“Septuagint”—Ol i Mekim Wok Long En Long Bipo na Long Nau Tu
WANPELA man bilong Itiopia, em man i gat namba, em i lusim Jerusalem na i laik i go bek long ples bilong em. Em i sindaun long wilka na i ran long wanpela rot long ples wesan nating na em i holim wanpela buk bilong lotu na i ritim long maus. Orait taim wanpela man i kamapim insait bilong ol tok em i bin ritim, em i kirap nogut na i pilim tru long bel, na kirap long dispela taim i gat bikpela senis i kamap long i stap bilong em. (Aposel 8:26-38) Dispela man Itiopia i bin ritim Aisaia 53:7, 8 long namba wan Baibel ol i bin tanim—em Baibel Grik Septuagint. Dispela Baibel Septuagint i bin mekim bikpela wok tru bilong helpim planti man long harim tok bilong Baibel insait long planti handet yia, olsem na ol i save kolim olsem wanpela Baibel i bin senisim i stap bilong olgeta lain.
Ol i bin tanim Baibel Septuagint long wanem taim? Na wanem ol samting i bin kamap na ol i mekim olsem? Bilong wanem ol man i mas i gat wanpela Baibel olsem? Ol i bin mekim wanem gutpela wok long en insait long planti handet handet yia? Long nau dispela Baibel Septuagint inap skulim yumi long wanem samting?
Em Bilong Ol Juda i Mekim Tok Grik
Long yia 332 B.C.E. taim ami bilong Bikpela King Aleksander i bagarapim pinis taun Taia bilong ol Fonisia, em i go insait long Isip na ol man bilong Isip i amamas long em olsem man bilong kisim bek ol. Long dispela hap em i kamapim taun Aleksandria, em ples bilong kisim bikpela skul. Aleksander i laik bai pasin bilong ol Grik i go long olgeta kantri em i bin kisim, olsem na em i kirapim pasin bilong mekim tok ples Grik (Koine) long olgeta hap em i bosim.
Inap olsem 300 yia paslain long Krais, i gat bikpela lain Juda i sindaun long Aleksandria. Bihain long taim ol Babilon i bin kisim ol Juda i go kalabus, ol Juda i go sindaun long ol setelmen nabaut ausait long Palestain, na bihain ol i go sindaun long Aleksandria. Olsem wanem? Ol dispela Juda i save gut long tok Hibru? Wanpela buk (Cyclopedia, bilong McClintock na Strong) i tok: “Taim ol Juda i lusim kalabus long Babilon na go bek long ples, ol i lusim pinis planti hap bilong tok Hibru bilong bipo, olsem na taim ol i ritim ol buk bilong Moses insait long ol haus lotu bilong Palestain, sampela i mas kamapim klia ol dispela tok long ol long tok ples Kaldia . . . Ating save bilong ol Juda bilong Aleksandria long tok Hibru i liklik tru; ol i save mekim tok Grik bilong Aleksandria.” Ol dispela samting i mekim na i luk olsem em i taim stret bilong tanim Ol Skripsa Hibru i go long tok Grik.
Aristobulus, em wanpela Juda i bin stap olsem tu handet yia paslain long Krais, em i tok olsem ol i bin tanim lo Hibru i go long tok Grik na ol i pinisim dispela wok long taim bilong Tolemi Filadelfus (285-246 B.C.E.). Ol man i gat narapela narapela tingting long mining bilong tok bilong Aristobulus long “lo.” Sampela i ting em i toktok long faipela buk bilong Moses ol i kolim Pentatuk, na sampela i ting em i bin toktok long Ol Skripsa Hibru olgeta.
Tasol tok bilong ol tumbuna i tok i gat olsem 72 saveman Juda i insait long wok bilong tanim Baibel Hibru i go long tok Grik long namba wan taim. Bihain ol i kirap kolim dispela namba olsem 70 tasol. Olsem na ol i kolim dispela Baibel olsem Septuagint, insait bilong en i olsem “70,” na ol i raitim olsem LXX, em pasin bilong ol Rom long raitim namba 70. Inap wan handet yia samting paslain long Krais, ol man inap ritim olgeta buk bilong Ol Skripsa Hibru long tok Grik. Olsem na ol i kirap kolim dispela nem Septuagint bilong makim Ol Skripsa Hibru olgeta em ol i bin tanim long tok Grik.
