ting tok Devit i mekim i makim olsem em i no ting i gat gutpela samting bilong bilip na wetim? Nogat. Lukim tok em i mekim long dispela seim song: “Bikpela i save harim prea bilong ol manmeri i sot long ol samting, na em i no save lusim tingting long ol manmeri bilong en ol i stap long kalabus.” (Sng. 69:33) Sampela taim yumi inap pilim olsem yumi stap kalabus long ol hevi bilong yumi. Yumi inap ting olsem ol arapela i no pilim tru ol hevi bilong yumi​—na ating dispela em i tru. Tasol olsem Devit, yumi save Jehova i pilim tru ol hevi bilong yumi na dispela i ken mekim gut bel bilong yumi.​—Sng. 34:15.

 5. King Solomon i bilip long wanem samting?

⁵ Solomon, pikinini bilong Devit, i bin strongim dispela tok taim ol i dediketim tempel long Jerusalem. (Ritim 2 Stori 6:​29-​31.) Em i beten strong na askim Jehova long harim prea bilong olgeta wan wan man i gat stretpela bel taim ol i beten long Em long ol ‘hevi i bin kamap long ol.’ God bai mekim wanem long beten bilong ol dispela manmeri i gat hevi? Solomon i kamapim bilip bilong em olsem God bai harim prea bilong ol na Em bai helpim ol. Bilong wanem? Bikos Em i save tru long “tingting bilong ol man.”

 6. Yumi ken mekim wanem bilong karim ol hevi i kamap long yumi? Olsem wanem dispela inap helpim yumi?

⁶ Yumi tu inap beten long Jehova long ‘hevi i bin kamap long yumi.’ Em i pilim tru ol hevi bilong yumi na em i tingim yumi, na dispela i save mekim gut bel bilong yumi. Aposel Pita i strongim dispela tok taim em i tok: “God i save wari long yupela. Olsem na olgeta hevi yupela i karim, yupela i mas putim long han bilong en.” (1 Pi. 5:7) Jehova i save tingim tru ol samting i painim yumi. Jisas i kamapim strong pasin bilong Jehova long tingim tru yumi taim em i tok: “Yupela i save, ol man i save baim tupela liklik pisin long 10 toea tasol. Na Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun. Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.”​—Mt. 10:​29-​31.

Bilip na Wetim Jehova i Helpim Yumi

 7. Yumi ken bilip tru olsem yumi bai kisim wanem helpim?

⁷ Yumi ken bilip tru olsem Jehova i gat laik na strong bilong helpim yumi taim ol hevi i bungim yumi. “God em i ples hait bilong yumi, na em i save strongim yumi oltaim. Em i stap klostu na i redi long helpim yumi long taim bilong bikpela hevi.” (Sng. 34:​15-​18; 46:1) God i save givim dispela helpim olsem wanem? Tingim tok bilong 1 Korin 10:13: “God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.” Jehova inap stiaim ol samting bilong rausim hevi yumi karim, o em inap givim strong long yumi bilong karim dispela hevi. Long wanpela bilong dispela tupela rot, yumi kisim helpim.

 8. Yumi mas mekim wanem bilong kisim helpim bilong God?

⁸ Olsem wanem yumi inap kisim dispela helpim? Harim tok Pita i mekim: “Olgeta hevi yupela i karim, yupela i mas putim long han bilong en.” Dispela i makim olsem yumi putim wok bilong tingim na stretim ol wari bilong yumi long han bilong Jehova. Yumi no ken wari wari, yumi stap isi na bilip olsem em bai lukautim yumi long ol samting yumi nidim. (Mt. 6:​25-​32) Bilong kisim kain bilip olsem yumi mas i gat pasin daun, yumi no ken bilip long strong o savetingting bilong yumi yet. Taim yumi daunim yumi yet na “stap aninit long strongpela han bilong God,” i olsem yumi tokaut olsem yumi samting nating tasol. (Ritim 1 Pita 5:6.) Na dispela i helpim yumi long karim ol hevi God i larim i kamap long yumi. Ating yumi laik bai hevi i pinis wantu, tasol yumi bilip olsem Jehova i save long olsem wanem em bai helpim yumi na em bai mekim long taim stret.​—Sng. 54:7; Ais. 41:10.

