Sapta 44
Tok Bilong Kamapim Tok Hait i Mekim Wanem Long Yu?
1. (a) Ensel i tok wanem long Jon na nau yumi ken save, Jehova bai truim olgeta gutpela tok promis i stap long Kamapim Tok Hait? (b) Husat i tok: “Bai mi kam long yupela kwiktaim”? Wanem taim em bai “kam”?
YU KAUNIM pinis gutpela stori bilong Nupela Jerusalem, na ating yu laik save, ‘Tru gutpela samting olsem inap kamap?’ Jon i kolim sampela tok moa bilong ensel na i tok: “Ensel i tokim mi olsem, ‘Dispela tok em i tru olgeta, inap olgeta man i ken bilip tru long em. God, Bikpela, em i save kirapim spirit bilong ol profet bilong autim tok bilong en, em i bin salim ensel bilong en i kam bilong soim olgeta wokman bilong en long olgeta samting i mas kamap kwiktaim. Na harim. Jisas i tok, “Bai mi kam long yupela kwiktaim.” ’ Ol manmeri i bihainim ol dispela tok profet i stap long dispela buk, ol i ken amamas.” (KTH 22:6, 7) Jehova bai truim olgeta gutpela tok promis i stap long Kamapim Tok Hait! Ensel i mekim tok long nem bilong Jisas na i tok, Jisas bai kam “kwiktaim.” Jisas bai kam ‘olsem stilman’ na bagarapim ol birua bilong Jehova na em bai kamapim dispela bikpela samting em Kamapim Tok Hait i stori long en. (KTH 16:15, 16) Olsem na yumi mas bihainim ol tok bilong Kamapim Tok Hait na bai yumi ken stap amamas long dispela taim bihain.
2. (a) Jon i mekim wanem long taim em i harim na lukim ol dispela samting? Ensel i tok wanem long em? (b) Dispela tok bilong ensel, ‘No ken mekim olsem! Lotu long God wanpela tasol,’ dispela i givim wanem save long yumi?
2 Taim Jon i harim na lukim ol dispela samting, em i tingting planti na i tok: “Mi harim pinis na lukim pinis, orait mi brukim skru klostu long lek bilong ensel i bin soim ol dispela samting long mi, na mi laik lotu long em. Tasol em i tokim mi, ‘Yu no ken mekim olsem! Mi tu mi wanwok bilong yu wantaim ol brata bilong yu, em ol profet. Na mi wanwok bilong olgeta man i save bihainim tok bilong dispela buk. Yu mas lotu long God wanpela tasol.’ ” (KTH 22:8, 9; skelim wantaim Kamapim Tok Hait 19:10.) Em namba 2 taim ensel i tok, no ken lotu long ensel, na dispela tok i stret long taim bilong Jon, long wanem, sampela man i bin lotuim ol ensel, o ol i tok ol ensel i bin givim sampela tok long ol. (1 Korin 13:1; Galesia 1:8; Kolosi 2:18) Olsem na toksave bilong ensel i mas givim tingting long yumi na yumi mas lotu long God wanpela tasol. (Matyu 4:10) Yumi no ken lotu liklik long wanpela man o ensel o wanpela samting na bagarapim lotu i tru.—Aisaia 42:5, 8.
3, 4. Ensel i givim wanem tok moa long Jon? Lain remnan i mekim wanem bilong bihainim tok bilong ensel?
3 Jon i tok moa: “Na em i tokim mi moa olsem, ‘Dispela tok profet i stap long dispela buk, em yu no ken pasim. Nogat. Taim bilong God i laik mekim ol dispela samting, em i kam klostu pinis. Olsem na ol manmeri i save mekim ol pasin nogut, ol i ken . . . mekim ol pasin nogut. Na ol manmeri i save mekim ol pasin i doti, ol i ken . . . mekim ol pasin i doti. Na ol manmeri i save mekim ol stretpela pasin, ol i ken . . . mekim stretpela pasin. Na ol manmeri . . . i stap holi, ol i ken . . . mekim ol pasin i holi.’ ”—KTH 22:10, 11.
