God i Laik Bai Ol Man i Stap Long Paradais

“Orait God, Bikpela i kisim dispela man em i bin wokim na i putim em long dispela gaden long Iden, bai man i ken i stap na lukautim dispela gaden.”—STAT 2:15.

 1. Long pastaim tru God i gat wanem laik long ol manmeri i bihainim tok?

LAIK bilong God long pastaim na i kam inap long nau, i olsem: Em i laik bai ol manmeri i ken bihainim tok na ol i ken i stap oltaim long paradais long graun! Ol i no ken i go lapun; bai skin bilong ol i stap yangpela na i gat strong. Ol i no inap les; oltaim bai ol i gat gutpela wok bilong mekim. Bai narapela i laikim tru narapela na i no tingting long em yet tasol; bai narapela i mekim gutpela pasin olgeta long narapela!—Stat 2:8; lukim tu Luk 23:42, 43.

 2. (a) Taim tingting bilong namba wan man i kirap long wok, em i kisim wanem save? (b) God i bin wokim namba wan man long wanem taim? na we? na long wanem mun na de?

² Bilong save long dispela samting, yumi ken tingting bek long taim God i bin wokim Adam na Adam i kamap laip na tingting bilong em i wok. Em i lukim skin bilong em yet na em i tingim olgeta narapela samting em i lukim na harim na holim na em i kirap nogut na em i save em i stap laip! Baibel i makim olsem dispela samting i bin kamap inap olsem 6,000 yia bipo, olsem long yia 4,026 paslain long taim bilong Krais. Dispela samting i kamap long kantri nau yumi kolim Turki olsem long saut-wes bilong ol hap graun nau yumi kolim Esia, em hap bilong Wara Yufretis na Wara Taigris, olsem long hap bilong not bilong dispela graun. Ating dispela samting i bin kamap long de 1 bilong mun Oktoba, long wanem ol kalenda bilong ol man bilong bipo tru i makim dispela mun i olsem namba wan mun bilong yia bilong ol.

 3. (a) Taim namba wan man i kamap laip, em i olsem wanem? (b) Kolim nem bilong namba wan man. Wanem insait bilong dispela nem?

³ Taim namba wan man i kamap laip em i bikpela pinis na skin bilong em i gutpela olgeta, no gat sik liklik, na pasin bilong em tu i gutpela olgeta. Nem em Baibel i kolim long em planti taim i kirapim yumi long tingim samting God i bin wokim man long en. Nem bilong em ‘A·dhamʹ.a God i bin wokim em long graun, em ‘a·dha·mahʹ. Olsem na insait bilong nem bilong em i olsem “Man Bilong Graun.” Dispela nem, Adam, i kamap olsem nem tru bilong nambawan man. Taim Adam i kamap laip, na tingting bilong em i wok na em i kisim save, ating em i kirap nogut tru!

 4. Taim namba wan man i kamap laip, wanem kain samting i no bin painim em? Olsem na em i no pikinini bilong wanem samting?

⁴ Taim dispela namba wan man, em Adam, em i opim ai na tingting bilong em i kirap long wok, em i no lukim olsem longpela strongpela han bilong wanpela samting olsem monki meri i holim em klostu long bros bilong en, em bros i gat planti gras, na em yet i holimpas dispela monki meri na lukluk long ai bilong em na laikim em tru na kolim em Mama. Nogat tru. Kain samting olsem i no bin painim Adam taim em i kamap laip. Na bihain tu, taim em i lukim wanpela monki long nambawan taim, em i no pilim olsem em i wanlain bilong en. Nogat. Long de God i bin wokim Adam, i no gat wanpela samting i makim olsem Adam em i bilong lain monki, olsem tumbuna pikinini bilong wanpela monki bilong bipo yet o bilong wanpela kain animal olsem. Tasol olsem wanem? Ating namba wan man i no ken save em i bin kamap olsem wanem? Bai em i save.

