Buk Bilong Baibel Namba 61—2 Pita
Man Bilong Raitim: Pita
Ples Em i Bin Raitim: Babilon (?)
Raitim Pinis: 64 C.E. samting
TAIM Pita i raitim namba 2 pas, em i save klostu nau bai em i dai. Em i laik kirapim tingting bilong ol narapela Kristen na bai ol i save, ol i mas kisim stretpela save bambai ol inap long sanap strong na stap gut long wok bilong autim tok. Olsem wanem? I gat sampela samting na yumi ken ting aposel Pita i no bin raitim dispela pas i gat nem bilong em i stap long en? Pas yet i helpim yumi long save tru olsem Pita yet i bin raitim. Man bilong raitim i tok: “Mi Saimon Pita, mi wokboi na aposel bilong Jisas Krais.” (2 Pi. 1:1) Na em i tok, “dispela em i namba 2 pas nau mi raitim long yupela.” (3:1) Em i tok, em i bin stap na lukim lait bilong God i kamap long Krais Jisas taim bodi bilong em i kamap narapela kain, na yumi save Pita na Jems na Jon tasol i bin lukim dispela samting. Na ol tok em i raitim i makim olsem em i bin lukim tru dispela samting. (1:16-21) Na em i tok, Jisas i bin tokaut long i dai bilong em.—2 Pi. 1:14; Jo. 21:18, 19.
2 Tasol sampela man i tok, Pita i no bin raitim namba 2 pas, long wanem, pasin bilong raitim i narapela kain long pasin bilong raitim namba wan pas. Tasol yumi no ken kirap nogut long dispela, long wanem, long namba 2 pas Pita i stori long narapela samting, na i gat narapela as na em i raitim pas. Na tu, em i raitim namba wan pas “long han bilong Sailas,” em wanpela gutpela brata bilong ol. Na sapos Pita i larim Sailas i raitim ol tok long pasin Sailas yet i laikim, orait bai tupela pas i narapela narapela kain liklik, long wanem, Sailas i no bin helpim Pita long raitim namba 2 pas. (1 Pi. 5:12) Na sampela man i tok, dispela pas i no hap tru bilong Baibel, long wanem, “ol Tisa Kristen bilong bipo i no tokaut klia olsem.” Tasol sapos yu lukim “Sampela Olpela Lista Bilong Ol Skripsa Grik,” bai yu lukim olsem paslain long Namba 3 Bikpela Bung Bilong Kates, ol saveman i bilip olsem Namba 2 Pita em i hap tru bilong Baibel.
3 Pita i raitim namba 2 pas long wanem taim? Yumi ken ting em i bin raitim long yia 64 C.E. samting, bihain liklik long taim em i raitim namba wan pas na long taim em i stap long Babilon o klostu long Babilon. Tasol i no gat wanpela samting tru i makim taim na ples stret em i bin raitim. Taim Pita i raitim dispela pas, ol kongrigesen i kisim pinis planti pas bilong Pol, na Pita i save long ol dispela pas, na em i bilip olsem spirit bilong God yet i kirapim Pol long raitim, na em i tingim ol dispela pas i hap bilong “olgeta arapela tok i stap long buk bilong God.” Pita i raitim namba 2 pas long “ol manmeri i bin kisim bilip i gutpela tru” na “bilip bilong [ol] i bin kamap wankain olsem bilong mipela,” na insait long dispela lain em ol manmeri Pita i bin raitim namba wan pas long ol na ol narapela manmeri em i bin autim tok long ol. Namba wan pas bilong Pita i go nabaut long ol kongrigesen long planti hap, na i wankain tasol long namba 2 pas.—2 Pi. 3:15, 16; 1:1; 3:1; 1 Pi. 1:1.
HELPIM YUMI OLSEM WANEM?
8 Yumi mas kisim stretpela save, em bikpela samting tru! Pita yet i kamapim stretpela save em i bin kisim long Ol Skripsa Hibru bilong helpim ol tok em i mekim. Em i tokaut olsem spirit holi yet i bin kirapim ol man long raitim ol tok bilong Ol Skripsa Hibru. Em i tok: “I no gat wanpela tok profet i bin kamap long laik bilong man i autim. Nogat. Holi Spirit yet i kirapim ol man na ol i autim tok God i givim long ol.” Na em i tok, “God i bin givim gutpela save” long Pol. (1:21; 3:15) Sapos yumi tingim gut olgeta tok bilong Baibel em spirit bilong God i kamapim, na yumi holimpas stretpela save, dispela bai helpim tru yumi. Olsem bai yumi no ken ting olsem ol samting bai stap olsem tasol na i no inap senis, olsem ol man em Pita i stori long ol, em ol i tok: “Olgeta samting i stap wankain olsem bipo tru, taim graun i kamap.” (3:4) Na bai yumi no ken pundaun i go insait long umben bilong ol tisa giaman, em Pita i stori long ol long sapta 2 bilong dispela pas. Long olgeta taim yumi mas tingim ol tok Pita na ol narapela man bilong raitim Baibel i mekim bilong kirapim tingting bilong yumi. Ol dispela tok inap helpim yumi long “sanap strong” long tok i tru, na bai yumi ‘larim marimari bilong Krais i strongim yumi, na yumi kisim planti save moa long em.’—1:12; 3:18.
9 Bilong helpim yumi long kisim planti save moa “long God na long Jisas, Bikpela bilong yumi,” Pita i tok yumi mas wok strong long mekim ol pasin Kristen i kamap strong tru long yumi, em ol pasin em i kolim long sapta 1, ves 5 i go 7. Na long ves 8, em i tok: “Yupela i save pinis long Jisas Krais, Bikpela bilong yumi. Na sapos yupela i kisim ol dispela kain pasin na ol i kamap strong tru long yupela, orait dispela save bilong yupela bai i no inap i stap nating. Nogat. Em bai i karim planti kaikai.” Tru tumas, dispela tok i kirapim tru ol wokboi bilong God long wok strong moa long wok bilong God nau long dispela taim nogut!—1:2.
10 Em i bikpela samting long yumi mas wok strong tru long kisim “olgeta samting i nambawan tru na i bikpela moa yet, em ol samting bipo [God] i bin promis long givim long yumi.” Olsem na Pita i laik kirapim ol Kristen God i bin makim na bai ol i ken lukluk i go long Kingdom, na em i tok: “God i singautim yupela pinis, na em i bin makim yupela bilong i stap ol lain bilong em yet. Olsem na yupela i mas wok strong long i stap ol lain tru bilong en. Sapos yupela i mekim olsem, orait yupela bai i no inap pundaun na lusim em. Na em bai i opim rot olgeta bilong yupela i ken i go insait long kingdom i stap oltaim oltaim, dispela kingdom bilong Jisas Krais, em Bikpela bilong yumi, na em i Man bilong kisim bek yumi.” Bihain Pita i stori long bikpela lait na namba Jisas i kisim long Kingdom, em Pita i bin lukim dispela long taim bodi bilong Jisas i kamap narapela kain, na Pita i tok: “Olsem na mipela i save bilip strong moa long tok bilong ol profet.” Tru tumas, ol tok profet long gutpela Kingdom Bilong Jehova bai kamap tru. Olsem na yumi ken bilip tru na mekim wankain tok olsem Pita long taim em i kamapim tok bilong Aisaia na em i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.”—2 Pi. 1:4, 10, 11, 19; 3:13; Ais. 65:17, 18.