Jehova Bai Kamapim Samting Em i Tingting Pinis Long Mekim!

1, 2. (a) Jehova i toksave long yumi long wanem samting? (b) Olsem wanem tok bilong Aisaia 46:10, 11 na 55:11 i strongim bilip bilong yumi?

NAMBA 1 tok i stap long fes buk bilong Baibel em i klia na i stret tru. Em i tok: “Bipo bipo tru God i mekim kamap skai na graun na olgeta samting i stap long en.” (Stt. 1:1) Yumi lukim na yumi gat liklik save tasol long planti samting God i wokim long ples antap na long graun, olsem spes i stap long ples antap, lait, na strong bilong graviti. (Sav. 3:11) Tasol Jehova i toksave long yumi long ol samting em i tingting pinis long kamapim long dispela graun na mekim bilong helpim ol manmeri. God i wokim yumi olsem piksa bilong em, na dispela graun em ples bilong yumi. (Stt. 1:26) Ol manmeri bai stap olsem ol pikinini bilong Jehova, na em bai stap olsem Papa bilong ol.

² Namba 3 sapta bilong Buk Stat i stori long wanpela hevi i kamap na i laik pasim Jehova long kamapim samting em i tingting pinis long mekim. (Stt. 3:1-7) Tasol dispela hevi i no inap pasim God. I no gat wanpela man i gat strong long pasim Jehova long kamapim samting em i laik mekim. (Ais. 46:10, 11; 55:11) Olsem na yumi ken bilip tru olsem long taim stret, Jehova bai kamapim samting em i tingting pinis long mekim!

 3. (a) Yumi mas kisim save long wanem ol bikpela tok bilong Baibel? (b) Wai na yumi skelim ol dispela tok long nau? (c) Yumi bai skelim wanem ol askim?

³ Yumi save long tok bilong Baibel long ol samting God i tingting pinis long mekim long graun, na mekim bilong helpim ol manmeri, na nambawan bikpela wok Jisas Krais i mekim long kamapim samting God i tingting pinis long mekim. Dispela em ol bikpela samting yumi kisim save long en taim yumi kirap stadi long Baibel. Yumi laik helpim ol man long kisim save tu long ol dispela samting. Long nau, yumi wok strong long invaitim planti manmeri moa long i kam long Memorial bilong tingim dai bilong Krais. (Luk 22:19, 20) Ol lain i kam long Memorial bai kisim planti save moa long ol samting God i tingting pinis long mekim. Olsem na insait long sampela de paslain long Memorial, yumi ken tingim ol askim yumi inap yusim long kirapim laik bilong ol Baibel sumatin na ol narapela manmeri na bai ol i ken tingim risen bilong dispela bung. Yumi bai skelim 3-pela askim: Long pastaim tru, God i tingting pinis long kamapim wanem samting taim em i wokim graun na ol manmeri? Wanem samting i kamap na i laik pasim God long kamapim samting em i tingting pinis long mekim? Wai na ofa bilong Jisas long baim bek ol man i opim rot long God inap kamapim ol samting em i tingting pinis long mekim?

 4. Olsem wanem ol samting Jehova i wokim i givim glori long em?

⁴ Jehova em Man i wokim olgeta samting, olsem na yumi rispektim em na givim ona long em. Ol samting em i wokim i gutpela olgeta. (Stt. 1:31; Jer. 10:12) Olgeta samting God i wokim i luk nais tru, na em i putim olgeta long ples stret bilong ol na ol i no paul nabaut, olsem na dispela i givim wanem skul long yumi? Taim yumi lukim ol samting Jehova i wokim, em ol liklik samting na ol bikpela samting, yumi pilim tru gutpela wok bilong ol dispela samting. Yumi kirap nogut na amamas long lukim olsem ol liklik sel insait long bodi bilong yumi inap mekim ol narakain wok, na taim nupela bebi i bon, skin bilong em i malumalum, na taim san i go daun, kala bilong skai i luk nais tru. Yumi amamas tru long lukim ol dispela samting bikos God i wokim yumi na yumi inap luksave long ol samting i luk nais.—Ritim Song 19:1; 104:24.

