Ol Gutpela Samting Inap Painim Man Long Gutpela Ples Paradais

“God i mekim gutpela tok bilong givim strong long ol. Em i tokim ol olsem, ‘Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.’”—STAT 1:28.

 1, 2. Jehova i mekim pasin sori na em i wok long mekim ol samting bambai ol manmeri i ken i stap olsem wanem? Em i givim wanem ol wok long Adam?

BAIBEL i tok, “God i laikim yumi tru.” Em i save sori long yumi ol man na tingim gut yumi; oltaim em i wok long mekim ol samting bambai yumi inap i stap gutpela na i stap bel isi na i stap oltaim long gutpela ples paradais long graun. (1 Jon 4:16; lukim tu Buk Song 16:11.) Namba wan man, em Adam, em i gutpela olgeta; em i stap bel isi na em i gat gutpela wok em i amamas long mekim. Man bilong wokim Adam i givim wok long em bilong lukautim gaden bilong Iden. Na bihain Man bilong wokim em i givim narapela wok long em, em bikpela wok na i hatwok liklik long mekim. Baibel i stori long dispela samting, olsem:

² “Olsem na God i kisim graun, na em i wokim olgeta kain animal na pisin. Na God i bringim olgeta animal na pisin i go long man, bilong man i ken givim nem long ol. Orait na man i givim nem long olgeta wan wan animal na pisin. Em i givim nem long olgeta animal bilong ples, na long olgeta animal bilong bus, na long olgeta pisin. Na wanem nem man i kolim ol long en, orait dispela nem i stap nem bilong ol.”—Stat 2:19, 20.

 3. Bilong wanem Adam i no pret long ol animal na ol animal i no pret long em?

³ Man i kolim hos olsem sus, bulmakau olsem shohr, sipsip olsem seh, meme olsem ʽez, pisin olsem ʽohph, balus olsem yoh·nahʹ, pikok olsem tuk·kiʹ, laion olsem ʼar·yehʹ o ’ariʹ, bea olsem dov, monki olsem qohph, dok olsem keʹlev, snek olsem na·chashʹ, olsem olsem.a Taim em i go long bikpela wara i stap long gaden Iden, em i lukim ol pis i stap long wara. Em i kolim nem bilong ol pis olsem da·gahʹ. Adam i no holim spia o banara samting, tasol em i no pret long ol dispela animal bilong ples o bilong bus, o long ol pisin, na ol i no pret long em. I olsem ol i save ol i stap aninit long em na ol i pilim olsem em i narapela kain na em i winim ol. God i bin wokim ol dispela animal na pisin samting na givim laip long ol, olsem na Adam i no tingting long bagarapim ol o kilim ol i dai.

 4. Ating Adam i bin mekim wanem pastaim na bihain em i kolim nem long ol animal? Adam i amamas long mekim dispela wok o olsem wanem?

⁴ God i wok long bringim ol dispela animal na pisin i kam long man na Baibel i no stori long hamas de o wik i lus long mekim dispela wok. Tasol God yet i bosim na stiaim dispela samting. Ating pastaim Adam i skelim gut animal o pisin na lukim ol pasin samting bilong en na nau em i kolim nem long en i stret long en. Olsem na ating bikpela hap taim liklik i lus. Adam i amamas long mekim dispela wok, long wanem long dispela rot em inap kisim save long olgeta kain kain animal samting bilong dispela graun, na em inap wokim tingting na mekim ol tok bilong kolim nem i stret long olgeta wan wan.

 5-7. (a) Ating i gat wanem ol askim i bin kamap? (b) Wanem kain bekim i stap long stori bilong God i bin wokim ol samting, em stori i stap long Stat 1:1-25?

⁵ Tasol God i bin wokim wanem samting pastaim na wanem samting bihain? Em i bin wokim ol animal pastaim na ol pisin bihain o olsem wanem? Na em i bin wokim man paslain o bihain long olgeta dispela animal samting i gat laip? God i bin mekim wanem bilong redim graun bambai man na ol animal inap i stap laip long en, na bilong redim skai bilong ol pisin i ken raun long antap tru? Na em i bin mekim wanem bambai i gat wara bilong dring na ol diwai sayor samting bilong kaikai? Na olsem wanem em i wokim bikpela lait bilong taim bilong san na liklik lait bilong nait bambai man inap lukim ol samting? Wanem samting i mekim na ples i hat inap long man i stap skin nating taim em i wokabaut na mekim wok na slip?