Long Taim Bilong Ol Aposel
Paslain na long taim bilong Jisas Krais na ol aposel bilong em, ol Juda i save mekim tok Grik ol i bin mekim bikpela wok long Baibel Septuagint. Planti Juda na ol man bilong ol narapela lain i bihainim lotu Juda em ol i bin bung long Jerusalem long de Pentikos bilong yia 33 C.E., ol i bilong provins Esia, Isip, Libia, Rom, na Krit—em ol hap ol man i save mekim tok Grik. Ating ol i save ritim Baibel Septuagint. (Aposel 2:9-11) Olsem na dispela Baibel ol i bin tanim long tok Grik i bin helpim gut wok bilong bringim gutnius i go long planti lain long taim bilong ol aposel.
Olsem: Taim disaipel Stiven i toktok wantaim ol man bilong Sairini, Aleksandria, Silisia, na Esia, em i tok: “Josep i salim tok na i singautim papa bilong en Jekop i kam long em, wantaim olgeta lain bilong en, inap olsem 75 manmeri.” (Aposel 6:8-10; 7:12-14) Ves 27 bilong Stat 46 long tok Hibru i tok, ol lain bilong Josep ol inap olsem 70. Tasol Baibel Septuagint i raitim dispela namba olsem 75. Em nau, i luk olsem Stiven i kamapim tok bilong Baibel Septuagint.—Stat 46:20, 26, 27.
Taim aposel Pol i raun long ol hap bilong Esia Maina na kantri Grik long namba 2 na namba 3 raun bilong em long wok misineri, em i autim tok long planti man bilong ol narapela lain i save pret long God na long ol “Grik i save lotu long God.” (Aposel 13:16, 26; 17:4) Ol dispela man i bin kisim pasin bilong pret long God o lotuim em, long wanem, ol i bin kisim sampela save long em long rot bilong Baibel Septuagint. Taim Pol i autim tok long ol dispela lain i save mekim tok Grik, planti taim em i save kamapim sampela hap tok bilong dispela Baibel Septuagint.—Stat 22:18; Galesia 3:8.
Inap olsem 320 taim Ol Skripsa Grik i kamapim stret tok bilong Ol Skripsa Hibru na planti taim ol i kamapim ol hap tok bilong en, na sapos yumi bungim olgeta wantaim, em inap olsem 890 taim. Planti bilong ol dispela tok, ol i kisim long Baibel Septuagint. Olsem na ol tok ol i kisim long dispela Baibel—i no long Baibel ol i bin raitim long tok Hibru—ol i kamap olsem hap bilong Ol Skripsa Grik em spirit bilong God i kirapim ol man long raitim. Dispela em i bikpela samting tru! Jisas i bin tok profet olsem ol bai autim gutnius bilong Kingdom long olgeta hap bilong graun. (Matyu 24:14) Bilong mekim dispela wok, Jehova bai larim ol man i tanim Tok bilong em i go long ol kain kain tok ples ol man bilong olgeta hap i save ritim.
Ol i Mekim Wok Long En Long Nau
Baibel Septuagint i bikpela samting long nau tu na ol i save mekim wok long en bilong painim ol popaia bilong ol man em bihain ol i bin raitim ol kopi bilong Baibel long tok Hibru. Olsem: Stat 4:8 i tok: “Bihain Kein i tokim Abel, brata bilong em long go wokabaut wantaim em [“long ples kunai,” NW ]. Na taim tupela i stap long ples kunai, Kein i paitim brata bilong em na kilim em i dai.”
Dispela hap tok, “go wokabaut wantaim em [“long ples kunai,” NW ]” em i no stap long ol rait Hibru bilong Baibel kirap long yia 900 C.E. samting. Tasol em i stap long ol rait Septuagint bilong Baibel na long sampela rait moa i bin kamap paslain long ol dispela rait Hibru. Dispela ves long ol dispela rait Hibru i kolim wanpela tok ol i save mekim bilong kirapim tok bilong man, tasol i no gat wanpela tok bilong Kein i kamap bihain long en. Ating wanem samting i bin kamap? Stat 4:8 (NW ) i gat wanpela hap tok “long ples kunai,” em i stap insait long tupela sentens. Olsem na buk Cyclopedia bilong McClintock na Strong i tok: “Man bilong raitim kopi bilong dispela ves long tok Hibru, ating ai bilong em i bin giamanim em taim em i lukim [wankain] tok . . . long pinis bilong tupela hap tok.” Olsem na ating em i bin kalapim namba wan taim dispela tok i kamap, olsem “long ples kunai.” Em nau, Baibel Septuagint na sampela narapela rait moa i stap yet ol i gutpela bilong helpim yumi long luksave long ol popaia i bin kamap long ol Baibel bilong tok Hibru ol i bin raitim bihain.
