Wanpela Baibel Ol i Tanim i Bin Mekim Bikpela Wok Tru

Taim profet bilong God, em Moses, i kirap long raitim Baibel olsem 3,500 yia i go pinis, i gat wanpela liklik lain tasol i gat save long kaunim ol tok bilong en. (Lo 7:⁠7) Ol tasol inap kaunim, long wanem, Baibel i stap long tok ples Hibru tasol, em tok ples bilong dispela lain. Tasol bihain, bikpela senis bai kamap.

OL I tanim Baibel Hibru i go long narapela tok ples​—⁠em namba wan taim ol i mekim olsem​—⁠na ol i kolim dispela Baibel olsem Septuagint. Dispela em i wanpela bikpela as na tok bilong Baibel i go kamap long planti hap na helpim gut ol man i go inap planti handet yia. Bilong wanem ol i wokim dispela Baibel? I stret yumi ken tok dispela Baibel i bin mekim bikpela wok long olgeta hap?

God i Bin Stiaim Wok Bilong Tanim?

Namel long yia 607 B.C.E. i go inap 537 B.C.E., ol Juda i stap kalabus long Babilon. Tasol taim ol i lusim pinis kalabus, planti Juda i go sindaun long ol kantri ausait long kantri bilong Israel na Juda bilong bipo. Long ol Juda em mama i karim ol long Babilon, tok Hibru i stap olsem nambatu tok ples bilong ol. Klostu long yia 200 B.C.E. samting, i gat sampela Juda i sindaun long Aleksandria, long Isip​—⁠Aleksandria em wanpela bikpela taun bilong Gavman Grik. Ol dispela Juda i save olsem i gutpela sapos ol i tanim tok bilong Baibel i go long tok Grik​—⁠long dispela taim em nambawan tok ples bilong ol.

I kam inap long dispela taim, ol i bin raitim tok bilong Baibel long tok Hibru, na sampela liklik hap long tok Aram​—⁠tok Aram i wankain liklik long tok Hibru. Olsem wanem? Sapos ol Juda i tanim Tok Bilong God i go long narapela tok ples, yu ting dispela inap mekim na Tok Bilong God bai i no gat strong moa o ating ol i no tanim stret na ol man i kisim kranki insait bilong ol tok bilong en? God i bin givim Tok bilong em long ol Juda bilong lukautim, olsem na nogut ol i tanim kranki na paulim tok bilong en, a?​—⁠Song 147:​19, 20; Rom 3:​1, 2.

Ol dispela samting i mekim na ol Juda i tingting planti. Tasol nogut ol Juda i kamap bihain ol i no inap kaunim ol tok bilong Baibel, olsem na ol i pasim tok long tanim tok bilong Tora i go long tok Grik​—⁠Tora em ol 5-pela hap bilong Baibel, kirap long Buk Stat i go inap long Buk Lo, em Moses i bin raitim. Sampela stori nating i bin kamap long dispela wok bilong tanim tok. Wanpela pepa (Letter of Aristeas) i tok: Tolemi Namba 2, bos bilong ol Isip (285-​246 B.C.E.), em i laik bai ol i tanim tok bilong Tora i go long tok Grik na bai em i ken putim wanpela long haus buk bilong em. Em i givim wok long 72 saveman bilong lain Juda, na ol i lusim Israel na kam long Isip, na insait long 72 de ol i mekim pinis dispela wok. Orait nau ol i kaunim tok bilong en long ol Juda i stap long dispela hap, na ol dispela Juda i tokaut olsem ol i bin tanim stret ol tok na i naispela tu. Bihain ol i bilasim dispela stori na ol i tok ol i putim olgeta wan wan man bilong tanim tok insait long narapela narapela rum, tasol olgeta tok ol i tanim, ol wan wan leta tu, i wankain stret long ol tok ol narapela narapela i tanim. Dispela stori olsem 72 man i bin tanim tok, dispela i mekim na ol i kolim dispela Baibel ol i bin tanim long tok Grik olsem Septuagint, ol i kisim long wanpela tok Latin olsem “Seventi.”