⁶ God i givim save long man long ol dispela samting. Em inap wokim tingting na kisim save, olsem na i stret God, em Man i save tru long bekim bilong ol dispela askim, em i mas givim ol stretpela bekim long em. Em i pikinini bilong God, olsem na God i no lusim em i stap nating, no gat save. Nogat. Ating God i givim tingting long em na em i save long gutpela stori bilong taim God i bin wokim olgeta samting, olsem i stap long Baibel long Stat 1:1-25.

⁷ Yumi save, Adam i amamas tru long save long dispela stori. Dispela stori i givim save long em long planti samting. Ol tok bilong dispela stori i lainim em olsem i gat 3-pela bikpela hap taim, em God i kolim olsem ol de long pasin bilong Em long makim de, na bihain i gat namba 4 bikpela hap taim na long dispela hap taim God i bin mekim tupela bikpela lait i kamap long skai bilong makim ol de bilong man, em inap olsem 24 aua tasol. Dispela sotpela de bilong man long graun i kirap long apinun, taim san i go daun, na i pinis long taim san i go daun gen. Na Adam i save i gat ol yia tu bilong em, na ating long dispela taim stret em i kirap long kaunim ol yia bilong em. Dispela bikpela lait long skai i bilong helpim man long makim ol de na ol yia. Tasol ol de bilong God bilong wokim ol samting i no 24 aua tasol. Nogat. Ol dispela de em ol bikpela hap taim, na Adam i kisim save olsem em i stap long namba 6 bikpela hap taim o de bilong God i wokim ol samting long graun. Long dispela namba 6 de, God i bin wokim olgeta kain kain animal long raun, na bihain em i bin wokim man, na em i no tok yet long dispela de i pinis. Nau Adam i save wanem samting i bin kamap pastaim, na wanem samting i kamap bihain, olsem ol diwai sayor samting, ol samting bilong solwara, ol pisin, ol kain kain animal bilong graun. Tasol taim God i wokim Adam na putim em long gaden long Iden, dispela i no inapim tru laik bilong God. God i no laik bai dispela wanpela man tasol i stap long Paradais long graun.

God i Wokim Namba Wan Meri

 8, 9. (a) Man i lukim ol animal i olsem wanem? Na em i kisim wanem tingting long em yet? (b) Bilong wanem i stret em i no askim God long givim wanpela poroman long em? (c) Baibel i stori olsem wanem long God i wokim namba wan meri?

⁸ Tingting bilong namba wan man i gutpela olgeta na em inap skelim gut ol samting. Em i lukim olgeta pisin na animal i stap tupela tupela, olsem man na meri, na ol inap kamapim pikinini kain olsem bilong ol yet. Tasol man i no gat poroman. Taim em i lukim dispela samting, sapos em i tingting long painim wanpela poroman, bai em i lukim olsem i no gat wanpela bilong ol dispela animal inap i stap poroman bilong em—ol monki tu, nogat. Na bai Adam i save, i no gat poroman bilong em, long wanem sapos God i bin wokim wanpela poroman bilong em, orait longtaim pinis bai God i bringim dispela poroman i kam long em. Taim God i wokim olgeta dispela kain kain animal, em i no bin wokim man wantaim. Em i wokim man long narapela taim na em i laik bai man i narapela kain tru long ol animal. Olsem na Adam i no laik bikhet na askim God, em Man bilong wokim em, long givim wanpela poroman long em. Em i larim dispela samting i stap long han bilong God, na i stret tru em i mekim olsem, long wanem liklik taim bihain em i kisim save olsem, God yet i lukim em i stap wanpis na i laik wokim wanpela poroman bilong em. Baibel i stori long dispela samting, olsem:

⁹ “Tasol i no gat wanpela bilong ol dispela samting inap i stap poroman bilong helpim Adam. Orait God, Bikpela i mekim man i slip i dai tru. Na taim man i slip yet, God i kisim wanpela bun long banis bilong man na i pasim gen skin bilong dispela hap. Orait God i wokim wanpela meri long dispela bun em i bin kisim long man, na bihain em i bringim meri i go long man. Man i lukim meri na em i tok olsem, ‘Em nau. Em i poroman tru bilong mi. Bun bilong em i kamap long bun bilong mi, na mit bilong em i kamap long mit bilong mi. God i wokim em long bun bilong mi, olsem na bai mi kolim em “meri.”’ Olsem na dispela pasin i kamap. Man i save lusim papamama na i pas wantaim meri bilong en, na tupela i kamap wanpela bodi tasol. Man na meri i no gat samting bilong karamapim skin bilong tupela. Tasol tupela i no sem.”—Stat 2:20-25.