4 Lain remnan bilong nau i bihainim dispela tok bilong ensel. Ol i no pasim o haitim ol tok bilong Kamapim Tok Hait. Namba wan Wastaua long tok Inglis (Zion’s Watch Tower and Herald of Christ’s Presence, Julai 1879) i bin stori long sampela ves bilong Kamapim Tok Hait. Na namba wan sapta bilong dispela buk i tok inap planti yia ol Witnes Bilong Jehova i bin wokim sampela buk i bin kamapim ol tok bilong Kamapim Tok Hait. Ol man i laikim tok i tru, nau ol Witnes i tokim ol gen long ol bikpela tok profet bilong Kamapim Tok Hait na long ol truim bilong en.
5. (a) Olsem wanem sapos ol man i laik sakim ol strongpela toksave bilong Kamapim Tok Hait? (b) Ol man i gat pasin daun na stretpela pasin ol i mas mekim wanem?
5 Sapos ol man i laik sakim ol strongpela tok bilong Kamapim Tok Hait, em samting bilong ol! ‘Ol manmeri i mekim pasin nogut, ol i ken mekim’ sapos ol i laik—laik bilong ol; sapos ol i stap olsem, dai bai painim ol. Klostu nau bai Jehova i givim strafe long ol man nogut. Pastaim em bai bagarapim Bikpela Babilon. Ol man i gat pasin daun ol i mas bihainim tok bilong profet, em i tok: “Yupela ol manmeri i no save bikhet na sakim tok bilong Bikpela, yupela i mas i kam long em. Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap.” (Sefanaia 2:3) Na ol manmeri i givim bel pinis long Jehova, na ol “i save mekim ol stretpela pasin,” orait, ol i mas i stap yet long “mekim ol stretpela pasin.” Sapos man i bihainim pasin nogut na em i kisim amamas long en, dispela amamas i no ken i stap longtaim, tasol sapos man i bihainim stretpela pasin na pasin holi, em bai kisim ol gutpela samting i no inap pinis. Baibel i tok: “Oltaim yupela i mas skelim pasin na tingting bilong yupela yet na painimaut, bilip bilong yupela i stap strong, o nogat. Yupela i mas skelim gut pasin bilong yupela yet.” (2 Korin 13:5) Wanem wanem pasin yu save bihainim, bai yu kisim pe bilong yu long dispela tasol.—Song 19:9-11; 58:10, 11.
6. Taim Jehova i givim laspela tok long ol man i kaunim tok bilong Kamapim Tok Hait em i tok wanem?
6 Nau Jehova i givim laspela tok long ol man i kaunim tok bilong Kamapim Tok Hait, na em i tok: “Harim. Bai mi kam kwiktaim. Na bai mi bringim pe bilong givim long olgeta man. Bai mi bekim pe long olgeta man wan wan, inap long pasin ol i bin mekim. Mi tasol mi stap paslain tru na mi stap las tru. Mi stap namba wan tru na mi stap bihain tru. Mi as bilong olgeta samting, na mi save pinisim olgeta wok mi mekim. Ol manmeri i bin wasim klos bilong ol, ol i ken amamas. Ol inap long kisim kaikai long [ol] diwai bilong givim laip. Na ol inap i go insait long ol dua bilong taun. Ol man bilong mekim ol rabis pasin nogut tru [ol dok]a na ol man i save wokim posin . . . na ol man i mekim pasin pamuk na ol man i kilim ol man i dai na ol man i lotu long ol giaman god na olgeta man i save laikim pasin giaman na bihainim, dispela olgeta man bai i stap ausait long taun bilong God.”—KTH 22:12-15.
