Abraham—Gutpela Piksa Long Pasin Bilong Bilip
“Abraham em i stap namba wan tumbuna bilong olgeta man i . . . bilip.”—ROM 4:11.
1, 2. (a) Ol Kristen tru bilong nau i save tingim wanem pasin bilong Abraham? (b) Bilong wanem Baibel i kolim Abraham olsem ‘namba wan tumbuna bilong olgeta man i bilip’?
EM I tumbuna bilong wanpela strongpela lain, em i wanpela profet, na bisnisman, na wanpela lida. Tasol ol Kristen long nau i save tingim wanpela pasin bilong em i kirapim God Jehova long tingim em olsem wanpela pren—em strongpela bilip bilong em. (Aisaia 41:8; Jems 2:23) Nem bilong em Abraham, na Baibel i kolim em olsem “namba wan tumbuna bilong olgeta man i . . . bilip.”—Rom 4:11.
2 Tasol ol man i bin stap paslain long Abraham, olsem Abel, Enok, Noa, ol tu i bilip, a? Em i stret, tasol God i wokim kontrak wantaim Abraham yet olsem Em bai mekim gut long olgeta lain bilong graun. (Stat 22:18, NW ) Olsem na long tok piksa em i kamap namba wan tumbuna bilong olgeta man ol bai bilip long dispela Pikinini em God i tok promis long salim i kam. (Galesia 3:8, 9) Yumi ken tingim Abraham i kain olsem tumbuna bilong yumi, long wanem, bilip bilong em i stap olsem piksa yumi ken bihainim. Olgeta samting em i bin mekim i kamapim strongpela bilip bilong em, long wanem, i gat planti traim na hevi i bin painim em insait long dispela taim. Paslain long taim nambawan bikpela traim i painim em—olsem em i mas givim pikinini bilong em Aisak long God olsem ofa—Abraham i bin kamapim klia strongpela bilip bilong em long planti ol narapela traim i bin painim em. (Stat 22:1, 2) Orait nau yumi ken skelim sampela samting i bin kamap bilong traim bilip bilong em na bai yumi ken save, ol dispela traim inap skulim yumi long wanem ol samting long nau.
God i Tokim Em Long Lusim Ur
3. Baibel i tokim yumi olsem wanem long sindaun bilong Abram taim em i yangpela yet?
3 Baibel i stori long Abram (bihain ol i kolim em Abraham) long namba wan taim long Stat 11:26, i tok: “Tera i gat 70 krismas na em i kamap papa bilong Abram na Nahor na Haran.” Abraham em i wanpela tumbuna pikinini bilong Siem, em man bilong i stap aninit long God. (Stat 11:10-24) Olsem Stat 11:31 i tok, Abram i bin sindaun wantaim famili bilong em long “taun Ur long hap bilong Kaldia,” em wanpela taun i gat planti bisnis samting long en na bipo em i stap long hap is bilong wara Yufretis.a Olsem na em i no go bikpela insait long lain i save raun raun na slip long haus sel, nogat—em i bin sindaun long wanpela taun i gat planti gutpela samting bilong skin. Long Ur i gat ol bikpela maket na ol man inap baim ol gutpela gutpela samting i bin kam long ol narapela kantri. Long arere bilong ol rot i gat ol bikpela haus ol i bin penim long waitpela pen, na i gat ol paip wara insait long ol haus.
4. (a) Ol man i sindaun long Ur na ol i lotuim God tru, ol i gat wanem hatwok? (b) Olsem wanem Abram i kisim pasin bilong bilip long Jehova?
