‘Yumi Bilip na Wokabaut’
“Nau yumi bilip tasol long em na yumi wokabaut. Yumi no lukim em yet.”—2 KORIN 5:7.
1. Wanem insait bilong dispela tok ‘bilip na wokabaut’?
LONG olgeta taim yumi beten long pasin i stret wantaim ol tok bilong Baibel, yumi soim olsem yumi bilip. Na taim yumi autim tok bilong Kingdom, dispela tu i soim olsem yumi bilip. Na taim yumi dediketim laip bilong yumi long Jehova, yumi kamapim long ples klia olsem yumi laik ‘bilip na wokabaut,’ olsem yumi laik bai bilip i mas bosim wokabaut bilong yumi.—2 Korin 5:7; Kolosi 1:9, 10.
2. Sapos yumi insait long sampela wok bilong kongrigesen, olsem wanem dispela i no makim olsem yumi gat bilip?
2 Tasol sapos yumi laik bihainim tru pasin bilong bilip na wokabaut, bilip bilong yumi i mas i gat strongpela as bilong en. (Hibru 11:1, 6) Planti man i laikim ol Witnes Bilong Jehova, long wanem, ol i lukim olsem ol Witnes i gat stretpela pasin na narapela i laikim tru narapela. Em gutpela, tasol dispela i no makim olsem ol dispela kain man ol i bilip. Ating sampela i gat poroman marit o papa o mama ol i stap strong long bilip, na ating sampela taim ol i insait long sampela wok bilong God dispela poroman marit o papa o mama i mekim. Sapos wanpela insait long famili bilong yu i stap strong long bilip olsem, em i gutpela blesing yu kisim, tasol dispela tu i no inap—yu yet yu mas laikim tru God na bilip long em.—Luk 10:27, 28.
3. (a) Yumi yet i mas i gat wanem bilip long Baibel bambai bilip bilong yumi i gat as tru bilong en? (b) Bilong wanem sampela man i save bilip kwik olsem Baibel em i tok bilong God na sampela i no save bilip kwik?
3 Ol man i bilip na wokabaut, ol i bilip tru olsem Baibel em i tok bilong God. I gat planti samting i kamapim klia olsem “spirit bilong God yet i bin kamapim olgeta tok i stap long buk bilong God.”a (2 Timoti 3:16) Orait man i mas skelim hamas bilong ol dispela samting bambai em inap bilip tru olsem Baibel em i tok bilong God? I stap bilong em kirap long taim em i pikinini yet, na ol samting i bin painim em, na save em i bin kisim, ating dispela bai makim olsem em bai bilip kwik o nogat. Samting i save kirapim wanpela man long bilip, sampela taim dispela i no save kirapim narapela man long bilip. Sampela man, maski yumi soim planti samting long ol i kamapim klia tru olsem Baibel em i tok bilong God, bai ol i sakim yet ol dispela samting. Bilong wanem ol i mekim olsem? Long wanem, i gat sampela laik i pas strong tru long bel bilong ol. (Jeremaia 17:9) Olsem na maski man i tok em i laik save long ol samting God i laik mekim, ating bel bilong em i gat bikpela laik tru long ol man bilong dispela graun i mas orait long em. Ating em i no laik lusim ol pasin bilong em i save pait wantaim ol lo bilong Baibel. Tasol sapos man i hangre tru long kisim tok i tru, na em i no giamanim bel bilong em yet, na em i gat pasin daun, orait bihain em bai pilim tru olsem Baibel em i tok bilong God.
4. Man i mas mekim wanem bambai em inap kisim bilip?
4 Planti man, taim yumi helpim ol long kisim save long Baibel, insait long sampela mun tasol ol i pilim olsem ol i kisim save pinis long planti samting i kamapim klia tru olsem Baibel em i tok bilong God. Sapos dispela i kirapim bel bilong ol long larim Jehova i skulim ol, orait isi isi ol samting ol i lainim bai mekim tingting na laik na bel bilong ol i kamap wankain olsem ol samting ol i lainim. (Song 143:10) Rom 10:10 i tok, “long bel” man i save bilip. Dispela kain bilip i save kamapim olgeta tingting i stap long bel bilong em, na dispela bai kamap ples klia long pasin na wokabaut bilong em.
Noa i Gat Strongpela Bilip
5, 6. Bilip bilong Noa i gat wanem as bilong en?
5 Noa em wanpela man i gat strongpela bilip. (Hibru 11:7) Wanem as bilong bilip bilong em? Noa i gat tok bilong God, tasol dispela tok i no stap long wanpela buk samting—God yet i bin givim tok long em. Stat 6:13 i tok: “God i tokim Noa olsem, ‘Olgeta manmeri i wok long pait na bikhet tasol, olsem na mi laik bagarapim ol. Bai mi pinisim tru olgeta lain manmeri.’ ” Jehova i tokim Noa long wokim wanpela sip, na Jehova i tokim em long pasin bilong wokim dispela sip. Na God i tok moa olsem: “Bai mi mekim bikpela tait i kamap long graun, bilong bagarapim olgeta samting i gat laip. Na olgeta samting i stap long graun bai i dai.”—Stat 6:14-17.
