Ol Tok Profet Bilong Kingdom Bilong God i Kamap Tru

“Sapos yupela tu i holim strong tok bilong ol [profet], em i gutpela. Tok bilong ol profet em i olsem lam i lait i stap long ples tudak.”​—2 PITA 1:19.

 1. Wanem narapela narapela kain pasin i stap long graun long nau?

LONG nau planti hevi moa yet i wok long kamap long graun. Ol bikpela bagarap, olsem strongpela win ren na ol guria samting, na pasin teroris i kamap long olgeta hap, na planti hevi moa i wok long go bikpela tru na ol man i no inap pasim. Na ol lotu bilong graun tu i no inap stretim ol dispela hevi. Planti taim ol lotu yet i kirapim pasin bilong bel nogut long ol lain i gat ol narapela tingting na bilip, na birua long ol narapela lain, na litimapim kantri bilong ol yet, em ol samting i save pasim rot bilong i stap wanbel. Tru tumas, olsem Baibel i tok profet long en, “bikpela tudak” i karamapim ‘olgeta lain manmeri.’ (Aisaia 60:2) Tasol planti milion manmeri i bilip na wetim gutpela samting bai kamap bihain. Olsem wanem na ol inap mekim olsem? Long wanem, ol i holim strong ol tok profet bilong God olsem “lam i lait i stap long ples tudak.” Ol i larim “tok” bilong God long Baibel i soim rot long ol.​—2 Pita 1:19.

 2. Tok profet bilong Daniel long “taim bilong pinis” i tok God i givim save bilong ol samting bilong spirit long husat tasol?

² Profet Daniel i stori long “taim bilong pinis” na em i tok: “Planti manmeri bai i raun long olgeta hap, na stretpela save bai kamap planti. Planti bai mekim ol samting bilong kamap klin na waitpela na gutpela tru. Na ol man nogut bai mekim ol pasin nogut tasol, na i no gat wanpela man nogut bai save long as bilong dispela tok; tasol ol man i gat gutpela tingting na save ol bai save long as bilong en.” (Daniel 12:​4, 10, NW ) Ol manmeri i givim bel long “raun,” o stadi strong, long Baibel, na ol i daun long ol lo bilong God na wok strong long bihainim laik bilong em, ol tasol i kisim save long ol samting bilong spirit.​—Matyu 13:​11-15; 1 Jon 5:20.

 3. Long 1870 samting, ol sumatin bilong Baibel i kisim save long wanem bikpela tok i tru?

³ Long 1870 samting, em sampela yia paslain long kirap bilong “taim bilong las de,” God Jehova i kirap long givim sampela lait, o save, moa long ol “tok hait bilong kingdom bilong heven.” (2 Timoti 3:​1-5; Matyu 13:11) Long dispela taim wanpela liklik lain sumatin bilong Baibel i kisim save​—i narapela kain long tingting bilong planti man​—olsem taim Krais i kam bek, ol man bilong graun i no inap lukim em. Taim Jisas i kamap King long heven, em bai lukluk i kam long graun olsem King bilong en, na i olsem em i kam bek. I gat wanpela mak i gat planti hap bilong en ol disaipel bai lukim na ol i ken save em i kam i stap pinis, tasol i no samting bilong lukim long ai.​—Matyu 24:​3-14.

Wanpela Tok Profet Olsem Piksa i Kamap Tru

 4. Olsem wanem Jehova i bin strongim bilip bilong ol wokman bilong em long nau?

⁴ Dispela piksa olsem driman long bodi bilong Jisas i kamap narakain, em i makim taim Krais bai kamap King long Kingdom. (Matyu 17:​1-9) Dispela piksa i strongim bilip bilong Pita, Jems, na Jon long taim planti man i lusim Jisas na i no bihainim em moa, long wanem, em i no bin mekim ol samting ol i ting bai em i mekim. Na long dispela taim bilong pinis, Jehova i bin strongim bilip bilong ol wokman bilong em bilong nau taim em i givim sampela save moa long ol long truim bilong dispela piksa olsem driman na planti tok profet moa bilong dispela samting. Orait nau yumi ken stori long sampela samting bilong spirit i bin kamap tru pinis na i strongim bilip bilong yumi.

