Askim
Bihain long laspela traim long pinis bilong 1,000 yia, ol man inap mekim sin na i dai o nogat?
Tupela ves long Kamapim Tok Hait i helpim yumi long bekim dispela askim. Ol i tok: “Em i tromoi Dai wantaim Ples bilong ol man i dai pinis [“Hades,” NW ] i go daun long dispela bikpela hul i gat paia. Dispela bikpela hul i gat paia em i namba 2 dai.” (KTH 20:14) “Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:4.
Samting dispela 2-pela ves i stori long en bai kamap long wanem taim? Wok bilong tromoi ‘Dai wantaim Hades’ i go daun long bikpela hul i gat paia, dispela samting bai kamap bihain long taim God i skelim pinis ol man i winim Armagedon, ol lain i kirap bek, na ol pikinini i bon bihain long Armagedon—em bai skelim ol long ol “tok i stap long ol . . . buk,” em ol tok bilong Jehova ol man i mas bihainim long taim bilong 1,000 yia. (KTH 20:12, 13) Long Kamapim Tok Hait sapta 21, aposel Jon i raitim stori bilong narapela driman, em truim bilong en bai kamap insait long Taim Bilong Wan Tausen Yia Bilong Krais Jisas i Stap King. Tasol truim olgeta bilong dispela driman bai kamap long pinis bilong De Bilong Kot bilong 1,000 yia. Long dispela taim, Jehova bai stap wantaim “ol lain manmeri bilong em” long spirit—i no gat ol namelman moa, long wanem, Jisas i bin putim Kingdom long han bilong Papa bilong em. Dispela promis, “ol manmeri bai i no i dai moa,” bai kamap tru olgeta long taim ol manmeri i kamap gutpela olgeta long rot bilong ofa bilong Jisas.—KTH 21:3, 4.
Olsem na dispela dai ol skripsa antap i stori long en em i makim dai ol man i bin kisim long Adam, em ofa bilong Krais bai pinisim. (Rom 5:12-21) Taim dai ol man i bin kisim long namba wan man i no stap moa, ol manmeri bai stap wankain olsem Adam taim God i wokim em. Adam em i man i gutpela olgeta, tasol dispela i no makim olsem em i no inap i dai. Jehova i tokim Adam long em i no ken kaikai “pikinini bilong dispela diwai bilong givim gutpela save long wanem samting i gutpela na wanem samting i nogut” na i tok: “Sapos yu kaikai, wantu bai yu dai.” (Stat 2:17) Em bai dai sapos em i bikhet na mekim sin. Bihain long laspela traim i kamap long pinis bilong Wan Tausen Yia Bilong Krais i Stap King, ol manmeri bai stap fri yet long makim rot ol i laik bihainim. (KTH 20:7-10) Ol inap makim olsem ol bai mekim yet wok bilong Jehova o nogat. Olsem na yumi no inap tok olsem bihain bai i no gat wanpela man i bikhet long God olsem Adam i bin mekim, nogat.
Orait wanem samting bai painim man sapos em i bikhet long God bihain long laspela traim, long taim i no gat dai na Hades? Long dispela taim, dai em sin bilong Adam i bin kamapim em i no stap moa. Na Hades, em ples bilong ol man i dai pinis na i gat rot long kirap bek, em tu i no i stap moa. Tasol maski ol dispela samting i no stap moa, Jehova inap pinisim man i bikhet long em long bikpela hul i gat paia, na em i no larim em i kirap bek. Dispela kain dai bai i wankain olsem dai i bin painim Adam tupela Iv, na i no dispela dai ol man i bin kisim long Adam.
Tasol i no gat as na yumi ken ting kain samting olsem bai kamap. Ol man i winim laspela traim bai ol i narapela kain long Adam long wanpela bikpela samting. Laspela traim bai traim tru ol. Yumi ken bilip tru olsem dispela laspela traim bai inapim tru wok bilong en, long wanem, Jehova i save long pasin bilong skelim gut tru ol man. Dispela laspela traim bai kamapim ol man husat ol bai mekim wok nogut long pasin bilong ol long stap fri long makim samting ol i laik mekim. Tru, ol man i winim laspela traim ol inap bikhet long God na kisim bagarap, tasol ating kain samting olsem i no ken kamap.
[Piksa long pes 31]
Bihain long laspela traim, olsem wanem ol manmeri bai i wankain olsem Adam?