7. (a) Jehova bai “kam kwiktaim” bilong mekim wanem? (b) Bilong wanem ol pris pasto i no ken insait long Nupela Jerusalem?
7 Jehova i tokaut gen olsem em i stap King inap olgeta taim, na ol samting em i tingting pinis long mekim em bai mekim tru. Em bai “kam kwiktaim” long givim strafe long ol man nogut na givim gutpela prais long ol man i givim bel long em. (Hibru 11:6) Ol lo bilong em yet i save skelim ol man na makim husat bai kisim gutpela prais na husat em bai rausim. Ol pris pasto bilong ol misin ol i bihainim pasin bilong “ol mauspas dok” na ol i no tokaut long ol pasin nogut Jehova i kolim hia—ol i orait long ol man i mekim. (Aisaia 56:10-12; Lo 23:18) Ol “i save laikim pasin giaman na bihainim” ol bilip giaman, na ol i no bihainim tok em Jisas i bin givim long 7-pela kongrigesen, olsem na ol i no insait long lain bilong Nupela Jerusalem.
8. (a) Husat tasol “inap long kisim kaikai long [ol] diwai bilong givim laip”? Wanem insait bilong dispela tok? (b) Olsem wanem ol manmeri bilong bikpela lain ol “i bin wasim ol klos bilong ol”? Ol i mas mekim wanem na bai ol i ken i stap klin yet?
8 Ol Kristen em God i bin makim ol na ol “i bin wasim klos bilong ol” na ol i kamap klin long ai bilong Jehova, ol tasol “inap long kisim kaikai long [ol] diwai bilong givim laip.” Dispela i makim olsem ol inap long i stap laip oltaim long heven, na ol i no inap i dai moa. (Lukim Stat 3:22-24; Kamapim Tok Hait 2:7; 3:4, 5.) Taim ol i dai long graun ol i kirap bek long spirit na i go insait long Nupela Jerusalem. Ol 12-pela ensel i was long ol dua ol i larim ol i go insait, tasol ol i no ken larim ol man nogut i go insait, maski ol i tok ol i bilong i go long heven. Na bikpela lain manmeri bilong i stap long graun ol tu “i bin wasim ol klos bilong ol long blut bilong Pikinini Sipsip, na ol klos i kamap waitpela,” tasol ol i mas i stap klin yet long ai bilong Jehova. Ol i ken mekim olsem sapos ol i abrusim ol dispela pasin nogut Jehova i kolim hia, na ol i mas bihainim 7-pela tok Jisas i bin givim long ol kongrigesen.—KTH 7:14; sapta 2 na sapta 3.
9. Jisas i tok wanem? Em i givim dispela tok na ol narapela tok bilong Kamapim Tok Hait long husat?
9 Jehova i tok pinis, na nau Jisas i toktok. Em i givim gutpela tok long ol man i gat gutpela bel na ol i kaunim tok bilong Kamapim Tok Hait; em i tok: “Mi Jisas, mi bin salim ensel bilong mi i kam long yupela, na em i autim dispela tok long yupela ol manmeri bilong ol sios [kongrigesen]. Mi tasol mi dispela Kru i kamap long ol lain tumbuna bilong King Devit, na mi Pikinini Bilong Devit. Na mi dispela sta i save lait tumas long moningtaim tru.” (KTH 22:16) Jisas i ‘autim dispela tok long ol kongrigesen,’ em ol Kristen God i bin makim ol long spirit holi na ol i stap long graun. Olgeta tok bilong Kamapim Tok Hait i bilong dispela lain ol bai go i stap long Nupela Jerusalem long heven. Jisas i tingim dispela lain pastaim na em i autim ol dispela tok. Ol i olsem rot na bai bikpela lain bilong i stap long graun ol tu i ken kisim save long ol dispela gutpela tok profet, em tok i tru.—Jon 17:18-21.