 5. Husat dispela Sta bilong moningtaim? Wanem taim em i “kirap”? Em i “kirap” olsem wanem?

⁵ Aposel Pita i toktok long taim bodi bilong Jisas i senis na i kamap narakain na em i tok: “Olsem na mipela i save bilip strong moa long tok bilong ol profet, na sapos yupela tu i holim strong tok bilong ol, em i gutpela. Tok bilong ol profet em i olsem lam i lait i stap long ples tudak, i go inap long tulait i kamap na sta bilong moningtaim em i kirap insait long bel bilong yupela.” (2 Pita 1:19) “Sta bilong moningtaim,” o “dispela sta i save lait tumas long moningtaim tru,” em Jisas Krais taim em i kisim biknem pinis long heven. (KTH 22:16) Em i “kirap” long 1914, taim Kingdom Bilong God i kamap nupela long heven, na dispela i makim wanpela nupela taim i kirap. (KTH 11:15) Long piksa olsem driman long bodi bilong Jisas i senis na i kamap narakain, Moses na Elaija i kamap na i sanap wantaim Jisas na ol i toktok wantaim em. Tupela i olsem piksa na i makim husat?

6, 7. Moses na Elaija i makim husat long piksa olsem driman long bodi bilong Jisas i senis na i kamap narakain? Baibel i kamapim klia wanem ol bikpela samting bilong dispela lain tupela i makim?

⁶ Moses na Elaija i bin kisim hap glori bilong Krais, olsem na i luk olsem dispela tupela witnes i bin stap gut long God ol i makim ol man i mekim wok king wantaim Jisas long Kingdom. Dispela save olsem sampela bai mekim wok king wantaim Jisas i stret wantaim wanpela driman i tok profet long taim Mesaia i kamap King, em profet Daniel i kisim. Daniel i lukim “wanpela man i wankain olsem yumi man bilong graun,” na “Man bilong bipo bipo yet”​—em God Jehova​—i mekim em i kamap king, na “wok king bilong en bai i no inap pinis.” Tasol tingim samting God i soim Daniel bihain liklik. Em i tok: “God Antap Tru . . . i givim biknem na strong bilong olgeta king bilong graun i go long ol manmeri bilong en.” (Daniel 7:​13, 14, 27) Em nau, inap 500 yia samting paslain long taim bodi bilong Jisas i senis na i kamap narakain, God i kamapim long ples klia olsem sampela “manmeri bilong God” bai stap king wantaim Krais.

⁷ Husat ol dispela manmeri bilong God long driman bilong Daniel? Aposel Pol i toktok long dispela lain taim em i tok: “Holi Spirit yet i save helpim spirit bilong yumi na yumi save tokaut ples klia olsem yumi stap pikinini bilong God . . . na bihain bai yumi kisim ol gutpela samting God Papa i bin promis long givim yumi, em ol samting Krais, brata bilong yumi, i kisim pinis. Sapos nau yumi karim pen olsem em i bin karim, orait bihain bai yumi kisim biknem na gutpela sindaun tru wantaim em.” (Rom 8:​16, 17) Ol dispela manmeri bilong God em ol disaipel bilong Jisas God i bin makim long holi spirit. Long Buk Kamapim Tok Hait, Jisas i tok: “Sapos man i winim pait, bai mi larim em i sindaun wantaim mi long sia king bilong mi, olsem bipo mi tu mi winim pait, na mi sindaun wantaim Papa bilong mi long sia king bilong em.” Dispela lain i “winim pait,” ol inap olsem 144,000, na taim ol i kirap bek ol bai wok wantaim Jisas long bosim olgeta hap graun.​—KTH 3:21; 5:​9, 10; 14:​1, 3, 4; 1 Korin 15:53.

 8. Olsem wanem ol disaipel bilong Jisas em God i bin makim ol i mekim wankain wok olsem Moses na Elaija? Wanem samting i kamap long wok bilong ol?

