Mipela Bai Wokabaut Long Nem Bilong Jehova, Em God Bilong Mipela
“Mipela bai wokabaut long nem bilong Jehova, em God bilong mipela, i go inap long taim bihain bihain, inap oltaim oltaim.”—MAIKA 4:5, NW.
1. Olsem wanem long pasin bilong ol man long taim bilong Noa? Olsem wanem Noa i stap narapela kain long ol?
NAMBA wan man em Baibel i kamapim olsem em i wokabaut wantaim God em Enok. Namba tu em Noa. Baibel i tok: “Noa em i gutpela man, na wokabaut bilong en i stret long ai bilong God. Em i pren tru bilong God.” (Stat 6:9) Long taim bilong Noa, ol man i bin lusim pinis lotu i tru. Hevi i go nogut moa taim ol ensel i no stap gut long God i mekim pasin i no stret na maritim ol meri na kamapim ol pikinini, em ol i kolim olsem Nefilim, ol i “strongpela man tru” na “ol i gat biknem” long dispela taim. Yumi no kirap nogut long pasin bilong pait na bagarapim man i bin pulap long graun! (Stat 6:2, 4, 11) Tasol Noa i wokabaut stret na em i “man bilong tokaut long stretpela pasin.” (2 Pita 2:5) Taim God i tokim em long wokim sip na bai ol man i ken abrusim bagarap, Noa i bihainim tok na “mekim olgeta samting olsem God i tokim em.” (Stat 6:22) Em nau, Noa i bin wokabaut wantaim God.
2, 3. Olsem wanem Noa i stap olsem gutpela piksa long yumi long nau?
2 Pol i putim nem bilong Noa long lista bilong ol gutpela witnes, em i tok: “Noa i bilip long God, na God i toksave long em long samting bai i kamap bihain, em samting Noa i no lukim yet. Orait em i bilipim tok bilong God na em i wokim wanpela sip. Na em wantaim meri pikinini bilong en ol i go insait long sip na ol i stap gut, na ol i no bagarap. Long dispela bilip bilong en, Noa i kamapim ples klia pasin nogut bilong olgeta arapela manmeri bilong graun. Noa i bilip long God na God i kolim em stretpela man.” (Hibru 11:7) Em i gutpela piksa tru long bihainim! Noa i save gut olsem tok bilong Jehova bai kamap tru, olsem na em i lusim taim, strong, na mani samting bilong em na bai em i ken bihainim tok bilong God. Long nau tu planti i givim baksait long ol wok i gat namba samting bilong graun em ol i gat rot long kisim, na ol i lusim taim, strong, na mani samting bilong ol na bihainim tok bilong Jehova. Bilip bilong ol i samting bilong tingim, na long rot bilong en God bai kisim bek ol na sampela arapela tu.—Luk 16:9; 1 Timoti 4:16.
3 I no isi long Noa na famili bilong em long bihainim pasin bilong bilip, wankain olsem Enok, tumbuna bilong Noa, em stadi paslain long dispela i bin stori long em. Long taim bilong Enok na Noa tu, ol man i lotu tru long God i no planti—etpela tasol i bin stap gut long God na abrusim bagarap long Tait. Noa i tokaut long stretpela pasin namel long ol man i mekim pasin nogut. Na tu, Noa wantaim famili bilong em ol i bisi long wokim wanpela traipela sip bilong redi long bikpela tait wara bai kamap long olgeta hap, maski i no gat wanpela i bin lukim kain tait olsem bipo. Ating samting ol i mekim i narapela kain tru long ai bilong ol man i lukluk long ol.
4. Jisas i kamapim wanem rong ol man long taim bilong Noa i bin mekim?
4 Tingim, taim Jisas i stori long taim bilong Noa, em i no bin toktok long ol pasin nogut tru ol man i insait long en olsem pait, lotu giaman, o pasin sem. Rong Jisas i kamapim em ol man i no laik tingim tok lukaut ol i harim. Jisas i tok ol i “wok long kaikai na dring, na ol man i maritim ol meri, i go inap long taim Noa i go insait long sip.” Kaikai, dring, marit, ol dispela samting yet i no gat rong long en. Em ol “nomol” samting tasol! Tasol wanpela tait wara i laik kamap, na Noa i wok long autim tok long stretpela pasin. Toktok na wokabaut bilong em i mas stap olsem tok lukaut long ol. Tasol “ol i stap olsem tasol i go inap long taim bikpela tait i kamap na i pinisim olgeta dispela manmeri.”—Matyu 24:38, 39.