4 Tru, Ur i gat planti gutpela samting bilong skin, tasol em inap givim bikpela hatwok tru long man i laik lotuim trupela God. Pasin bilong lotuim ol god giaman na kain kain bilip bilong ol tumbuna i pulap tru long dispela taun. I gat wanpela kain haus lotu long dispela hap em het bilong en i go antap olsem wanpela taua, na em i bilong givim biknem long god bilong mun, em Nana. Yumi ken ting ol wanples i bin strong long Abram i mas insait long dispela lotu nogut, na ating sampela wanblut tu i laik subim em long mekim olsem. Sampela stori bilong ol Juda i tok, papa bilong Abram, em Tera, em i man bilong wokim ol imis. (Josua 24:2, 14, 15) Dispela tok i tru o nogat, em yumi no save. Tasol yumi save Abram i no bin mekim lotu giaman i gat ol pasin nogut tru long en. Lapun tumbuna bilong em, Siem, i stap yet na ating em i bin givim save long Abram long God tru. Olsem na Abram i bilip long Jehova—long Nana, nogat!—Galesia 3:6.
Samting Bilong Traim Bilip
5. Taim Abram i stap yet long Ur, God i givim wanem tok na promis long em?
5 Orait bihain wanpela samting i kamap bilong traim bilip bilong Abram. God i kamap long em na i tokim em: “Yu lusim graun bilong yu na ol brata bilong yu, na ol lain bilong papa bilong yu, na yu go long wanpela graun bai mi soim yu long en. Bai mi mekim ol lain tumbuna bilong yu i kamap bikpela lain tru. Na bai mi mekim gut long yu na mekim yu i gat biknem tru. . . . Bai mi mekim gut long ol man i save mekim gutpela pasin long yu. Tasol bai mi yet mi bagarapim ol man i tok long bagarapim yu. Na long yu, bai mi mekim gut long olgeta lain manmeri bilong graun.”—Stat 12:1-3; Aposel 7:2, 3.
6. Bilong lusim Ur, bilong wanem Abram i mas bilip strong?
6 Abram i lapun pinis na em i no gat pikinini. Olsem wanem lain tumbuna pikinini bilong em bai kamap “bikpela lain tru”? Na dispela kantri God i tok em i mas i go long en, em i stap we? Long dispela taim God i no tokim em. Olsem na Abram i mas bilip strong bambai em i ken lusim gutpela sindaun bilong em long Ur. Wanpela buk (Family, Love and the Bible) i stori long ol lain bilong bipo bipo na i tok: ‘Taim wanpela bilong famili i bin mekim bikpela rong, nambawan bikpela strafe tru em inap kisim, em ol bai rausim em long famili, olsem em i no insait moa long famili. Olsem na taim Abram i lusim kantri na lain bilong em olsem God i bin tokim em long mekim, dispela i kamapim long ples klia tru pasin bilong em long bihainim tok bilong God na bilip long em.’
7. Olsem wanem ol wankain traim inap painim ol Kristen long nau olsem i bin painim Abram?
7 Ol wankain traim inap painim ol Kristen long nau. Olsem Abram, ating ol man i strong long yumi mas putim ol samting bilong skin i go pas long ol samting yumi mas mekim bilong lotu tru long God. (1 Jon 2:16) Na ating yumi kisim hevi long sampela bilong famili em ol i no bilip, na sampela wanblut i bin raus long kongrigesen, em ol i laik pulim yumi long poromanim ol lain i no bihainim gutpela pasin. (Matyu 10:34-36; 1 Korin 5:11-13; 15:33) Olsem na Abram i stap olsem gutpela piksa tru. Em i putim pasin bilong i stap pren bilong God i go pas long olgeta narapela samting—famili bilong em tu. Em i no save gut long olsem wanem God bai truim ol tok promis bilong em, o em bai mekim long wanem taim o long wanem hap. Tasol em i bilip tru olsem ol dispela tok promis bai kamap tru, na em i orait long mekim olgeta samting i stret wantaim dispela bilip. Dispela pasin bilong em i strongim yumi tru long putim Kingdom i go pas long olgeta narapela samting long i stap bilong yumi!—Matyu 6:33, Nupela Testamen na Ol Sam.
