Holi Spirit—Wok Bilong En Long Ol Samting God i Wokim!
“God i bin tok tasol, na san na mun na ol sta i kamap long skai. Em i tok tasol na olgeta samting i kamap antap.”—SNG. 33:6.
1, 2. (a) Olsem wanem save bilong ol man long ol samting long ples antap na graun i bin i go bikpela? (b) Wanem askim yumi mas kisim bekim long en?
LONG 1905, wanpela saientis i gat nem, Albert Einstein, na planti narapela saientis i ting olsem i gat wanpela galaksi tasol i stap long ples antap—em Milkiwe galaksi. Ol i paul tru long sais bilong ples antap! Long nau ol saientis i ting ples antap i gat planti galaksi, winim 100 bilion, na sampela galaksi i gat planti bilion sta long en. Taim ol i yusim ol teleskop i strongpela moa na ol i salim sampela teleskop i go long ples antap, ol i painimaut olsem i gat planti galaksi moa i stap, na namba bilong ol i wok yet long i go antap.
2 Long 1905 ol saientis i gat sampela save tasol long ol samting bilong ples antap na bilong graun. Tru, save bilong dispela lain ol i bin stap 100 yia i go pinis em i winim save bilong ol tumbuna bilong ol. Tasol long nau, ol man i kliagut moa long ol samting i stap laip long graun na olsem wanem graun yet i helpim ol samting long i stap laip. Na long ol yia i kamap bihain bai yumi lainim planti samting moa long dispela graun na ples antap. Tasol i stret long askim olsem: Olsem wanem olgeta dispela samting i bin kamap? Yumi inap save long bekim bilong dispela askim, long wanem, Man Bilong Wokim olgeta samting i bin tokaut long en long Baibel.
Ol Samting God i Wokim i Olsem Mirakel
3, 4. God i wokim olgeta samting long wanem rot? Olsem wanem ol samting em i wokim i givim biknem long em?
3 Namba wan tok bilong Baibel i stori long olsem wanem ol samting i bin kamap, em i tok: “Bipo bipo tru God i mekim kamap skai na graun na olgeta samting i stap long en.” (Stt. 1:1) Taim i no gat wanpela samting i stap yet, God i yusim holi spirit bilong em long wokim skai na graun na olgeta arapela samting i stap long en. Man i save yusim han bilong em na ol tul long wokim ol samting, tasol God i save salim holi spirit long wokim ol samting.
4 Baibel i mekim tok piksa long holi spirit i olsem “pinga” bilong God. (Luk 11:20; Mat. 12:28) Na ‘ol gutpela wok bilong em’—ol samting Jehova i bin wokim long rot bilong holi spirit—ol i givim biknem tru long em. Man bilong raitim song, Devit, i tok: “Skai i soim yumi olsem God em i nambawan tru. Olgeta samting bilong antap i soim yumi gutpela wok bilong em.” (Sng. 19:1) Tru tumas, ol samting God i bin wokim i kamapim ples klia bikpela strong bilong holi spirit bilong em. (Rom 1:20) Olsem wanem bikpela strong bilong en i stap ples klia?
Strong Bilong God i No Gat Pinis Bilong En
5. Stori long strong bilong holi spirit bilong Jehova.
5 Traipela ples antap i kamapim klia olsem pawa na strong bilong Jehova i no gat pinis bilong en. (Ritim Aisaia 40:26.) Tingim san bilong yumi, em i wanpela sta i stap longwe long graun inap 150 milion kilomita, na i hat nogut tru olsem 15 milion digri Selsias. Maski san i hat nogut tru, em i stap longwe long graun inap stret long mak, olsem na ol samting i gat laip i ken i stap gut. I mas i gat bikpela pawa na strong bilong kamapim san na ol arapela bilion bilion sta. Jehova i gat kain strong olsem bilong wokim ol dispela samting.
6, 7. (a) Olsem wanem yumi ken tok God i bin yusim holi spirit bilong em long mekim ol samting i ron gut? (b) Wanem samting i soim olsem ol samting long ples antap i no bin kamap nating?