10. Taim God i bringim dispela meri long man, nau man i tok wanem? Dispela tok em i mekim, ating em i makim wanem samting?

¹⁰ Dispela meri em i gutpela olgeta na taim God i givim em long man olsem poroman bilong helpim em, tok man i mekim i kamapim klia olsem man i amamas tru long dispela meri. Em i tok: “Em nau. Em i poroman tru bilong mi. Bun bilong em i kamap long bun bilong mi, na mit bilong em i kamap long mit bilong mi.” Dispela tok em i mekim taim em i lukim dispela meri nau tasol God i bin wokim em, ating dispela tok i makim olsem em i bin wet longtaim liklik long kisim kain gutpela poroman olsem. Adam i kolim meri bilong em olsem “meri” (’ish·shahʹ), long wanem “God i wokim em long bun bilong [em].” (Stat 2:23) Adam i no pilim olsem em i wanblut bilong ol pisin o ol animal bilong graun, em bipo God i bin bringim ol i kam long em bilong givim nem long ol. Nogat. Skin bilong em i narapela kain tru long skin bilong ol. Tasol dispela meri em i wanblut tru bilong em. Bun em God i kisim long Adam na wokim meri long en i kamapim wankain blut long skin bilong meri olsem i stap long skin bilong Adam. (Lukim Matyu 19:4-6.) Nau Adam inap i stap olsem profet bilong God na tokim meri long gutpela stori bilong taim God i bin wokim ol samting.

11-13. (a) Adam i kisim pinis meri na nau ating i gat wanem ol askim i kamap? (b) God i laik bai namba wan man na meri i mekim wanem? (c) Ol manmeri i kamap long graun bai ol i nambawan olgeta na bai ol i kaikai wanem samting?

¹¹ Tasol i gat wanem as na God i givim meri long Adam? Em i laik bai Adam i gat poroman bilong helpim em bambai em i no ken i stap wanpis, o God i gat narapela laik tu? Baibel i kamapim dispela laik bilong God taim Baibel i stori long God i blesim marit bilong tupela; Baibel i tok:

¹² “Bihain God i tok olsem, ‘Nau yumi wokim ol manmeri bai ol i kamap olsem yumi yet. Bai yumi putim ol i stap bos bilong ol pis na ol pisin na bilong olgeta kain animal na bilong olgeta samting bilong graun.’ Orait God i wokim ol manmeri na ol i kamap olsem God yet. God i mekim ol i kamap man na meri. Na God i mekim gutpela tok bilong givim strong long ol. Em i tokim ol olsem, ‘Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.’

¹³ “Na God i tok olsem, ‘Mi givim yupela ol kain diwai na gras i karim pikinini bilong kaikai. Na yupela i ken kisim kaikai long ol dispela samting. Tasol mi givim ol grinpela lip na gras samting olsem kaikai bilong olgeta bikpela na liklik animal na olgeta pisin.’ Orait ol dispela samting i kamap olsem God i tok.”—Stat 1:26-30.

Ol Samting Inap Painim Namba Wan Man na Meri

14. God i mekim gut long namba wan man na meri, olsem na tupela inap mekim wanem? Na i stret tupela i ken tingim wanem samting inap kamap long graun?

