Lukim! Lait i Gutpela Tru!
SAPOS wanpela taim yu bin paul nabaut long tudak na hatwok long painim rot, orait yu save pinis long hevi dispela i givim long yu. Tasol taim lait i kamap, yu amamas tru, a? Na ating wanpela samting i bin painim yu na yu pilim olsem yu stap long tudak. Ating yu no inap painim rot bilong stretim wanpela hevi. Orait bihain, isi isi yu lukim lait—i gat rot bilong stretim dispela hevi. Taim yu lusim dispela kain tudak na yu kamap long lait, em i gutpela samting tru.
Long taim bilong ol aposel, ol man i stap tudak long ol samting bilong spirit. Aposel Pita i raitim pas long ol manmeri i bin lusim olpela bilip bilong ol na i kirap bihainim lotu Kristen, na em i tokim ol: ‘God i bin singautim yupela long lusim tudak na em i bringim yupela i kam insait long lait i gutpela moa yet.’ (1 Pita 2:9) Long tingting bilong ol, i olsem ol i bin stap long ples i tudak olgeta na ol i lusim na i kam insait long strongpela lait. Na tu, em i olsem man i bin i stap wanpis na i no gat gutpela samting bilong wetim i kamap, tasol bihain em i insait long wanpela famili em gutpela samting bai painim ol.—Efesus 2:1, 12.
“Yu Bin Laikim Mi Tru, Tasol Nau Nogat”
Ol Kristen bilong pastaim i bin painim “tok tru”—em bilip Kristen tru. (Jon 18:37) Ol i lukim gutpela lait bilong tok i tru na ol i lusim tudak bilong spirit na kam long gutpela lait. Tasol sampela yia i go pinis na sampela Kristen i no givim bel na wok strong moa olsem long taim ol i bilip nupela. Olsem: Klostu long yia 100 C.E., wanpela bikpela hevi i kamap insait long kongrigesen long Efesus. Jisas Krais, em i kirap bek pinis, em i kamapim klia dispela hevi, em i tok: “Mi gat tok long yu olsem, taim yu bilip nupela, yu bin laikim mi tru, tasol nau nogat. . . . Olsem na yu mas tingim gen dispela pasin yu bin mekim bipo, na yu mas tanim bel na mekim kain pasin olsem pastaim yu save mekim.” (KTH 2:4, 5) Ol Kristen long Efesus i mas kirapim gen pasin bilong ol long laikim tru God na tok i tru.
Orait olsem wanem long yumi? Yumi tu i bin kisim dispela amamas bilong lukim lait, olsem kisim save long gutpela tok i tru bilong Baibel. Yumi bin kisim pasin bilong laikim tumas tok i tru. Tasol ol hevi bilong graun inap daunim laik bilong yumi long tok i tru. Na tu, i gat ol hevi bilong dispela “taim bilong las de.” Yumi stap long taim bilong “planti hevi nogut tru”—em ol lain bilong graun i save ‘laikim ol yet tasol, laikim tumas long kisim mani, litimapim nem bilong ol yet na hambak nabaut, tok kros na tok nogut long ol arapela, sakim tok bilong papamama, i no tok tenkyu, na givim baksait long ol pasin bilong God.’ (2 Timoti 3:1, 2) Pasin bilong ol inap daunim pasin bilong yumi long givim bel long wok, na pasin bilong yumi long laikim tumas Jehova bai pinis.
Sapos yumi no laikim tumas Jehova olsem long taim yumi bilip nupela, orait yumi mas ‘tingim gen dispela pasin yumi bin mekim bipo, na yumi mas tanim bel.’ Yumi mas kamap strong gen long ol samting bilong spirit olsem bipo. Na yumi mas was gut, nogut laik bilong yumi long tok i tru i wok long pinis. Yumi olgeta i mas holimpas pasin bilong bilip strong na amamas long samting yumi wetim i kamap, na holimpas pasin bilong laikim tumas God na tok i tru bilong em!