6 Ol samting i soim klia olsem taim God i bin yusim holi spirit bilong em long wokim ol samting, em i mekim ol samting i ron gut na i no paul nabaut. Tingim olsem yu gat wanpela boks i gat ol bal i gat kain kain kala. Yu seksekim boks, na nau yu kapsaitim olgeta bal i go daun long graun. Yu ting olgeta bal i gat wankain kala bai go bung long wanpela hap—olsem ol blupela long wanpela hap, na ol yelopela long narapela hap? Ating nogat, a? Pasin bilong mekim nabaut ol samting i no inap mekim ol samting i ron gut. Dispela em wanpela lo i bosim olgeta samting.a
7 Tasol taim yumi lukim ol samting long ples antap, yumi lukim wanem samting? Yumi lukim ol samting i ron gut—ol galaksi, ol sta, na ol planet, ol i save bihainim stret rot bilong ol. Ol dispela samting i no inap kamap nating. Olsem na yumi mas askim, Wanem strong i bin kamapim ol dispela samting long ples antap na mekim ol i bihainim stret lo? Save bilong yumi ol man bilong graun i sot, na long rot bilong saiens tasol yumi no inap save dispela strong em i wanem samting. Tasol Baibel i kamapim klia olsem dispela strong em holi spirit bilong God, em nambawan bikpela strong. Man bilong raitim song i tok: “God i bin tok tasol, na san na mun na ol sta i kamap long skai. Em i tok tasol na [“long rot bilong spirit bilong em,” NW ] olgeta samting i kamap antap.” (Sng. 33:6) Tasol taim yumi lukim ol dispela sta long nait, yumi lukim sampela tasol bilong ol planti lain sta!
Holi Spirit na Graun
8. Olsem wanem long save bilong yumi long ol samting Jehova i wokim?
8 Save yumi gat long nau long ol samting bilong graun em i liklik tru taim yumi skelim wantaim ol samting yumi no save yet long en. Gutpela man Jop i stori long save yumi gat long ol samting God i bin wokim, olsem: “Dispela olgeta samting God i mekim ol i kamap, na yumi save lukim na pilim long en, em i soim yumi liklik hap tasol bilong bikpela strong bilong God. Na dispela i winim save bilong yumi.” (Jop 26:14) Sampela handet yia bihain, King Solomon, man i save skelim gut ol samting Jehova i wokim, em i tok: “Mi lukim olgeta samting God i bin mekim na mi save, yumi no inap painimaut as bilong ol dispela samting i kamap long graun. Maski yumi taitim bun na yumi hatwok long painimaut, yumi no inap. Na maski sapos ol saveman i tok ol i save pinis long as bilong ol dispela samting, tok bilong ol i no tru. Ol i no inap save long en.”—Sav. 3:11; 8:17.
9, 10. God i yusim wanem samting bilong wokim graun? Wanem ol samting i bin kamap long de namba 1 i go inap de namba 3?
9 Tasol Jehova i bin tokaut long ol bikpela samting long ol wok bilong en, em yumi mas save long en. Olsem: Baibel i tokim yumi olsem bipo bipo yet, spirit bilong God i mekim wok long graun. (Ritim Stat 1:2.) Long dispela taim, graun i stap yet aninit long solwara, na i no gat lait na win oksijen.
10 Orait nau Baibel i stori long ol wok God i mekim insait long 6-pela de bilong em i wokim ol samting. Ol dispela de i no ol de i gat 24 aua long en, nogat, ol i makim ol wan wan bikpela haptaim. Long de namba 1, Jehova i mekim na lait i stat long kamap long graun. Dispela lait bai kamap klia olgeta, taim san na mun i kamap ples klia. (Stt. 1:3, 14) Long de namba 2, win oksijen i wok long kamap. (Stt. 1:6) Nau i gat wara, lait, na win, tasol graun i stap yet aninit long solwara. Long kirap bilong de namba 3, Jehova i yusim holi spirit long mekim graun i kam antap olsem ples drai, ating em i mekim wok long ol bikpela strong i stap insait long graun bilong subim graun i kam antap long solwara. (Stt. 1:9) Bai i gat ol narapela kain bikpela samting i kamap long de namba 3 na long ol narapela de i kamap bihain.
Holi Spirit na Ol Samting i Gat Laip
11. Ol samting i gat laip i kamapim klia wanem samting?
11 Spirit bilong God i bin kamapim tu ol samting i gat laip na olgeta dispela samting i wok gut tru. Long de namba 3 i go inap de namba 6, God i wokim planti kain kain diwai na animal samting long rot bilong holi spirit. (Stt. 1:11, 20-25) Ol dispela samting i gat kain kain disain long en na i luk nais tru, na dispela i kamapim klia olsem wanpela man i gat bikpela save tru i bin tingim na wokim.
12. (a) DNA i mekim wanem wok? (b) Wok bilong DNA i no senis liklik, na dispela i givim wanem save long yumi?
