Sapta 19
Ol i Makim Israel Bilong God
Driman 4—Kamapim Tok Hait 7:1-17
Stori: Inap 144,000 i kisim mak, na bikpela lain i sanap long ai bilong sia king bilong Jehova na long ai bilong Pikinini Sipsip
Taim bilong truim: Kirap long taim Jisas Krais i kamap King long 1914 na i go inap long taim em i stap King inap 1,000 yia
1. ‘Husat inap i stap gut’ long bikpela de bilong belhat bilong God?
“HUSAT inap . . . i stap gut?” (KTH 6:17) Tru tumas, husat inap i stap gut? Taim bikpela de bilong belhat bilong God i bagarapim ol wok na lain bilong Satan, ol man bilong graun na ol bikman bilong ol gavman bai askim olsem. Ol bai ting dispela bikpela bagarap bai pinisim olgeta man. Tasol olsem wanem? Olgeta man bai pinis, o nogat? Nogat, long wanem, profet bilong God i tok: “Olgeta man i kolim nem bilong Jehova na singaut long em ol i no ken bagarap.” (Joel 2:32, NW ) Aposel Pita na Pol tu i tok olsem. (Aposel 2:19-21; Rom 10:13) Tru tumas, ol man i singaut long nem bilong Jehova ol i no ken kisim bagarap. Husat dispela ol man? Yumi ken lukim narapela driman moa na yumi ken save.
2. Bilong wanem yumi kirap nogut long save, sampela man bai abrusim bagarap long taim Jehova bai strafim ol man nogut?
2 Yumi kirap nogut tru long save, sampela man bai abrusim bagarap long taim Jehova i givim strafe long ol man nogut, long wanem, narapela profet bilong God i stori long dispela taim nogut na i tok: “Harim. Belhat bilong Bikpela i laik kamap long ol man nogut, olsem strongpela win na ren i kamap long ol, na olsem bikpela raunwin i krungutim het bilong ol. Bikpela bai i belhat i stap inap em i pinisim tru olgeta samting em i bin tingting long mekim.” (Jeremaia 30:23, 24) Olsem na kwiktaim yumi mas mekim sampela samting bambai yumi no ken bagarap long dispela taim nogut bai kamap!—Sindaun 2:22; Aisaia 55:6, 7; Sefanaia 2:2, 3.
Fopela Win
3. (a) Jon i lukim ol ensel i mekim wanem bikpela wok? (b) Dispela “4-pela win” i makim wanem samting?
3 Taim Jehova i no kamapim yet belhat bilong em ol ensel bilong heven bai mekim wanpela bikpela wok. Long driman Jon i lukim dispela samting. Em i tok: “Dispela olgeta samting i pinis, orait mi lukim 4-pela ensel i sanap i stap long ol 4-pela kona bilong graun. Ol i holimpas ol 4-pela win bilong graun, bai ol win i no inap i go winim graun na solwara na ol diwai.” (KTH 7:1) Yumi ken ting olsem wanem long dispela tok? Dispela “4-pela win” i makim bikpela strafe em liklik taim bai kisim ol man nogut bilong graun na ol bikhetman i olsem “solwara” i mekim nabaut na ol bikman em ol i olsem “ol diwai” em ol man bilong graun i helpim na strongim ol.—Aisaia 57:20; Song 37:35, 36.
4. (a) Dispela 4-pela ensel i makim wanem samting? (b) Taim ol ensel i lusim 4-pela win em bai mekim wanem long oganaisesen bilong Satan long graun?