Klostu olgeta saveman bilong nau ol i wanbel long tok, stori bilong dispela pepa (Letter of Aristeas) em i wanpela stori nating. Na ol i tok, Tolemi Namba 2 i no bin kamapim tingting bilong wokim dispela Baibel, nogat; ol bikman bilong ol Juda long Aleksandria i bin kamapim dispela tingting. Tasol ol rait bilong saveman Filo, em wanpela Juda i sindaun long Aleksandria, na ol rait bilong saveman Josifas, em wanpela Juda, na ol tok bilong buk Talmut tu, olgeta i tokaut olsem, ol Juda i stap long taim bilong ol aposel ol i bilip olsem spirit holi i bin stiaim wok bilong tanim tok bilong Baibel Septuagint, wankain olsem spirit holi i bin mekim long Baibel bilong pastaim. Ating ol i gat dispela bilip, long wanem, bikpela wok i bin kamap bilong kirapim ol Juda long olgeta hap long laikim Septuagint.

Tru, pastaim ol i tanim ol faipela buk bilong Moses tasol, olsem Buk Stat i go inap long Buk Lo, tasol bihain ol i givim dispela nem Septuagint long Ol Skripsa Hibru olgeta em ol i bin tanim i go long tok Grik. Inap olsem 100 yia ol i wok long tanim olgeta narapela buk bilong Ol Skripsa Hibru. Tasol ol man bilong tanim tok bilong Baibel Septuagint ol i no wok gut wantaim na tanim tok, nogat; narapela i tanim narapela hap, na narapela i tanim narapela hap, olsem. Na ol man bilong tanim tok, save bilong ol long tok Hibru i narapela narapela. Klostu olgeta hap bilong Baibel ol i tanim, ol i raitim wankain stret olsem i stap long tok ples bilong pastaim ol man i bin raitim Ol Skripsa Hibru long en, tasol tok bilong sampela hap ol i tanim ol i bin raitim long pasin i no hatwok long kaunim. Na sampela man bilong tanim tok ol i bin sotim ol tok long sampela hap. Klostu long yia 100 B.C.E., olgeta buk bilong Ol Skripsa Hibru i stap long tok Grik. Tru, ol i no bihainim wankain pasin long tanim tok bilong en, tasol wok bilong tanim Ol Skripsa Hibru i go long tok Grik i bin kamapim gutpela wok tru ol man bilong tanim tok i no bin ting bai kamap.

Jafet i Sindaun Wantaim Siem?

Taim buk Talmut i stori long Septuagint, em i kamapim tok bilong Stat 9:​27: “Ol pikinini bilong Jafet . . . bai ol i sindaun gut wantaim ol lain bilong Siem.” (Megila 9b, Talmut Bilong Babilon) Long tok piksa, Talmut i tok, long rot bilong naispela tok Grik bilong Septuagint, Jafet (papa bilong Javan, em tumbuna bilong ol Grik) i bin sindaun wantaim Siem (em tumbuna bilong ol Israel). Tasol yumi inap tok tu olsem, long rot bilong Septuagint, Siem i bin sindaun wantaim Jafet. Olsem wanem yumi inap tok olsem?

Bikpela King Aleksander i daunim na kisim planti kantri klostu long yia 330 B.C.E., na bihain long dispela em i kamapim wanpela bikpela wok bilong skulim ol man long ol dispela kantri long tok ples Grik na long pasin na sindaun bilong ol Grik. Ol Juda i pilim olsem dispela wok i daunim pasin na sindaun bilong ol Juda yet. Ol i ting sapos pasin na tingting bilong ol Grik i kamap strong, dispela inap daunim lotu bilong ol Juda. Wanem samting inap pasim dispela wok?

Max Margolis em wanpela Juda na man bilong tanim tok bilong Baibel, na em i kolim samting em i ting i olsem as bilong kirapim ol Juda long wokim Septuagint. Em i tok: ‘Sapos yumi ting ol Juda yet ol i as bilong dispela tingting bilong tanim Baibel i go long tok Grik, orait yumi ken ting ol i mekim olsem na bai ol man bilong ol narapela lain inap lukim Lo bilong ol Juda na bilip olsem pasin na save bilong ol Juda em i gutpela, wankain olsem bilong ol Grik.’ Em nau, taim ol i tanim Ol Skripsa Hibru bambai ol lain bilong tok Grik inap kaunim, ol Juda i mekim olsem bilong lukautim pasin na sindaun bilong ol yet.