 5. Jehova i mekim wanem bilong stiaim olgeta samting na bai ol inap wok gut wantaim?

⁵ Ol samting Jehova i wokim i soim olsem pasin laikim i kirapim em long putim ol lo. Em i putim ol lo bilong stiaim ol samting em i wokim long graun na long ples antap, na tu, em i putim ol lo bilong helpim ol manmeri. (Sng. 19:7-9) Olsem na olgeta samting long heven na graun i gat wok stret ol i mas mekim bilong kamapim samting God i tingting pinis long mekim. Jehova i putim lo bilong stiaim olgeta samting em i wokim bambai wok bilong wanpela samting i ken helpim wok bilong ol narapela samting. Dispela strong ol i kolim graviti i mekim na ol win i banisim graun long strongpela lait bilong san i stap stret long ples bilong en. Na tu, dispela strong bilong graviti i stiaim taim bilong solwara long solap na taim bilong solwara long drai. Ol dispela lo i kontrolim ol manmeri na ol animal long i stap laip. Olgeta samting God i wokim i soim klia olsem i gat samting God i tingting pinis long kamapim long dispela graun na mekim bilong helpim ol manmeri. Taim yumi autim tok, mobeta yumi kirapim ol manmeri long tingim Man i wokim olgeta samting long ples antap na long graun.—Rev. 4:11.

6, 7. Jehova i givim wanem ol presen long Adam na Iv?

⁶ Long pastaim tru, Jehova i wokim ol man bilong i stap laip oltaim long dispela graun. (Stt. 1:28; Sng. 37:29) Em i givim planti gutpela presen bilong helpim Adam na Iv long i stap laip. (Ritim Jems 1:17.) Jehova i larim ol i stap fri long mekim disisen, na ol inap tingting gut na skelim ol samting, na ol inap laikim narapela narapela na stap olsem ol gutpela pren. God i toktok long Adam na tokim em long ol samting em i mas mekim bilong soim olsem em i bihainim tok bilong God. Adam i kisim skul long olsem wanem em inap lukautim em yet, ol animal, na dispela graun. (Stt. 2:15-17, 19, 20) Na tu, Adam na Iv inap pilim teis bilong ol samting, tatsim ol samting, lukim ol samting, harim nois, na smelim ol samting. Olsem na ol i amamas tru long ol naispela samting i stap long ples paradais ol i stap long en. I gat planti wok tru em Adam na Iv inap mekim na kisim amamas long en, na planti samting tru bilong kisim save long en.

⁷ God i tingting pinis long mekim wanem samting moa? Taim Jehova i wokim Adam na Iv, em i redim tupela long kamapim ol pikinini i gutpela olgeta. God i laik bai ol pikinini bilong tupela i kamapim ol pikinini na pulapim olgeta hap bilong graun. Jehova i laik bai Adam na Iv na olgeta papamama long bihain i mas laikim ol pikinini wankain olsem em i laikim Adam na Iv—em ol fes pikinini bilong em long graun. Dispela graun olgeta bai kamap olsem ples ol bai stap oltaim long en.—Sng. 115:16.

 8. Wai na God i putim lo em Stat 2:16, 17 i stori long en?

⁸ Ol samting i no kamap stret olsem God i tingting pinis long mekim. Jehova i putim wanpela lo bilong painimaut sapos Adam na Iv bai holim stretpela tingting olsem i gat sampela samting ol i no gat rait long mekim. God i tokim Adam: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stt. 2:16, 17) Dispela lo i no hatwok long Adam na Iv inap kliagut long en na bihainim. Kaikai i pulap tru, na ol i no inap sot long kaikai.

9, 10. (a) Satan i sutim tok long Jehova long wanem samting? (b) Adam na Iv i mekim wanem disisen? (Lukim piksa long kirap bilong stadi.)

⁹ Satan i yusim snek long giamanim Iv na kirapim em long sakim tok bilong Papa bilong em, Jehova. (Ritim Stat 3:1-5; Rev. 12:9) Satan i laik save sapos God i tambuim ol pikinini bilong em long graun long “kaikai pikinini bilong olgeta diwai bilong gaden.” I olsem Satan i tok: ‘Em tru olsem God i tambuim yutupela long bihainim laik bilong yutupela yet?’ Satan i giaman na tok: “Nogat. Yutupela i no inap i dai.” Bihain, Satan i kirapim Iv long kisim tingting olsem i no gat wok long em i harim tok bilong God, na Satan i tok: “Sapos yutupela i kaikai pikinini bilong dispela diwai, bai ai bilong yutupela i op . . . God i save long dispela, olsem na em i tambuim yutupela long kaikai pikinini bilong dispela diwai.” Satan i laik bai Iv i kisim tingting olsem Jehova i no laik bai ol i kaikai dispela prut bikos save bilong ol bai kamap bikpela moa. Satan i mekim gen narapela tok giaman olsem: “Yutupela [bai] kisim save long wanem samting i gutpela, na wanem samting i nogut, na bai yutupela i kamap wankain olsem God.”