8. Strongpela bilip bilong Abram i bin mekim wanem long famili bilong em? Ol Kristen inap kisim wanem save long dispela?
8 Olsem wanem long famili stret bilong Abram? Yumi save, strongpela bilip bilong em i mekim bikpela samting long ol, long wanem, meri bilong em Sarai, na pikinini bilong brata bilong em, Lot, em papa i dai pinis, ol tu i bihainim tok bilong God na ol i lusim Ur. Bihain brata bilong Abram, em Nahor, na sampela pikinini bilong em ol i lusim Ur na i go sindaun long Haran na ol i lotuim Jehova long dispela hap. (Stat 24:1-4, 10, 31; 27:43; 29:4, 5) Na papa bilong Abram, em Tera, em tu i orait long lusim Ur na go wantaim pikinini bilong em! Olsem na Baibel i makim olsem em i het bilong famili na i tok em yet i bin kisim famili bilong em na ol i lusim Ur na i go long Kenan. (Stat 11:31) Olsem na sapos yumi autim tok long ol wanblut long gutpela pasin, ating dispela tu bai kamapim gutpela samting, a?
9. Abram i mekim wanem ol wok bilong redi long wokabaut? Olsem wanem yumi ken ting em i mas lusim sampela samting bilong mekim olsem?
9 Bilong lusim Ur, pastaim Abram i gat planti samting bilong mekim. Em i mas salim haus na graun na ol narapela samting bilong em na baim ol haus sel, na ol kamel, na kaikai, na ol narapela samting. Em i mas mekim hariap ol samting, olsem na ating hap mani bilong em i lus, tasol em i amamas long bihainim tok bilong Jehova. Orait bihain ol samting i redi pinis, na ol lain bilong Abram wantaim ol kamel samting i stap pinis ausait long banis bilong Ur na ol i redi long wokabaut. Man! Em i wanpela bikpela de tru bilong ol, a? Ol i bihainim wara Yufretis i go long hap bilong not-wes. Insait long sampela wik ol i wokabaut inap olsem 1,000 kilomita na ol i kamap long wanpela taun bilong Mesopotemia long hap not, ol i kolim Haran, em ples ol lain bilong raun long kamel i save malolo long en.
10, 11. (a) Bilong wanem Abram i sindaun inap sampela hap taim long Haran? (b) Ol Kristen i save lukautim ol lapun papamama, yumi ken givim wanem gutpela tok long ol bilong strongim bel bilong ol?
10 Abram i sindaun long Haran, long wanem, em i tingim lapun papa bilong em Tera. (Wok Pris 19:32) Long nau tu, planti Kristen ol i gat wok long lukautim papamama i lapun pinis o i gat sik, na sampela i mas senisim sampela samting long sindaun bilong ol bilong mekim olsem. Taim ol i mas mekim olsem, ol i ken bilip tru olsem “God i laikim tumas” dispela pasin sori ol i mekim.—1 Timoti 5:4.
11 Orait sampela yia i go pinis. “Tera i gat 205 krismas na em i dai long dispela taun.” Yumi save, Abram i bel hevi stret long papa i dai, tasol taim em i krai sori pinis, kwiktaim em i lusim Haran na i go. “Long dispela taim Abram i gat 75 krismas. Abram i kisim meri bilong en, Sarai, na Lot, pikinini bilong brata bilong en, na ol i go wantaim. Na ol i kisim ol wokman na wokmeri bilong ol tu, na olgeta samting ol i bin kisim long Haran, na ol i wokabaut i go long graun Kenan.”—Stat 11:32; 12:4, 5.