Tasol ol inap popaia taim ol i raitim sampela kopi bilong Baibel Septuagint tu, na sampela taim ol i kamapim tok bilong ol Baibel ol i bin raitim long tok Hibru bilong stretim ol popaia i stap long Baibel ol i bin tanim long tok Grik. Olsem na taim ol i skelim ol rait Hibru wantaim ol rait Grik na ol narapela Baibel ol i bin tanim, ol inap painim sampela popaia bilong ol man bilong tanim tok na ol man bilong raitim ol kopi bilong Baibel, na bai yumi gat wanpela Baibel ol i kamapim stret ol tok bilong en.
Sampela Baibel Septuagint i stap yet long nau ol i bilong bipo yet, olsem long yia 300 C.E. samting. Ol dispela rait na ol narapela Baibel Septuagint ol i bin raitim bihain ol i no gat nem bilong God, Jehova, long en, ol i raitim long 4-pela leta Hibru ol i kolim Tetragramaton (YHWH ). Ol dispela Baibel i raitim “God” o “Bikpela” long tok Grik long olgeta hap i gat 4-pela leta i makim nem bilong God long Baibel Hibru. Tasol samting ol i bin painim long Palestain olsem 50 yia i go pinis i givim sampela save long yumi long dispela samting. Wanpela lain i bin raun bilong lukim ol bikpela hul bilong maunten long hap bilong Detsi na ol i painim sampela liklik hap bilong wanpela olpela buk bilong 12-pela profet (Hosea i go inap long Malakai) ol i bin raitim long tok Grik. Ol dispela rait i bilong ol yia namel long 50 B.C.E. na 50 C.E. Long ol dispela olpela rait, ol i no bin senisim 4-pela leta (YHWH ) na raitim olsem “God” na “Bikpela” long tok Grik, nogat. Olsem na dispela i strongim tok olsem ol i bin kamapim nem bilong God long Baibel Septuagint bilong pastaim.
Long 1971 ol i bin kamapim sampela hap bilong wanpela olpela rait ol i bin raitim long pepa ol i wokim long wel pitpit (Fouad 266 papyri). Ol dispela liklik hap bilong Baibel Septuagint em ol i bilong 150 yia samting paslain long Krais, ol i kamapim klia wanem samting? Nem bilong God i stap long ol dispela rait tu. Ol dispela liklik hap rait bilong Baibel Septuagint bilong pastaim ol i kamapim klia olsem Jisas wantaim ol disaipel bilong em bilong pastaim ol i save long nem bilong God na ol i kamapim dispela nem.
Long nau ol i bin tanim Baibel long planti tok ples, winim olgeta narapela buk bilong bipo na bilong nau. Klostu olgeta manmeri bilong graun, winim 90 pesen, ol inap kisim Baibel olgeta o wanpela hap bilong en long tok ples bilong ol yet. Yumi amamas long holim wanpela Baibel ol i bin tanim stret ol tok bilong en long ol tok ples bilong nau, em Baibel New World Translation of the Holy Scriptures, ol man inap kisim long 40 tok ples samting—sampela em Baibel olgeta na sampela em ol hap bilong en. Baibel New World Translation of the Holy Scriptures—With References i gat planti handet tok long sta daunbilo long ol pes i makim Baibel Septuagint na sampela ol olpela rait moa bilong Baibel. Tru tumas, Baibel Septuagint i stap yet olsem gutpela samting ol sumatin bilong Baibel i save mekim wok long en nau long taim bilong yumi.
[Piksa long pes 26]
Disaipel Filip i kamapim klia sampela tok em man Itiopia i bin ritim long Baibel “Septuagint”
[Ol Piksa long pes 29]
Planti taim aposel Pol i kamapim sampela tok bilong Baibel “Septuagint”