Klostu Nau Bai God i Kisim Bek Ol Man i Givim Bel Long Em!

“Sapos traim i kamap long ol man i bihainim God, orait Bikpela i save long rot bilong kisim bek ol long dispela traim. Na Bikpela i save . . . long rot bilong bekim pe nogut long ol [man nogut].”​—⁠2 PITA 2⁠:⁠9.

 1. (a) Wanem ol hevi i painim ol man long taim bilong yumi? (b) Olsem na nau yumi laik skelim wanem ol askim?

OL HEVI i wok long i go bikpela. Dispela samting i painim olgeta man, maski ol i stap long ples i gat planti kaikai samting o long ples i sot long ol dispela samting. Ol manmeri long olgeta hap ol i tingting planti, long wanem mani i no gat strong moa, na pe bilong ol samting i go antap, na planti man i no gat wok. Na ol i tingting planti tu, long wanem planti samting bilong bagarapim win na graun i kamap, na dispela inap bagarapim olgeta samting i stap laip long graun. Sik i kisim planti man. Ol sik i save kalap long narapela narapela, na sik bilong klok long bel, na sik kensa​—⁠ol dispela sik i kilim i dai planti man. Pasin pamuk i bin givim bikpela bel hevi long planti manmeri, na i bagarapim sindaun bilong planti famili. Na pasin bilong pait na bagarapim man i pulap long graun. Yumi tingim ol dispela hevi i painim ol man, na yumi gat askim olsem: I gat as tru na yumi ken bilip olsem, klostu nau bai God i kisim bek ol man long ol dispela hevi na traim? Sapos tru em bai mekim, orait em bai mekim olsem wanem? Na em bai kisim bek husat?​—⁠Lukim Habakuk 1⁠:2; 2⁠:​1-3.

 2, 3. (a) Olsem wanem na long nau tok bilong 2 Pita 2⁠:9 i strongim bel bilong yumi? (b) Baibel i stori long wanem taim God i bin kisim bek ol man na dispela inap strongim bel bilong yumi?

² Ol samting i kamap long taim bilong yumi i wankain olsem ol samting i bin kamap long sampela bikpela taim bilong ol man long bipo. Aposel Pita i stori long God i bin kisim bek sampela man long ol dispela taim bipo na bihain Pita i mekim wanpela tok i strongim tru bel bilong yumi, em i tok: “Bikpela i save long rot bilong kisim bek ol [man i bihainim em].” (2 Pita 2⁠:⁠9) Gutpela sapos yumi skelim ol tok i stap paslain na bihain long dispela tok, olsem long 2 Pita 2⁠:​4-10:

³ “Yupela save, bipo sampela ensel i bin mekim sin, na God i no larim ol. Nogat. Em i kalabusim ol i stap long [Tartarus], long dispela hul i tudak nogut tru. Na ol i kalabus i stap yet na wetim De bilong bikpela kot bilong God. Ol manmeri bilong bipo tu, ol i bin givim baksait long God, na em i no larim ol. Nogat. Em i mekim bikpela tait i kamap long ol, na ol i lus. Tasol Noa em i man bilong tokaut long stretpela pasin. Na God i lukautim em wantaim 7-pela manmeri, na ol i stap gut. God i bin tok long Sodom wantaim Gomora tu i mas bagarap. Na God i kukim dispela tupela bikpela taun long paia, na sit bilong paia tasol i stap. Em i mekim save long tupela taun na tupela i bagarap olgeta. Olsem na bihain, ol man i givim baksait long God, ol i ken tingim dispela samting i bin kamap long Sodom na Gomora, na ol bai i save long samting i mas kamap long ol tu. Tasol dispela stretpela man Lot i bin i stap long Sodom, na em i lukim ol kain kain pasin pamuk samting bilong ol dispela man nogut na em i bel hevi tru. Na God i kisim bek Lot, na em i no bagarap. Yes, dispela stretpela man em i stap namel long ol Sodom, na em i lukim pasin nogut bilong ol, na long olgeta de em i harim tok nogut bilong ol. Bel bilong en i stap stret, na em i kirap nogut na bel bilong en i pen tru long pasin bilong sakim lo ol i mekim. Orait yumi tingting long ol dispela samting Bikpela i bin mekim, na yumi save, sapos traim i kamap long ol man i bihainim God, orait [Jehova] i save long rot bilong kisim bek ol long dispela traim. Na Bikpela i save pinis long pasin bilong ol man nogut, na em i save long rot bilong bekim pe nogut long ol, i go inap long De bilong bikpela kot bilong God. Sampela man bai i kisim pe nogut moa yet. Em ol man i save bel kirap long mekim ol pasin pamuk i doti tru, na ol i save ting tok bilong Bikpela em i samting nating.” Olsem ol dispela tok bilong Baibel i makim, yumi mas tingim gut ol samting i bin kamap long taim bilong Noa na long taim bilong Lot.