¹⁰ Adam na Iv i mas mekim disisen: Tupela bai bihainim tok bilong Jehova, o ol bai bihainim tok bilong snek? Tupela i sakim tok bilong God na bihainim pasin bikhet bilong Satan. Tupela i givim baksait long Jehova olsem Papa bilong ol, na ol i no stap aninit moa long gutpela wok bos na gutpela lukaut bilong em.—Stt. 3:6-13.

11. Wai na Jehova i save bekim pe nogut long ol man i mekim pasin bikhet?

¹¹ Adam na Iv i bikhet long Jehova, olsem na tupela i no stap moa olsem ol manmeri i gutpela olgeta. Na tu, pasin bikhet bilong tupela i mekim na tupela i stap longwe moa long Jehova bikos pasin bilong em i “stret olgeta.” Olsem na em i mas “kotim ol man i save mekim pasin nogut na bekim pe nogut long ol.” (Hab. 1:13) Sapos em i larim pasin bikhet i stap, dispela bai putim hevi long olgeta lain long heven na graun. Moa yet, sapos God i no mekim wanpela samting bilong stretim pasin bikhet i kamap long Iden, olgeta lain long heven na graun bai i no inap trastim em. Tasol Jehova i save bihainim stret ol lo bilong em, na em i no save brukim ol dispela lo. (Sng. 119:142) Olsem na maski Adam na Iv i stap fri long mekim disisen bilong ol yet, dispela i no makim olsem ol i mas sakim lo bilong God, nogat. Tupela i bikhet na sakim tok bilong Jehova, olsem na ol i dai na tanim i kamap graun wankain olsem graun God i wokim ol long en.—Stt. 3:18, 19.

12. Wanem samting i kamap long ol pikinini bilong Adam?

¹² Taim Adam na Iv i kaikai prut bilong diwai tambu, tupela i brukim lo na ol i no inap stap moa long lain famili bilong God. God i rausim ol long gaden Iden, na ol i no gat rot long i go bek. (Stt. 3:23, 24) Jehova i bihainim stretpela pasin na em i bekim pe i stret long pasin bikhet bilong ol. (Ritim Lo 32:4, 5.) Adam i mekim sin, olsem na em i no inap moa long bihainim stret olgeta pasin bilong God. Adam i lus long kisim gutpela sindaun, na tu, ol pikinini bilong em i kisim sin na dai long rot bilong em. (Rom 5:12) Em i pasim rot bilong ol tumbuna pikinini bilong em long kisim laip oltaim. Adam na Iv i no inap kamapim ol pikinini i gutpela olgeta, na ol pikinini bilong ol tu i no inap kamapim ol pikinini i gutpela olgeta. Stat long taim Satan i kirapim Adam na Iv long givim baksait long God, em i wok yet long giamanim ol manmeri i kam inap long nau.—Jon 8:44.

13. Jehova i laik bai olgeta manmeri i stap olsem wanem?

¹³ God i laikim yet ol manmeri. Maski Adam na Iv i bikhet, Jehova i laik bai olgeta manmeri i pas gut wantaim em. Em i no laik bai wanpela man i dai. (2 Pita 3:9) Olsem na bihain stret long pasin bikhet i kamap long gaden Iden, God i bihainim ol stretpela lo bilong em na em i stretim rot bambai ol manmeri inap kamap pren bilong em. Orait, Jehova i mekim wanem?

14. (a) Olsem Jon 3:16 i kamapim, God i stretim wanem rot bilong helpim ol manmeri? (b) Yumi ken helpim ol manmeri long kisim bekim bilong wanem askim?

¹⁴ Ritim Jon 3:16. Planti bilong ol manmeri i kam long Memorial bai save gut long dispela skripsa. Tasol yumi laik save, Olsem wanem ofa bilong Jisas inap helpim yumi long kisim laip oltaim? Taim yumi mekim wok bilong tilim invatesen bilong Memorial, stap long bung bilong Memorial, na go bek na lukim ol lain i kam long Memorial, dispela inap opim rot bilong yumi long helpim ol manmeri long kisim stretpela save long bekim bilong dispela bikpela askim. Ating ol manmeri bai amamas taim ol i kisim save olsem ofa bilong Krais i soim klia olsem Jehova i pulap tru long pasin laikim na savetingting. Yumi ken kamapim klia wanem ol bikpela poin long ofa bilong Krais long baim bek yumi?