 5. Adam i lukim gutpela ples em i stap long en na em i lukim skin bilong em yet na em i save tru long wanem samting?

⁵ Tru, pastaim em i no save olgeta gutpela samting em i lukim i bin kamap olsem wanem. Em i stap long wanpela gutpela ples paradais em yet i no bin tingim o wokim o stretim gut olsem. Orait, dispela gutpela ples i bin kamap olsem wanem? Adam i gat tingting na em inap wokim tingting na kisim save, olsem na em i laik save long dispela samting. Em i no save long ol samting i bin kamap bipo, olsem na em i save em i no bin wokim em yet o bilong em yet em i bin kamap. I no long strong bilong em yet na em i bin kamap. Nogat.—Lukim Buk Song 100:3; 139:14.

 6. Taim Adam i kamap laip long gutpela ples long graun, ating em i bin mekim wanem?

⁶ Ating pastaim namba wan man Adam em i amamas tumas long em i stap laip, na em i amamas long lukim olgeta samting long gutpela ples em i stap long en, na em i no wok long tingting long em i kamap olsem wanem na em i stap bilong mekim wanem. Em i amamas tru na yumi save, em i no inap pasim maus—ating em i bin singaut. Tok i kamap long maus bilong em. Em i mekim tok ples bilong man na mekim ol toktok long ol gutpela gutpela samting em i lukim na harim. Em i amamas tru long em i stap laip long dispela gutpela ples Paradais! Em i wok long lukim na harim na smelim na holim ol samting—em i amamas long kisim save long ol dispela samting. Na nau em i laik save, olgeta dispela samting i bin kamap olsem wanem? Sapos yumi bin kamap olsem Adam i bin kamap, bai yumi tu i laik save long dispela samting, a? Tasol long tingting bilong yumi yet yumi no inap kisim dispela save.

Yumi Inap Save Ol Man i Bin Kamap Olsem Wanem

 7. Pastaim Adam i no save olsem wanem em i bin kisim laip i stap long gutpela ples paradais, tasol i no longtaim na em i kisim save long dispela samting long wanem rot?

⁷ Pastaim Adam i no save em i bin kamap olsem wanem na em i stap em wanpela tasol; em i no lukim narapela man kain olsem em i stap long dispela gutpela ples Paradais. Tasol i no longtaim na em i kisim save long dispela samting. Em i harim maus bilong wanpela man i toktok long em. Em i save long dispela tok. Tasol man i mekim dispela tok em i stap we? Adam i no inap lukim em, long wanem em i stap long heven. Dispela man i toktok wantaim Adam em i Man bilong wokim Adam! Na Adam inap bekim tok long em long wankain tok ples. Em i toktok wantaim God, em Man bilong wokim olgeta samting. Adam i no mekim wok long wanpela redio samting bambai em inap harim tok bilong God. Nogat. God i bin wokim Adam na em i toktok stret wantaim Adam.

 8, 9. (a) Adam inap givim wanem ol askim long God na kisim save long en? Papa i mekim wanem ol gutpela pasin long em? (b) Papa bilong Adam long heven, em i bekim wanem tok long Adam?

⁸ Nau Adam i save em i no stap wanpis olgeta na dispela i mekim gut bel bilong em. Planti askim i pulap long tingting bilong em. Em inap givim ol dispela askim long dispela Man i toktok long em na em i no inap lukim em. Adam i laik save, husat i bin wokim em na husat i bin wokim dispela gutpela ples em i stap long en? Em i stap bilong mekim wanem? I gat as bilong i stap bilong em o nogat? Papa bilong em i tingim em na mekim gut long em—em i bekim ol askim bilong em bambai em i ken save long ol dispela samting na tingting bilong em i ken i stap isi. Taim Adam i kirap long toktok na em i mekim tok long namba wan taim, yumi save, Papa bilong em long heven, em Man bilong wokim em na givim laip long em, em i amamas! Papa long heven i amamas long harim pikinini bilong em i toktok wantaim em! Ating namba wan askim Adam i mekim i olsem: “Mi bin kamap olsem wanem?” Papa long heven i amamas long bekim dispela askim na tokaut olsem dispela namba wan man em i pikinini bilong Em. Adam em i “pikinini bilong God.” (Luk 3:38) God Jehova i tokaut klia olsem em yet em i Papa bilong dispela namba wan man, em Adam. Papa bilong Adam long heven i bekim tok long em na Adam i tokim ol pikinini bilong em long dispela tok. Dispela tok em olsem:

