Sapta 4
Dispela Man Olgeta Profet i Bin Tokaut Long Em
1. Ol samting Jisas i mekim taim em i no kam daun yet long graun i soim olsem em i stap olsem wanem wantaim Jehova?
“PAPA i laikim tumas Pikinini na em i save soim em olgeta samting em yet i save mekim.” (Jon 5:20) Dispela Pikinini i pas gut wantaim Papa bilong em, Jehova! Tupela i pas gut wantaim kirap long taim God i wokim em, em planti milion yia paslain long taim em i kamap man long graun. Em dispela wanpela Pikinini Jehova wanpela tasol i bin wokim em. God i wokim olgeta narapela samting long heven na long graun long rot bilong dispela namba wan Pikinini em i laikim tumas. (Kolosi 1:15, 16) Em i stap tu olsem Tok Bilong God, o Mausman, em long rot bilong dispela Man God i tokim ol narapela long ol samting em i laik mekim. Dispela Pikinini em God i laikim em tumas, em i kamap man Jisas Krais.—Sindaun 8:22-30; Jon 1:14, 18; 12:49, 50.
2. Ol tok profet bilong Baibel i bin mekim liklik tok tasol long Jisas o olsem wanem?
2 Paslain long taim God i wokim mirakel na namba wan Pikinini bilong em i kamap long bel bilong wanpela meri, spirit bilong God i kirapim ol man long raitim planti tok profet long em. Aposel Pita i bin tokaut long Kornilius: “Olgeta profet i bin autim tok long ol samting em bai i mekim.” (Aposel 10:43) Baibel i gat planti stori long ol wok bilong Jisas, olsem na wanpela ensel i tokim aposel Jon olsem: “Tok Jisas i autim, em tasol i save kirapim ol man long autim tok profet.” (KTH 19:10) Ol dispela tok profet i kamapim klia olsem em i Mesaia. Ol i kirapim ol man long tingim ol wok em bai mekim bilong kamapim tru ol samting God i tingting pinis long mekim. Yumi mas i gat laik long save long ol dispela samting long nau.
Ol Samting Ol Profet i Tok Bai Kamap
3. (a) Long tok profet bilong Stat 3:15, “meri” i makim husat, na “ol lain” bilong snek i makim husat? (b) Bilong wanem ol wokman bilong Jehova i laik save long wok bilong ‘krungutim het bilong snek’?
3 Namba wan tok profet olsem i kamap bihain long pasin bikhet i kamap long Iden. Jehova i tokim snek olsem: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [“pikinini,” NW] bilong meri. Bai ol i krungutim het bilong yu, na bai yu kaikaim lek bilong ol.” (Stat 3:15) Dispela tok profet i go long Satan, em snek i makim. “Meri” em i gutpela oganaisesen bilong Jehova long heven, olsem meri i stap gut long em. “Ol lain” bilong snek em olgeta ensel na man i bihainim pasin bilong Satan, em ol man i birua long Jehova na lain bilong Em. Dispela tok ‘krungutim het bilong snek’ i makim olsem bihain dispela bikhetman Satan bai bagarap, em i bin toknogutim Jehova na kamapim bikpela hevi long ol manmeri. Tasol husat dispela “lain,” o pikinini, em bai krungutim het bilong snek? Inap planti handet yia, em i wanpela “tok hait.”—Rom 16:20, 25, 26.
4. Olsem wanem ol tumbuna bilong Jisas i helpim yumi long luksave olsem Jisas em dispela Pikinini God i bin promis long salim i kam?
4 Inap 2,000 yia bihain, Jehova i kamapim sampela tok moa long dispela samting. Em i tok, dispela Pikinini bai kamap long lain bilong Abraham. (Stat 22:15-18) Tasol God yet bai makim wanem lain dispela Pikinini bai kamap long en. Maski Abraham i laikim tru pikinini man bilong em Ismael, em Hagar i karim, Jehova i tok: “Kontrak bilong mi, em bai mi mekim wantaim Aisak, dispela pikinini Sara bai i karim.” (Stat 17:18-21) Bihain dispela tok promis o kontrak i go long Jekop, em tumbuna bilong 12-pela lain bilong Israel—em i no go long namba wan pikinini man bilong Aisak, em Iso, nogat. (Stat 28:10-14) Bihain, God i makim olsem dispela Pikinini bai kamap long lain bilong Juda, long famili bilong Devit.—Stat 49:10; 1 Stori 17:3, 4, 11-14.