¹⁴ I gutpela samting tru long namba wan man na meri inap harim maus bilong God i toktok wantaim tupela. God i tokim tupela long ol samting ol i mas mekim na em i mekim gutpela tok long tupela bilong givim strong long ol. God i mekim gut long tupela, olsem na bai tupela inap mekim olgeta wok God i tokim ol long mekim, na wok bilong ol i no ken lus nating. Gutpela samting tru inap painim tupela! Tupela marit hia i stap amamas na tupela i stap long gutpela ples long Iden, na ating tupela i tingim ol gutpela samting inap kamap sapos tupela i bihainim laik bilong God. Long tingting bilong tupela, ating tupela i lukim ol samting inap kamap bihain tru, olsem olgeta hap bilong graun bai kamap gutpela ples wankain olsem Iden, na olgeta manmeri long graun bai amamas na pes bilong ol i lait. (Stat 2:8) Bel bilong tupela i amamas, long wanem ol i save, olgeta dispela manmeri i kamap long graun ol i pikinini bilong tupela, olsem lain tumbuna pikinini bilong tupela. Skin bilong olgeta dispela manmeri i nambawan olgeta na ol i stap yangpela oltaim, no gat sik, na ol i stap amamas. Narapela i laikim tru narapela, na olgeta wantaim namba wan tumbuna papamama bilong ol, ol i wanbel wantaim long lotuim bikpela Man i bin wokim ol, em i Papa bilong ol long heven. Taim namba wan man na meri i tingim dispela kain gutpela famili tupela inap kamapim, bel bilong tupela i amamas tru!

15, 16. (a) Olsem wanem na bai i gat planti kaikai bilong olgeta manmeri? (b) Bai ol i kamap planti na i gat wanem wok ol i mas mekim long ol hap graun i stap ausait long Iden?

¹⁵ Bai i gat planti kaikai inap tru long olgeta dispela pikinini bilong ol i pulap long olgeta hap bilong graun. Long gaden Iden i gat planti kaikai i stap. God i bin wokim ol kain kain diwai samting i save karim kaikai, na ol i ken planim pikinini bilong en na kamapim planti kaikai moa bilong strongim skin bilong ol na helpim ol long i stap laip.—Lukim Buk Song 104:24.

¹⁶ Bai lain bilong ol i kamap planti na bai ol i skruim gaden i go; bai ol i mekim ol hap graun ausait long Iden i kamap gutpela ples olsem dispela gaden long Iden. Ol tok bilong God i makim olsem ol hap graun ausait long Iden em i bus tasol, olsem i no gat man i lukautim na mekim i kamap gutpela olsem gaden long Iden. Olsem na Man bilong wokim ol i tokim ol, ol i mas i go sindaun long olgeta hap bilong graun na “bosim” graun.—Stat 1:28.

17. Olsem wanem na bai i gat planti kaikai inap long ol manmeri i wok long kamap long graun? Bai ol i skruim gaden i go na wanem samting bai kamap long olgeta hap?

¹⁷ Ol dispela manmeri i gutpela olgeta bai ol i skruim gaden i go na bai ol i bosim graun na lukautim gut, olsem na bai graun i kamapim planti kaikai inap tru long ol manmeri i wok long kamap long graun. Na bihain tru bai olgeta hap bilong graun i stap olsem gutpela ples gaden. Bai paradais i kamap long olgeta hap, na bai ol manmeri inap i stap oltaim long en. Ol lain long heven bai lukluk i kam daun na bai ol i lukim graun i olsem gutpela ples tru, na bai God, em Man bilong wokim dispela graun, i tok, dispela samting em i bin wokim i gutpela na bai em i amamas.—Lukim Jop 38:7.

18.Taim olgeta hap bilong graun i kamap gutpela ples olsem Iden, bilong wanem i no gat pait o hevi long en? Wanem kain gutpela pasin isi bai stap?

¹⁸ Bai i no gat pait o hevi—ol samting bai stap isi tasol, wankain olsem long dispela gaden long Iden, em tupela nupela marit hia i bin stap long en. Ol manmeri i no ken pret long olgeta dispela animal na pisin samting, em dispela namba wan man, Adam, i bin skelim na kolim nem long ol. Ol dispela animal samting i no ken bagarapim ol. Ol dispela gutpela manmeri i stap long Paradais long olgeta hap bilong graun bai ol i bosim ol animal samting wankain olsem namba wan tumbuna papamama bilong ol i mekim. Bai ol i bosim gut ol pis bilong solwara, na ol pisin i wokabaut long antap, na olgeta kain kain animal i wokabaut long graun, ol animal bilong bus tu. God i putim save long skin bilong ol dispela animal na ol i save ol i aninit long ol manmeri, long wanem God i bin wokim ol manmeri “i kamap olsem God yet.” Olsem na ol dispela animal samting bai sindaun gut wantaim ol man. Ol manmeri i bosim ol dispela animal bai ol i gutpela olgeta na bai ol i mekim gut long ol animal, na bai ol animal i stap isi wantaim. Ol dispela gutpela manmeri i stap isi na dispela bai mekim ol animal i stap gut wantaim na i stap isi, na bai ol i stap gutpela. Na bikpela samting em olsem: Ol dispela manmeri bai ol i stap gut wantaim God, olsem wanbel wantaim God, na em bai mekim gut long ol inap long olgeta taim bihain.—Lukim Aisaia 11:9.

