Sampela yia bihain, ating taim tupela i bikpela man pinis, Kein na Abel i mekim ofa long Jehova. Abel em i man bilong lukautim sipsip, olsem na em i kisim “namba wan pikinini sipsip mama i bin karim,” na em i mekim ofa long Jehova. Tasol Kein i “kamautim kaikai long gaden na em i bringim sampela na i mekim ofa.” Jehova i amamas long ofa bilong Abel, tasol “em i no amamas long Kein na ofa bilong em.” (Stat 4:​3-5) Bilong wanem?

Sampela man i save tok, God i amamas long ofa bilong Abel, long wanem, em i kisim “namba wan sipsip mama i bin karim” na em i mekim ofa long en, tasol Kein i kisim “kaikai long gaden” na mekim ofa long en. Tasol i no olsem ol kaikai bilong gaden em Kein i ofaim i no gutpela, nogat; long wanem, Baibel i tok Jehova i amamas “long Abel na ofa bilong em,” tasol “em i no amamas long Kein na ofa bilong em.” Olsem na Jehova i skelim bel bilong dispela tupela man i lotuim em. Taim em i mekim olsem, em i lukim wanem samting? Hibru 11:4 i tok, Abel “i bilip long God” na i mekim ofa long em. Olsem na ating Kein i no gat strongpela bilip olsem Abel, em dispela bilip i mekim na God i amamas long ofa bilong Abel.

Tasol yumi ken ting olsem Kein i no tingting tumas long ofa em i mekim. Inap wan handet yia samting bipo, wanpela saveman bilong Baibel i tok: ‘Ofa bilong em i tokaut tasol olsem God em i Man bilong givim ol gutpela samting long ol man. Ofa em i mekim i kamapim klia olsem em i no ting em i stap longwe long God, o em i mas kamapim sin bilong em long God, o i mas i gat wanpela ofa bilong helpim em.’

Na tu, Kein em i namba wan pikinini, olsem na em inap ting olsem em yet i dispela pikinini God i tok promis long en na em bai bagarapim Snek, em Satan. Iv tu inap ting olsem long namba wan pikinini bilong em. (Stat 4:⁠1) Tasol sapos Kein na Iv i gat dispela kain tingting, ol i popaia stret.

Jehova i bin mekim wanem bilong makim olsem em i amamas long ofa bilong Abel, Baibel i no tok. Sampela saveman bilong Baibel i ting paia i kam daun long heven na kukim dispela ofa. Dispela samting i kamap o nogat, em yumi no save, tasol taim Kein i save God i sakim ofa bilong em, “Kein i kros nogut tru, na pes bilong en i senis olgeta.” (Stat 4:⁠5) Em nau, Kein i stap long rot bilong bagarap.