Pasin i Stap long Taim Bilong Noa

 4. Bilong wanem pasin bilong ol man long taim bilong Noa i nogut tru long ai bilong God? (Buk Song 11⁠:5)

⁴ Stori bilong Stat sapta 6 i tokim yumi, long taim bilong Noa, God i lukim pasin bilong ol manmeri bilong graun i nogut tru. Ol i mekim wanem kain pasin i nogut tru? Ol i save mekim pait na bagarapim man. I no olsem wan wan taim ol i paitim man o bagarapim man. Nogat. Pasin pait i pulap long graun. Stat 6⁠:11 i tok: “Long olgeta hap bilong graun ol i wok long pait na bikhet tasol.”

 5. (a) Ol man i mekim wanem na dispela i wanpela as bilong pasin pait i kamap long taim bilong Noa? (b) Enok i bin mekim wanem toksave long pasin bilong givim baksait long God?

⁵ Wanem as bilong dispela pasin? Tok bilong Namba 2 Pas Pita i raitim, em yumi kolim pinis, i stori long ol man i givim baksait long God. Tru tumas, long taim bilong Noa ol man i givim baksait long God na dispela samting i as bilong pasin ol i mekim. Ol i sakim ol lo bilong God, na ol i bikhet long God yet.a Na sapos ol man i bikhet long God, yu ting ol bai mekim gutpela pasin long ol narapela man? Nogat, a? Taim Noa i no kamap yet, dispela pasin bilong bikhet na givim baksait long God i kamap bikpela, olsem na Jehova i bin kirapim Enok long mekim tok profet long ol samting bai painim ol man i mekim dispela pasin. (Jut 14, 15) Ol i bikhet long God, olsem na strafe bilong God i mas painim ol.

 6, 7. Sampela ensel i bin mekim wanem na dispela i wanpela as tru na pasin nogut i go bikpela paslain long Tait?

⁶ Na i gat narapela samting tu na pasin pait i pulap long graun long taim bilong Noa. Tok bilong Stat 6⁠:​1, 2 i helpim yumi long save long dispela samting, em i tok: “Bihain planti manmeri i kamap pinis long graun, na ol i gat ol pikinini meri. Ol pikinini man bilong God i lukim ol dispela meri i naispela tumas. Na ol i kisim ol meri long laik bilong ol yet na maritim ol.” Husat ol dispela pikinini man bilong God? Ol i no man nating bilong graun. Inap planti handet yia pinis ol man bilong graun i bin lukim ol meri i naispela tumas na maritim ol. Ol dispela pikinini man bilong God em ol ensel i bin tanim i kamap man. Jut 6 i stori long ol na i tok: “Ol dispela ensel ol i no laik i stap gut long dispela wok God i bin givim ol, na ol i lusim ples bilong ol.”​—⁠Lukim tu 1 Pita 3⁠:​19, 20.

⁷ Ol dispela ensel i gat bikpela strong, winim ol man, olsem na taim ol i kamap man na maritim ol meri bilong graun, ol i kamapim wanem kain pikinini? Baibel i tok: “Long dispela taim na long taim bihain tu i bin i gat ol traipela man i stap long graun. Ol dispela man i pikinini bilong ol meri i bin slip wantaim ol pikinini man bilong God. Ol i strongpela man tru bilong mekim kain kain wok, na ol i gat biknem long dispela taim.” Tru tumas, ol dispela traipela man, em ol i bin kamap long narapela kain pasin pamuk ol ensel i mekim, ol i gat bikpela strong tru, winim bilong ol narapela man, na ol i mekim wok long dispela strong bilong mekim nogut long ol man na pretim ol.​—⁠Stat 6⁠:⁠4.