5. Taim Jisas i kirap mekim wok bilong em long graun, wanem samting i kamapim klia olsem em i Mesaia?
5 Wanem ol narapela tok i stap bilong helpim yumi long save dispela Pikinini em i husat? Inap 700 yia paslain long taim dispela Pikinini i kamap long graun, Baibel i makim Betlehem em i ples mama bai karim em. Baibel i tokaut tu olsem dispela Pikinini i bin stap “long bipo tru,” kirap long taim God i bin wokim em long heven. (Maika 5:2) Na long rot bilong profet Daniel, Baibel i tok profet long wanem taim stret em bai kamap olsem Mesaia long graun. (Daniel 9:24-26) Na taim God i makim Jisas long holi spirit na em i kamap Man God i Makim, nek bilong God yet i kam daun long heven na tokaut olsem Jisas i Pikinini bilong em. (Matyu 3:16, 17) Em nau, Pikinini i kamap ples klia! Olsem na Filip inap tokaut stret olsem: “Mipela i lukim pinis dispela man bipo Moses i bin raitim tok bilong em long buk bilong lo, na ol profet tu i bin raitim tok bilong em. Em Jisas.”—Jon 1:45.
6. (a) Olsem Luk 24:27 i tok, ol disaipel bilong Jisas i save long wanem samting? (b) Husat em i namba wan pikinini bilong “lain” bilong meri? Em bai krungutim het bilong snek, na dispela i makim wanem samting?
6 Bihain, ol disaipel bilong Jisas i save olsem planti tok profet bilong Baibel i toktok long Jisas. (Luk 24:27) Em i kamap klia moa olsem Jisas em i namba wan pikinini bilong “lain” bilong meri, em dispela man bai krungutim het bilong snek, olsem pinisim Satan olgeta. Long rot bilong Jisas olgeta tok promis bilong God, olsem olgeta gutpela samting yumi wet long en, bai kamap tru.—2 Korin 1:20.
7. Yumi mas save husat dispela Man ol tok profet i tok long en, tasol yumi mas tingim wanem narapela samting tu?
7 Dispela save yumi kisim i mas mekim wanem long yumi? Baibel i stori long man Itiopia i bin ritim sampela bilong ol dispela tok profet long Mesaia na Man bilong kisim bek ol man. Em i tingting planti na em i askim Filip: “Profet i tok long husat na i mekim dispela tok?” Tasol taim dispela man i kisim bekim, em i no larim dispela tok i stap nating long bel bilong em. Em i putim gut yau long tok Filip i mekim, na nau em i save olsem pasin bilong pilim tru tok profet i mas kirapim em long mekim sampela samting. Em i save em i mas kisim baptais. (Aposel 8:32-38; Aisaia 53:3-9) Yumi tu i mekim olsem?
8. (a) Abraham i laik givim Aisak olsem ofa, na dispela i makim wanem samting? (b) Bilong wanem Jehova i tokim Abraham olsem olgeta lain man bai kisim blesing long rot bilong Pikinini? Dispela i makim wanem samting long yumi long nau?
8 Tingim tu stori bilong Abraham i laik givim Aisak olsem ofa, em dispela wanpela pikinini tasol em i bin kisim long Sara. (Stat 22:1-18) Dispela i makim samting Jehova bai mekim—em bai givim dispela wanpela Pikinini bilong em olsem ofa: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” ( Jon 3:16) Jehova i bin givim dispela wanpela Pikinini bilong em bilong kamapim ol samting Em i tingting pinis long mekim, na dispela i helpim yumi long bilip tru olsem Jehova bai “givim yumi olgeta arapela samting tu.” (Rom 8:32) Orait yumi mas mekim wanem? Olsem Stat 22:18 i kamapim, Jehova i tokim Abraham olsem olgeta lain manmeri bai kisim blesing long rot bilong Pikinini, “long wanem, [Abraham i] bin bihainim tok bilong [God].” Yumi tu i mas harim tok bilong Jehova na Pikinini bilong em: “Man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini, em bai i no inap kisim laip. Nogat. Belhat bilong God i stap long em.”—Jon 3:36.