Aleksander i laik bai olgeta man i skul long pasin na sindaun bilong ol Grik, olsem na tok Grik i kamap tok ples bilong ol man long olgeta hap. Maski ol Rom i kam na daunim na kisim ol kantri em Aleksander i bin bosim, tok Grik bilong ol man nating (olsem Koine) i stap yet olsem tok ples bilong ol lain i wok bisnis na mekim ol narapela wok wantaim ol narapela lain. Olsem na planti man i no Juda, em pastaim ol i no save long God na long Lo bilong ol Juda, kwiktaim ol i kisim Baibel Septuagint bilong Ol Skripsa Hibru. Dispela i kamapim wanpela bikpela samting.

Ol Man i Bihainim Lotu Bilong Ol Juda na Ol Man i Save Aninit Long God

Long taim bilong ol aposel, Filo inap tok: ‘I no ol Juda tasol i laikim Lo bilong Moses; ol man bilong olgeta narapela lain ol tu i save laikim dispela Lo.’ Saveman Joseph Klausner i bilong lain Juda, na em i stori long ol Juda i sindaun ausait long kantri Palestain long taim bilong ol aposel, na em i tok: ‘Mi hatwok long bilip olsem dispela bikpela lain Juda, inap planti milion milion, olgeta i bin lusim liklik kantri Palestain. Mi mas tok olsem, dispela lain Juda i wok long go bikpela hariap, planti bilong ol em ol man na meri bilong ol narapela lain i save bihainim lotu bilong ol Juda.’

Tasol i gat narapela samting i mekim na planti man moa yet i bihainim lotu bilong ol Juda. Profesa Shaye J. D. Cohen i raitim buk i stori long ol Juda bilong bipo, na em i tok: ‘Kirap long tri handet yia samting paslain long taim bilong Krais na i go inap 200 handet yia bihain long taim bilong em, planti man na meri bilong ol narapela lain ol i kirap bihainim lotu bilong ol Juda. Tasol i gat planti man moa yet bilong ol narapela lain ol i laikim sampela pasin bilong lotu bilong ol Juda, tasol ol i no kamap man tru bilong bihainim dispela lotu.’ Ol dispela man i no kamap man tru bilong bihainim lotu bilong ol Juda, Klausner na Cohen i kolim ol olsem ol man i save aninit long God. Dispela tok i save kamap planti taim long ol buk long tok Grik ol i bin raitim long dispela taim.

Ol man bilong narapela lain i bihainim lotu bilong ol Juda na ol man i save stap aninit long God, ol i narapela narapela olsem wanem? Man bilong narapela lain i bihainim lotu bilong ol Juda, em i bin kamap man tru bilong bihainim dispela lotu, na ol man i tingim em olsem wanpela Juda, long wanem, em i bilip long God bilong ol Israel (em i sakim ol narapela god), na em i katim skin, na em i bung wantaim lain Israel. Tasol Cohen i tok long ol man i save aninit long God, na em i tok: ‘Tru, ol dispela man bilong ol narapela lain ol i save bihainim planti pasin bilong ol Juda na ol i lotuim God bilong ol Juda, tasol ol i no tingim ol yet olsem wanpela Juda, na ol narapela i no tingim ol olsem wanpela Juda.’ Klausner i tok ol i ‘stap olsem namel,’ long wanem, ol i kisim lotu Juda na ol i ‘bihainim sampela pasin bilong en, tasol ol i no kamap Juda tru.’

Ating sampela i bin toktok wantaim ol Juda i save raun autim tok, o ol i bin lukim pasin na wokabaut bilong ol Juda em i narapela kain, na dispela i bin kirapim ol long kisim save long God. Tasol Baibel Septuagint em nambawan bikpela samting i bin helpim ol dispela man i save aninit long God long kisim save long God Jehova. Yumi no save tru tru olsem i gat hamas manmeri i stap aninit long God long taim bilong ol aposel, tasol Baibel Septuagint i bin mekim wok long bringim sampela save bilong God i go kamap long ol kantri em Gavman Rom i bosim. Na long rot bilong Septuagint wanpela bikpela wok inap kamap.