12 Tingim wok bilong DNA (deoxyribonucleic acid). Taim man, animal o diwai i kamapim pikinini, DNA i mekim na pikinini bai wankain olsem lain bilong ol yet na i go i go. Olgeta samting long graun i gat laip—olsem ol liklik binatang yumi no inap lukim long ai, gras, elefan, blu weil, na man—ol i kamapim pikinini long wok DNA i mekim. Ol samting i gat laip ol i kain kain, tasol wok bilong DNA long mekim pikinini i kisim pasin na lukluk bilong papamama, dispela wok i no senis liklik. DNA i mekim na elefan i karim elefan, man i kamapim man, na i go olsem. Olsem God Jehova i tingting pinis long mekim, ol samting i gat laip long graun ol i wok yet long mekim wok bilong ol. (Sng. 139:16) Pasin bilong ol samting long wok gut olsem, dispela tu i kamapim ples klia olsem ol samting i bin kamap long rot bilong “pinga” bilong God, olsem holi spirit bilong em.
Nambawan Gutpela Samting God i Wokim
13. God i wokim man olsem wanem?
13 Planti yia i lus na God i wokim kain kain samting, ol samting i gat laip na ol samting i no gat laip, na nau graun i no “stap nating” moa. Tasol wok Jehova i mekim long yusim holi spirit long wokim ol samting long graun, dispela wok i no pinis yet. Em i redi long wokim samting i winim olgeta narapela samting em i bin wokim long graun. Long pinis bilong de namba 6, God i wokim man. Jehova i mekim olsem wanem? Em i yusim holi spirit bilong em na kisim graun na wokim man.—Stt. 2:7.
14. Olsem wanem ol man i narapela kain long ol animal?
14 Stat 1:27 i tok: “God i wokim ol manmeri na ol i kamap olsem God yet. God i mekim ol i kamap man na meri.” Dispela tok, God i wokim ol manmeri i kamap olsem em yet, i makim olsem yumi inap kamapim pasin laikim, makim rot yumi yet i laik bihainim, na tu, yumi inap pas gut wantaim Man Bilong Wokim yumi. Olsem na kru bilong yumi i narapela kain tru long kru bilong ol animal. Jehova i wokim kru bilong yumi man na bai yumi inap amamas long kisim save long em na long ol wok bilong em i go inap long olgeta taim bihain.
15. Adam tupela Iv i gat rot long mekim wanem?
15 Taim God i wokim Adam na meri bilong em Iv, em i givim dispela graun na ol gutpela samting bilong en long tupela bambai tupela i ken raun na kisim save na amamas long en. (Stt. 1:28) Jehova i givim planti kaikai long tupela na wanpela gutpela ples paradais bilong i stap long en. Tupela i gat rot long i stap laip oltaim oltaim na kamap tumbuna bilong planti bilion pikinini i gutpela olgeta. Tasol ol samting i no bin kamap olsem.
Luksave Long Wok Bilong Holi Spirit
16. Maski namba wan man na meri i bin bikhet long God, yumi inap bilip na wetim wanem gutpela samting?
16 Tupela i no bihainim tok bilong Man Bilong Wokim ol, ol i tingim ol yet tasol na sakim tok bilong em. Dispela i mekim na olgeta tumbuna pikinini bilong ol i karim pen na hevi. Tasol Baibel i stori long olsem wanem God bai stretim olgeta hevi em sin bilong namba wan tumbuna papamama bilong yumi i bin kamapim. Na Baibel i stori tu olsem Jehova bai kamapim laik bilong em long pastaim. Graun bai kamap wanpela paradais we ol manmeri bai stap amamas inap oltaim oltaim na no gat sik. (Stt. 3:15) Bilong holimpas bilip long dispela gutpela samting, holi spirit bilong God i mas helpim yumi.
17. Yumi mas sakim wanem kain tingting?
17 Yumi mas beten askim Jehova long givim holi spirit long yumi. (Luk 11:13) Taim yumi mekim olsem, dispela bai strongim bilip bilong yumi olsem olgeta samting i bin kamap long han bilong God. Long nau, bilip bilong evolusen na i no gat God i stap, dispela tingting i wok long kamap strong moa, maski i no gat as bilong en. Yumi no ken larim dispela tingting kranki i paulim o givim tupela tingting long yumi. Olgeta Kristen i mas redim ol yet na bai ol inap sakim dispela kain tingting na ol wanlain i laik pulim ol long kisim dispela bilip.—Ritim Kolosi 2:8.