 9. Devit i gat wanem hevi em i laik putim long han bilong Jehova?

⁹ Tingim tok Devit i mekim long Song 55:22: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” Taim Devit i raitim dispela tok, em i bel hevi tru. (Sng. 55:4) Devit i bin raitim dispela song taim pikinini bilong em Apsalom i wok hait long kisim wok king bilong Devit. Ahitofel, em man Devit i trastim bilong givim gutpela tingting long em, i joinim lain bilong Apsalom. Devit i mas ranawe lusim Jerusalem, nogut ol i kilim em i dai. (2 Sml. 15:​12-​14) Maski ol dispela hevi i painim Devit, em i bilip yet long God, na gutpela samting i painim em.

10. Taim ol hevi i painim yumi, yumi mas mekim wanem?

¹⁰ Em i bikpela samting long yumi mas beten long Jehova long olgeta kain hevi i save kamap long yumi, wankain olsem Devit i bin mekim. Yumi laik skelim samting aposel Pol i kirapim yumi long mekim long kain taim olsem. (Ritim Filipai 4:​6, 7.) Wanem samting bai kamap long rot bilong ol kain strongpela beten olsem? “Bel isi God i save givim yumi, em i gutpela samting tru, . . . na long dispela pasin [yumi] bai i pas gut wantaim Krais Jisas, na bel na tingting bilong [yumi] bai i stap gut tru.”

11. Olsem wanem “bel isi God i save givim” i lukautim bel na tingting bilong yumi?

¹¹ Yu ting taim yu beten dispela bai senisim i stap bilong yu? Em inap kamap. Tasol yumi mas tingim, Jehova i no save bekim ol prea bilong yumi long pasin yumi laik bai em i mekim. Tasol maski i olsem, beten i save helpim yumi long tingting stret na ol hevi i no ken daunim yumi. “Bel isi God i save givim” inap mekim yumi stap isi taim ol hevi i mekim na bel na tingting bilong yumi i bagarap. “Bel isi God i save givim” bai lukautim bel na tingting bilong yumi, wankain olsem lain soldia i save lukautim wanpela taun na ol birua i no inap kam insait. Na tu, dispela bel isi bai helpim yumi long daunim pasin bilong holim tupela tingting, pasin pret, na ting olsem samting nogut tasol bai kamap. Na em bai pasim yumi long kirap hariap na mekim samting we yumi no bihainim savepasin.​—Sng. 145:18.

12. Kamapim tok piksa i makim olsem wanem tingting na bel bilong yumi inap stap isi.

¹² Olsem wanem tingting na bel bilong yumi inap stap isi taim yumi wok long karim ol hevi? Tingim wanpela tok piksa i makim i stap bilong yumi long nau. Long wanpela kampani i gat maneja i save tok kros na mekim hatpela pasin long ol wokman. Tasol wanpela wokman i gat rot long kamapim tingting bilong em long papa bilong kampani, em wanpela gutpela man i save isi long ol arapela. Papa bilong kampani i tokim wokman olsem em i save long pasin bilong maneja na i no longtaim em bai rausim dispela maneja long wok bilong en. Yu ting dispela i mekim wanem long wokman? Em i bilipim tok bilong papa bilong kampani na em i save olsem klostu nau senis bai kamap, na dispela i strongim bel bilong em long mekim yet wok, maski em i mas karim sampela hevi moa inap long maneja i pinis long wok. Na olsem tasol Jehova tu i save long ol hevi yumi karim, na em i tokim yumi olsem klostu nau em bai “rausim dispela hetman i save bosim dispela graun.” (Jo. 12:31) Dispela i mekim gut bel bilong yumi, a?