⁸ Tasol olsem wanem na Moses wantaim Elaija i makim ol Kristen God i bin makim long holi spirit? As bilong en i olsem: Taim ol dispela Kristen i stap yet long graun, ol i mekim wankain wok olsem Moses na Elaija. Olsem: Ol i mekim wok olsem witnes bilong Jehova, maski ol man i mekim nogut long ol. (Aisaia 43:10; Aposel 8:​1-8; KTH 11:​2-12) Olsem Moses na Elaija, ol i no pret​—ol i kamapim long ples klia ol lotu giaman na ol i tokim ol man i gat gutpela bel long lotuim God wanpela tasol. (Kisim Bek 32:​19, 20; Lo 4:​22-24; 1 King 18:​18-40) Olsem wanem? Wok bilong ol i karim kaikai? Tru tumas! Ol i mekim wok bilong bungim olgeta manmeri God i bin makim, na tu, ol i helpim planti milion “arapela sipsip” long daun long Jisas Krais.​—Jon 10:16; KTH 7:4.

Krais i Winim Ol Pait

 9. Kamapim Tok Hait 6:2 i tok Jisas i stap olsem wanem long nau?

⁹ Long nau Jisas i no stap moa olsem man bilong graun i sindaun long wanpela donki. Nau em i strongpela King. Baibel i tok piksa olsem em i sindaun long hos​—long Baibel hos i makim pait. (Sindaun 21:31) Kamapim Tok Hait 6:2 i tok: “Mi lukim wanpela waitpela hos, na man i sindaun long en em i holim banara. Ol i givim em wanpela hat bilong man i winim pait, . . . na em i wok long winim planti pait moa.” Na Devit, man bilong raitim song, em i tok long Jisas olsem: “Bikpela i stap long Saion, na bai em i mekim yu i bosim planti ples, na em i tok, ‘Yu bosim ol birua bilong yu.’ ”​—Song 110:2.

10. (a) Olsem wanem kirap bilong raun bilong Jisas long winim pait i gutpela tru? (b) Namba wan pait Krais i winim i bin mekim wanem long ol manmeri bilong graun?

¹⁰ Namba wan pait Jisas i winim, em pait em i bin mekim long nambawan strongpela birua bilong em​—em Satan wantaim ol spirit nogut bilong em. Jisas i rausim ol long heven i kam daun long graun. Ol spirit nogut i save ol i gat sotpela taim tasol, olsem na ol i kamapim bikpela belhat bilong ol long ol manmeri bilong graun, na ol i kamapim bikpela hevi tru. Bilong makim ol dispela hevi Buk Kamapim Tok Hait i stori long 3-pela narapela man ol i raun long ol hos. (KTH 6:​3-8; 12:​7-12) Olsem Jisas i tok profet long en taim em i tokaut long ol “mak bai kamap bilong makim olsem [em i] kam i stap na pasin bilong dispela graun i laik pinis,” raun bilong ol man i sindaun long hos i mekim na ol bikpela pait, na bikpela hangre, na ol bikpela sik nogut i kamap. (Matyu 24:​3, 7, NW; Luk 21:​7-11) Olsem pen i kamap long meri i laik karim pikinini, ol dispela hevi bai wok long go bikpela moa inap long taim Krais i ‘winim pait’ bilong em na pinisim tru olgeta samting bilong oganaisesen bilong Satan long graun.a​—Matyu 24:8.

11. Olsem wanem ol wok bilong kongrigesen Kristen i kamapim klia olsem Krais i stap King?

¹¹ Mak bilong bikpela namba bilong Jisas olsem King i kamap klia long narapela rot, olsem: Em i bin lukautim gut kongrigesen Kristen bambai kongrigesen i ken inapim tru wok bilong en long autim tok bilong Kingdom long olgeta hap. Maski Bikpela Babilon​—em olgeta lotu giaman bilong graun​—na sampela gavman i birua nogut tru long kongrigesen Kristen, wok autim tok i stap yet na em i go bikpela moa, winim olgeta taim bipo. (KTH 17:​5, 6) Em wanpela strongpela mak olsem tokaut i kamapim klia olsem Krais i stap King!​—Song 110:3.