4 Dispela 4-pela ensel i makim 4-pela lain ensel em Jehova i givim wok long ol bilong pasim strafe bilong em inap long taim em yet i bin makim. Taim ol ensel i lusim 4-pela win, olsem belhat bilong Jehova, ol dispela win bai kirap long hap bilong not na saut na is na wes na ol bai mekim save long dispela graun na kamapim bikpela bagarap. Em bai kain olsem 4-pela win i bin painim lain Elam bilong bipo na rausim ol nabaut na bagarapim ol, tasol dispela 4-pela win bai kamapim bikpela bagarap tru. (Jeremaia 49:36-38) Em bai olsem bikpela win na klaut i pairap, winim dispela “strongpela win” Jehova i salim bilong bagarapim ol Amon. (Amos 1:13-15) Kros bilong Jehova bai painim na bagarapim olgeta hap bilong oganaisesen bilong Satan long graun, long taim Jehova i stretim bek wok king bilong em, na i no gat tok moa i ken kamap long en inap long olgeta taim bihain.—Song 83:15, 18; Aisaia 29:5, 6.
5. Jeremaia i tok wanem na yumi save strafe bilong God bai painim olgeta hap bilong graun?
5 Yumi laik save, strafe bilong God bai painim olgeta hap bilong graun, o olsem wanem? Harim gen tok bilong profet bilong em, em Jeremaia: “Harim, olgeta kantri bai i bagarap. Dispela bai i stat long wanpela kantri na bai i go i go na inapim olgeta kantri. Dispela bagarap i olsem traipela win na ren i kirap long ol longwe ples na i raun long olgeta hap bilong graun. Na long dispela taim Bikpela bai i kilim i dai planti manmeri moa na bai bodi bilong ol i stap nabaut long olgeta hap bilong graun.” (Jeremaia 25:32, 33) Taim dispela bikpela hevi i kamap, bikpela tudak bai karamapim graun. Ol bikpela bos bilong graun bai bagarap na i lus olgeta. (KTH 6:12-14) Tasol i no olgeta man bai bagarap, nogat. Orait, Jehova i tingim husat na em i tokim ol ensel long pasim 4-pela win?
Ol Wokman Bilong God i Kisim Mak
6. Husat i tokim ol ensel long pasim 4-pela win? Olsem na bai i gat taim bilong mekim wanem?
6 Jon i stori long sampela bai kisim mak bambai ol i no ken bagarap, na em i tok: “Mi lukim narapela ensel i lusim hap bilong sankamap na i kam. Em i holim mak bilong God, em God i save stap laip oltaim, na em i singaut strong long dispela 4-pela ensel God i givim strong long ol bilong bagarapim graun wantaim solwara. Em i tok olsem, ‘Yupela i no ken hariap long bagarapim graun na solwara na ol diwai. Mipela i laik putim mak bilong God bilong yumi long pes bilong ol wokman bilong en pastaim, na bihain yupela i ken bagarapim ol samting.’ ”—KTH 7:2, 3.
7. Husat dispela namba 5 ensel? Olsem wanem yumi ken save em i husat?
7 Baibel i no kolim nem bilong dispela namba 5 ensel, tasol ol samting i makim olsem em i Bikpela Jisas taim em i kisim pinis namba long heven. Em i Nambawan ensel, na olsem dispela ves i makim, em i bosim ol narapela ensel. (1 Tesalonaika 4:16; Jut 9) Em i kirap long hap bilong is olsem “ol king i kam long hap sankamap”—em Jehova wantaim Krais bilong em—bilong givim strafe long ol man, olsem King Darius na Sairus i bin daunim Babilon bilong bipo. (KTH 16:12; Aisaia 45:1; Jeremaia 51:11; Daniel 5:31) Na yumi ken save dispela ensel em Jisas tasol, long wanem, em i gat wok long putim mak long ol Kristen em God i bin makim ol long spirit holi. (Efesus 1:13, 14) Taim ol ensel i lusim 4-pela win, Jisas bai kisim ol ensel na ol bai strafim ol lain man. (KTH 19:11-16) Olsem na em Jisas tasol i tokim ol ensel long pasim wok bilong bagarapim oganaisesen bilong Satan long graun inap long taim ol wokman bilong God i kisim pinis mak.
