“Bikpela De Bilong Jehova” i Klostu
“De bilong Bikpela i mekim kot bilong en, em i klostu nau na dispela De bai i kamap kwiktaim tru.”—SEFANAIA 1:14.
1, 2. (a) Ol Kristen i wetim wanem bikpela de? (b) Yumi mas mekim wanem ol askim? Bilong wanem yumi mas mekim ol dispela askim?
WANPELA yangpela meri i wetim de bilong marit bilong em. Wanpela meri i gat bel i wetim de bilong karim pikinini. Wanpela wokman em skin bilong em i les tru em i wetim kirap bilong malolo bilong em. Wanem samting bilong ol i wankain? Tripela i wetim wanpela bikpela de. Dispela de bai mekim wanpela bikpela samting long i stap bilong ol. Ol i amamas tru long wetim dispela de, tasol amamas bilong ol wan wan i narapela narapela, i no wankain. De ol i wetim em bai kamap tru, na ol i laik bai ol i redi long en taim em i kamap.
2 Ol Kristen tru long nau ol tu i wetim wanpela bikpela de. Em bikpela “de bilong Jehova.” (Aisaia 13:9, NW; Joel 2:1; 2 Pita 3:12) Wanem dispela “de bilong Jehova,” na em bai mekim wanem long ol manmeri? Yumi ken mekim wanem na bai yumi redi taim dispela de i kamap pinis? Em i bikpela samting olsem nau yumi kisim bekim bilong ol dispela askim, long wanem, ol samting i wok long kamap i soim klia olsem dispela tok bilong Baibel i tru, em i tok: “De bilong Bikpela i mekim kot bilong en [“bikpela de bilong Jehova,” NW ], em i klostu nau na dispela De bai i kamap kwiktaim tru.”—Sefanaia 1:14.
“Bikpela De Bilong Jehova”
3. “Bikpela de bilong Jehova” em wanem samting?
3 Wanem dispela “bikpela de bilong Jehova”? Long Baibel, “de bilong Jehova” i makim ol taim we Jehova i bin mekim kot na givim strafe long ol birua bilong em na litimapim bikpela nem bilong em. “De bilong Jehova” i bin painim ol bikhetlain bilong Juda na Jerusalem, na tu, ol lain bilong Babilon na Isip. (Aisaia 2:1, 10-12; 13:1-6; Jeremaia 46:7-10) Tasol nambawan bikpela “de bilong Jehova” i no kamap yet. Em “de” we Jehova bai mekim kot long ol man i bin bagarapim nem bilong em. Pastaim bagarap bai painim ‘Bikpela Babilon,’ em olgeta lotu giaman, na bihain bagarap bai painim olgeta narapela lain nogut bilong dispela graun long pait bilong Armagedon.—KTH 16:14, 16; 17:5, 15-17; 19:11-21.
4. I gat wanem as na klostu olgeta manmeri i mas pret long de bilong Jehova i wok long i kam klostu?
4 Maski ol i save long dispela samting o nogat, klostu olgeta manmeri i mas pret long dispela de i wok long i kam klostu. Bilong wanem ol i mas pret? Long maus bilong profet Sefanaia, Jehova i bekim dispela askim, olsem: “Long dispela De, belhat bilong God bai i kamap ples klia, na bai ol manmeri i gat bikpela hevi na bel nogut, na bai ol samting i bagarap nabaut. Na ol klaut bai i karamapim san na bikpela tudak bai i kamap.” Tru tumas, dispela de em samting bilong pret long en! Sefanaia i tok moa: “Bikpela i tok olsem, ‘Ol manmeri i bin mekim sin long mi, olsem na bai mi mekim ol kain kain bagarap nogut tru i kamap long ol.’ ”—Sefanaia 1:15, 17.
