‘Wokabaut Bilong Em i Stret Long Ai Bilong God’

NOA i sanap na stretim baksait na ol masol bilong em i pen. Piksaim long tingting em i sindaun long bikpela hap plang, malolo liklik na lukluk long traipela sip em i wokim. Strongpela smel bilong kolta i stap long win; em i harim pairap bilong ol tul bilong wokim ol samting long diwai. Long hap Noa i sindaun long en, em inap lukim ol pikinini man bilong em i wok strong long wokim ol bun bilong sip na ol narapela hap bilong en. Ol pikinini man bilong em na ol meri bilong ol, na meri bilong Noa yet, ol i wok wantaim em long wokim dispela sip inap planti yia pinis. Ol i wokim pinis bikpela hap bilong sip, tasol i gat planti wok i stap yet.

Ol manmeri long hap bilong Noa, ol i ting Noa wantaim lain bilong em i longlong. Taim isi isi sip i wok long kamap, ol manmeri i lap moa yet taim ol i tingim dispela tok long bikpela tait wara bai karamapim olgeta hap bilong graun. Long tingting bilong ol, bikpela bagarap em Noa i tok lukaut long en i olsem stori nating tasol na em i no inap kamap tru! Ol i ting, olsem wanem wanpela man inap westim nating laip bilong em—na laip bilong famili bilong em tu—long kain longlong wok olsem. Tasol long ai bilong God bilong Noa, em Jehova, Noa i no longlong man.

Baibel i tok: “Wokabaut bilong [Noa] i stret long ai bilong God.” (Stat 6:9) Wokabaut bilong Noa i makim olsem em i trastim God, bihainim tru tok bilong em, na i stap bilong em i stret wantaim laik bilong God. Na tu, em i bin kisim pasin bilong pas gut wantaim Jehova. Sampela tausen yia bihain Baibel i tok long Noa olsem: “Long . . . bilip bilong en, em i soim olsem ol manmeri bilong dispela graun i gat asua.” (Hibru 11:7) Em i mekim olsem wanem? Bilip bilong em inap skulim yumi long wanem samting?

Noa i go bikpela namel long ol lain em pasin bilong ol i wok long go nogut moa. Long taim bilong tumbuna bilong em Enok, em narapela man i bin wokabaut stret long ai bilong God, ol man i bin mekim tu ol pasin nogut. Enok i bin tok profet long wanpela de bilong kot bai painim ol manmeri bilong graun i givim baksait long God. Nau, long taim bilong Noa pasin bilong ol man i go nogut moa yet. Long ai bilong Jehova, graun i bagarap pinis, long wanem, pait na bagarapim man i pulap long graun. (Stat 5:22; 6:11; Jut 14, 15) Wanem samting i kamap na pasin nogut i go nogut moa yet?

Wanpela samting nogut tru i wok long kamap namel long ol ensel bilong God. Long taim pinis wanpela bilong ol i bin bikhet long Jehova na em i kamap Satan taim em i krungutim gutnem bilong God na pulim Adam na Iv long mekim sin. Long taim bilong Noa, sampela ensel moa i bikhet long Jehova na long stretpela lo bilong em. Ol i lusim wok God i bin givim long ol long heven, na ol i kam daun long graun na tanim i kamap man na ol i maritim ol naispela naispela meri. Ol dispela bikhet ensel i gat pasin antap, ol i tingim ol yet tasol, na pasin nogut bilong ol i wok long pulim ol manmeri.—Stat 3:1-5; 6:1, 2; Jut 6, 7.

Na tu, ol dispela ensel i bin tanim i kamap man na maritim ol meri bilong graun, ol i kamapim ol pikinini man i traipela longpela man na ol i gat bikpela strong tru. Ol dispela traipela man ol i man nogut tru bilong pait, na ol i kirapim moa yet pasin bilong pait na givim baksait long God. Olsem na Man Bilong Wokim olgeta samting i lukim “pasin bilong ol manmeri long olgeta hap i nogut tru. Ol manmeri i tingting tasol long ol samting nogut.” Jehova i tingting pinis long em bai pinisim ol dispela lain manmeri nogut bilong graun insait long 120 yia.—Stat 6:3-5.