13. Yumi mas beten na mekim wanem samting moa?

¹³ Yu ting em inap long yumi beten tasol bilong kamapim ol hevi bilong yumi long Jehova? Nogat. I gat sampela samting moa yumi mas mekim. Yumi mas mekim ol samting i stret wantaim prea bilong yumi. Taim King Sol i salim ol man long haus bilong Devit bilong kilim em i dai, Devit i beten olsem: “God bilong mi, yu mas kisim bek mi long han bilong ol birua bilong mi. Yu mas lukautim mi bai ol i no bagarapim mi. Yu mas rausim mi long han bilong ol man nogut, na kisim bek mi long han bilong ol man i laik kilim mi i dai.” (Sng. 59:​1, 2) Devit i beten na em i bihainim tok bilong meri bilong em na em i ranawe. (1 Sml. 19:​11, 12) Yumi tu i ken bihainim wankain pasin. Yumi beten askim Jehova long givim savetingting long yumi bilong helpim yumi long karim hevi o givim save long yumi long rot bilong mekim samting bilong daunim hevi.​—Jem. 1:5.

Rot Bilong Sanap Strong na Karim Hevi

14. Wanem samting inap helpim yumi long sanap strong na karim hevi?

¹⁴ Ating ol hevi yumi karim i no inap pinis wantu, nogat. Ol inap stap longpela taim. Sapos olsem, wanem samting bai helpim yumi long sanap strong na karim hevi? Namba wan, yumi mas tingim olsem taim yumi mekim tru wok bilong Jehova, maski ol hevi i painim yumi, yumi kamapim klia yumi laikim em tru. (Ap. 14:22) Tingim tok Satan i sutim long Jehova long pasin bilong Jop: “Yu ting bai Jop i aninit long yu sapos em i no kisim wanpela samting long han bilong yu, a? Mi ting nogat. Long wanem, oltaim yu save lukaut gut long em na long famili bilong en na long olgeta samting bilong en. Oltaim yu save mekim gut long em, na yu bin givim em planti bulmakau moa inap long pulapim olgeta hap bilong kantri em i stap long en. Tasol sapos yu bagarapim na rausim dispela olgeta samting bilong en, orait bai yu lukim em i tok nogut tru long yu.” (Jop 1:​9-​11) Jop i no lusim Jehova, na long dispela rot em i soim olsem tok Satan i sutim em giaman tasol. Taim yumi sanap strong na karim hevi, yumi tu i gat rot long kamapim klia olsem Satan em i man bilong giaman. Na pasin bilong sanap strong na karim hevi i save strongim pasin bilong yumi long wetim gutpela samting i kamap bihain.​—Jem. 1:4.

15. Wanem ol stori inap strongim yumi?

¹⁵ Namba tu, no ken lusim tingting olsem “ol arapela manmeri bilong God, ol i stap long olgeta hap bilong graun, ol tu i save karim wankain pen olsem [yumi].” (1 Pi. 5:9) Tru tumas, “ol traim i bin kamap long [yumi], ol i no ol narakain traim. Nogat. Ol i wankain olsem ol traim i save kamap long olgeta man.” (1 Ko. 10:13) Olsem na yu inap kisim strong na strongim bel taim yu skelim ol samting i bin painim ol arapela na no ken tingting tumas long ol hevi bilong yu yet. (1 Te. 1:​5-7; Hi. 12:1) Tingting long ol manmeri yu save long ol em ol i bin sanap strong maski ol bikpela hevi i painim ol. Olsem wanem? Yu bin painim ol laip stori insait long ol buk na nius bilong yumi em bilong ol manmeri husat i bin karim wankain hevi olsem yu yet? Ol dispela stori inap strongim yu tru.

16. Olsem wanem God i save strongim yumi taim kain kain hevi i painim yumi?

¹⁶ Namba tri, no ken lusim tingting olsem Jehova em i “Papa bilong yumi, na em i as bilong olgeta pasin marimari na pasin sori. Em i God bilong mekim isi bel bilong olgeta man i gat hevi. Long olgeta hevi i kamap long mipela, em i save mekim isi bel bilong mipela. Olsem na mipela inap long mekim isi bel bilong ol man i gat kain kain hevi, olsem God i save mekim isi bel bilong mipela.” (2 Ko. 1:​3, 4) I olsem God i sanap i stap klostu long yumi bilong strongim yumi, i no long hevi yumi karim long nau tasol, nogat, em ‘long olgeta hevi i kamap long yumi.’ Dispela i mekim na yumi inap mekim gut bel bilong ol man “i gat kain kain hevi.” Long laip bilong em yet Pol i lukim truim bilong dispela tok.​—2 Ko. 4:​8, 9; 11:​23-​27.