12. Bilong wanem planti man i no luksave olsem Krais i stap pinis olsem King?

¹² Tasol sori tru, planti man​—na ol milion milion man i tok ol i Kristen​—ol i no luksave long ol samting i olsem as bilong ol bikpela samting tru i wok long kamap long graun. Na ol i save tok bilas long ol manmeri i autim tok bilong Kingdom bilong God. (2 Pita 3:​3, 4) Bilong wanem ol i mekim olsem? Long wanem, Satan i pasim tingting bilong ol. (2 Korin 4:​3, 4) Inap planti handet yia i go pinis em i bin tromoi laplap, olsem tudak bilong spirit, antap long ol lain i tok ol i Kristen, na em i mekim na ol i lusim ol gutpela tok promis bilong Kingdom.

Ol i Lusim Ol Gutpela Promis Bilong Kingdom

13. Dispela tudak bilong spirit i mekim na wanem samting i kamap?

¹³ Jisas i tok profet olsem, ol apostet, em ol man i bin tromoi lotu i tru, bai ol i kain olsem ol gras nogut ol i planim namel long wit​—ol bai hait i kam insait long kongrigesen Kristen na giamanim planti manmeri. (Matyu 13:​24-30, 36-43; Aposel 20:​29-31; Jut 4) Bihain, ol dispela man i tok ol i Kristen ol i kisim ol bikpela de bilong ol haiden, na ol pasin na bilip bilong ol, na ol i kolim ol dispela samting olsem “Kristen.” Olsem: As bilong Krismas, em ol pasin ol i bin mekim bilong lotuim ol god haiden olsem Mitra na Saten. Tasol wanem samting i bin kirapim ol dispela man i tok ol i Kristen na ol i kisim ol dispela bikpela de bilong lotu i no bilong ol Kristen? Buk The New Encyclopædia Britannica (1974) i tok: “Ol i bin kamapim Krismas, olsem bikpela de bilong taim mama i bin karim Jisas Krais, long wanem, ol i no tingting strong moa olsem liklik taim na Krais bai i kam bek.”

14. Olsem wanem ol tok bilong Origen na Augustine i paulim tok i tru bilong Kingdom?

¹⁴ Na tu, ol i bin paulim mining bilong dispela tok “kingdom.” Wanpela buk (The Kingdom of God in 20th-Century Interpretation) i tok: “Origen [wanpela tisa bilong lotu i bin stap 200 yia samting bihain long Krais] em i bin senisim mining bilong dispela tok ‘kingdom’ olsem ol Kristen i bilip long en, na em i tok i olsem lo bilong God i stap insait long bel bilong man.” Wanem as bilong dispela tok bilong Origen? Em i no kisim long Baibel, nogat. As bilong dispela tok em ‘ol tingting bilong ol man bilong dispela graun, i narapela kain tru long tingting bilong Jisas na sios bilong pastaim tru.’ Long buk De Civitate Dei (Taun Bilong God), Augustine bilong Hippo (354-430 C.E.) i tok, sios yet em i Kingdom bilong God. Ol dispela kain tingting i no bilong Baibel em i givim rot long ol misin bilong Kristendom long insait long wok politik. Insait long planti handet yia ol i holim bikpela strong long bosim ol man, na planti taim ol i mekim nogut tru long ol.​—KTH 17:​5, 18.

15. Olsem wanem tok bilong Galesia 6:7 i kamap tru long planti misin bilong Kristendom?

¹⁵ Tasol long nau ol misin i wok long kisim kaikai ol yet i bin planim. (Galesia 6:7) I luk olsem planti misin i lusim strong bilong ol, na lain bilong ol tu i wok long lusim ol. Dispela pasin i kamap klia tru long Yurop. Nius Christianity Today i tok: “Long nau ol bikpela haus lotu long Yurop i no stap moa olsem ol haus bilong mekim lotu​—nau ol i mekim wok olsem haus tumbuna, na ol turis tasol i save go insait long en.” Na yumi lukim wankain samting i kamap long ol narapela hap. Dispela i makim wanem samting bilong ol lotu giaman? Ating isi isi ol bai pinis olgeta, long wanem, i no gat ol lain moa bilong en? Na dispela bai mekim wanem long lotu i tru?