9. Sapos yumi pilim tru olsem ofa bilong Jisas i opim rot bilong kisim laip oltaim, bai yumi mekim wanem?
9 Sapos yumi pilim tru olsem ofa bilong Jisas i opim rot long yumi ken kisim laip oltaim, yumi mas mekim ol samting Jehova i bin tokim yumi long rot bilong Jisas. Ol dispela samting yumi mas mekim i insait long pasin bilong yumi long laikim tru God na ol narapela man. (Matyu 22:37-39) Jisas i soim olsem pasin bilong yumi long laikim tru Jehova bai kirapim yumi long lainim ol narapela “long bihainim olgeta tok [Jisas i] bin givim long [yumi].” (Matyu 28:19, 20) Na yumi mas laikim tru ol wanlotu na oltaim “bung wantaim” ol. (Hibru 10:25; Galesia 6:10) Na taim yumi harim tok bilong God na Pikinini bilong em, yumi no ken ting ol i laik bai pasin bilong yumi i gutpela olgeta. Hibru 4:15 i tok, Jisas em i Hetpris bilong yumi na em “inap sori long yumi.” Dispela i mekim gut bel bilong yumi, na moa yet taim yumi beten long God long rot bilong Krais na bai God i ken helpim yumi long daunim ol pasin kranki bilong yumi!—Matyu 6:12.
Bilip Long Krais
10. Bilong wanem Jisas Krais tasol inap baim bek yumi?
10 Aposel Pita i tokim nambawan kot bilong ol Juda long Jerusalem olsem Jisas i truim ol tok profet bilong Baibel, na bihain em i tok strong olsem: “I no gat narapela man i inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut. Em wanpela tasol God i bin makim bilong kisim bek yumi.” (Aposel 4:12) Olgeta pikinini bilong Adam i sinman, olsem na i dai bilong ol i no gat strong bilong baim bek wanpela man. Tasol Jisas i gutpela olgeta, olsem na taim em i givim laip bilong em olsem ofa, dispela laip i gat strong long baim bek ol man. (Song 49:6-9; Hibru 2:9) Pe em i givim long God bilong baim bek ol man, dispela pe i wankain stret long nambawan gutpela laip Adam i bin lusim. (1 Timoti 2:5, 6) Dispela i opim rot long yumi ken kisim laip oltaim long nupela taim God bai kamapim.
11. Stori long olsem wanem ofa bilong Jisas inap helpim yumi tru.
11 Ofa bilong Jisas i opim rot long yumi long kisim ol narapela gutpela samting long nau tu. Olsem: Maski yumi gat sin, ofa bilong Jisas i mekim na bel bilong yumi i no gat tok, long wanem, God i lusim sin bilong yumi. Dispela i gutpela samting tru—tasol ol animal ol i bin wokim ofa long en olsem Lo Bilong Moses i makim, ol i no bin helpim ol Israel olsem. (Aposel 13:38, 39; Hibru 9:13, 14; 10:22) Tasol bilong God i ken lusim sin bilong yumi, yumi mas save olsem ofa bilong Krais i bikpela samting bilong helpim yumi. “Sapos yumi tok, ‘Mi no gat sin,’ orait yumi giamanim bel bilong yumi yet, na tok tru i no i stap long bel bilong yumi. Tasol sapos yumi autim sin bilong yumi, orait God bai i mekim olsem em i bin tok. Em bai i mekim stretpela pasin na lusim sin bilong yumi. Na em bai i rausim olgeta pasin nogut i stap long yumi na mekim yumi i kamap klin.”—1 Jon 1:8, 9.
12. Bilong wanem baptais long wara i bikpela samting bilong stap klin long ai bilong God?
12 Olsem wanem ol sinman inap kamapim olsem ol i bilip long Krais na ofa bilong em? Taim ol manmeri long taim bilong ol aposel i kamap bilipman, ol i kamapim dispela long ples klia. Olsem wanem ol i mekim? Ol i kisim baptais. Bilong wanem? Long wanem, Jisas i tok olgeta disaipel bilong em i mas kisim baptais. (Matyu 28:19, 20; Aposel 8:12; 18:8) Man bai i no surik long mekim ol samting taim bel bilong em i pilim tru gutpela samting Jehova i bin mekim long rot bilong Jisas. Em bai stretim pasin bilong em, dediket long God long rot bilong beten, na kisim baptais long wara bilong makim olsem em i dediket pinis. Dispela i makim olsem man i bilip, na long dispela rot i olsem em i askim ‘God long em i ken stap klin long ai bilong em.’—1 Pita 3:21.