18. Taim ol man i skelim ol samting i bin kamap olsem wanem, bilong wanem i no stret ol i tok God i no bin wokim ol dispela samting?
18 Bilip bilong yumi long Baibel na long God bai kamap strong moa long rot bilong skelim ol samting i strongim bilip olsem God i bin wokim ol samting. Taim ol man i skelim ol samting i bin kamap olsem wanem, planti i no laik bilip long wanpela strong ol i no save long en. Sapos man i gat dispela tingting, ating em i no laik skelim stret tupela sait wantaim, olsem God i wokim ol samting o nogat. Na tu, em i no laik luksave long ol samting long ples antap na long graun i wok gut na i gat as na ol i stap, em ol i planti tru na ol man i “no inap kaunim” namba bilong ol. (Jop 9:10; Sng. 104:25) Tasol yumi ol Kristen i kliagut olsem dispela strong Jehova i yusim bilong wokim ol samting, em holi spirit.
Holi Spirit na Bilip Bilong Yumi Long God
19. Wanem samting i helpim yumi long save olsem God i stap na holi spirit bilong em i mekim wok?
19 I no olsem yumi mas i gat olgeta save long ol samting God i bin wokim bambai yumi ken bilip long God, laikim em, na rispek tru long em. Em wankain long pasin pren namel long tupela man. Maski sapos yumi save long sampela samting bilong narapela, dispela i no makim olsem yumi pren bilong en. Tasol bilong pasin pren namel long tupela i ken kamap strong, narapela i mas save gut long narapela. Na olsem tasol bilip bilong yumi long God bai go bikpela moa taim yumi kisim save moa long em. Taim God i harim ol beten bilong yumi na yumi luksave long ol gutpela samting i kamap taim yumi bihainim ol stiatok bilong em, dispela i strongim bilip bilong yumi olsem em i stap tru. Yumi go klostu moa long Jehova taim yumi luksave olsem em i stiaim wokabaut bilong yumi, lukautim yumi, blesim ol wok bilong em yumi mekim, na em i givim yumi ol samting yumi mas i gat. Olgeta dispela samting i strongim tru bilip bilong yumi olsem God i stap na holi spirit bilong em i mekim wok.
20. (a) Bilong wanem God i wokim ples antap na graun na ol man? (b) Wanem samting bai kamap sapos yumi wok yet long larim holi spirit bilong God i stiaim yumi?
20 Baibel em i wanpela gutpela eksampel long wok Jehova i mekim long holi spirit, long wanem, ol man i raitim Baibel, “holi spirit i kirapim ol long autim ol tok God yet i bin givim long ol.” (2 Pita 1:21) Pasin bilong stadi gut long Baibel inap strongim bilip bilong yumi long God olsem man husat i bin wokim olgeta samting. (Rev. 4:11) Pasin laikim bilong Jehova i kirapim em long wokim olgeta samting. (1 Jon 4:8) Olsem na yumi mas wok strong long helpim ol narapela long kisim save long gutpela Papa na Pren bilong yumi long heven. Sapos yumi wok yet long larim holi spirit bilong God i stiaim yumi, bai yumi inap kisim save long em inap oltaim oltaim. (Gal. 5:16, 25) Yumi mas wok yet long kisim save long Jehova na long ol gutpela wok bilong em, na long wokabaut bilong yumi, yumi mas kamapim dispela pasin laikim em i bin mekim taim em i bin yusim holi spirit bilong em long wokim heven na graun na ol man.
[Futnot]
a Lukim pes 24 na 25 bilong buk Is There a Creator Who Cares About You?
Yu Inap Stori Long Dispela?
• Ol samting long ples antap na long graun i givim wanem save long yumi long wok God i bin mekim long holi spirit?
• God i wokim yumi ol manmeri i kamap olsem em yet, olsem na yumi inap mekim wanem?
• Bilong wanem yumi mas skelim ol samting i soim olsem God i bin wokim ol samting?
• Olsem wanem pasin pren bilong yumi wantaim Jehova inap kamap strong moa?
[Piksa long pes 7]
Ol samting yumi lukim long ples antap i givim wanem save long yumi?
[Credit Line]
Stars: Anglo-Australian Observatory/David Malin Images
[Ol Piksa long pes 8]
DNA i mekim wanem wok long ol dispela samting?
[Piksa long pes 10]
Yu redi long tokim ol arapela long bilip bilong yu?