12. Taim Abram i sindaun long Haran, em i mekim wanem?
12 Baibel i tok, taim Abram i sindaun long Haran, em i bin kisim planti samting. Tru, em i bin lusim planti samting bilong skin bambai em i ken lusim Ur, tasol taim em i lusim Haran em i wanpela maniman. Yumi save, God i bin mekim gut long em na em i kisim ol dispela samting. (Saveman 5:19) Tru, God i no tok promis long givim planti mani kago long lain bilong em long nau, tasol ol manmeri i “lusim haus o brata o susa” bilong mekim wok bilong Kingdom, em i save lukautim ol long ol samting ol i mas kisim, olsem em i bin tok promis long mekim. (Mak 10:29, 30) Na Abram i bin “kisim ol wokman na wokmeri” tu. Rait bilong Jerusalem Targum na Chaldee Paraphrase i tok Abram i bin autim bilip bilong em bilong kirapim ol man long lotuim God bilong em. (Stat 18:19) Olsem wanem? Bilip bilong yu i save kirapim yu long autim tok long ol lain i sindaun klostu long yu, o ol wanwok o wanskul? Abram i no sindaun gut long Haran na lusim tok God i bin givim long em, nogat. Long dispela hap taim em i mekim ol wok i kamapim gutpela samting. Tasol nau em i mas lusim dispela ples. “Orait Abram i lusim taun Haran na i go olsem Bikpela i bin tokim em.”—Stat 12:4.
Em i Brukim Wara Yufretis
13. Wanem taim Abram i bin brukim wara Yufretis? Dispela samting em i mekim i bikpela samting olsem wanem?
13 Em nau, Abram i mas kirap wokabaut gen. Em i lusim Haran na i go long hap wes inap olsem 90 kilomita. Ating em i malolo long wanpela ples long Karkemis em ol man bilong bisnis i save baim na salim ol samting. Planti lain bilong raun long ol kamel na mekim wok bisnis ol i save brukim wara Yufretis long dispela hap.b Orait wanem taim tru Abram wantaim lain bilong em i bin brukim dispela wara? Baibel i makim olsem dispela samting i bin kamap 430 yia paslain long taim ol Juda i lusim Isip long Nisan 14, long yia 1513 B.C.E. Kisim Bek 12:41 i tok: “Long dispela de stret ol i bin i stap long Isip 430 yia pinis, ol lain manmeri bilong Bikpela i lusim Isip.” Olsem na yumi ken ting dispela kontrak God i bin mekim wantaim Abram i kirap mekim wok bilong en long Nisan 14, long yia 1943 B.C.E., taim Abram i bihainim tok bilong God na brukim wara Yufretis.
14. (a) Long bilip bilong em, i olsem Abram inap lukim wanem samting? (b) Olsem wanem lain bilong God long nau i kisim gutpela blesing tru, winim Abram?
14 Abram i bin lusim wanpela taun i gat planti samting bilong skin. Tasol nau em inap lukim long tingting “dispela taun i stap strong tru,” em wanpela stretpela gavman bai bosim ol man. (Hibru 11:10) Abram i gat liklik save tasol long dispela samting, tasol em i lukim long tingting sampela samting God i laik mekim bilong kisim bek ol man bilong graun i save dai. Tasol long nau yumi kisim gutpela blesing tru—yumi gat planti save moa long ol samting God i laik mekim, winim Abram. (Sindaun 4:18) Dispela “taun,” olsem Kingdom o gavman em Abram i wetim, nau em i stap tru tru—em i kamap pinis long heven long 1914. Olsem na dispela i mas kirapim yumi long mekim ol wok i kamapim olsem yumi bilip long Jehova na wetim em, a?
Kamap Pinis Long Graun Bilong Promis
15, 16. (a) Bilong wanem Abram i mas i gat strongpela bel bambai em i ken wokim wanpela alta bilong Jehova? (b) Ol Kristen long nau i ken mekim wanem na bai ol i gat strongpela bel olsem Abram?