 8. Jehova i ting olsem wanem long pasin nogut i bin kamap long graun?

⁸ Wanem kain pasin tru i kamap long graun long dispela taim bipo? Pasin nogut tru i kamap. Jehova “i lukim pasin bilong ol manmeri long olgeta hap i nogut tru. Ol manmeri i tingting tasol long ol samting nogut.” Orait, God Jehova i mekim wanem? “Bikpela i ting i gutpela sapos em i no bin wokim ol manmeri. Na em i bel hevi tru.” I no olsem God i ting em i bin popaia na em i wokim ol man na nau em i bel hevi long dispela. Nogat. Em i bel hevi, long wanem taim em i wokim pinis ol man, ol i kirap mekim pasin nogut tru, olsem na em i mas pinisim ol.​—⁠Stat 6⁠:​5-7.

Ol Samting Ol i Mekim na God i Kisim Bek Ol

 9. (a) Bilong wanem God i amamas long Noa na mekim gut long em? (b) God i toksave long Noa long wanem samting bai kamap bihain?

⁹ Tasol God i “amamas long Noa. . . . Noa em i gutpela man, na wokabaut bilong en i stret long ai bilong God. Em i pren tru bilong God.” (Stat 6⁠:​8, 9) Olsem na Jehova i toksave long Noa pastaim olsem Em bai kamapim bikpela tait wara long olgeta hap bilong graun, na Em i tokim Noa long wokim wanpela sip. God bai pinisim olgeta manmeri long graun. Noa wantaim lain bilong em, ol tasol bai abrusim bagarap. Ol animal tu bai bagarap, tasol Noa i mas kisim sampela bilong olgeta wan wan kain na putim long sip na ol dispela animal tasol i no ken bagarap.​—⁠Stat 6⁠:​13, 14, 17.

10. (a) Ol i mas mekim wanem bambai ol i ken redi na abrusim bagarap? Em bikpela wok o nogat? (b) God i givim dispela wok long Noa na Noa i mekim wanem gutpela pasin?

¹⁰ Noa i kisim dispela toksave paslain long Tait, olsem na em i gat bikpela wok. Em i mas wokim dispela sip i kain olsem traipela bokis na insait bilong en i bikpela inap olsem 40,000 kubik-mita. Noa i mas putim ol kaikai insait long sip, na em i mas bungim ol animal na pisin “bilong olgeta kain” na putim insait long sip bambai ol i no ken bagarap. Em i mas wok planti yia bilong inapim dispela wok. Orait, Noa i mekim wanem? Baibel i tok, “Noa i mekim olgeta samting olsem God i tokim em.”​—⁠Stat 6⁠:​14-16, 19-22; Hibru 11⁠:⁠7.

11. Noa i gat wanem bikpela wok bilong helpim lain bilong em?

¹¹ Noa i gat dispela wok na em i mas wok tu long helpim lain bilong em long i stap strong long spirit. Dispela bai lukautim ol bambai ol i no ken bihainim pasin pait na pasin bikhet bilong ol manmeri ol i stap namel long ol. Em bikpela samting ol i no ken tingting tumas long ol samting bilong olgeta de. God i givim wanpela wok long ol na ol i mas tingim dispela wok i nambawan bikpela samting. Yumi save, lain bilong Noa i harim gut ol tok em i skulim ol long en na ol i gat bilip wankain olsem Noa, long wanem, Baibel i tok Noa wantaim meri bilong em, na 3-pela pikinini man bilong tupela wantaim meri bilong ol​—⁠em 8-pela manmeri olgeta​—⁠ol i gutpela man.​—⁠Stat 6⁠:18; 1 Pita 3⁠:20.