Redi Long Bikpela De Bilong God

16. Bilong wanem pasin bilong ol lain long bel nogut long Bikpela Babilon em i bikpela samting?

¹⁶ Taim wanpela maunten volkeno i kirap long tromoi smok na sit bilong paia i go antap, na em i no bin mekim olsem inap longpela taim tru, dispela inap makim olsem klostu nau na maunten bai pairap. Na olsem tasol, pasin bilong bel nogut long ol lotu i wok long kamap long planti hap, na dispela i makim olsem klostu nau na ol lotu giaman bai pinis. Liklik taim Jehova bai kirapim ol lain politik bilong graun long bung wantaim long bagarapim pamukmeri bilong spirit, em Bikpela Babilon. (KTH 17:​15-17; 18:21) Olsem wanem? Ol Kristen tru i mas pret long dispela samting na ol narapela samting bilong taim bilong “bikpela hevi tru” bai kamap bihain long en? (Matyu 24:21) Nogat tru! Bai i gat as na ol i ken amamas taim God i kirap na mekim save long ol man nogut. (KTH 18:20; 19:​1, 2) Tingim ol samting i bin kamap long Jerusalem long taim bilong ol aposel na ol Kristen i bin sindaun long dispela taun.

17. I gat wanem as na ol wokman bilong Jehova i stap gut long em ol i no ken pret long pasin bilong dispela graun i laik pinis?

¹⁷ Taim ol ami bilong Rom i kam banisim Jerusalem long 66 C.E., ol Kristen i was i stap ol i no kirap nogut o pret. Ol i bin stadi gut long Baibel, olsem na ol i save “taim bilong taun i mas bagarap em i klostu nau.” (Luk 21:20) Na ol i save, God bai opim rot bilong ol long ranawe na abrusim bagarap. Orait taim God i opim rot, ol Kristen i ranawe. (Daniel 9:26; Matyu 24:​15-19; Luk 21:21) Long nau tu, ol manmeri i save long God na bihainim tok bilong Pikinini bilong em, ol i ken i stap strong na i no pret long dispela pasin bilong nau i laik pinis. (2 Tesalonaika 1:​6-9) Taim bikpela hevi tru i kirap, ol bai amamas na ‘litimapim het bilong ol, long wanem, taim bilong God i kisim bek ol em i kam klostu pinis.’​—Luk 21:28.

18. Taim Gok i mekim pait long ol wokman bilong Jehova, wanem samting bai kamap?

¹⁸ Taim Bikpela Babilon i bagarap pinis, Gok bilong Magok, em Satan, em bai mekim pait long lain Witnes Bilong Jehova ol i stap isi. Ol ami bilong Gok bai i “karamapim graun olsem bikpela klaut” na ol bai ting ol i no gat hatwok long winim pait. Tasol ol bai kirap nogut tru long samting i kamap! (Esekiel 38:​14-16, 18-23) Aposel Jon i tok: “Mi lukim heven i op, na wanpela waitpela hos i stap. Na nem bilong man i sindaun long dispela hos, em i olsem, ‘Man i lukautim gut wok bilong en,’ na ‘Man i save mekim pasin i tru tasol.’ . . . Wanpela bainat i sap tru, em i kam ausait long maus bilong [em]. Na long dispela bainat em bai i daunim ol manmeri bilong olgeta lain.” Dispela strongpela “King bilong olgeta king” bai kisim bek lain bilong lotuim Jehova na pinisim olgeta birua bilong ol. (KTH 19:​11-21) Em gutpela samting tru bai kamap long pinis bilong truim bilong dispela piksa olsem driman long bodi bilong Jisas i senis na i kamap narakain!

19. Taim Krais i winim pait olgeta, ol disaipel bilong em bai mekim wanem? Long nau ol i mas wok strong long mekim wanem?