15 Stat 12:5, 6 i tok: “Ol i kamap pinis long Kenan, na Abram wantaim ol lain bilong en i wokabaut long dispela graun na i go kamap long . . . taun Sekem.” Sekem i stap long hap not bilong Jerusalem inap 50 kilomita, na i stap long wanpela ples daun em graun i gat planti gris long en. Sampela i bin kolim dispela hap olsem “ples paradais bilong graun holi.” Tasol “long dispela taim ol man bilong Kenan i stap yet long dispela graun.” Ol lain bilong Kenan i save mekim ol pasin nogut tru, olsem na Abram i mas wok strong bambai famili bilong em i no ken kisim pasin nogut bilong ol.— Kisim Bek 34:11-16.
16 Orait nau long namba tu taim “Bikpela i kamap long Abram na i tok, ‘Bai mi givim dispela graun long ol lain pikinini bilong yu.’ ” Ating Abram i amamas tru long dispela! Tasol em i mas i gat strongpela bilip bambai em i ken amamas long samting ol tumbuna pikinini tasol bai kisim long bihain. Tasol taim Abram i kisim dispela tok, em i “wokim alta bilong lotu long Bikpela long dispela hap Bikpela i bin kamap long em.” (Stat 12:7) Wanpela saveman bilong Baibel i tok: ‘Taim man i sanapim alta long wanpela hap graun, dispela i makim olsem nau dispela graun i bilong em—em i bin kamapim bilip bilong em na long dispela as i stret em i ken kisim dispela graun.’ Na taim em i wokim dispela alta, em kamapim olsem em i gat strongpela bel. Yumi ken ting dispela alta i wankain olsem ol alta em bihain kontrak bilong Lo i tok long en, olsem ol i mas wokim long ston ol i no bin katim long ain samting. (Kisim Bek 20:24, 25) Em bai narapela kain tru long ol alta ol Kenan i save mekim wok long en. Em nau, Abram i no pret long kamapim long ples klia olsem em i man bilong lotuim God tru, Jehova, maski ol man inap bel nogut long em na bagarapim em. Orait olsem wanem long yumi? Sampela bilong yumi—na moa yet ol yangpela—i save surik long tokim ol lain i stap klostu o ol wanskul olsem yumi save lotuim Jehova? Yes, pasin bilong Abram olsem em i gat strongpela bel na i no pret, em i mas kirapim yumi olgeta long amamas long i stap wokman bilong Jehova!
17. Olsem wanem Abram i kamapim klia olsem em i man bilong autim nem bilong God? Dispela i kirapim ol Kristen long nau long tingim wanem samting?
17 Maski Abram i go we, em i putim lotu bilong Jehova i go pas long olgeta narapela wok. “Bihain Abram i go long hap saut, long wanpela maunten i stap long hap bilong sankamap klostu long taun Betel. Na em i wokim kem namel long Betel na taun Ai. . . . Na Abram i wokim alta long dispela hap na em i kolim nem bilong Bikpela na i lotu long em.” (Stat 12:8) Long tok Hibru, dispela tok “kolim nem,” i gat narapela insait tu bilong en, olsem “autim nem.” Yumi ken save, Abram i bin autim nem bilong Jehova namel long ol lain Kenan i sindaun klostu long em. (Stat 14:22-24) Dispela i kirapim yumi long tingim wok bilong yumi, olsem yumi mas insait tru long wok bilong autim nem bilong Jehova long ol man.—Hibru 13:15; Rom 10:10.