Septuagint i Bin Mekim Bikpela Wok

Septuagint i bin mekim bikpela wok bilong bringim tok bilong lotu Kristen i go kamap long planti hap. Taim kongrigesen Kristen i kamap long Pentikos long yia 33 C.E., planti Juda i save tok Grik ol i stap. Na sampela man bilong ol narapela lain i save bihainim lotu bilong ol Juda, ol i kamap disaipel bilong Krais long dispela taim. (Aposel 2:​5-​11; 6:​1-6; 8:​26-​38) Ol hap bilong Baibel ol aposel na disaipel bilong Jisas i bin raitim, ol i bilong helpim ol man i stap long olgeta hap, olsem na ol i raitim long tok ples Grik.a Olsem na planti tok bilong Ol Skripsa Hibru ol i kamapim long Ol Skripsa Grik, ol i bin kisim long Baibel Septuagint.

Ol Juda bilong skin na ol man bilong ol narapela lain i save bihainim lotu bilong ol Juda, ol i laik kisim tok bilong Kingdom, na i gat sampela moa ol i laikim, olsem: Kornilius em i man bilong narapela lain, na “em i save bihainim gut pasin God i laikim. Na em wantaim olgeta lain i stap long haus bilong en ol i save aninit long God. Em i save givim planti mani samting bilong helpim ol Juda i sot long ol samting. Na oltaim em i save beten long God.” Long yia 36 C.E., Kornilius wantaim famili bilong em na sampela moa ol i bung long haus bilong em, em namba wan lain bilong ol manmeri bilong ol narapela lain i kisim baptais olsem disaipel bilong Krais. (Aposel 10:​1, 2, 24, 44-​48; skelim wantaim Luk 7:​2-​10.) Taim aposel Pol i raun long hap bilong Esia Maina na kantri Grik, em i autim tok long planti man bilong ol narapela lain em ol i save aninit long God, na em i autim tok long “sampela Grik i save lotu long God.” (Aposel 13:​16, 26; 17:⁠4) I gat wanem as na Kornilius na ol dispela narapela i redi long kisim gutnius? Baibel Septuagint i bin helpim ol. Wanpela saveman i tok, Baibel Septuagint ‘i bin mekim bikpela wok tru, na sapos i no gat dispela buk, orait bai i no gat lotu Kristen, na bai i no gat pasin na sindaun bilong ol man long hap bilong wes olsem nau yumi lukim.’

Septuagint i Lusim Namba Olsem Wanpela Buk Em God i Bin Stiaim Wok Bilong Tanim

Planti man long olgeta hap ol i save mekim bikpela wok long Septuagint, na dispela i mekim na bihain ol Juda i sakim dispela buk. Olsem na taim ol Juda na ol Kristen i toktok wantaim, ol Juda i tok, Septuagint em i wanpela Baibel ol man i bin tanim kranki. I kam inap long yia 100 C.E., ol Juda i sakim tru dispela buk em pastaim ol i bin litimapim nem bilong en olsem wanpela buk em spirit bilong God yet i bin stiaim ol man long tanim. Ol rabai i sakim dispela stori nating bilong 72 man bilong tanim tok, na ol i tok: ‘Wanpela taim 5-pela hetman i tanim tok bilong Tora i go long tok Grik na ol i givim long King Tolemi, na dispela i makim olsem taim nogut bai painim ol Israel, wankain olsem taim ol i wokim bulmakau gol, long wanem, Tora em i wanpela buk ol man i no inap tanim stret.’ Bilong Tora i ken wankain stret olsem tingting bilong ol rabai, ol rabai i putim tok long kamapim wanpela nupela Baibel long tok Grik. Dispela samting i bin kamap bihain long yia 100 C.E. Man i mekim dispela wok, em Akwila​—⁠em wanpela man bilong narapela lain i save bihainim lotu bilong ol Juda, na em i wanpela disaipel bilong rabai Akiba.

Ol Juda i no mekim wok moa long Septuagint, tasol nupela Misin Katolik i kirap mekim bikpela wok long en na em i kamap olsem “Olpela Testamen” bilong ol i go inap long taim Jerom i wokim Baibel Vulgate long tok Latin. Tru, buk ol i tanim em i no inap kisim ples bilong buk ol i bin raitim long pastaim, tasol Septuagint i bin mekim bikpela wok bilong bringim save bilong God Jehova na Kingdom bilong em long han bilong Krais Jisas i go kamap long planti hap. Tru tumas, Septuagint em i wanpela Baibel i bin mekim bikpela wok tru long olgeta hap.

[Futnot]

[Piksa long pes 31]

Planti man em Pol i autim tok long ol, ol i bin kisim gut ol tok bilong “Septuagint”

[Piksa Kredit Lain long pes 29]

Courtesy of Israel Antiquities Authority