God i Malolo long Wokim Ol Samting

19. (a) Taim namba wan man na meri i tingim laik bilong God, ating nau tupela i save long wanem samting? (b) Tok bilong God i makim wanem samting long ol yia na ol de?

¹⁹ Taim namba wan man na meri i tingim ol dispela samting i mas kamap long graun bilong inapim laik bilong God, nau tupela i kisim save long wanpela samting, olsem: Tupela i save, tupela i no inap mekim kwik olgeta dispela gutpela wok God i laik bai ol i mekim. Bilong inapim laik bilong God, ol i mas gat bikpela hap taim, olsem planti yia. Hamas yia? Man bilong wokim ol, em Papa bilong ol long heven, em i save. Tok em i givim long tupela i makim olsem ol dispela bikpela de bilong em long wokim ol samting i laik pinis. I olsem ‘san i go daun’ na nupela de i laik kirap, olsem God yet i makim long ol de bilong em bilong wokim ol samting. Dispela nupela de i mas kamap gutpela de, em de God i makim bilong kamapim gutpela stretpela laik bilong em. Namba wan man em i gutpela olgeta na em i profet bilong God, em i save long dispela samting. Baibel i stori olsem:

20. Baibel i tok wanem long “de namba 7”?

²⁰ “God i lukim olgeta dispela samting i gutpela, na em i amamas tru. Nait i go pinis na moning i kamap. Em i de namba 6. Long dispela pasin tasol, God i wokim skai na graun na ol planti samting i stap long en. Long de namba 7 God i lukim olgeta wok bilong en i pinis, na em i malolo long dispela de. Na God i tambuim de namba 7 na em i tok olsem de namba 7 . . . em i bikpela de bilong em yet, long wanem, em i wokim pinis olgeta samting na long dispela de em i malolo. Long dispela pasin tasol, God i wokim skai na graun na olgeta samting.”—Stat 1:31-2:4.

21. (a) Baibel i tok, de malolo bilong God i pinis na em i amamas long en o olsem wanem? Stori long dispela samting. (b) I gat wanem ol askim?

²¹ Baibel i no stori long de malolo bilong God i pinis na God i tok i gutpela na em i amamas. Baibel i no tok, nait i go pinis na moning i kamap, em i de namba 7. Nogat. Dispela de i no pinis yet, olsem na God i no tok yet olsem ol samting i kamap long dispela de i gutpela na em i amamas long en, olsem em i bin mekim long pinis bilong ol narapela 6-pela de bilong wokim ol samting. Namba 7 de i no pinis yet, tasol olsem wanem long ol samting i bin kamap long en inap long nau? God Jehova i lukim olsem i gutpela na em i amamas long en o nogat? Em i bin kisim gutpela malolo o nogat? Olsem wanem long ol gutpela samting namba wan man na meri i tingim long de tupela i marit long Paradais, em ol samting i bin mekim bel bilong tupela i amamas tru? Ol samting i bin kamap olsem tupela i tingim o nogat? Orait, tok i kamap bihain long dispela bai stori long dispela samting.

[Futnot]

[Bai Yu Bekim Wanem Tok?]

◻ God i givim wok long Adam bilong lukautim gaden na em i givim wanem narapela wok tu long em? Em i mas mekim wanem bilong inapim dispela wok?

◻ Stori bilong Stat 1:1-25 long God i wokim ol samting, dispela stori i kamapim klia wanem samting?

◻ God i wokim namba wan meri olsem wanem? Taim God i givim meri long Adam, Adam i tok wanem?

◻ Wanem ol gutpela samting inap painim namba wan man na meri?

◻ God i tok wanem long makim olsem narapela de bilong ol dispela bikpela de bilong wokim ol samting em i pinis?