8. Wanem dispela wok bilong putim mak long ol wokman bilong God? Dispela wok i kirap long wanem taim?
8 Wanem dispela wok bilong putim mak long ol wokman bilong God, na husat dispela ol wokman? Dispela wok i kirap long de Pentikos long yia 33, taim God i makim long spirit holi ol namba wan lain Kristen bilong ol Juda. Bihain em i singautim sampela moa “bilong ol arapela lain” na em i makim ol tu long spirit holi. (Rom 3:29; Aposel 2:1-4, 14, 32, 33; 15:14) Aposel Pol i tok ol Kristen em God i makim ol, ol i “pas wantaim Krais” ol i “bilong em yet,” na Pol i tok, God “i bin putim mak bilong em yet long yumi, na em i givim Holi Spirit bilong i stap long bel bilong yumi. Holi Spirit em i olsem namba wan hap bilong ol gutpela samting God i laik givim yumi. Na yumi kisim Holi Spirit pinis, olsem na yumi ken save, tru tumas bai yumi kisim olgeta arapela samting tu.” (2 Korin 1:21, 22; skelim wantaim Kamapim Tok Hait 14:1.) Olsem na taim God i kisim ol dispela wokman olsem pikinini spirit bilong em na ol i no go i stap yet long heven, em i givim mak long ol olsem tok promis. (2 Korin 5:1, 5; Efesus 1:10, 11) Na nau ol inap tok: “Holi Spirit yet i save helpim spirit bilong yumi na yumi save tokaut ples klia olsem yumi stap pikinini bilong God. Orait yumi stap pikinini bilong God, na bihain bai yumi kisim ol gutpela samting God Papa i bin promis long givim yumi, em ol samting Krais, brata bilong yumi, i kisim pinis. Sapos nau yumi karim pen olsem em i bin karim, orait bihain bai yumi kisim biknem na gutpela sindaun tru wantaim em.”—Rom 8:15-17.
9. (a) Hap lain bilong ol pikinini bilong God long spirit, em ol i stap yet long graun, ol i mas karim pen na i stap gut inap long wanem taim? (b) Wok bilong traim na skelim dispela lain bai stap inap long wanem taim?
9 Dispela tok “sapos nau yumi karim pen olsem em i bin karim”—wanem insait bilong dispela tok? Ol dispela Kristen em God i bin makim ol, sapos ol i laik kisim laip oltaim ol i mas i stap strong i go inap long taim ol i dai. (KTH 2:10) Sapos long nau ol i kamap strong pinis, ol i mas i stap olsem tasol i go inap long taim ol i dai. (Matyu 10:22; Luk 13:24) Pita i tokim ol: “Yupela i mas wok strong long i stap ol lain tru bilong en.” Ol i mas i stap olsem aposel Pol na bai ol inap tok: “Mi bin ran strong long gutpela resis bilong laip. Nau mi kamap pinis long mak, na mi bin holimpas bilip.” (2 Pita 1:10, 11; 2 Timoti 4:7, 8) Hap lain bilong ol dispela pikinini bilong God ol i stap yet long graun, na hevi bai painim ol bilong traim bel bilong ol na bilong skelim ol, na dispela bai stap inap long taim Jisas na ol ensel bilong em i putim gut mak long “pes bilong ol” bilong makim olsem ol i winim pinis ol traim na ol i bin stap gut olsem ‘ol wokman bilong God bilong yumi.’ Nau dispela mak bai stap oltaim. Taim olgeta bilong lain Israel bilong spirit i kisim pinis mak, orait, ol ensel bai lusim 4-pela win, tasol sampela bilong dispela lain bai stap yet long graun long dispela taim. (Matyu 24:13; KTH 19:7) Na long dispela taim olgeta bilong dispela lain i kam insait pinis na ol inap pinis!—Rom 11:25, 26.
Hamas Ol Bai Kisim Mak?
10. (a) Wanem ol tok bilong Baibel i tok, i no planti man bai kisim mak? (b) Hamas man bai kisim mak? Lista i kolim olsem wanem?