⁹ “God, Bikpela i kisim graun na em i wokim man long en. Na em i winim win bilong laip i go insait long nus bilong man na man i kisim laip. Orait God, Bikpela i wokim wanpela gaden i stap long Iden, long hap bilong sankamap. Na long dispela gaden God i putim dispela man em i bin wokim. Na God i mekim graun i kamapim ol kain kain diwai, pikinini bilong ol i gutpela long kaikai. Olgeta dispela diwai i naispela tru. Namel long dispela gaden i gat wanpela diwai i stap, em diwai bilong givim laip. Na i gat narapela diwai tu i stap, em diwai bilong givim gutpela save long wanem samting i gutpela na wanem samting i nogut. Na wanpela wara i kamap long Iden bilong givim wara long dispela gaden. Dispela wara i bruk na i kamap 4-pela han wara.”—Stat 2:7-10.b

10, 11. (a) Adam i kisim gut wanem ol save? Tasol i gat wanem ol narapela askim em i mas save long bekim bilong en? (b) Papa long heven i bekim wanem tok long Adam?

¹⁰ Tingting bilong Adam i klia na em i kisim gut ol dispela save; em i amamas long kisim. Nau em i save, em i no bin kam long heven, em dispela ples em i no inap lukim na Man bilong wokim em i stap long en na i toktok long em. Em i bilong graun, long wanem God i bin kisim graun na wokim em long en na em i stap long graun. God Jehova em i Man bilong givim laip long em na em i Papa bilong em. Em i wanpela man i gat laip. Em i “kisim laip” long God Jehova, olsem na em i wanpela “pikinini bilong God.” I gat kain kain diwai long gaden Iden, em dispela ples em i stap long en, na pikinini bilong ol i gutpela bilong em i ken kaikai bambai em i ken i stap laip. Tasol bilong wanem em i mas i stap laip? God i bin putim em long graun, long Iden, bilong mekim wanem? Em i wanpela man tru, em i bikpela pinis, na em i gat strong long tingting na long skin inap long em i mekim wok, olsem na i stret em i mas save God i bin wokim em bilong mekim wanem wok. Sapos em i no save, bai em i no inap mekim dispela wok; bai em i no inap bihainim laik bilong God, em i Man bilong wokim em na em i Papa bilong em. Bekim bilong ol dispela stretpela askim i olsem:

¹¹ “Orait God, Bikpela i kisim dispela man em i bin wokim na i putim em long dispela gaden long Iden, bai man i ken i stap na lukautim dispela gaden. Na God i tokim man olsem, ‘Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.”—Stat 2:15-17.

12. Adam i mas tenkyu long God long wanem samting? Na olsem wanem Adam inap litimapim nem bilong God long dispela rot?

¹² Adam i mas tenkyu tru long God long dispela gutpela wok God i givim long em long dispela gutpela ples Iden. Nau em i save long laik bilong God, na em inap mekim wok bilong Em long graun. Nau em i gat wok em i mas mekim, em wok bilong lukautim gaden long Iden, tasol em i gutpela wok. Taim em i mekim dispela gutpela wok na lukautim gut dispela gaden, bai dispela gaden i litimapim nem bilong Man i wokim, em God Jehova. Taim Adam i mekim wok na nau em i pilim hangre, em i ken kaikai pikinini bilong ol diwai long gaden na inapim hangre bilong em. Long dispela rot bai skin bilong em i kisim nupela strong long olgeta taim na bai em i stap laip na i stap amamas inap long taim bihain bihain—inap oltaim oltaim.—Lukim Saveman 3:10-13.