5. Noa na famili bilong em i mas kamapim wanem ol pasin?
5 Taim yumi tingting i go bek long taim bilong Noa, yumi luksave olsem Noa i bihainim savetingting. Tasol long haptaim paslain long Bikpela Tait, man i mas i gat strongpela bel na bai em i ken stap narapela kain long ol arapela manmeri. Bilip bilong Noa na famili bilong em i mas strong tru na bai ol i ken wokim traipela sip na pulimapim long ol kain kain animal. Olsem wanem? Yu ting sampela taim sampela bilong ol i gat laik long i stap “nomol” tasol na no ken mekim ol samting i pulim ai bilong ol man? Sapos kain tingting olsem i bin kamap long ol, dispela i no daunim strong bilong ol long holimpas laik bilong God. Bihain long planti yia tru—i winim tru ol yia em yumi bai stap long dispela taim bilong nau—bilip bilong Noa i mekim na em i abrusim bagarap long Bikpela Tait. Tasol Jehova i bin bagarapim ol man em ol i mekim ol “nomol” samting na ol i no tingim ol bikpela samting i laik kamap long taim bilong ol.
Pasin Nogut i Kamap Strong Gen
6. Wanem ol hevi i stap yet bihain long Bikpela Tait?
6 Taim Bikpela Tait i slek, ol man i kirap gen long mekim ol samting. Tasol ol i sinman yet na “tingting long mekim ol pasin nogut” i stap yet long skin bilong ol ‘stat long taim ol i yangpela yet.’ (Stat 8:21) Na maski ol spirit nogut i no inap tanim i kamap man gen long graun, ol i wok strong i stap. Kwiktaim ol man i givim baksait long God i kamapim olsem ol i “stap aninit long strong bilong Satan,” na wankain olsem long taim bilong yumi, ol man i lotu tru long God i bin i gat wok long sakim “olgeta kain pasin bilong trik na giaman Satan i save hait na mekim.”—1 Jon 5:19; Efesus 6:11, 12.
7. Olsem wanem pasin nogut i bin go bikpela moa bihain long Bikpela Tait?
7 Kirap long taim bilong Nimrot bihain long Bikpela Tait, pasin nogut i kamap gen long graun. Na dispela pasin nogut i go bikpela moa taim ol man i kamap planti moa long graun na save bilong ol long wokim ol samting i go bikpela moa. Pastaim i gat bainat, spia, banara, na karis bilong pait. Bihain i gat masket na gan kenon na raifel, na klostu wan handet yia i go pinis, ol i wokim kain kain roket bom. Taim Wol Woa 1 i kamap ol i yusim ol samting bilong pait i nogut moa, olsem balus, strongpela ka i gat ol bikpela gan, sabmarin, na ges nogut. Long dispela woa ol dispela samting bilong pait i kilim i dai planti milion manmeri. Olsem wanem? Yumi kirap nogut long dispela? Nogat.
8. Truim bilong Kamapim Tok Hait 6:1-4 i bin kamap olsem wanem?
8 Long 1914, Jisas i kamap King bilong Kingdom Bilong God, na “de bilong Bikpela” i kirap. (KTH 1:10) Long wanpela driman bilong Buk Kamapim Tok Hait, Jisas i raun long waitpela hos olsem King i winim pait. Ol arapela man i raun long hos i bihainim em, wan wan bilong ol i makim ol narapela narapela bikpela hevi i painim ol man. Man i sindaun long retpela hos, em i kisim strong “bilong pinisim gutpela taim bilong ol manmeri bilong graun, bai ol man i wok long kilim i dai ol arapela man. Na ol i givim em wanpela bikpela bainat bilong mekim dispela wok.” (KTH 6:1-4) Dispela hos na man i sindaun long en i makim pait, na bikpela bainat i makim bikpela bagarap tru bilong ol pait bilong nau we i gat ol strongpela samting bilong kilim man i dai. Em ol samting olsem bom nuklia, wanpela tasol bilong en inap bagarapim planti tausen manmeri; na i gat ol roket bilong kisim ol dispela bom i go long ol hap i stap longwe inap planti tausen kilomita; na tu i gat kain kain ol marasin nogut ol inap bagarapim planti man tru.