‘Tok Tru i Mekim Yumi i Kamap Fri’
Lait, olsem save, bilong tok i tru bilong Baibel i gutpela tumas, long wanem, Baibel i save bekim ol bikpela askim ol man i bin tingting planti long en inap planti tausen yia, olsem: Yumi stap bilong mekim wanem? I gat wanem as bilong i stap bilong yumi? Bilong wanem i gat pasin nogut i stap? I gat laip bihain long taim yumi dai? Jehova i bin givim save long yumi long ol gutpela tok i tru bilong Baibel. Orait yumi mas tenkyu tru long en, a? Yumi no ken ting ol tok yumi bin lainim i samting nating tasol!
Jisas i tokim ol disaipel: “Yupela bai i save long tok tru, na tok tru bai i mekim yupela i kamap fri.” (Jon 8:32) Ofa bilong Jisas bilong baim bek ol man i opim rot na yumi inap lusim sin na dai. Tasol ol dispela tok i tru i mekim na yumi lusim tudak em ol lain bilong graun i stap long en, em ol i no gat save liklik long tok i tru na ol samting bai kamap. Sapos yumi tingim tingim long bel ol tok yumi bin lainim, dispela bai strongim pasin bilong yumi long laikim tumas Jehova na Tok bilong em.
Aposel Pol i tokim ol Kristen long Tesalonaika: “Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God. Na dispela tok i wok strong long bel bilong yupela ol manmeri i bilip long Krais.” (1 Tesalonaika 2:13) Ol Tesalonaika i bin harim na ‘kisim tok bilong God na ol i amamas.’ Ol i no stap moa “long tudak.” Ol i kamap “man bilong lait.” (1 Tesalonaika 1:4-7; 5:4, 5) Ol i kisim save olsem Jehova em i Man Bilong Wokim olgeta samting na em i gat olgeta strong, na em i gat savetingting, pasin laikim, na marimari. Olsem ol narapela disaipel bilong Krais, ol i kisim save tu olsem Jehova i bin wokim rot bilong rausim sin bilong ol long rot bilong ofa bilong Pikinini bilong em, Jisas Krais, bilong baim bek ol man.—Aposel 3:19-21.
Ol Tesalonaika i no save long olgeta samting bilong tok i tru bilong Baibel, tasol ol i save ol i mas lukluk we bilong kisim save. Ol tok bilong Baibel inap mekim na man bilong God bai “kisim tru olgeta gutpela pasin, na . . . i redi long mekim olgeta kain gutpela wok.” (2 Timoti 3:16, 17) Ol Kristen long Tesalonaika ol inap wok yet long stadi, na ol i ken pilim tru olsem lait God i salim i kam em i gutpela samting tru. I gat as na ol i ken amamas long olgeta taim. (1 Tesalonaika 5:16) Na i wankain long yumi tu.
Lait Bilong Soim Rot Long Yumi
Man bilong raitim song i kamapim wanpela as na dispela lait i gutpela tru, em i tok: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.” (Song 119:105) Ol tok bilong God long soim rot, em yumi kisim long Baibel, em inap helpim yumi long stiaim gut wokabaut bilong yumi na bai i stap bilong yumi i gat as bilong en. Yumi no ken i stap olsem sip i drip nabaut long solwara. Taim yumi save long tok i tru na yumi bihainim, dispela i lukautim yumi na “olgeta pasin bilong trik na giaman, em bai i no inap sakim yumi nabaut olsem win na si i save sakim kanu long solwara, na kanu i trip nabaut.”—Efesus 4:14.
Baibel i tok: “Ol king na ol man bilong graun i no inap kisim bek yu. Olsem na nogut yu bilip long ol.” Na em i tok moa: “Sapos wanpela man i bilip long God bilong Jekop bai em i helpim em, na sapos dispela man i pas wantaim God, Bikpela bilong em, orait em i ken amamas.” (Song 146:3, 5) Na tu, sapos yumi bilip strong long Jehova dispela bai helpim yumi long daunim pasin bilong pret na tingting planti. Aposel Pol i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. . . . Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas.” (Filipai 4:6, 7) Taim Baibel i stiaim yumi, dispela i save helpim yumi tru.