5. Bilong wanem planti milion manmeri i amamas tru long de bilong Jehova bai kamap?
5 Tasol planti milion manmeri i amamas tru long wetim de bilong Jehova i kamap. Bilong wanem? Ol i save olsem em wanpela de we Jehova bai kisim bek ol stretpela man na em bai winim pait na nem bilong em i kamap holi. (Joel 3:16, 17; Sefanaia 3:12-17) Samting ol man i mekim nau long i stap bilong ol, dispela inap makim olsem ol i mas pret long dispela de o ol inap amamas tru long wetim i kamap. Yu yet i gat wanem tingting long dispela de? Yu redi long en? De bilong Jehova i kam klostu pinis, dispela i stiaim ol samting yu mekim long olgeta wan wan de long nau o nogat?
“Ol Man Bilong Tok Bilas Bai i Kamap”
6. Klostu olgeta manmeri i gat wanem tingting long “de bilong Jehova”? Bilong wanem ol Kristen tru i no kirap nogut long dispela samting?
6 Taim i sot pinis, tasol klostu olgeta manmeri i no tingim “de bilong Jehova” klostu nau bai kamap. Ol i save tok bilas long ol man husat i tok dispela de i kam klostu pinis. Ol Kristen tru i no kirap nogut long dispela. Ol i tingim dispela tok lukaut bilong aposel Pita: “Long taim bilong las de, ol man bilong tok bilas bai i kamap, na ol bai i bihainim laik nogut bilong bel bilong ol. Bai ol i tok bilas olsem, ‘Em i bin tok olsem em bai i kam bek gen, a? Orait em i stap we? Em i no inap i kam. Taim ol tumbuna i dai, na i kam inap long nau, olgeta samting i stap wankain olsem bipo tru, taim graun i kamap.’ ”—2 Pita 3:3, 4.
7. Wanem samting bai helpim yumi long holimpas tingting olsem taim i sot pinis?
7 Wanem samting bai helpim yumi long sakim kain tingting olsem, na holimpas tingting olsem taim i sot pinis? Pita i tok: “Mi givim tok long yupela bilong kirapim yupela long tingim gen ol dispela samting, bai tingting bilong yupela i stap stret olgeta. Mi laik bai yupela i mas tingim gen tok bilong samting i laik kamap bihain, em ol profet bilong God i bin autim. Na yupela i mas tingim tu lo bilong Bikpela, em Man bilong kisim bek yumi. Yupela i bin harim dispela lo long maus bilong ol aposel i bin kam long yupela.” (2 Pita 3:1, 2) Sapos yumi tingim ol tok lukaut i kam long rot bilong ol tok profet, dispela bai helpim yumi long “tingim gen tok bilong samting i laik kamap.” Ating planti taim yumi bin harim ol dispela tok lukaut, tasol nau long dispela taim, i bikpela samting yumi wok long tingim yet.—Aisaia 34:1-4; Luk 21:34-36.
8. Bilong wanem planti man i givim baksait long ol tok lukaut bilong Baibel?
8 Bilong wanem sampela i givim baksait long ol dispela tok lukaut? Pita i tok moa: “Ol i no laik tingting gut na save long dispela samting. Bipo tru God i bin tok na skai i kamap. Na God i kisim wara na mekim graun i kamap namel long wara. Na bihain God i tok na em i mekim wara i kamap gen na bikpela tait i karamapim dispela graun, na graun i bagarap olgeta.” (2 Pita 3:5, 6) Yes, i gat sampela i no laik bai de bilong Jehova i kamap. Ol i no laik bai wanpela samting i kamap bilong senisim i stap bilong ol. Ol i no laik bai ol i mas kot long Jehova long pasin bilong ol long bihainim laik bilong ol yet tasol! Olsem Pita i tok, ol i save “bihainim laik nogut bilong bel bilong ol.”
