Abraham i Bin i Gat Ol Kamel o Nogat?
BAIBEL i stori olsem Fero i bin givim ol animal long Abraham, na sampela bilong ol, em ol kamel. (Stt. 12:16) Taim wokboi bilong Abraham i go long Mesopotemia, em i “kisim 10-pela kamel bilong Abraham” i go wantaim em. Olsem na Baibel i tok klia olsem Abraham i bin i gat ol kamel long yia 1900 B.C.E. samting.—Stt. 24:10.
Sampela i no wanbel long dispela tok. Buk New International Version Archaeological Study Bible i tok: “Ol saveman i tok ol dispela stori bilong ol kamel i no stret, bikos planti bilong ol i ting ol man i kirap lukautim ol kamel long yia 1200 B.C.E., em longpela taim bihain long taim bilong Abraham.” Olsem na ol man inap ting ol stori Baibel i mekim long ol kamel i no stret, long wanem, dispela hap taim em Baibel i stori long en, ol man i no bin lukautim ol kamel.
Tasol sampela saveman i tok, i tru olsem pasin bilong lukautim kamel i bin kamap bikpela klostu long yia 1000 B.C.E, tasol dispela i no makim olsem ol man i no bin mekim wok long ol kamel paslain long dispela. Buk Civilizations of the Ancient Near East i tok: “Sampela wok painimaut ol i mekim long nau i kamapim olsem ol man i bin kirap lukautim ol kamel long saut-is bilong Arebia sampela hap taim paslain long yia 2000 B.C.E. Pastaim ating ol i lukautim ol bilong kisim susu, gras, skin, na abus long ol, tasol ating i no longtaim na ol i luksave olsem kamel inap karim ol kago samting.” Ol bun na ol narapela samting ol saveman i bin painim insait long graun i kamapim olsem dispela yia em buk i makim paslain long taim bilong Abraham, em i stret.
Sampela rait tu i kamapim olsem ol kamel i bin i stap. Dispela buk i tok moa: “Long Mesopotemia, ol rait ol i bin katim long plet ston i stori long dispela animal [kamel] na piksa bilong en i stap long sampela gris kandel. Dispela i soim olsem dispela animal i bin kamap long Mesopotemia long 1900 B.C.E. samting,” em long taim bilong Abraham.
Sampela saveman i ting ol bisnisman bilong Saut Arebia i save maketim ol paura i gat gutpela smel, ol i bin yusim kamel bilong karim maket bilong ol i go brukim ples wesan nating bilong i go long hap not. Ol i go long ol hap olsem Isip na Siria, olsem na ol i kisim kamel i go long ol dispela hap. Planti man i bin mekim dispela wok bisnis long yia 2000 B.C.E. Na Stat 37:25-28 i stori long ol lain Ismael husat i bin yusim kamel bilong karim paura i gat gutpela smel i go long Isip, dispela em klostu 100 yia bihain long taim bilong Abraham.
Ating planti man long Midel Is bilong bipo tru i no bin mekim wok long ol kamel long yia 1900 B.C.E. samting, tasol ol samting i kamapim klia olsem ol man i save long dispela animal. Wanpela buk The International Standard Bible Encyclopedia i tok: “Yumi no ken ting moa olsem stori bilong kamel long taim bilong Abraham i no stret, long wanem, i gat planti samting i kamapim olsem ol man i bin lukautim ol kamel paslain long taim bilong Abraham.”