17. Olsem wanem Baibel inap helpim yumi long karim ol hevi i painim yumi?

¹⁷ Namba foa, yumi gat Tok Bilong God, em Baibel, na em i “gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.” (2 Ti. 3:​16, 17) Tok Bilong God i mekim yumi kisim ol “gutpela pasin” na yumi mekim “gutpela wok.” Na tu, em i helpim yumi long karim ol hevi bilong laip. Dispela tok i mekim yumi “kisim tru olgeta gutpela pasin” na i mekim yumi “redi long mekim olgeta kain gutpela wok.” Mining bilong tok Grik ol i tanim long dispela hap olsem “redi long mekim olgeta kain gutpela wok” em “redim na stretim gut ol samting.” Ol inap yusim dispela tok long bipo taim ol i stori long wanpela bot ol i bin redim na putim olgeta samting ol i nidim long raun bilong en o ol i yusim bilong makim wanpela masin em i redi long mekim wanem wanem wok ol i laik mekim long en. Na olsem tasol, long rot bilong Baibel Jehova i save givim yumi olgeta samting yumi mas kisim bilong mekim ol wok o winim ol hevi i kamap long yumi. Olsem na yumi ken tok, “Sapos God i larim hevi i painim mi, orait long strong bilong em mi inap karim dispela hevi.”

Kisim Bek Yumi Long Olgeta Hevi Bilong Yumi

18. Wanem narapela samting yumi ken tingting long en na dispela bai helpim yumi long sanap strong?

¹⁸ Namba faiv, oltaim tingim olsem klostu nau Jehova bai pinisim olgeta hevi bilong ol man. (Sng. 34:19; 37:​9-​11; 2 Pi. 2:9) Taim em i kisim bek yumi pinis, dispela i no makim olsem em i kisim bek yumi long dispela taim nogut bilong nau na em tasol, nogat. Dispela i makim tu olsem yumi inap kisim laip oltaim oltaim, sampela long heven wantaim Jisas na sampela long Paradais hia long graun.

19. Olsem wanem yumi inap sanap strong?

¹⁹ I go inap long nupela taim i kamap, yumi wok yet long karim ol hevi bilong pasin nogut bilong dispela graun. Yumi laik tru long dispela taim nogut bilong nau i mas pinis! (Sng. 55:​6-8) Yumi no ken lusim tingting, pasin bilong yumi long sanap strong i save kamapim klia olsem Devil em i man bilong giaman. Yumi kisim strong long ol prea bilong yumi na long lain brata Kristen. Na yumi tingim, ol wankain hevi i painim yumi i save painim ol brata bilong yumi. Wok yet long kisim tru olgeta gutpela pasin na redi long mekim olgeta kain gutpela wok long rot bilong mekim gutpela wok long Baibel. Oltaim yumi mas bilip strong olsem “God bilong mekim isi bel” bilong yumi bai lukautim yumi. Tingim: “Bikpela i save lukautim ol stretpela manmeri, na em i save harim beten bilong ol.”​—Sng. 34:15.

Yu Inap Bekim?

• Devit i ting wanem long ol hevi i painim em?

• King Solomon i kamapim wanem bilip bilong em?

• Wanem samting inap helpim yumi long karim ol hevi em Jehova i save larim i kamap long yumi?

[Piksa long pes 13]

Solomon i bilip strong olsem Jehova bai helpim ol manmeri bilong Em taim hevi i painim ol

[Piksa long pes 15]

Long rot bilong prea Devit i putim olgeta hevi bilong em long Jehova na bihain em i mekim ol samting i stret wantaim prea bilong em