13. Sapos yumi save olsem yumi bin mekim sin, yumi mas mekim wanem? Bilong wanem yumi mas mekim olsem?
13 Tru, bihain long baptais ol pasin kranki bilong yumi bai i stap yet. Bai yumi mekim wanem? Aposel Jon i tok: “Ol liklik pikinini bilong mi, mi raitim dispela tok long yupela, bai yupela i no ken mekim sin. Na sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta.” (1 Jon 2:1, 2) Tasol olsem wanem? Dispela i makim olsem maski yumi mekim wanem kain sin, sapos yumi askim God long lusim rong bilong yumi em bai mekim olsem? Ating nogat. Yumi mas tanim bel tru na bai God i ken lusim rong bilong yumi. Na ating yumi mas kisim tu helpim long ol strongpela Kristen insait long kongrigesen ol i lapun liklik. Yumi mas save olsem dispela samting yumi mekim i no stret, na yumi mas pilim tru rong bilong yumi na bai yumi wok strong bambai yumi no ken mekim gen. (Aposel 3:19; Jems 5:13-16) Sapos yumi mekim olsem, yumi ken bilip tru olsem Jisas bai helpim yumi na Jehova bai orait gen long yumi.
14. (a) Stori long wanpela bikpela samting em ofa bilong Jisas i bin mekim bilong helpim yumi. (b) Sapos yumi bilip tru, bai yumi mekim wanem?
14 Ofa bilong Krais i bin opim rot long wanpela “liklik lain sipsip” inap kisim laip oltaim long heven, em ol nambatu pikinini bilong meri em Stat 3:15 i stori long en. (Luk 12:32; Galesia 3:26-29) Ofa bilong em i opim rot tu long planti bilion manmeri moa i ken kisim laip oltaim long Paradais long graun. (Song 37:29; KTH 20:11, 12; 21:3, 4) Laip oltaim em i ‘presen God i givim long wok bilong Jisas Krais, Bikpela bilong yumi.’ (Rom 6:23; Efesus 2:8-10) Sapos yumi bilip long dispela presen na pilim tru ol wok God na Krais i mekim bilong yumi ken kisim dispela presen, bai yumi kamapim klia bel bilong yumi. Taim yumi pilim gutpela wok Jehova i mekim long rot bilong Krais bilong kamapim laik bilong Em, na yumi save olsem yumi mas bihainim tru lek bilong Jisas, bai yumi tingim wok Kristen bilong yumi em i nambawan bikpela samting long laip bilong yumi. Bilip bilong yumi bai kamap ples klia taim yumi tokim ol narapela long dispela gutpela presen i kam long God.—Aposel 20:24.
15. Olsem wanem pasin bilong bilip long Jisas Krais i helpim yumi long i stap wanbel?
15 Kain bilip olsem i mekim na yumi stap wanbel tru! Long rot bilong dispela bilip, yumi pas gut wantaim Jehova, na Pikinini bilong em, na ol narapela insait long kongrigesen Kristen. (1 Jon 3:23, 24) Dispela bilip i mekim na yumi amamas long Jehova i bin givim long Pikinini “wanpela nem i gutpela tru na i winim olgeta arapela nem [i no winim nem bilong God]. Em i givim dispela nem long Jisas, bai olgeta ensel na olgeta man na ol arapela samting i stap long heven na long graun na aninit long graun ol i ken brukim skru long ai bilong Jisas na i stap aninit long em. Na . . . ol i ken tokaut olsem, ‘Jisas Krais em i Bikpela.’ Na long dispela pasin ol bai i givim biknem long God Papa.”—Filipai 2:9-11.
Stori Gen Long Ol Dispela Tok
• Taim Mesaia i kamap, olsem wanem ol man i bilip tru long Tok Bilong God ol inap luksave long em?
• Wanem sampela samting yumi mas mekim bilong soim olsem yumi pilim tru ofa bilong Jisas?
• Long wanem ol rot ofa bilong Jisas i helpim yumi pinis? Olsem wanem dispela i helpim yumi taim yumi beten askim Jehova long lusim sin bilong yumi?
[Piksa long pes 36]
Jisas i tokim ol disaipel bilong em long ol i mas lainim ol narapela long bihainim ol tok bilong God