10. (a) Bilong wanem Jisas i tok, “Mi dispela Kru i kamap long ol lain tumbuna bilong King Devit, na mi Pikinini Bilong Devit”? (b) Bilong wanem Jisas i tok em i “dispela sta i save lait tumas long moningtaim tru”?
10 Jisas i kisim wok bilong givim ol dispela tok long Jon na bai Jon i ken givim long ol Kristen. Jisas i tok, “Mi dispela Kru i kamap long ol lain tumbuna bilong King Devit, na mi Pikinini Bilong Devit.” Em i tok olsem, long wanem, Devit em i tumbuna bilong em long skin, olsem na em inap kamap King long Kingdom bilong Jehova. Na em bai kamap “Papa” bilong Devit tu, olsem “Papa bilong i stap oltaim,” olsem na em i tok em i “dispela Kru i kamap long ol lain tumbuna bilong King Devit.” (Aisaia 9:6; 11:1, 10) Em i wanpela King i bin kamap long lain bilong Devit, na em i bilong i stap olsem inap olgeta taim, bilong truim tok promis Jehova i bin mekim long Devit. Na em i “dispela sta i save lait tumas long moningtaim tru,” olsem Moses i bin tok bai kamap. (Namba 24:17; Song 89:34-37) Na em i dispela “sta bilong moningtaim” i save kamap paslain long taim san i kam antap. (2 Pita 1:19) Bikpela Babilon em i bikpela birua, tasol ol pasin giaman bilong em i no inap pasim dispela sta na bai em i no inap kamap.
Ol i Tok, “Yu Kam”
11. Jon i kolim wanem singaut ol i mekim long ol man? Husat inap long harim na bihainim dispela tok?
11 Nau Jon i toktok. Em i amamas long ol samting em i bin lukim na harim, na em i tok: “Holi Spirit wantaim meri bilong Pikinini Sipsip tupela i tok, ‘Yu kam.’ Na olgeta man i harim dispela tok, em tu i mas tok, ‘Yu kam.’ Na wanem man nek bilong en i drai, em i mas kam. Man i laik dring, em i mas kam na kisim wara bilong givim laip, em i olsem presen bilong God.” (KTH 22:17) Ofa Jisas i bin mekim bilong baim bek ol man, dispela i no bilong helpim lain 144,000 tasol, long wanem, dispela singaut olsem “Yu kam,” em i go long olgeta manmeri. Spirit bilong Jehova i mekim wok long rot bilong lain olsem “meri” bilong Jisas, olsem na ol i wok long tokim olgeta man: “Kam na kisim wara bilong givim laip, em i olsem presen bilong God.” (Lukim tu Aisaia 55:1; 59:21.) Ol man i laikim stretpela pasin ol i ken “kam” na kisim ol gutpela save bilong Jehova. (Matyu 5:3, 6) Ol man i gat tingting long i stap laip long graun, sapos ol i bihainim dispela tok bilong lain remnan, ol i ken amamas tru!
12. Ol manmeri bilong bikpela lain ol i mekim wanem taim ol i harim singaut bilong Kamapim Tok Hait 22:17?
12 Bihain liklik long 1930 sampela man i kirap “harim dispela tok,” na nau ol i kamap bikpela lain—ol i givim bel long “kam.” Olsem lain remnan i bin mekim, ol tu i stretim pasin bilong ol na nau ol i no gat asua moa long ai bilong Jehova. Ol i tingting strong long taim Nupela Jerusalem bai givim planti gutpela blesing long ol man. Dispela bikpela lain i harim pinis tok bilong Kamapim Tok Hait na ol i kirap tokim ol narapela man, “Yu kam,” na ol i wok long bringim ol i kam long oganaisesen bilong Jehova, na ol i lainim ol na bai ol tu i tokim ol man olsem: “Wanem man nek bilong en i drai, em i mas kam.” Olsem na dispela bikpela lain i wok long i go bikpela moa. Nau ol i winim 6,000,000 na ol i stap long planti kantri, olsem 235, na ol i wok wantaim hap lain bilong “meri” bilong Krais, ol i aninit long 9,000, na olgeta ol i tokim ol man long ol “i mas kam na kisim wara bilong givim laip, em i olsem presen bilong God.”