Yumi ken ting olsem, em i hatwok tru long ol papamama i mekim bikpela long ol pikinini long dispela kain taim! Tasol Noa i bin mekim olsem. Em i kisim wanpela gutpela meri. Taim Noa i winim pinis 500 krismas, meri bilong em i karim 3-pela pikinini man—Siem, Ham, na Jafet.a Papa na mama wantaim i mas lukautim gut ol pikinini bilong ol, nogut pasin nogut bilong ol man i paulim ol. Taim ol liklik mangi i lukim ol “strongpela man” na ol man “i gat biknem” ol i save amamas long bihainim pasin bilong ol—na ol pikinini bilong ol dispela ensel ol i kain man olsem. Tru, Noa na meri bilong em i no inap banisim ol pikinini bilong ol long harim ol kain stori long ol samting nogut ol dispela traipela man i mekim, tasol tupela inap skulim ol long gutpela tok i tru long God Jehova, em man i heitim tru olgeta kain pasin nogut. Ol i mas helpim ol pikinini bilong ol long save olsem Jehova i save bel hevi tru taim em i lukim ol man i mekim pasin pait na bagarapim man na pasin bikhet.—Stat 6:6.

Ol papamama long nau inap pilim hatwok bilong Noa na meri bilong em. Pasin bilong pait na bagarapim man na bikhet i olsem marasin nogut i wok long bagarapim graun bilong yumi. Na ol piksa bilong ol dispela pasin nogut tu i stiaim ol pikinini long mekim ol dispela pasin. Bilong helpim ol pikinini long sakim ol dispela kain pasin, ol papamama i gat savetingting ol i save skulim ol pikinini long God bilong bel isi, em Jehova, husat bai pinisim tru pasin bilong pait na bagarapim man long bihain. (Song 11:5; 37:10, 11) Ol pikinini inap lain long mekim pasin i stret, maski ol i stap namel long ol man i save mekim ol pasin nogut. Noa na meri bilong en i bin mekim gutpela wok long skulim ol pikinini bilong ol. Ol pikinini man bilong ol i go bikpela na kamap gutpela man, na ol i maritim ol meri em ol tu i amamas long putim God tru, Jehova, i stap namba 1 long laip bilong ol.

Wanpela taim, i stap bilong Noa i senis olgeta. Jehova i tokim dispela gutpela wokman olsem Em i tingting pinis long pinisim ol pasin nogut bilong dispela taim. God i tokim Noa: “Yu mas kisim plang bilong gutpela diwai na wokim wanpela sip.”—Stat 6:14.

Dispela sip em i no wanpela sip tru. Em i no gat poret, baksait, stia, kil o propela samting, na em i no luk olsem sip. Em i wanpela traipela bokis. Jehova i kolim stret sais, longpela na bikpela bilong sip, na ol narapela pasin bilong wokim, na em i tokim Noa long penim tu insait na ausait long kolta. Na God i tokim Noa long as bilong dispela: “Bai mi mekim bikpela tait i kamap long graun . . . Olgeta samting i stap long graun bai i dai.” Tasol em i tokim Noa: “Yu mas i go insait long dispela sip wantaim meri bilong yu na ol pikinini bilong yu wantaim ol meri bilong ol.” Na Noa i mas kisim tu sampela bilong olgeta kain animal i go insait. Ol samting i stap insait long sip, ol tasol bai abrusim bagarap long Bikpela Tait bai kamap!—Stat 6:17-20.

Man! Noa i gat bikpela wok tru! Em i mas wokim traipela sip stret—longpela bilong en inap olsem 130 samting mita, op bilong en i olsem 22 mita, na em i go antap inap 13 mita. Em i bikpela tru, winim olgeta sip ol i bin wokim long palang long bipo na long nau tu. Yu ting Noa i surik na i toktok planti long hatwok bilong wokim dispela sip o em i surikim mak i go liklik na bai isi long em i wokim? Baibel i tok: “Noa i mekim olgeta samting olsem God i tokim em.”—Stat 6:22.