Yumi Tingim Tok Lukaut Bilong Jehova
9. Olsem wanem ol samting long nau i wankain olsem ol samting i bin kamap paslain long Bikpela Tait?
9 Long taim bilong Noa, Jehova i bin bagarapim ol man, long wanem, pasin bilong ol long pait na nogutim narapela man i bikpela tru, na ol Nefilim i helpim dispela pasin. Orait, olsem wanem long nau? Yu ting pasin nogut long taim bilong Noa i winim tru pasin nogut long taim bilong yumi? Nogat! Na tu, wankain olsem long taim bilong Noa, ol man long nau i bisi long mekim ol wok samting bilong ol yet, em ol samting ol i ting i “nomol” long ol, na ol i no laik tingim ol tok lukaut i kamap long nau. (Luk 17:26, 27) Olsem na i no gat as na man i ken ting Jehova bai i no kamapim gen bikpela bagarap, laka?
10. (a) Ol tok profet bilong Baibel i kamapim wanem tok lukaut planti taim? (b) Em i savetingting long mekim wanem long nau?
10 Planti handet yia paslain long Bikpela Tait, Enok i tok profet long bikpela bagarap bai i kamap long taim bilong yumi. (Jut 14, 15) Jisas tu i bin tokaut long “bikpela hevi tru” i laik kamap. (Matyu 24:21) Ol arapela profet i tokaut long dispela samting. (Esekiel 38:18-23; Daniel 12:1; Joel 2:31, 32) Na long Buk Kamapim Tok Hait, yumi ritim stori long dispela laspela bagarap. (KTH 19:11-21) Yumi i bihainim pasin bilong Noa na autim tok long stretpela pasin. Yumi tingim ol tok lukaut bilong Jehova na long gutpela pasin yumi helpim ol arapela man long mekim wankain samting. Wankain olsem Noa, yumi wokabaut wantaim God. Tru tumas, man i laik kisim laip i mas holimpas dispela pasin bilong wokabaut wantaim God. Olsem wanem yumi inap mekim olsem maski i gat ol hevi i save bungim yumi long olgeta wan wan de? Yumi mas kisim strongpela bilip olsem ol samting God i tingting pinis long mekim i wok long kamap.—Hibru 11:6.
Wokabaut Yet Wantaim God Long Taim Nogut
11. Olsem wanem yumi bihainim pasin bilong ol Kristen long taim bilong ol aposel?
11 Long taim bilong ol aposel, ol Kristen God i makim i gat nem olsem ol i “bihainim rot bilong Jisas.” (Aposel 9:2) Bilip bilong ol long Jehova na Jisas Krais i bosim olgeta samting ol i mekim. Ol i wokabaut long rot Bikman bilong ol i bin bihainim. Long nau, ol gutpela Kristen i mekim wankain samting.
12. Wanem samting i kamap bihain long mirakel bilong Jisas long givim kaikai long bikpela lain manmeri?
12 Samting i bin kamap long taim Jisas i mekim wok bilong em long graun i soim olsem bilip em i bikpela samting. Wanpela taim, Jisas i wokim mirakel bilong givim kaikai long 5,000 man. Ol man i kirap nogut na ol i amamas. Tasol lukim samting i kamap bihain long dispela. Baibel i tok: “Ol manmeri i lukim dispela mirakel o mak em i bin wokim, na ol i tok, ‘Tru tumas, em i dispela profet God i bin tok long salim i kam long graun.’ Jisas i harim dispela tok na em i save, ol i laik i kam holimpas em na mekim em i kamap king bilong ol. Olsem na em i lusim dispela ples na em wanpela tasol i go bek gen long maunten.” (Jon 6:10-15) Long dispela nait em i go long narapela hap. Ating planti i bel hevi long Jisas i no orait long kamap king bilong ol. Jisas i bin kamapim ples klia olsem em i gat savetingting inap long mekim wok king na em i gat strong long inapim laik bilong ol manmeri long ol samting bilong skin. Tasol Jehova i no makim em long kamap King long dispela taim. Na tu, Kingdom bilong Jisas bai kamap long heven, long graun, nogat.