13. Jisas i mekim wanem strongpela toksave?
13 Jisas i toktok gen na i tok: “Mi givim strongpela tok long olgeta man i harim dispela tok profet i stap long dispela buk. Sapos wanpela man i skruim narapela tok long dispela tok, orait ol dispela samting nogut tru God i tok long en long dispela buk, em God bai i skruim long ol samting i mas kamap long dispela man. Na sapos wanpela man i tekewe sampela bilong ol dispela tok profet i stap long dispela buk, orait God bai i tekewe ol gutpela samting long em. Em bai i no inap kisim kaikai long diwai bilong givim laip, na em bai i no inap i stap long dispela taun bilong God, dispela buk i tok long en.”—KTH 22:18, 19.
14. Dispela lain Jon i piksa bilong ol, ol i ting olsem wanem long ol tok profet bilong Kamapim Tok Hait?
14 Dispela lain Jon i piksa bilong ol, ol i mas harim “dispela tok profet” i stap long Kamapim Tok Hait. Ol i no ken haitim o skruim sampela tok moa long en. Ol i mas autim long ples klia, olsem “sanap antap long haus na autim long ol manmeri.” (Matyu 10:27) God i as bilong ol tok bilong Kamapim Tok Hait. Husat bai senisim wanpela hap bilong dispela tok God yet i bin salim i kam long rot bilong King Krais Jisas? I no gat wanpela. Sapos wanpela i mekim, em i no inap kisim laip, na ol samting nogut bai painim em olsem bai painim Bikpela Babilon na ol man bilong dispela graun.
15. Yumi tingim dispela tupela hap tok bilong Jisas em i tok, em “i autim tok long dispela olgeta samting,” na em bai “kam kwiktaim,” na yumi ting olsem wanem long dispela?
15 Nau Jisas i mekim laspela tok bilong strongim bel bilong lain bilong em: “Dispela man i autim tok long dispela olgeta samting, nau em i tok, ‘Tru tumas, bai mi kam kwiktaim.’ ” (KTH 22:20a) Jisas em i “man bilong . . . autim stret olgeta tok bilong God.” (KTH 3:14) Em i autim tok bilong ol driman, o piksa, bilong Kamapim Tok Hait, olsem na yumi save ol dispela samting i tru. Planti taim Jisas na Jehova yet i tok ol bai kam “kwiktaim” o kam “bihain liklik,” na dispela em namba 5 taim em i bin tok olsem. (KTH 2:16; 3:11; 22:7, 12, 20) Jisas bai “kam” bilong givim strafe long bikpela pamukmeri na “ol king” politik bilong graun na olgeta narapela man i biruaim Kingdom bilong Jehova wantaim Krais.—KTH 11:15; 16:14, 16; 17:1, 12-14.
16. Nau yu save God Jehova na Jisas bai kam kwiktaim, olsem na yu mas mekim wanem?
16 Nau yumi save God Jehova na Jisas bai kam kwiktaim na dispela save i mas kirapim yumi long “wetim De bilong God i kamap.” (2 Pita 3:12) Yumi no ken ting wok bilong ol man bai kamap gutpela, nogat; ol i olsem graun bilong Satan. Na sapos i olsem ol bikman, o “skai,” aninit long Satan i stretim sampela wok bilong graun, ol dispela samting i no ken i stap gutpela olsem. Olgeta dispela samting bai pinis. (KTH 21:1) Jehova, na Kingdom bilong em em Krais Jisas i bosim, na nupela taim em Jehova i bin tok promis long kamapim, ol dispela tasol inap long i stap oltaim. Yumi no ken lusim tingting long dispela!—1 Jon 2:15-17.
