Yu Ting Man o Meri i Mas Marit Bambai Em i Ken Stap Amamas?

Yu ting Baibel i tok yu mas marit bambai laip bilong yu i gat as bilong en na yu stap amamas? Sapos yu ritim Baibel long namba 1 taim, ating bai yu ting Tok Bilong God i sapotim kain tingting olsem.

Long Buk Stat, Baibel i tok God i lukim olsem “i no gutpela” long namba 1 man Adam i stap wanpis. Olsem na God i wokim Iv olsem “poroman” bilong Adam. (Stat 2:18) Dispela tok “poroman” i makim olsem tupela i pas gut wantaim olsem wanpela. Taim yumi ritim dispela stori, ating bai yumi kisim tingting olsem sapos man o meri i no marit, em bai pilim wanpis na i no gat helpim. Na tu, planti stori bilong Baibel i soim olsem marit i save kamapim ol gutpela samting na em rot bilong stap amamas. Stori bilong Rut em wanpela eksampel olsem.

Tasol yu ting ol dispela stori i laik skulim yumi olsem ol Kristen long nau i no inap i stap amamas na laip bilong ol bai i no gat as bilong en sapos ol i no marit na kamapim pikinini? Nogat. Man em laip bilong em i gat as tru bilong en na em i stap amamas em Jisas Krais. Tasol em i bin stap singel inap long em i dai. Jisas em i nambawan man i gat gutpela savetingting tru winim ol narapela, na em i piksa tru bilong Jehova, em “God bilong amamas.” (1 Timoti 1:11; Jon 14:9) Jisas i kolim klia ol samting inap mekim man i stap amamas long dispela graun. (Matyu 5:1-12) Tasol em i no kolim marit long lista bilong em.

Yu ting dispela i makim olsem ol tok bilong Baibel i pait wantaim long ol samting bilong marit? Nogat tru. Yumi mas tingim marit olsem samting Jehova i putim bilong kamapim ol samting em i tingting pinis long mekim. God i putim marit bilong kamapim amamas, stap pren wantaim, na mekim gut bel bilong narapela narapela, na tu, sampela taim marit i bikpela samting bilong kamapim sampela laik bilong God. Olsem, God i wokim Adam na Iv bambai ol i “kamap planti na i go sindaun long olgeta hap bilong graun.” (Stat 1:28) Adam wanpela o Iv wanpela tasol i no inap kamapim dispela samting God i tingting pinis long ol i mas mekim. Nogat. Narapela i mas i gat narapela olsem poroman bilong em bilong mekim olsem.

Olsem tasol, i gat as na Jehova i yusim marit na famili taim em i mekim ol samting long rot bilong lain Israel bilong graun. Em i laik bai lain bilong em i kamap planti bambai ol birua i no ken daunim ol. Na tu, em i tingting pinis olsem lain Juda bai kamapim Mesaia, em man bilong kisim bek ol man long ol samting nogut em sin na dai i save kamapim. (Stat 49:10) Ol meri Israel i stap gut long God ol i tingim olsem em i gutpela samting long marit na kamapim pikinini, sapos ol i no karim pikinini em i samting bilong sem na bel hevi long en.

Olsem wanem long nau? Yu ting dispela tok God i bin mekim long bipo olsem “kamap planti na i go sindaun long olgeta hap bilong graun” i makim olsem ol Kristen long nau i mas marit na kamapim pikinini? Nogat. (Matyu 19:10-12) Na tu, i no gat wok moa long God i mas lukautim na mekim ol samting bilong was gut long lain em Mesaia bai kamap long en. Olsem na ol Kristen i mas i gat wanem tingting long marit na pasin bilong stap singel?

Marit na stap singel, tupela wantaim em presen i kam long God. Yumi save olsem wanpela presen em wanpela man i laikim, ating narapela man bai i no laikim. Marit em samting i holi na em inap kamapim pasin laikim, pasin pren, na strongim famili. Maski i olsem, Baibel i tok ol manmeri i marit long nau ol bai karim ol hevi, olsem “ol bai karim pen na hevi long bodi bilong ol.” Jehova i no tingim pasin bilong stap singel olsem samting bilong sem o bel hevi long en. Nogat. Baibel i tok i gat sampela samting long pasin bilong stap singel i gutpela moa winim marit.—1 Korin 7:28, 32-35.

Baibel i helpim ol man long kisim stretpela tingting long marit na pasin bilong stap singel. Jehova, em i As bilong marit na famili, na em i laik olsem olgeta wokboi bilong em i mas i stap amamas na laip bilong ol i gat as bilong en, maski ol i singel o ol i marit.