12. Noa i bin mekim gut wanem wok bilong em, olsem 2 Pita 2⁠:5 i tok?

¹² Noa i gat narapela wok tu​—⁠em i mas givim toksave long ol man long dispela Bikpela Tait i laik kamap, na em i mas tokim ol long as bilong en. Yumi save em i bin mekim gut dispela wok, long wanem Baibel i tok, “Noa em i man bilong tokaut long stretpela pasin.”​—⁠2 Pita 2⁠:⁠5.

13. Wanem ol traim i bin painim Noa taim em i mekim dispela wok God i givim long em?

¹³ Orait, nau yumi ken skelim ol traim i bin kamap long Noa taim em i mekim dispela wok. Yu mas tingting olsem yu yet yu stap long dispela taim. Sapos yu bin stap wantaim lain bilong Noa, pasin nogut na pasin pait bai bungim yu long olgeta hap, em pasin ol traipela strongpela man na ol man i givim baksait long God ol i save mekim. Na yu mas wok strong long sakim wok nogut bilong ol ensel i bikhet. Na taim yu wokim dispela traipela sip, ol man bai lap nogut long yu na rabisim yu. Bai yu wok inap planti yia long tokaut long ol man long Bikpela Tait bai kam, tasol ol i no ken harim​—⁠bai ol i pas long ol wok bilong ol, em wok bilong skin, na ‘ol i no tingim.’ Bai “ol i stap olsem tasol i go inap long taim bikpela tait i kamap na i pinisim olgeta dispela manmeri.”​—⁠Matyu 24⁠:39; Luk 17⁠:​26, 27.

Bilong Wanem Yu Mas Tingim Ol Samting i Bin Painim Noa?

14. Olsem wanem na long nau i no hatwok long yumi pilim ol traim i bin painim Noa wantaim lain bilong em?

¹⁴ I no hatwok long yumi pilim ol dispela hevi na traim i bin painim Noa wantaim lain bilong em long dispela taim, long wanem wankain pasin i stap long taim bilong yumi. Krais Jisas i tok kain samting olsem i mas kamap. Em i mekim bikpela tok profet long ol samting i mas kamap taim em i stap king pinis na pasin bilong dispela graun i laik pinis, na em i tok: “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap.”​—⁠Matyu 24⁠:37.

15, 16. (a) Olsem wanem yumi ken tok, long nau pasin pait i pulap long graun wankain olsem long taim bilong Noa? (b) Ol man i bin mekim wanem pasin pait long ol wokboi bilong Jehova?

¹⁵ Ol samting i bin kamap olsem Jisas i tok, o nogat? Olsem wanem? Pasin nogut na pasin pait i pulap long graun long nau? Tru tumas! Long taim bilong yumi, winim 100 milion manmeri i bin kisim bagarap long pait. Ating dispela hevi i bin nogutim sampela man i kaunim ol nius bilong yumi. Na planti man tru i gat hevi, long wanem ol raskol i bin hansapim ol na tok long paitim ol o bagarapim ol bambai ol i ken kisim mani samting bilong ol. Na pasin pait i givim hevi long planti yangpela long skul tu.

¹⁶ Ol bikpela pait na pasin raskol i givim hevi long ol wokboi bilong Jehova, na i gat narapela pasin pait i givim hevi long ol. Em olsem: Ol man i save mekim nogut long ol, long wanem ol i no bilong dispela graun na ol i wok strong long givim bel long God. (2 Timoti 3⁠:​10-12) Sampela taim ol man i subim ol o solapim ol tasol; tasol sampela taim ol man i bagarapim samting bilong ol, o paitim ol nogut tru, o kilim ol i dai.​—⁠Matyu 24⁠:⁠9.

17. Pasin bilong bikhet na givim baksait long God, dispela pasin i kamap bikpela long nau o olsem wanem? Stori long dispela samting.