Dispela wok i winim planti yia tru, ating 40 i go inap 50 yia. Ol i mas katim ol diwai, pulim i kam, wokim ol palang samting, sapim long mak bilong sip, na skruim wantaim. Sip i mas i gat 3-pela plua, planti rum, na wanpela dua long sait bilong sip. I luk olsem i gat ol windo antap, na rup i gat liklik sap na bai wara i ken ran i go daun.—Stat 6:14-16.

Ol yia i kam i go pinis na wok bilong wokim sip i kamap gutpela. Yumi ken ting Noa i amamas tru long famili i sapotim em gut long wok! Na i gat narapela wok ating i gat hatwok moa long mekim, winim wok bilong wokim sip. Baibel i tok Noa em i “man bilong tokaut long stretpela pasin.” (2 Pita 2:5) Olsem na Noa i go pas long famili long givim tok lukaut long ol man bilong givim baksait long God olsem bikpela bagarap i laik kamap. Ol i mekim wanem taim ol i harim dispela tok lukaut? Bihain Jisas Krais i tingim bek dispela taim, na em i tok ol dispela manmeri “i no luksave long ol samting i wok long kamap.” Em i tok ol i tingting tasol long ol samting bilong i stap bilong ol—ol i kaikai, dring, na marit—olsem na ol i no putim yau long tok bilong Noa. (Matyu 24:37-39) Yumi ken save, planti ol i tok bilas long em wantaim famili bilong em; ating sampela i tok long kilim em i dai na ol i mekim pasin birua long em.

Tasol Noa wantaim lain bilong en ol i no lusim dispela wok. Maski ol i stap namel long ol lain em ol i tingting tasol long inapim laik bilong ol, na ol i ting wok bilong wokim sip em i wanpela liklik wok i no gat as bilong en, Noa na famili i stap gut long dispela wok. Olsem na strongpela bilip bilong Noa na famili bilong em inap skulim gut ol famili Kristen bilong nau. Long wanem, yumi stap long taim Baibel i kolim olsem “taim bilong las de” bilong dispela graun. (2 Timoti 3:1) Jisas i tok, taim bilong yumi bai i wankain olsem long taim Noa i bin wokim sip. Taim ol Kristen i autim tok bilong Kingdom Bilong God na ol man i les long harim, o tok bilas, o birua long ol, ol i mas tingim pasin bilong Noa. Ol Kristen i no namba 1 lain i karim kain hevi olsem, nogat.

Planti yia i go pinis na klostu ol i pinisim wok bilong wokim sip. Klostu long taim Noa i gat 600 krismas, em i bin karim hevi long sampela long famili i dai. Papa bilong em Lamek i dai.b Faivpela yia bihain, papa bilong Lamek, Metusela, em tumbuna man bilong Noa, em i dai taim em i gat 969 krismas—long Baibel i no gat narapela man bilong graun i winim bikpela krismas olsem. (Stat 5:27) Metusela na Lamek i bin i stap long taim namba 1 man, Adam, i stap laip yet.

Long dispela yia stret, Noa i bin kisim nupela tok long God Jehova: “Yu wantaim olgeta lain famili bilong yu i mas i go insait long sip.” Na God i tokim Noa long kisim ol kain kain animal i go insait long sip—7-pela 7-pela bilong ol klinpela animal, ol i gutpela inap long mekim ofa, na tupela tupela bilong ol narapela animal.—Stat 7:1-3.

Ating ol i no inap lusim tingting long samting ol i bin lukim. Planti handret animal na pisin samting ol i wok long kam longwe yet—ol i wokabaut long lek, flai, wokabaut long bel, na kalap kalap—ol i gat kain kain sais na mak na pasin. Yumi no ken ting Noa i hatwok tru long kontrolim na subim ol dispela animal bilong bus i go insait long sip. Baibel i tok “ol i go insait . . . wantaim Noa.”—Stat 7:9.