10 Jisas i tokim ol dispela lain bilong kisim mak: “Yupela liklik lain sipsip, yupela i no ken pret. Papa bilong yupela em i tok pinis long em bai i . . . givim kingdom bilong en long yupela.” (Luk 12:32) Na Kamapim Tok Hait 6:11 na Rom 11:25 tu i makim olsem dispela lain i liklik na God i makim pinis hamas manmeri bai insait long en. Jon tu i tok olsem: “Mi harim ol i kolim namba bilong ol manmeri i kisim mak. Ol i putim mak long 144,000 manmeri namel long olgeta lain bilong Israel. Olsem na 12,000 manmeri bilong lain Juda ol i kisim mak, na 12,000 bilong lain Ruben na 12,000 bilong lain Gat na 12,000 bilong lain Aser na 12,000 bilong lain Naptali na 12,000 bilong lain Manase na 12,000 bilong lain Simeon na 12,000 bilong lain Livai na 12,000 bilong lain Isakar na 12,000 bilong lain Sebulun na 12,000 bilong lain Josep na 12,000 bilong lain Benjamin. Ol dispela manmeri ol i kisim mak bilong God.”—KTH 7:4-8.
11. (a) Olsem wanem dispela tok long 12-pela lain em i no makim lain Israel bilong skin? (b) Bilong wanem Kamapim Tok Hait i kolim 12-pela lain? (c) Olsem wanem na i no wanpela lain tasol bilong dispela 12-pela lain bai holim wok king na pris insait long Israel bilong God?
11 Dispela i toktok long ol Israel bilong skin, o nogat? Nogat, long wanem, lista bilong ol hia long Kamapim Tok Hait 7:4-8 i narapela kain na i no olsem ol narapela lista bilong lain Israel bilong skin. (Namba 1:17, 47) Wok bilong dispela lista hia i no bilong kolim nem bilong ol wan wan lain Juda na bai ol i ken save ol i bilong wanem wanem lain, nogat; em i bilong makim olsem Israel bilong spirit i gat ol wankain lain olsem Israel bilong skin; i mas i gat 144,000 stret insait long dispela 12-pela lain bilong Israel bilong spirit, olsem 12,000 bilong olgeta wan wan lain. Na i no wanpela lain tasol bai mekim wok king o wok pris, nogat. Dispela lain Israel bilong spirit, em olgeta wantaim bai holim wok king na wok pris.—Galesia 6:16; KTH 20:4, 6.
12. Olsem wanem na i stret 24 hetman i mekim singsing long Pikinini Sipsip na i kolim ol tok i stap long Kamapim Tok Hait 5:9, 10?
12 Rot i bin op pastaim long ol Juda na ol man i bihainim lotu Juda na bai ol i ken kam insait long lain Israel bilong spirit, tasol liklik hap lain tasol bilong ol i bin mekim olsem. Olsem na Jehova i singautim ol manmeri bilong ol narapela lain. (Jon 1:10-13; Aposel 2:4, 7-11; Rom 11:7) Bipo ol Efesus “i stap ausait long lain bilong Israel,” na sampela ol narapela lain tu, em ol i no bilong lain Juda, tasol nau ol inap kisim mak na kam insait long lain Kristen em God i bin makim ol long spirit holi. (Efesus 2:11-13; 3:5, 6; Aposel 15:14) Olsem na i stret dispela 24 hetman i mekim singsing long Pikinini Sipsip na i tok: “Long blut bilong yu yu bin baim bek ol manmeri, bilong givim ol long God. Yes, yu baim bek ol manmeri bilong olgeta lain man, na bilong olgeta tok ples, na bilong olgeta kain skin, na bilong olgeta kantri. Yu bin mekim ol i kamap . . . king, na ol i stap lain pris bilong God bilong mipela. Na bai ol i stap king na bosim ol manmeri bilong graun.”—KTH 5:9, 10.
13. Olsem wanem na i stret long Jems i salim pas i go long ‘ol 12-pela lain bilong Israel i stap long ol arapela hap bilong graun’?