Stap Olsem Lait Long Dispela Graun
Narapela as na lait bilong Baibel i gutpela samting tru, em olsem em i save opim dua na yumi ol man bilong graun inap go insait long wanpela gutpela wok tru. Jisas i bin tokim ol disaipel: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.” Long kirap bilong ol dispela ves em i tok: “God i givim mi bikpela namba na strong bilong bosim olgeta samting long heven na long graun.”—Matyu 28:18-20.
Yumi ken tingim husat i save helpim ol Kristen tru long mekim wok bilong autim gutnius na skulim ol man bilong olgeta lain long tok i tru bilong Baibel. Jisas i tok promis long ol disaipel olsem em bai stap wantaim ol. Na tru tumas, em i bin helpim ol long mekim wok bilong ol taim ol i autim tok na larim ‘lait bilong ol i lait,’ na long ol narapela “gutpela pasin” ol i mekim. (Matyu 5:14-16) Ol ensel tu i insait long wok bilong autim gutnius. (KTH 14:6) Na olsem wanem long God Jehova? Aposel Pol i tok: “Mi bin planim pikinini bilong kaikai. Apolos em i bin givim wara long en. Tasol God i bin mekim kaikai i kamap.” Em i gutpela samting tru long yumi ken i stap “wanwok bilong God”!—1 Korin 3:6, 9.
Na tingting tu long olsem wanem God i bin mekim gut long yumi long hatwok yumi mekim long autim tok. I no gat wanpela samting i winim wok God i bin givim long yumi bilong “i stap olsem ol lait namel long ol lain manmeri bilong dispela graun.” Taim yumi kamapim lait bilong Baibel long ol tok na pasin bilong yumi, yumi inap helpim tru ol manmeri i gat gutpela bel. (Filipai 2:15) Na taim yumi wok strong long autim tok na skulim ol man, yumi ken amamas, long wanem, ‘God em i no man nogut, na bai em i lusim tingting long ol gutpela wok yumi i bin mekim. Nogat.’—Hibru 6:10.
“Baim Marasin Bilong Putim Long Ai”
Jisas i bin salim wanpela tok i go long kongrigesen Laodisia na em i tok: “Mobeta yu baim marasin bilong putim long ai bilong yu, na bai yu inap lukluk. Sapos mi laikim sampela man, orait mi save krosim ol na stretim pasin bilong ol.” (KTH 3:18, 19) Sapos man i stap aipas long ol samting bilong spirit, orait gutpela samting bilong stretim, em dispela ‘marasin bilong ai’—em ol tok bilong Jisas long skulim na stretim man. Sapos yumi laik holimpas stretpela tingting long ol samting bilong spirit, yumi mas kisim na bihainim ol tok kaunsel bilong Jisas na ol tok bilong stiaim yumi i stap long Baibel. Na yumi mas kisim tingting olsem bilong Krais na bihainim pasin bilong em. (Filipai 2:5; 1 Pita 2:21) Yumi no inap kisim nating dispela marasin bilong ai. Jisas i tok yumi mas “baim.” Yumi mas givim taim bilong yumi na wok strong.
Taim yumi lusim ples tudak na yumi kam insait long rum i gat lait, haptaim i mas lus pastaim na nau ai inap lukim gut ol samting. Na olsem tasol, yumi mas lusim haptaim bilong stadi long Baibel na bai yumi ken lukim lait bilong tok i tru. Na yumi mas lusim haptaim tu bilong tingim tingim long bel ol tok yumi bin lainim na tingim tok i tru i gutpela samting tumas. Tasol pe yumi tromoi i no bikpela tumas. Bilong wanem yumi ken tok olsem? Long wanem, dispela lait em i gutpela samting tru.
[Piksa long pes 14]
“Baim marasin bilong putim long ai bilong yu, na bai yu inap lukluk”