¹⁷ Ol man i givim baksait long God, taim ol i mekim pasin pait olsem, sampela taim ol i tokaut klia olsem ol i bikhet long God na tingim em i samting nating. Long wanpela hap bilong Afrika, polis i tok: “Gavman em bilong mipela. Yupela go long God, sapos i gat God, na askim em long i kam helpim yupela.” Long ol haus kalabus na long ol banis kalabus nogut, sampela man i bin birua long ol Witnes Bilong Jehova. Long banis kalabus nogut ol i kolim Saksenhausen, long Jemani, wanpela man (nem bilong em Baranowsky) em i bin birua long ol. Em i tok bilas long ol na em i tok: “Mi kirap mekim pait long Jehova. Nau bai yumi lukim husat i strong moa, mi yet o Jehova.” Liklik taim bihain sik i kisim dispela man na em i dai pinis. Tasol sampela man i mekim yet wankain pasin. Sampela bikman bilong gavman i mekim nogut long ol wokboi bilong Jehova, tasol i no ol dispela man tasol i bikhet long God. Long olgeta hap bilong graun, ol wokboi bilong God i lukim na harim tok long planti pasin i kamapim long ples klia olsem ol man i mekim ol dispela pasin ol i no pret long God.

18. Ol spirit nogut i mekim wanem na dispela i kirapim ol man long mekim nabaut?

¹⁸ Taim bilong yumi i wankain olsem taim bilong Noa, na long taim bilong yumi tu ol spirit nogut i mekim wok nogut. (Kamapim Tok Hait 12⁠:​7-9) Ol dispela spirit ol i ensel tasol, em ol dispela ensel i bin kam long graun na maritim ol meri long taim bilong Noa. Ol meri pikinini bilong ol i bin bagarap long Bikpela Tait, tasol ol dispela bikhet ensel i tanim na i kamap spirit gen na i stap. Tasol ol i no inap insait moa long lain holi bilong Jehova long heven, olsem na em i putim ol long ples i olsem hul i tudak nogut tru (Tartarus). Ol i no inap kisim moa lait o save i kam long God. (2 Pita 2⁠:​4, 5) Satan i bos bilong ol na ol i laik wok klostu yet long ol manmeri. Ol i no inap tanim i kamap man moa, tasol ol i wok long bosim ol man na meri na ol pikinini tu. Ol i mekim olsem long rot bilong posin na ol wok marila samting, na long ol narapela rot tu. Na ol i save kirapim ol man long bagarapim ol narapela man long ol pasin nogut em yumi save kirap nogut tru long en. Na ol i mekim ol narapela samting tu.

19. (a) Ol spirit nogut i bel nogut tru long husat na pait long ol? (b) Ol spirit nogut i laik subim yumi long mekim wanem?

¹⁹ Baibel i tokaut klia olsem ol spirit nogut i save mekim pait long ol manmeri “i save bihainim ol lo bilong God, na ol i save autim tok bilong Jisas.” (Kamapim Tok Hait 12⁠:​12, 17) Ol dispela spirit nogut ol i nambawan lain bilong kirapim ol man long mekim nogut long ol wokboi bilong Jehova. (Efesus 6⁠:​10-13) Ol i mekim wok long kain kain rot bilong subim o pulim ol gutpela man bambai ol i kalapim lo bilong Jehova na ol i lusim wok bilong autim tok bilong Kingdom bilong Jehova, em Jisas i King bilong en.

20. Ol spirit nogut i mekim wanem bilong pasim ol man i laik bai ol spirit nogut i no ken bosim ol moa? (Jems 4⁠:7)

²⁰ Ol spirit nogut i wok long pasim ol man i laik tru bai ol spirit nogut i no ken bosim ol moa. Wanpela meri bilong Brasil, em bipo ol spirit nogut i bin bosim em, em i tok, taim ol Witnes i kam long haus bilong em, em i harim nek bilong ol spirit nogut i tokim em, em i no ken opim dua. Tasol em i opim dua na em i kisim save long tok i tru. Long planti hap ol spirit nogut i kirapim ol posinman na marilaman long pasim wok bilong ol Witnes Bilong Jehova. Olsem: Long wanpela liklik ples long Suriname ol birua bilong ol Witnes Bilong Jehova i singautim wanpela posinman i kam. Planti man i save long dispela man, long wanem em inap makim ol man long stik bilong em na wantu bai ol i dai. Orait, dispela posinman i gat spirit nogut i stap long em, em i kam wantaim lain bilong em, em ol i singsing na paitim kundu, na em i bungim ol Witnes Bilong Jehova. Em i mekim ol tok hait bilong em na makim ol Witnes long stik bilong em. Ol man bilong ples i ting wantu ol Witnes Bilong Jehova bai pundaun na i dai pinis, tasol nogat. Dispela posinman i ai raun na i pundaun na ol lain bilong em i sem pipia na karim em i go.