¹⁹ Long dispela De, olgeta manmeri i bilip long Jisas ol bai i litimapim nem bilong em na amamas tru long em. (2 Tesalonaika 1:10) Yu laik i stap namel long ol lain i amamas tru long Pikinini bilong God i winim pait? Sapos olsem, orait yu mas wok yet long strongim bilip bilong yu na ‘yu mas redi,’ bikos ‘Pikinini Bilong Man bai i kam long wanpela taim yu no ting em bai i kam.’​—Matyu 24:​43, 44.

Tingting i Mas Klia

20. (a) Olsem wanem yumi ken soim olsem yumi tenkyu long God i bin givim yumi dispela “wokboi i gat gutpela tingting”? (b) Yumi mas givim wanem ol askim long yumi yet?

²⁰ Long olgeta taim “wokboi i gat gutpela tingting” i save tokim lain bilong God long was i stap na tingting i mas klia. (Matyu 24:​45, 46; 1 Tesalonaika 5:6) Yu save tenkyu long ol dispela tok bilong kirapim tingting em yumi save kisim? Yu save larim ol dispela tok i helpim yu long skelim wanem ol samting i mas i stap nambawan long laip bilong yu? Askim yu yet: ‘Mi gat gutpela ai bilong spirit na mi inap lukim Pikinini Bilong God i mekim wok king long heven? Mi inap lukim em i redi long givim strafe bilong kot bilong God long Bikpela Babilon na ol narapela hap bilong dispela graun bilong Satan?’

21. Ating i gat wanem as na sampela i bin larim ai bilong ol i go tudak long ol samting bilong spirit? Ol i mas hariap long mekim wanem?

²¹ Sampela manmeri nau ol i save bung wantaim lain bilong Jehova ol i bin larim ai bilong ol i go tudak long ol samting bilong spirit. Ating ol i les long wet o ol i no gat pasin bilong stap strong na karim hevi, olsem sampela disaipel bilong Jisas long bipo? Ating ol hevi bilong graun, o laikim tumas mani samting, o pasin bilong ol man long mekim nogut long ol i as na ol i mekim olsem? (Matyu 13:​3-8, 18-23; Luk 21:​34-36) Ating sampela i hatwok long kisimgut ol tok em “wokboi i gat gutpela tingting” i kamapim long ol buk samting? Sapos kain samting olsem i bin painim yu, mipela laik bai yu kirap na stadi strong gen long Baibel na beten long Jehova bambai yu ken kisim bek pasin bilong pas gut wantaim em.​—2 Pita 3:​11-15.

22. Yumi bin stori long piksa olsem driman long bodi bilong Jisas i senis na i kamap narakain na ol arapela tok profet olsem, na dispela i bin mekim wanem long yu?

²² Taim ol disaipel bilong Jisas i mas i gat samting bilong strongim bel bilong ol, ol i bin kisim dispela piksa olsem driman long bodi bilong Jisas i senis na i kamap narakain. Long nau yumi gat wanpela bikpela samting moa bilong strongim yumi​—em truim bilong dispela tok profet olsem piksa na planti tok profet moa olsem. Taim yumi tingim ol dispela gutpela samting i kamap tru pinis na ol samting bilong en bai kamap bihain, yumi tu i mas givim bel long mekim wankain tok olsem aposel Jon, em i tokaut olsem: “I tru. Bikpela Jisas, yu kam.”​—KTH 22:20.

[Futnot]

Yu Inap Tingim?

• Long 1870 samting, wanpela liklik lain sumatin bilong Baibel i kisim wanem save long kambek bilong Krais?

• Dispela piksa olsem driman long bodi bilong Jisas i senis na i kamap narakain, truim bilong en i kamap olsem wanem?

• Jisas i go winim ol pait, na dispela i mekim wanem long ol lain bilong dispela graun na long kongrigesen Kristen?

• Yumi mas mekim wanem na bai yumi stap namel long ol man ol bai abrusim bagarap taim Jisas i winim pinis ol pait?

[Ol Piksa long pes 16, 17]

Wanpela tok profet olsem piksa i kamap tru tru

[Ol Piksa long pes 18]

Yu save long samting i bin kamap taim Jisas i kirap long winim ol pait?