Man i Bin Wokim Olgeta Samting

MI SAVE long wanpela gutpela samting tru. Yu laik mi tokim yu?— Lukluk long han bilong yu. Bendim ol pinga. Orait nau kisim wanpela samting. Han bilong yu inap mekim planti samting, na em inap mekim gut ol dispela samting. Yu save husat i bin wokim han bilong yumi?—

Yes, em dispela wankain Man i bin wokim maus, nus, na ai bilong yumi. Em God, Papa bilong Bikpela Tisa. Yumi amamas tru olsem God i bin wokim ai bilong yumi, a?— Yumi inap lukim planti samting. Yumi inap lukim ol plaua. Yumi inap lukim grinpela gras na blupela skai. Yumi inap lukim ol liklik pisin i kaikai i stap olsem long dispela piksa. Tru tumas, em gutpela samting tru long yumi inap lukim ol kain samting olsem, a?—

Tasol husat i bin wokim ol dispela samting? Yu ting wanpela man bilong graun i bin wokim? Nogat. Ol man inap wokim haus. Tasol i no gat wanpela man inap wokim gras i save kamap long graun. Ol man i no inap wokim pikinini pisin, plaua, o narapela samting i gat laip. Yu bin save long dispela?—

God tasol i bin wokim olgeta dispela samting. God i bin wokim heven na graun. Em i wokim ol man tu. Em i bin wokim namba wan man na meri. Jisas, em Bikpela Tisa, i skulim yumi olsem.—Matyu 19:​4-6.

Olsem wanem Jisas i save olsem God i bin wokim man na meri? Yu ting Jisas i bin lukim God i wokim ol?— Yes, em i lukim. Jisas i bin stap wantaim God taim God i wokim man na meri. Jisas em i namba wan samting God i bin wokim. Jisas i wanpela ensel, na em i bin stap long heven wantaim Papa bilong em.

Baibel i kamapim dispela tok bilong God: “Nau yumi wokim ol manmeri.” (Stat 1:26) Yu save God i toktok long husat?— Em i toktok long Pikinini bilong em. Em i toktok long dispela man em bihain em i kam long graun na kamap Jisas.

Em samting bilong amamas, a? Tingim! Taim yumi harim tok bilong Jisas, yumi kisim skul long dispela man i bin stap wantaim God taim God i wokim graun na ol narapela samting. Jisas i lainim planti samting taim em i wok wantaim Papa bilong em long heven. Olsem na yumi no kirap nogut long Jisas em i Bikpela Tisa!

Paslain long God i wokim Pikinini bilong em, yu ting em i bel hevi long stap wanpis?— Nogat. Orait sapos em i no bel hevi, bilong wanem em i wokim ol arapela samting i gat laip?— Em i mekim olsem, long wanem, em i God bilong pasin laikim. Em i laik bai ol arapela i ken stap laip na amamas long laip bilong ol. Yumi mas tenkyu long God long em i bin givim laip long yumi.

Olgeta samting God i bin wokim i kamapim pasin laikim bilong em. God i wokim san. San i givim lait long yumi na hatim skin bilong yumi. Sapos i no gat san, olgeta samting bai kol na bai i no gat wanpela samting i stap laip long graun. Yu amamas long God i wokim san?—

Na God i kamapim ren tu. Ating sampela taim yu no amamas long ren, long wanem, yu no inap i go pilai ausait taim ren i pundaun. Tasol ren i save helpim ol plaua long kamap. Olsem na taim yumi lukim ol naispela plaua, bai yumi tok tenkyu long husat?— God. Na bai yumi tok tenkyu long husat taim yumi kaikai ol prut na kumu i swit long maus?— Yumi mas tenkyu long God, long wanem, san na ren bilong em i save mekim ol samting i kamap.

Sapos wanpela man i askim yu olsem, ‘God i bin wokim ol man na ol animal tu?’ Bai yu tok wanem?— I stret long tok: “Yes, God i bin wokim ol man na ol animal.” Tasol olsem wanem sapos wanpela man i no bilip olsem God i bin wokim ol man? Olsem wanem sapos em i tok ol man i bin kamap long rot bilong ol animal? Baibel i no tok olsem. Baibel i tok God i bin wokim olgeta samting i gat laip.—Stat 1:​26-31.

Tasol wanpela man inap tokim yu olsem em i no bilip long God. Bai yu tok wanem?— Yu ken poinim pinga i go long wanpela haus. Askim em: “Husat i wokim dispela haus?” Olgeta man i save olsem wanpela man i bin wokim dispela haus. Dispela haus i no wokim em yet!—Hibru 3:4.

Bihain, kisim dispela man i go long wanpela gaden na soim wanpela plaua long em. Askim em: “Husat i wokim dispela?” Olsem dispela haus, dispela plaua tu i no bin wokim em yet, nogat. Wanpela man i bin wokim. Em God.

Askim dispela man long harim krai bilong pisin. Orait askim em: “Husat i bin wokim ol pisin na skulim ol long mekim singsing?” God. God tasol i bin wokim heven na graun na olgeta samting i gat laip. Em i dispela Man i givim laip long ol samting.

Tasol man inap tok olsem em i bilip tasol long ol samting em inap lukim. Ating em i tok: ‘Sapos mi no lukim samting long ai, mi no inap bilip long en.’ Olsem na sampela man i tok ol i no bilip long God, long wanem, ol i no inap lukim em.

I tru olsem yumi no inap lukim God. Baibel i tok: ‘I no gat wanpela man inap lukim God.’ I no gat wanpela man, meri, o pikinini long graun inap lukim God. Olsem na yumi no ken traim long wokim wanpela piksa o imis bilong God. God i tokim yumi long no ken wokim imis bilong em. Olsem na God i no inap orait long yumi i gat ol kain samting olsem long haus bilong yumi.—Kisim Bek 20:​4, 5; 33:20; Jon 1:18.

Tasol sapos yu no inap lukim God, olsem wanem yu inap save olsem i gat God i stap? Tingim dispela: Yu inap lukim win?— Nogat, a? I no gat man inap lukim win. Tasol yu inap lukim ol samting win i save mekim. Yu inap lukim ol lip bilong diwai i meknais taim win i bloim ol han bilong diwai. Olsem na yu save olsem i gat win.

Yu inap lukim tu ol samting God i bin wokim. Taim yu lukim wanpela plaua o pisin, yu lukim samting God i bin wokim. Olsem na yu bilip olsem God i stap tru.

Wanpela man inap askim yu olsem, ‘Husat i wokim san na graun?’ Baibel i tok: “God i mekim kamap skai na graun.” (Stat 1:1) Yes, God i bin wokim olgeta dispela gutpela samting! Yu ting olsem wanem long dispela?—

Em gutpela samting tru long i stap laip, a? Yumi inap harim ol naispela singsing bilong ol pisin. Yumi inap lukim ol plaua na ol narapela samting God i bin wokim. Na yumi inap kisim ol kaikai God i bin givim long yumi.

Yumi mas tenkyu long God long olgeta dispela samting. Na bikpela samting moa, yumi mas tenkyu long em i bin givim laip long yumi. Sapos yumi tenkyu tru long God, yumi bai mekim wanpela samting. Em wanem samting?— Yumi bai harim tok bilong God, na mekim ol samting em i tokim yumi long mekim olsem Baibel i kamapim. Long dispela rot yumi inap soim olsem yumi laikim tru dispela Man i bin wokim olgeta samting.