21. Long nau, olsem long taim bilong Noa, planti man i ting olsem wanem long wok bilong yumi long autim tok? Bilong wanem ol i ting olsem?

²¹ Long sampela hap ol man i no save mekim ol wok posin na marila samting long ples klia, tasol olgeta Witnes Bilong Jehova i bin pilim hevi bilong autim tok long ol manmeri i tingting tumas long ol wok bilong skin na ol samting bilong olgeta de na ol i les long harim tok. I wankain olsem long taim bilong Noa​—⁠long nau tu planti man ‘i no tingim.’ (Matyu 24⁠:​37-39) Sampela ol i tingim pasin bilong yumi long i stap wanbel na ol bikpela wok yumi mekim, na ol i litimapim nem bilong yumi. Tasol ol samting yumi mekim bilong i stap strong long spirit​—⁠olsem lusim planti aua long stadi, na go long ol miting, na autim tok​—⁠ol i ting ol dispela samting i olsem pasin longlong. Ol i tok bilas long yumi, long wanem yumi bilipim ol tok promis bilong God long Baibel, tasol ol yet i ting mani kago na ol amamas bilong skin ol inap kisim long nau em nambawan bikpela samting.

22, 23. Ol samting i bin kamap long taim bilong Noa, olsem wanem dispela i kirapim yumi long bilip tru olsem Jehova bai kisim bek ol man i givim bel long em?

²² Lain bilong Jehova i stap gut long em, tasol ol man i no laikim God ol i mekim nogut long ol. Olsem wanem? Dispela pasin bai stap inap long olgeta taim? Nogat tru! Yumi ken tingim samting i bin kamap long taim bilong Noa. God yet i tok na Noa wantaim lain bilong em i go insait long sip ol i wokim pinis. Na long taim God i makim pinis “graun i op na bikpela wara i stap aninit long graun i sut i kam antap. Na olgeta dua long skai i op na wara i kapsait i kam daun.” Bikpela Tait i kamap na wara i kam antap moa moa yet na i karamapim olgeta maunten. (Stat 7⁠:​11, 17-20) Ol bikhet ensel i bin lusim ples bilong ol na tanim i kamap man, nau ol i mas tanim i kamap spirit gen na i go bek long ples spirit. Ol traipela pikinini bilong ol dispela ensel, na olgeta narapela man i bin givim baksait long God, wantaim ol man i no tingim toksave bilong Noa na ol i no bin kirap mekim wanpela samting, olgeta i bagarap. Tasol Noa wantaim meri bilong em, na 3-pela pikinini man bilong tupela wantaim meri bilong ol, ol i no bagarap. Jehova i kisim bek Noa wantaim lain bilong em long dispela traim ol i bin sanap strong long en inap planti yia pinis.

²³ Olsem wanem? Jehova bai mekim wankain pasin bilong helpim ol man long nau em ol i givim bel long em? Yumi ken bilip tru long em bai mekim olsem. Em i tok promis long mekim olsem, na em i no save giaman.​—⁠Taitus 1⁠:2; 2 Pita 3⁠:​5-7.

[Ol Futnot]

Yu Tingim?

◻ Pita i tok wanem na em i kamapim klia olsem Jehova i save long rot bilong kisim bek ol man i givim bel long em?

◻ Wanem sampela samting i mekim na pasin pait i pulap long graun long taim bilong Noa?

◻ Bikpela Tait i laik kamap, olsem na Noa i gat wanem wok?

◻ Wanem samting i kamap long taim bilong yumi na i wankain olsem long taim bilong Noa?

[Piksa long pes 12]

Ol i wok strong inap planti yia bilong wokim sip

[Piksa long pes 13]

Noa i wok long helpim lain bilong em long i stap strong long spirit