13 Lain Kristen em God i bin makim ol, ol “i stap lain manmeri bilong” God na ol “i stap ol pris bilong lain bilong king . . . [na] lain manmeri i holi, em ol lain manmeri tru bilong God.” (1 Pita 2:9) Bipo, ol Israel bilong skin ol i lain bilong God, tasol em i lusim ol na em i kisim nupela lain Israel, olsem “lain tru bilong Israel.” (Rom 9:6-8; Matyu 21:43)a Olsem na i stret long brata bilong Jisas, em Jems, em i salim pas bilong em long “ol 12-pela lain bilong Israel,” ol “i bin lusim as ples bilong [ol] na ol i go i stap long ol arapela hap bilong graun,” em dispela lain Kristen, God i bin makim ol na ol i stap nabaut long olgeta hap bilong graun na ol i mas kamap inap 144,000.—Jems 1:1.
Israel Bilong God Long Nau
14. Olsem wanem yumi ken save, long bipo na i kam inap nau ol Witnes Bilong Jehova i bin tok, lain Israel bilong spirit em inap olsem 144,000 stret?
14 Charles T. Russell i bin save olsem lain Israel bilong spirit i gat 144,000 tru insait long en. Long wanpela buk (The New Creation, Volyum 6 bilong Studies in the Scriptures, ol i wokim long 1904) em i raitim tok olsem: “Yumi ken bilip tru olsem dispela lain em God i bin makim ol, ol inap olsem 144,000 na Kamapim Tok Hait yet i kolim dispela namba (KTH 7:4; 14:1); God i kisim ol namel long ol man bilong graun.” Na wanpela buk (Light, Buk Namba Wan) em ol Sumatin Bilong Baibel i wokim long 1930, em tu i tok: “Lain bilong Krais em inap olsem 144,000 . . . na God i bin kisim ol na makim ol.” Long bipo na i kam inap nau ol Witnes Bilong Jehova i bin tok, lain Kristen em God i bin makim na ol i stap olsem Israel bilong God, ol inap olsem 144,000 stret.
15. Klostu long taim de bilong Bikpela i laik kamap, ol gutpela sumatin bilong Baibel i bin ting lain Israel bilong skin inap mekim wanem long pinis bilong taim bilong ol man bilong ol narapela lain?
15 Tasol olsem wanem? God i save laikim yet lain Israel bilong skin, o nogat? Klostu long taim de bilong Bikpela i laik kamap, ol gutpela sumatin bilong Baibel i wok long kisim save long ol tok tru bilong Baibel, na ol i bin ting, long pinis bilong taim bilong ol man bilong ol narapela lain, long dispela taim God bai kirap laikim gen ol Israel. Olsem na wanpela buk bilong C. T. Russell (The Time Is at Hand [Volyum 2 bilong Studies in the Scriptures], ol i wokim long 1889) i tok, Jeremaia 31:29-34 i makim ol Israel bilong skin, na buk i tok: “Kirap long [yia 607] paslain long Krais, ol Israel i kisim strafe na ol i mas i stap aninit long ol man bilong ol arapela lain, na ol i mas mekim olsem i go inap 1914, em inap olsem 2520 yia, na yumi no ken ting lain Israel bai kamap strong gen paslain long 1914.” Ol sumatin bilong Baibel i bin ting, long 1914 lain Israel, em ol Juda, bai kamap strong gen, na long 1917 i olsem dispela samting i laik kamap tru, long wanem, long dispela yia Inglan i tok promis long helpim ol Juda long kisim kantri Palestain na bai ol i ken sindaun long en.
16. Ol Witnes Bilong Jehova i bin mekim wanem bilong helpim ol Juda long kisim save long tok bilong Krais? Ol Juda i mekim wanem?