13, 14. Planti i bin soim olsem ol i tingting long wanem samting? Wanem samting i traim bilip bilong ol?
13 Tasol ol lain i strong long go long hap Jisas i stap long en, na olsem Jon i tok, ol i painim em long “hapsait bilong raunwara.” Bilong wanem ol i go long Jisas bihain long em i bin sakim laik bilong ol long mekim em i kamap king? Planti i soim olsem ol i tingting long ol samting bilong skin tasol, ol i toktok long kaikai Jehova i bin kamapim long ples nating long taim bilong Moses. Ol i mekim olsem Jisas i mas givim kaikai yet long ol. Jisas i save long tingting kranki bilong ol, na em i kirap lainim ol long sampela tok i tru bilong stretim tingting bilong ol. (Jon 6:17, 24, 25, 30, 31, 35-40) Taim em i mekim olsem, sampela i toktok planti, na moa yet taim em i mekim dispela tok piksa: “Tru tumas mi tokim yupela, sapos yupela i no kaikai bodi bilong Pikinini Bilong Man, na sapos yupela i no dringim blut bilong em, bai yupela i no gat laip i stap long yupela. Man i save kaikai bodi bilong mi na dringim blut bilong mi, em i gat laip i stap gut oltaim oltaim, na bai mi kirapim em long las de.”—Jon 6:53, 54.
14 Planti taim ol tok piksa bilong Jisas i bin kirapim ol man long kamapim olsem ol i laik tru long wokabaut wantaim God o nogat. Dispela tok piksa i mekim olsem. Em i mekim bikpela samting tru long ol man i harim. Baibel i tok: “Ol disaipel i harim dispela tok bilong Jisas, na planti bilong ol i tok olsem, ‘Dispela tok em i hevi tumas. Husat inap long harim?’ ” Jisas i tokim ol olsem ol i mas tingim tok bilong em i gat wanem mining long ol samting bilong spirit. Em i tok: “Holi Spirit yet i save givim laip long ol manmeri. Bodi em i no inap helpim yumi liklik. Dispela tok mi givim long yupela, em i spirit, na em i gat laip.” Tasol planti i no laik harim tok, Baibel i tok: “Jisas i autim dispela tok pinis, na planti disaipel bilong en i lusim em, na ol i go bek, na ol i no wokabaut moa wantaim em.”—Jon 6:60, 63, 66.
15. Sampela disaipel bilong Jisas i gat wanem stretpela tingting?
15 Tasol i no olgeta disaipel bilong Jisas i mekim olsem. Tru, ol gutpela disaipel i no kliagut long tok bilong Jisas. Tasol ol i strong long bilip yet long em. Pita, wanpela bilong ol gutpela disaipel, em i kamapim tingting bilong ol arapela husat i stap yet taim em i tok: “Bikpela, bai mipela i go long husat? Tok bilong yu tasol i save givim laip i stap gut oltaim oltaim.” (Jon 6:68) Em i nambawan gutpela tingting na gutpela piksa long bihainim!
16. Wanem samting inap traim bilip bilong yumi? Yumi mas wok long kisim wanem stretpela tingting?
16 Ol samting inap traim bilip bilong yumi long nau, olsem em i bin traim bilip bilong ol disaipel bilong bipo. Ating yumi bel hevi long truim bilong ol tok promis bilong Jehova i no kamap kwik olsem yumi yet i laikim. O ating yumi pilim olsem i hatwok long kisimgut mining bilong ol skripsa em ol buk bilong yumi i kamapim. O ating yumi bel hevi long pasin wanpela wanbilip Kristen bilong yumi i mekim. Olsem wanem? I stret sapos ol dispela samting o sampela arapela samting olsem i mekim na yumi no wokabaut moa wantaim God? Nogat tru! Ol disaipel i lusim Jisas i kamapim klia olsem ol i tingting long ol samting bilong graun tasol. Yumi mas abrusim dispela samting.