9. Ol lain long taim bilong Noa na Lot ol i gat wanem kain tingting?
9 Ol dispela man bilong tok bilas “ol i no laik” save olsem long bipo Jehova i bin mekim save long ol man nogut. Jisas Krais na aposel Pita i stori long tupela taim olsem—em “taim bilong Noa” na “taim bilong Lot.” (Luk 17:26-30; 2 Pita 2:5-9) Paslain long Bikpela Tait, ol manmeri i no tingim tok lukaut bilong Noa. Na paslain long bagarap i painim Sodom na Gomora, tupela tambu man bilong Lot, ol tu i no tingim tok lukaut, ol “i ting [Lot] i tok pilai tasol.”—Stat 19:14.
10. Jehova i mekim wanem tok long ol man i no bihainim tok lukaut?
10 Na i wankain tu long nau. Tingim ol tok Jehova i mekim long ol man i no bihainim tok lukaut. Em i tok: “Bai mi go . . . painim ol man i no save laikim pasin bilong mi. . . . Ol i tok, ‘God i save sindaun nating. Em i no helpim ol gutpela man na em i no bekim pe long ol man nogut. Olsem na maski long em.’ Orait bai mi bagarapim ol dispela man. Ol arapela man bai i stilim ol samting bilong ol dispela man, na bagarapim ol haus bilong ol. Ol i bin wokim ol nupela haus, tasol ol bai i no inap i stap long ol. Na ol i planim ol diwai wain, tasol ol bai i no inap kisim ol pikinini bilong ol dispela diwai na wokim wain long en.” (Sefanaia 1:12, 13) Ating ol manmeri bai wok yet long mekim ol samting ol i save mekim long olgeta de, tasol hatwok bilong ol i no inap helpim tru ol. Bilong wanem? Long wanem, de bilong Jehova bai kamap wantu tasol, na ol mani kago samting ol i bin bungim i no inap helpim ol long abrusim bagarap.—Sefanaia 1:18.
“Wet Liklik”
11. Yumi mas tingim wanem tok?
11 Yumi no olsem ol man nogut bilong dispela graun, nogat, yumi save tingim tok bilong profet Habakuk, em i tok: “Taim bilong ol dispela samting i mas kamap, em i no yet. Olsem na yu mas raitim dispela tok na putim i stap. Tasol i no longtaim na dispela samting mi laik soim yu long en, em bai i kamap. Yu ting bai em i no inap kamap kwik, tasol yu mas wet liklik na em bai i kamap.” (Habakuk 2:3) Maski i olsem dispela de i no kamap kwik, Jehova i no save wok isi isi. De bilong em bai kamap long taim stret em i bin makim, long wanpela taim em yumi ol man bilong graun i no ting em bai kamap.—Mak 13:33; 2 Pita 3:9, 10.
12. Jisas i bin toksave long wanem samting? Olsem wanem dispela i narapela kain long ol samting ol gutpela disaipel bilong Jisas i mekim?
12 Bilong strongim yumi long wetim de bilong Jehova, Jisas i toksave olsem sampela bilong lain bilong em, ol tu bai lusim pasin bilong tingim taim i sot pinis. Em i tok profet long ol olsem: “Sapos dispela wokboi em i man nogut na em i ting long bel bilong en, ‘Bikman bilong mi bai i no inap i kam kwik,’ na em i stat long paitim ol wanwok bilong en, na em i wok long kaikai na dring wantaim ol man i save spak, orait bikman bai i kam bek long wanpela de dispela wokboi i no redi, na long wanpela taim em i no save long en. Na bikman bai i bagarapim tru dispela wokboi.” (Matyu 24:48-51) Tasol lain wokboi i gat gutpela tingting em i save tingim taim i sot pinis. Dispela lain wokboi i bin was i stap na i bin kamapim olsem em i redi pinis. Jisas i bin makim dispela lain bilong “bosim olgeta samting bilong en” hia long graun.—Matyu 24:42-47.