16 Bihain long Namba Wan Pait Inglan i bosim Palestain, na planti Israel, olsem ol Juda, ol i go sindaun gen long dispela hap. Long 1948 ol i kolim dispela hap olsem kantri Israel. I olsem God i laik mekim gut long lain Juda, a? Inap planti yia ol Witnes Bilong Jehova i bin ting olsem. Olsem na long 1925 ol i wokim wanpela buk i gat 128 pes, nem bilong en, Comfort for the Jews (Gutpela Tok Bilong Mekim Gut Bel Bilong Ol Juda). Na long 1929 ol Witnes i wokim narapela naispela buk i gat 360 pes, nem bilong en Life, na ol i wokim bilong ol Juda i ken laikim, na em i kamapim ol tok bilong Jop long Baibel. Ol Witnes i bin wok strong long taun Nu Yok na sampela hap moa long bringim dispela tok bilong Krais long ol Juda. Sampela i harim, tasol planti nogat. Ol i bihainim pasin bilong ol tumbuna bilong ol i stap long taim bilong Jisas na ol i sakim ol mak i kamapim klia olsem Krais i kam pinis bilong mekim wok bilong em.
17, 18. Ol wokman bilong God long graun ol i kisim wanem save long nupela kontrak na ol tok profet long lain Israel bai kamap strong gen?
17 Olsem na nau ol Witnes i save, lain Juda i no dispela lain Israel em Kamapim Tok Hait 7:4-8 i stori long en na sampela tok profet moa bilong Baibel i stori long de bilong Bikpela, nogat. Ol Juda i bihainim pasin bilong ol tumbuna bilong ol na ol i no kolim nem bilong God. (Matyu 15:1-3, 7-9) Long 1934, ol Witnes Bilong Jehova i wokim wanpela buk, nem bilong en Jehovah, na em i kamapim tok bilong Jeremaia 31:31-34; buk i mekim sampela tok long dispela na i tok klia olsem: “Nupela kontrak i no samting bilong lain Israel bilong skin o ol narapela lain bilong graun, nogat. . . . Nupela kontrak em i samting bilong lain Israel bilong spirit tasol.” Taim Baibel i toktok long ol tok profet long lain Israel bai kamap strong gen, dispela i no samting bilong lain Juda bilong skin o bilong gavman bilong kantri Israel em i insait long Yunaitet Nesen na em i samting bilong dispela graun em Jisas i bin toktok long en long Jon 14:19, 30 na 18:36.
18 Long 1931 ol wokman bilong God long graun i amamas tru long kisim nem olsem ol Witnes Bilong Jehova. Nau ol inap givim bel long tok bilong Song 97:11 em i tok: “God i save givim lait long ol stretpela manmeri, na i save mekim bel bilong ol i amamas.” Nau ol i save gut, God i bringim lain Israel bilong spirit tasol i kam insait long nupela kontrak. (Hibru 9:15; 12:22, 24) Lain Israel bilong skin i no givim bel long God, na ol i no insait long nupela kontrak, na ol narapela lain bilong graun tu nogat. Ol Witnes i kisim dispela save, na dispela i opim rot na nau ol i kisim sampela save moa long wanpela bikpela samting olsem: Jehova i save marimari na sori long olgeta man i tanim bel i go long em, na em i save givim tok i tru long ol. (Kisim Bek 34:6; Jems 4:8) Ol ensel i pasim 4-pela win bilong bagarapim ol man, na dispela i helpim lain Israel bilong God na sampela man moa. Husat dispela ol narapela man? Ating yu wanpela bilong ol, o nogat? Orait, nau yumi ken save.
[Futnot]
a Insait bilong nem Israel i olsem “God i Pait Bilong Helpim Ol.”
[Piksa i karamapim pes olgeta long pes 114]
[Ol Piksa long pes 116, 117]
Long de Pentikos long yia 33 na i go inap 1935 God i bin bungim trupela lain Israel bilong God, na long bikpela kibung long Wosington, D.C., ol i tokaut long wok bilong bungim bikpela lain bai stap laip long graun (KTH 7:9)