18. Abram i stap olsem wanem wantaim ol lain bilong Kenan?
18 Abram i no bin stap longtaim long ol dispela hap. “Bihain Abram wantaim ol lain bilong en i lusim dispela hap na ol i wokabaut gen i go olsem long hap saut. Na ol i wokim ol kem i go inap ol i kamap long distrik Negev”—em wanpela ples drai i stap long hap saut bilong ol maunten bilong Juda. (Stat 12:9) Taim em i lusim wanpela hap na i go long nupela hap, em i save kamapim long ol lain bilong dispela hap olsem em i man bilong lotuim Jehova, na long dispela rot Abram wantaim ol wanhaus bilong em i bin ‘tokaut olsem ol i stap long dispela graun olsem ol manmeri bilong narapela kantri, na ol i kam i stap liklik taim tasol long dispela graun.’ (Hibru 11:13) Long olgeta taim ol i abrusim pasin bilong prenim tumas ol haiden i stap klostu long ol. Ol Kristen long nau ol tu i mas i stap olsem ol i “no bilong dispela graun.” (Jon 17:16) Tru, yumi save mekim gutpela pasin long ol lain i sindaun klostu long yumi na ol wanwok, tasol yumi save was gut na bai yumi no go insait long sampela pasin i kamapim tingting bilong dispela graun i stap olsem birua bilong God.—Efesus 2:2, 3.
19. (a) Bilong wanem pasin bilong raun raun olsem tripman bai givim sampela hatwok long Abram na Sarai? (b) Wanem sampela traim moa i laik painim Abram?
19 Yumi save, pasin bilong raun raun olsem ol tripman, dispela i mas givim hatwok long Abram na Sarai. Ol i save kaikai ol samting ol i kisim long ol lain sipsip samting bilong ol, na i no long ol kaikai ol inap baim long wanpela maket bilong Ur i gat planti kaikai long en; ol i save sindaun long haus sel, na i no long wanpela gutpela haus. (Hibru 11:9) Long olgeta de Abram i gat planti wok bilong mekim; em i mas lukautim ol lain sipsip samting bilong em na bosim ol wokboi bilong em. Yumi ken ting Sarai i bin mekim ol wok em ol meri long lain bilong em i save mekim bipo, olsem tanim plaua, wokim bret, lumim laplap samting long gras bilong sipsip, samapim klos. (Stat 18:6, 7; 2 King 23:7; Sindaun 31:19; Esekiel 13:18) Tasol i gat ol nupela traim i laik kamap. I no longtaim na wanpela samting bai painim ol em ol inap kisim bagarap long en! Olsem wanem? Abram bai i gat strongpela bilip inap long em i ken winim dispela traim?
[Ol Futnot]
a Long nau, wara Yufretis i save ran long hap is bilong olpela taun Ur na i stap longwe long en inap olsem 16 kilomita. Tasol i gat sampela samting i makim olsem long bipo bipo dispela wara i save ran long hap wes bilong Ur. Olsem na bihain Baibel i stori olsem Abram i bin stap long “hapsait bilong wara Yufretis.”—Josua 24:3.
b Sampela handet yia bihain, King Asurnasipal Namba 2 bilong Asiria i mekim wok long ol bet ol i wokim long diwai bambai em i ken brukim wara Yufretis klostu long Karkemis. Ating Abram tu i mas mekim olsem, o em wantaim lain bilong em i wokabaut tasol na brukim wara, em Baibel i no tok.
Yu Tingim?
• Bilong wanem Baibel i kolim Abram olsem ‘namba wan tumbuna bilong olgeta man i bilip’?
• Bilong wanem Abram i mas i gat strongpela bilip bambai em i ken lusim taun Ur bilong ol Kaldia?
• Olsem wanem Abram i kamapim olsem em i putim lotu bilong Jehova i go pas long olgeta narapela samting?
[Mep long pes 16]
(Bilong save ol dispela rait i stap we long pes, lukim buk o magasin)
RAUN BILONG ABRAM
Ur
Haran
Karkemis
KENAN
Biksolwara Mediterenian
[Kredit Lain]
Based on a map copyrighted by Pictorial Archive (Near Eastern History) Est. and Survey of Israel
[Piksa long pes 15]
Bilong lusim gutpela sindaun bilong em long Ur, Abram i mas i gat strongpela bilip
[Piksa long pes 18]
Abram na ol wanhaus bilong em i sindaun long ol haus sel, na long dispela rot ol i ‘tokaut olsem ol i stap long dispela graun olsem ol manmeri bilong narapela kantri, na ol i kam i stap liklik taim tasol long dispela graun’