Tingim Taim i Sot Pinis
13. Jisas i bin mekim wanem tok bilong helpim ol Kristen bilong pastaim long tingim taim i sot pinis?
13 Em i bikpela samting long ol Kristen bilong pastaim i mas tingim taim i sot pinis. Taim ol i lukim “ol ami i kam raunim Jerusalem i stap,” kwiktaim ol i mas lusim dispela taun. (Luk 21:20, 21) Dispela samting i bin kamap long yia 66 C.E. Tingim tok Jisas i mekim bilong kirapim ol dispela Kristen long ol i mas tingim taim i sot pinis: “Sapos man i stap antap long haus, orait taim em i go daun em i no ken ting long kisim ol samting i stap insait long haus bilong en. Na man i stap long gaden, em i no ken i go bek long haus bilong kisim longpela klos bilong en.” (Matyu 24:17, 18) Tasol Jerusalem i no bagarap long dispela yia, em i stap 4-pela yia moa, olsem na bilong wanem ol Kristen i mas hariap bihainim tok bilong Jisas long 66 C.E.?
14, 15. Bilong wanem i bikpela samting long ol Kristen bilong pastaim i mas kirap kwik na lusim Jerusalem taim ol i lukim ol ami i banisim taun?
14 Tru, ami bilong Rom i no bagarapim Jerusalem long 66 C.E. Dispela samting i bin kamap long 70 C.E. Tasol bel isi i no stap long dispela 4-pela yia namel long 66 na 70 C.E. I gat pasin bilong kros na bagarapim man na kilim man i dai. Wanpela saveman i stori long Jerusalem long dispela taim na em i tok ol Juda “i pait long ol yet na narapela i mekim nogut tru long narapela.” Ol i kisim ol yangpela bilong strongim ol banis, karim bainat, na bilong wok long ami. Long olgeta de ol i kisim trening long pait. Ol man i no sapotim wok bilong ol Juda, ol Juda i tingim ol olsem birua bilong ol. Sapos ol Kristen i bin stap yet long dispela taun, bikpela hevi inap painim ol.—Matyu 26:52; Mak 12:17.
15 Tingim: Jisas i tok olsem “ol manmeri i stap long distrik Judia,” na i no long Jerusalem tasol, ol i mas ranawe. Dispela em i bikpela samting, long wanem, sampela mun tasol bihain long ami bilong Rom i lusim Jerusalem, ol i kirapim gen pait. Ol i pait na daunim Galili long 67 C.E., na long yia bihain, ol i daunim Judia. Bikpela hevi i kamap long ol liklik ples nabaut. Na i hatwok long ol Juda i ranawe lusim taun Jerusalem. Ol man i save was long ol dua bilong taun, na taim man i laik ranawe, ol i ting em i laik ranawe i go helpim ol Rom.
16. Ol Kristen bilong pastaim i mas i gat wanem kain tingting bilong ol i ken abrusim bagarap?
16 Orait nau yumi save pinis long as na Jisas i tok ol i mas kirap kwik na ranawe. Ol dispela Kristen i mas redi long lusim sampela samting bilong ol, ol i no ken larim ol mani kago samting i pasim ol. Ol i mas redi long “givim baksait long olgeta samting bilong [ol]” na bai ol i ken bihainim tok lukaut bilong Jisas. (Luk 14:33) Ol man husat i bihainim tok bilong em na ranawe i go long hapsait bilong wara Jordan ol i no bagarap.
Holimpas Tingting Olsem Taim i Sot Pinis
17. Bilong wanem yumi mas strongim pasin bilong yumi long tingim olsem taim i sot pinis?
17 Ol tok profet bilong Baibel i soim klia olsem yumi stap klostu long pinis bilong taim bilong las de. Long nau, winim olgeta taim bipo, yumi mas strongim moa yet pasin bilong yumi long tingim olsem taim i sot pinis. Long taim i no gat pait, soldia i no pilim olsem hevi inap painim em. Tasol sapos em i no was i stap na wantu ol i singautim em long go pait, ating bai em i no redi, na em inap kisim bagarap na dai. Na i wankain long yumi tu. Sapos isi isi yumi no tingim moa olsem taim i sot pinis, ating bai yumi no redi long sakim ol samting i laik pulim yumi, na ating bai yumi no redi taim De bilong Jehova i kamap pinis. (Luk 21:36; 1 Tesalonaika 5:4) Sapos sampela i ‘no bihainim moa’ Jehova, orait nau em taim bilong ol i mas kirap bihainim em gen.—Sefanaia 1:3-6; 2 Tesalonaika 1:8, 9.