“Yumi No Man Bilong Surik”
17. Wanem samting inap helpim yumi long wokabaut yet wantaim God?
17 Aposel Pol i tok: “Spirit bilong God yet i bin kamapim olgeta tok i stap long buk bilong God.” (2 Timoti 3:16) Long Baibel, Jehova i tokim yumi long ‘rot yumi mas bihainim.’ (Aisaia 30:21) Pasin bilong bihainim Tok Bilong God i helpim yumi long ‘lukaut gut long wokabaut bilong yumi.’ (Efesus 5:15) Pasin bilong stadi long Baibel na skelim long bel ol tok yumi lainim i helpim yumi long “wokabaut long pasin bilong tok tru.” (3 Jon 3) Olsem Jisas i tok: “Holi Spirit yet i save givim laip long ol manmeri. Bodi em i no inap helpim yumi liklik.” Ol tok bilong soim gutpela rot long yumi, em ol tok i kam long Jehova tasol, long rot bilong Baibel, na spirit bilong em, na oganaisesen bilong em.
18. (a) Sampela i mekim wanem samting i no stret wantaim savetingting? (b) Yumi wok long kamapim wanem kain bilip?
18 Long nau ol man husat i kisim bel hevi, long wanem, ol i bihainim tingting bilong graun tasol o samting ol i wetim i no kamap kwiktaim, planti taim ol i kirap na givim bel long ol samting bilong dispela graun. Ol i no tingim moa olsem taim i sot pinis, ol i no pilim olsem ol i mas “was i stap,” na ol i kirap mekim ol samting bilong helpim ol yet tasol na ol i no putim ol wok bilong Kingdom i go pas. (Mak 13:33) Kain wokabaut olsem i no stret wantaim savetingting. Tingim tok bilong aposel Pol: “Tasol yumi no man bilong surik na lus. Nogat tru. Yumi ol manmeri bilong bilip na kisim laip.” (Hibru 10:39) Olsem Enok na Noa, yumi tu i stap long taim nogut, tasol wankain olsem tupela, yumi inap wokabaut wantaim God. Long dispela rot yumi ken bilip tru olsem yumi bai lukim ol tok promis bilong Jehova i kamap tru, olsem pasin nogut bai pinis, na nupela taim i gat stretpela pasin long en bai kamap. Em ol gutpela samting tru long wetim!
19. Maika i stori olsem wanem long rot ol man i lotu tru long God i save bihainim?
19 Profet bilong God, Maika, em i tok ol arapela lain man “bai wokabaut long nem bilong god bilong ol yet.” Bihain em i tok long em yet na ol arapela gutpela wokboi bilong God olsem: “Mipela bai wokabaut long nem bilong Jehova, em God bilong mipela, i go inap long taim bihain bihain, inap oltaim oltaim.” (Maika 4:5, NW ) Sapos yu gat strongpela tingting i wankain olsem tingting bilong Maika, orait stap klostu long Jehova maski wanem wanem samting nogut i kamap. (Jems 4:8) Yumi olgeta wan wan i mas i gat bikpela laik tru long wokabaut wantaim God bilong yumi Jehova long olgeta taim bihain, inap oltaim oltaim!
Bai Yu Bekim Olsem Wanem?
• Wanem ol samting long nau i wankain olsem long taim bilong Noa?
• Noa na famili bilong em i bin mekim wanem, na olsem wanem yumi inap bihainim pasin bilong ol long bilip?
• Sampela disaipel bilong Jisas i kamapim wanem tingting kranki?
• Ol Kristen tru i gat strongpela tingting long mekim wanem?
[Ol Piksa long pes 20]
Wankain olsem long taim bilong Noa, ol man long nau i bisi tru long ol samting ol i gat wok long mekim long ol wan wan de
[Piksa long pes 21]
Yumi ol lain bilong autim tok long Kingdom, “yumi no man bilong surik”