Em Inap i Stap Oltaim

13. Namba wan man inap mekim wanem? Bilong wanem i olsem?

¹³ Dispela namba wan man em i gutpela olgeta na em inap i stap oltaim oltaim! Ating em i kirap nogut long dispela samting. Tasol i stret em i ken tingting long i stap oltaim. Man bilong wokim em i no gat tingting liklik long bagarapim dispela gutpela gaden long Iden i gat ol gutpela gutpela samting long en. Yu ting em bai bagarapim dispela samting em yet i bin wokim na i gutpela tru na i kamapim save bilong em long wokim ol naispela samting? Nogat tru. Em i no laik mekim olsem. (Aisaia 45:18) Na em i no laik bai dispela gutpela gaden tru i kamap bus gen, olsem na i mas i gat man bilong lukautim, olsem gutpela man Adam. Na sapos dispela man bilong lukautim gaden em i no kaikai pikinini bilong diwai tambu, em “diwai bilong givim gutpela save long wanem samting i gutpela na wanem samting i nogut,” orait dispela man i no ken i dai. Dispela man em i gutpela olgeta em inap i stap oltaim!

14. Adam i mas mekim wanem na bai em inap i stap oltaim long Paradais?

¹⁴ Em nau, Adam inap i stap oltaim long gutpela ples Paradais! Em inap i stap oltaim sapos em i bihainim stret olgeta tok bilong Man bilong wokim em, na em i no kisim pikinini bilong diwai, em Man bilong wokim em i tambuim em long kisim. God i laik bai dispela man i gutpela olgeta em i holimpas pasin bilong bihainim tok na bai em inap i stap oltaim. God i tambuim em long kisim kaikai long “diwai bilong givim gutpela save long wanem samting i gutpela na wanem samting i nogut” tasol dispela i no bagarapim man. Nogat. Dispela i traim tasol bel bilong man, em i laik i stap gut long Papa bilong em na bihainim tru tok bilong em o nogat. Dispela i givim rot long man bilong soim olsem em i givim bel tru long God, em Man bilong wokim em.

15. Bilong wanem Adam inap wetim gutpela samting bilong bihain, na wet long kisim gutpela samting long han bilong Man i bin wokim em?

¹⁵ Dispela man i stap belgut, long wanem em i save em i no bin kamap nating; em i gat Papa long heven. Na em i save em i stap laip bilong mekim wanem, na em inap i stap laip oltaim long Paradais. Em i tingim ol gutpela samting bai painim em inap long taim bihain bihain, olsem na em i kisim tasol ol kaikai long ol diwai em pikinini bilong ol i gutpela long kaikai, na em i klia long dispela “diwai bilong givim gutpela save long wanem samting i gutpela na wanem samting i nogut.” Em i laik kisim ol gutpela samting long han bilong Man i bin wokim em. Wok, olsem bilong lukautim gaden long Iden, em i gutpela wok; em i no wok bilong bagarapim man. Olsem na dispela man i mekim dispela wok.

Em i No Pilim Olsem Em i Mas Save long Olgeta Samting

16-18. I gat wanem ol samting i olsem i stap hait, tasol Adam i no pilim olsem em i mas kisim save long en? Bilong wanem i olsem?

¹⁶ Adam inap lukim bikpela lait bilong de, em san, i wokabaut long skai. Taim san i go daun, nau tudak i kamap, em nait. Na nau Adam inap lukim mun. Em i no pret; mun em i liklik lait bilong givim lait long nait. (Stat 1:14-18) Ating i gat ol liklik binatang i stap long gaden, em ol i kolim sta, ol i olsem ol liklik lam na lait bilong ol i kirap i dai, kirap i dai.

¹⁷ Nait i kamap na i tudak na nau Adam i pilim olsem em i mas slip wankain olsem ol animal i stap klostu long em. Taim em i lusim slip na kirap, nau em i pilim hangre na em i kisim kaikai bilong moningtaim—em i kaikai pikinini bilong ol diwai i no tambu.