18, 19. Wanem samting bai helpim yumi long hariapim “de bilong Jehova”?
18 Olsem na i gat as na aposel Pita i tokim yumi long wetim “De bilong God i kamap”! Olsem wanem yumi ken mekim olsem? Wanpela samting, em yumi mas “wokabaut long pasin holi na bihainim olgeta pasin bilong God.” (2 Pita 3:11, 12) Taim yumi wok strong long mekim ol dispela wok, dispela bai helpim yumi long hariapim “de bilong Jehova.” Tru, yumi no inap sotim dispela haptaim i stap yet, kirap long nau i go inap long De bilong Jehova, nogat. Tasol taim yumi wet long dispela de i kamap, dispela haptaim bai go hariap sapos yumi wok strong long mekim wok bilong God.—1 Korin 15:58.
19 Taim yumi tingim tingim long bel ol tok bilong Baibel na ol tok lukaut bilong en, dispela tu bai helpim yumi long “wetim na hariapim” dispela de, olsem “was gut oltaim na wetim” dispela de. (2 Pita 3:12, The Amplified Bible; The New Testament, bilong William Barclay) Insait long ol dispela tok lukaut bilong Baibel i gat planti tok profet i tokaut long de bilong Jehova, tasol i no dispela samting tasol, nogat. Ol i tokaut tu long ol planti blesing em God bai givim long ol man i “wet tasol long dispela De.”—Sefanaia 3:8.
20. Yumi mas tingim na bihainim wanem tok?
20 Orait nau em taim bilong yumi olgeta i mas tingim na bihainim dispela tok bilong profet Sefanaia: “Nogut belhat bilong Bikpela i kamap na kukim yupela olsem paia. Yupela ol manmeri i no save bikhet na sakim tok bilong Bikpela, yupela i mas i kam long em. Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap.”—Sefanaia 2:2, 3.
21. Ol manmeri bilong God i tingting strong long mekim wanem long 2007?
21 Olsem na i stret long ol i makim yiateks bilong yia 2007 olsem: “Bikpela de bilong Jehova i klostu.” Ol manmeri bilong God i bilip tru olsem “klostu nau na dispela De bai i kamap kwiktaim tru.” (Sefanaia 1:14) Tru tumas, “em bai i kamap.” (Habakuk 2:3) Olsem na taim yumi wetim dispela de, yumi mas was i stap na tingim gut dispela taim yumi stap long en, na save olsem bikpela truim bilong ol dispela tok profet i kam klostu pinis!
Yu Inap Bekim?
• “Bikpela de bilong Jehova” em wanem samting?
• Bilong wanem planti man i no tingim olsem taim i sot pinis?
• Bilong wanem ol Kristen long taim bilong ol aposel i mas tingim olsem taim i sot pinis na kirap kwik na ranawe?
• Yumi ken mekim wanem bilong strongim pasin bilong yumi long tingim taim i sot pinis?
[Rait long pes 19]
Yiateks bilong 2007: Bikpela de bilong Jehova i klostu.—Sefanaia 1:14.
[Ol Piksa long pes 16, 17]
Wankain olsem long taim bilong Noa, ol man bilong tok bilas bai kirap nogut taim Jehova i kirap mekim kot
[Piksa long pes 18]
Taim ol Kristen i lukim “ol ami i kam raunim Jerusalem i stap,” ol i kirap kwik na ranawe