Sampela man bai tok: ‘Olsem wanem kain samting inap kamap? Na olsem wanem olgeta animal inap i stap isi wantaim long liklik spes olsem?’ Tingim dispela: Yu ting Man Bilong Wokim olgeta samting em i no gat strong long bosim ol animal em yet i bin wokim, o mekim ol i stap isi olsem ol animal bilong ples? Tingim: Jehova em dispela God i bin brukim solwara Retsi na mekim san i sanap i stap. Yu ting em i no inap mekim olgeta samting olsem i bin kamap long stori bilong Noa? Em inap, na em i bin mekim tru!

Tru God inap makim narapela rot na bai ol animal samting i no ken lus. Tasol long savetingting bilong em, em i makim rot we i kirapim yumi long tingim wok em i bin givim pastaim tru long ol manmeri, em long lukautim olgeta samting i gat laip long graun. (Stat 1:28) Long nau planti papamama i save kamapim stori bilong Noa long ol pikinini, bilong skulim ol olsem Jehova i save tingim gut ol manmeri na ol animal em i bin wokim.

Jehova i tokim Noa, wanpela wik moa na Bikpela Tait bai kamap. Ating famili bilong em i mas hariap hariap long mekim ol samting. Tingim bikpela wok tru ol i mas mekim long putim ol animal na ol kaikai long ples stret na karim olgeta samting bilong ol i go insait long sip. Ating meri bilong Noa, na tripela tambu meri bilong em ol i mas bisi tru long stretim gut ol samting long sindaun bilong ol insait long sip.

Olsem wanem long ol lain i stap long hap bilong ol? Ol “i no luksave long ol samting i wok long kamap,” maski i klia tru olsem Jehova i blesim Noa na ol wok bilong em. Ol i bin lukim ol animal i go insait long sip. Tasol ol i les yet long harim tok. Long nau ol man i no luksave long ol mak i soim klia olsem yumi stap long taim bilong las de bilong dispela graun. Na olsem aposel Pita i tok profet long en, ol man bilong tok bilas i bin kamap, na ol i tok bilas long ol man i putim yau long tok lukaut bilong God. (2 Pita 3:3-6) Em i wankain long ol manmeri i bin tok bilas long Noa na famili bilong em.

Wanem taim tok bilas bilong ol i pinis? Baibel i tok, taim Noa i bringim lain bilong em na ol animal i go insait long sip, Jehova “i pasim dua bilong sip.” Sapos sampela man bilong tok bilas i stap klostu, ating samting God i mekim i pasim maus bilong ol. Sapos nogat, yumi save ren yet i pasim maus bilong ol, long wanem, bikpela ren tru i bin pundaun! Na ren i wok long pundaun i go i go inap tait wara i karamapim graun, olsem Jehova i bin tok pinis.—Stat 7:16-21.

Yu ting Jehova i amamas long ol dispela man nogut i dai pinis? Nogat! (Esekiel 33:11) Inap longtaim tru em i bin givim rot long ol long senisim pasin bilong ol na mekim pasin i stret. Yu ting ol inap mekim olsem? Wokabaut bilong Noa i soim olsem ol inap. Em i wokabaut stret long ai bilong Jehova, na em i bihainim tok bilong God bilong em long olgeta samting, na long dispela rot Noa i soim olsem ol man inap abrusim bagarap. Long pasin Noa i mekim, em i kamapim klia olsem ol man long taim bilong em i gat asua. Bilip bilong Noa i mekim na em wantaim famili bilong em i abrusim bagarap. Sapos yu bihainim strongpela bilip bilong Noa, yu tu inap helpim yu yet na ol famili bilong yu. Olsem Noa, yu inap wokabaut wantaim God Jehova olsem pren bilong yu. Na pasin pren bilong yupela inap i stap oltaim oltaim!