¹⁸ Em i bin slip gut na kaikai gut na nau em i kisim bek strong na em i kirap mekim wok bilong em bilong san. Em i lukim ol diwai long gaden i gat grinpela lip, tasol em i no pilim olsem em i mas save long wok bilong ol dispela lip (photosynthesis), em planti tausen yia bihain ol man i kisim save long en. Dispela grinpela samting long ol lip (chlorophyll) i save kisim strong bilong san na wokim kaikai long en bilong ol man na ol animal, na lip bilong ol diwai i save klinim win bambai ol man na ol animal i gat klinpela win bilong pulim (ol lip i kisim kabon-daioksait long win na tromoi oksijen i go long en). Pastaim dispela samting i stap hait, tasol Adam i no pilim olsem em i mas save long en. Em wanpela strongpela wok o mirakel Man bilong wokim em i bin kamapim. Man bilong wokim em i save long dispela wok bilong lip bilong ol diwai; em yet i bin kamapim dispela samting bilong helpim ol man na animal bambai ol i gat kaikai na ol i ken i stap laip long graun. Olsem na namba wan man i save, God, em Man bilong wokim olgeta samting, em i mekim olgeta kain kain diwai na gras na kaikai i kamap, na God i bin givim wok long en bilong lukautim ol dispela samting long gaden bilong Iden. Tingting bilong Adam i gutpela olgeta na dispela save em i kisim em inap tru long em.—Lukim Stat 1:12.

Em i Stap Wanpis, Tasol Em i Amamas

19. Adam i save em i stap wanpis, i no gat narapela man kain olsem em long graun, tasol em i no mekim wanem?

¹⁹ Papa bilong Adam long heven em i wok long givim save long Adam. Adam i wok^. long lukautim gaden long Iden na i no gat wanpela man wankain olsem em long graun bilong wok wantaim em na helpim em. I no gat narapela man kain olsem em; em i stap wanpis. Tasol em i no wok long painim wanpela man bilong poroman wantaim em. Em i no askim Papa bilong em long heven long givim wanpela brata o susa long em. Em i stap wanpis—em wanpela tasol em i stap man long graun—tasol dispela i no mekim em i kamap longlong o mekim em i bel hevi na em i no amamas moa long i stap laip na long mekim wok. Nogat. Em i save poroman wantaim God.—Lukim Buk Song 27:4.

20. (a) Adam i amamas tru long mekim wanem? (b) I stap bilong Adam, olsem wanem dispela i no ken givim bikpela hatwok long em? (c) Tok i kamap bihain long dispela bai stori long wanem samting?

²⁰ Adam i save, Papa bilong em long heven i wok long skelim em na ol wok em i mekim. Em i save amamas tru long mekim pasin God i laikim. Em i lukim olgeta gutpela gutpela samting God i bin wokim na em i save, God em i Man bilong mekim ol gutpela wok tru. (Lukim Kamapim Tok Hait 15:3.) Dispela i stap bilong Adam i no givim bikpela hatwok long em o mekim em i les, long wanem skin na tingting bilong em i gutpela olgeta na em inap toktok wantaim God. Na God i bin givim gutpela wok long Adam, em Adam i amamas long mekim, olsem na Adam i stap belgut. Tok i kamap bihain long dispela bai stori long sampela gutpela blesing moa bilong Paradais na ol gutpela samting Adam i bin kisim long han bilong gutpela Man i bin wokim em.

[Ol Futnot]

“Nem bilong namba wan wara em Pison na em i go raunim kantri Havila. Long kantri Havila i gat gutpela gol, na i gat wanpela kain diwai, blut bilong en i gat gutpela smel. Na i gat wanpela kain ston i dia tumas, em ol i save kolim kanilian. Nem bilong namba 2 wara em Gihon na em i go raunim kantri Kus. Nem bilong namba 3 wara em Taigris na em i ran i go long hap sankamap bilong kantri Asiria. Na nem bilong namba 4 wara em Yufretis.”—Stat 2:11-14.

[Bai Yu Bekim Wanem Tok?]

◻ Pastaim Adam i no save em i bin kamap olsem wanem, tasol i no longtaim na em i kisim dispela save long wanem rot?

◻ God i givim wanem wok long Adam? Adam i ting olsem wanem long dispela wok?

◻ Adam i gutpela olgeta na em inap mekim wanem? Bilong wanem i olsem?

◻ Bilong wanem Adam i no givim bel long kisim save long ol samting i stap hait?

◻ Adam i stap wanpis—em wanpela tasol em i stap man long graun—tasol bilong wanem dispela i no mekim em i bel hevi?

[Piksa Kredit Lain long pes 10]

NASA photo