17. Jehova em i holi, na dispela i mas kirapim yu long mekim wanem?
17 Ol dispela save yu bin kisim bilong Kamapim Tok Hait em i mas kirapim yu long senisim pasin bilong yu. I olsem yu lukim pinis Jehova i stap long heven, em Man i bin wokim yumi na em i stap insait long bikpela lait na em i holi tumas. (KTH 4:1–5:14) Sapos yu mekim wok bilong dispela God, yu gat gutpela wok tru! Yu mas tingim pasin holi bilong em, na dispela i mas kirapim yu long bihainim ol tok Jisas i bin givim long 7-pela kongrigesen na bai yu no ken tingting tumas long mani na kago, na yu mas klia long ol god giaman na pasin pamuk, na no ken givim hap bel tasol long Jehova, o lusim bilip na givim baksait long em, na yu no ken mekim narapela samting na bai em i no orait long wok bilong yu. (KTH 2:1–3:22) Tok em aposel Pita i givim long lain 144,000 i stret tu long bikpela lain manmeri bilong i stap long graun; em i tok: “God i singautim yupela pinis, em i holi na em i save mekim gutpela na stretpela pasin olgeta. Olsem na yupela i mas givim yupela yet long God na stap holi long olgeta wokabaut bilong yupela.”—1 Pita 1:15, 16.
18. Yu mas wok strong long mekim wanem? Bilong wanem yu mas givim bel long mekim dispela wok long nau?
18 Gutpela sapos bel bilong yu i kirapim yu long wok strong moa long “tokaut olsem, taim i kamap pinis bilong God, Bikpela bilong yumi, i laik mekim gut long ol manmeri bilong en na mekim save long ol birua bilong ol.” (Aisaia 35:4; 61:2) Maski yu bilong liklik lain o bikpela lain, gutpela sapos yu wok strong long tokaut long olgeta man olsem Jehova i kapsaitim 7-pela dis i gat belhat bilong em i stap long ol, na tokim ol man em God i laik mekim save na bagarapim ol man bilong graun em Satan i bos bilong ol. Na yu ken kamapim tu gutpela tok bilong Kingdom bilong Jehova na Krais bilong em, em dispela Kingdom i kamap pinis long heven. (KTH 11:15; 14:6, 7) Yumi mas givim bel long dispela wok, long wanem, nau yumi stap long “de bilong Bikpela” na yumi mas kirapim planti man long mekim wok bilong Jehova na bung wantaim yumi long autim gutpela tok bilong Kingdom. Na yumi laik bai ol dispela man i ken kamap strong na dediket long God na tingting long kisim baptais. Long nau yumi mas mekim ol dispela wok, long wanem, “taim i laik kamap nau, na ol dispela samting God i tok pinis long mekim, em bai i mekim.”—KTH 1:3.
19. Wanem laspela tok bilong lapun aposel Jon? Dispela ol tok i kirapim yu long mekim wanem?
19 Olsem na yumi strong long mekim wankain beten olsem Jon i mekim na yumi tu i tok: “I tru. Bikpela Jisas, yu kam.” Na lapun aposel Jon i tok: “Marimari bilong Bikpela Jisas em i ken i stap wantaim [lain holi].” (KTH 22:20b, 21) Mipela laik bai em i ken mekim olsem long yupela olgeta man i kaunim dispela buk. Na yu ken bilip olsem nambawan bikpela samting Kamapim Tok Hait i kolim i laik kamap nau, olsem na yu tu yu ken bung wantaim mipela na yumi ken givim bel wantaim na i tok: “I tru.”
[Futnot]
a Dispela tok “ol dok” i stap long Nupela Testamen bilong 1988.
[Piksa long pes 314]
‘Ol dok i stap ausait’
[Piksa long pes 315]
‘Ol manmeri inap i go insait long ol dua bilong taun ol i ken amamas’