15. Olsem wanem Jisas i no wankain long Adam?

¹⁵ Jehova i stretim rot na man i gutpela olgeta i ken i dai na baim bek yumi. Dispela man i mas i stap gut long Jehova na redi long givim laip bilong em long baim bek ol manmeri em bagarap i laik painim ol. (Rom 5:17-19) Jehova i stretim rot na fesbon Pikinini bilong em long heven i kamap olsem man long graun. (Jon 1:14) Jisas i kamap man i gutpela olgeta, wankain olsem Adam long pastaim. Adam i no bihainim stret olgeta lo bilong Jehova, tasol Jisas i bihainim stret olgeta lo. Maski ol bikpela traim tru i painim Jisas, em i no mekim sin o brukim wanpela lo bilong God.

16. Wai na pe bilong baim bek yumi em gutpela presen tru?

¹⁶ Jisas em man i gutpela olgeta, na em i dai bilong baim bek ol manmeri long sin na dai. Jisas i kamap wankain stret olsem Adam long bipo—em i stap olsem man i gutpela olgeta, na em i stap gut long God, na bihainim tok bilong em. (1 Tim. 2:6) Jisas i givim laip bilong em olsem ofa bilong baim bek yumi, na dispela i opim rot long “planti manmeri” inap kisim laip oltaim—ol man, ol meri, na ol pikinini. (Mat. 20:28) Tru tumas, pe bilong baim bek man i opim rot long God inap kamapim samting em i tingting pinis long mekim. (2 Kor. 1:19, 20) Dispela pe i opim rot na olgeta manmeri i bilip, ol inap kisim laip oltaim.

17. Pe bilong baim bek man i opim rot long wanem ol gutpela samting inap kamap?

¹⁷ Jehova i stretim rot bilong baim bek yumi, maski dispela i putim bikpela hevi long em. (1 Pita 1:19) Em i laikim tru ol manmeri, olsem na em i redi long larim Pikinini tru bilong em long i dai na helpim yumi. (1 Jon 4:9, 10) I olsem Jisas i kisim ples bilong Adam, em fes papa bilong yumi long graun. (1 Kor. 15:45) Jisas i opim rot bilong yumi long kisim laip, na tu, yumi inap stap gen insait long lain famili bilong God. Long rot bilong ofa bilong Jisas, Jehova inap bihainim stretpela lo bilong em na larim ol manmeri i kamap olsem lain famili bilong em. Yumi amamas olsem wanpela taim bai kamap bihain, na olgeta manmeri bai kamap gutpela olgeta. Pasin wanbel bai stap namel long lain famili bilong God long heven na long graun. Yumi olgeta bai kamap pikinini bilong God.—Rom 8:21.

18. Wanem taim bai Jehova “i stap het bilong olgeta samting”?

¹⁸ Pasin bikhet bilong Satan i no stopim Jehova long soim pasin laikim bilong em long ol manmeri, o pasim ol sinman long stap gut long Jehova. Long rot bilong ofa bilong baim bek man, Jehova bai helpim olgeta pikinini bilong em long kamap stretpela manmeri. Olgeta manmeri husat i “luksave long Pikinini na bilip long em,” ol bai kisim laip oltaim na stap amamas tru. (Jon 6:40) Jehova i pulap tru long pasin laikim na savetingting, olsem na em bai kamapim samting em i tingting pinis long mekim, na em bai helpim ol manmeri long kamap gutpela olgeta. Jehova, Papa bilong yumi, em bai “i stap het bilong olgeta samting.”—1 Kor. 15:28.

19. (a) Ofa bilong Krais long baim bek man i mas kirapim yumi long mekim wanem? (Lukim blok, “Yumi Mas Wok Yet Long Painim Ol Man i Gat Gutpela Bel.”) (b) Neks stadi bai stori long wanem samting?

¹⁹ Ofa bilong Krais long baim bek man i mas kirapim yumi long givim bel tru long toksave long ol narapela olsem ol inap kisim helpim long dispela ofa. Ol manmeri i mas luksave olsem dispela ofa i opim rot na Jehova inap givim laip oltaim long ol. Dispela ofa i opim rot long sampela moa gutpela samting long kamap. Neks stadi bai stori long olsem wanem ofa bilong Jisas i opim rot long God inap stretim ol hevi em Satan i kamapim long gaden Iden.