6 Olsem wanem? Paslain long dispela taim ren i bin kam daun? Baibel i no tok. Stat 2:5 i tok: “[God] i no salim ren i kam daun yet.” Tasol Moses, em man i bin stap planti handet yia bihain long taim bilong Noa, em i kolim kain tok olsem taim em i stori long ol samting i bin kamap paslain tru long taim bilong Noa—em i no toktok long taim bilong Noa yet. Olsem yumi lukim long Stat 7:4, Jehova i stori long ren taim em i toktok wantaim Noa, na Noa i kisim gut dispela tok bilong em. Tasol ol samting Noa inap lukim, dispela i no as bilong bilip bilong em. Aposel Pol i tok, “God i toksave long [Noa] long samting bai i kamap bihain, em samting Noa i no lukim yet.” God i tokim Noa olsem em bai salim “bikpela tait” i kam long graun, o “wara bilong ples antap,” olsem sta daunbilo bilong Stat 6:17 i tok long Baibel New World Translation. I kam inap long taim bilong Noa, kain samting olsem i no bin kamap. Tasol olgeta samting God i bin wokim i kamapim ples klia long Noa olsem God em inap tru long salim bikpela tait wara i kam na bagarapim olgeta samting long graun. Bilip i kirapim Noa na em i wokim sip.
7. (a) Bilong mekim wok God i tokim em long mekim, Noa i no gat wok long save long wanem samting? (b) Taim yumi stori long bilip bilong Noa, dispela i save helpim yumi olsem wanem? Olsem wanem bilip bilong yumi inap helpim gut ol narapela?
7 God i no bin tokim Noa long wanem de stret dispela bikpela ren bai kirap. Tasol Noa i no kisim tingting long dispela olsem em bai wet tasol na lukim samting i kamap pastaim, na wok bilong wokim sip na autim tok bai i olsem namba tu samting long i stap bilong em. Bihain God i tokim Noa long taim bilong go insait long sip. Orait, i go inap long dispela taim, “Noa i mekim olgeta samting olsem God i tokim em.” (Stat 6:22) Noa i bilip na wokabaut. Yumi tenkyu tru long em i bin mekim olsem! Em i bilip, olsem na yumi stap laip long nau. Na i wankain tu long yumi—bilip yumi kamapim em inap mekim bikpela samting long i stap bilong yumi long bihain, na i stap bilong ol pikinini bilong yumi na ol man i stap klostu long yumi.
Bilip Bilong Abraham
8, 9. (a) Wanem as bilong bilip bilong Abraham? (b) Jehova i “kamap” long Abraham long wanem rot?
8 Yumi ken tingim bilip bilong narapela man—em Abraham. (Hibru 11:8-10) Wanem as bilong bilip bilong Abraham? Em i go bikpela namel long ol manmeri bilong Ur long Kaldia em ol i save lotuim ol god giaman na ol i tingting tasol long kisim mani kago. Tasol i gat ol narapela samting i stiaim tingting bilong Abraham. Ating em i bin bung wantaim pikinini bilong Noa, em Siem, em i stap laip yet inap 150 yia taim Abraham i stap long graun. Abraham i kisim strongpela bilip olsem Jehova em i “God, Bikpela Antap Tru, em i bin wokim heven na graun.”—Stat 14:22.
9 I gat narapela samting tu i strongim tru bilip bilong Abraham. Taim “Abraham i stap long graun bilong Mesopotemia na i no i go yet long taun Haran, God . . . i kamap long Abraham. Na God i tokim em olsem, ‘Yu lusim graun bilong yu na ol brata bilong yu, na yu go long wanpela graun bai mi soim yu long en.’ ” (Aposel 7:2, 3) Jehova i “kamap” long Abraham long wanem rot? Abraham i no lukim God long ai bilong em. (Kisim Bek 33:20) Tasol ating Jehova i kamap long Abraham long wanpela driman, na em i lukim narapela kain samting i kamapim bikpela lait bilong Jehova, o Jehova i givim tok long em long maus bilong wanpela ensel. (Skelim wantaim Stat 18:1-3; 28:10-15; Wok Pris 9:4, 6, 23, 24.) Tasol maski Jehova i kamap long Abraham long wanem rot, dispela bilipman i bilip tru olsem God i givim wanpela gutpela wok long em. Orait Abraham i bilip na i bihainim tok bilong God.
10. Olsem wanem Jehova i strongim bilip bilong Abraham?
10 Abraham i no ting em i mas save long ol samting bilong dispela graun God i stiaim em i go long en na nau em inap bilip, nogat. Na em i no ting em i mas save long wanem taim God bai givim dispela graun long em na nau em inap bilip, nogat. Em i bilip, long wanem, em i save Jehova em God i Gat Olgeta Strong. (Kisim Bek 6:3) Jehova i tokim Abraham olsem em bai kamapim pikinini, tasol sampela taim Abraham i tingting olsem em bai kamapim pikinini olsem wanem. Em i wok long go lapun. (Stat 15:3, 4) Bilong strongim bilip bilong Abraham, Jehova i tokim em long lukluk i go antap long ol sta na kaunim hamas sta i stap, sapos em inap. Orait nau God i tok: “Ol tumbuna pikinini bilong yu bai i kamap planti tru, olsem ol sta.” Bel bilong Abraham i kirap tru long dispela tok. Em i save, Man bilong wokim ol dispela planti planti sta samting long antap em inap truim tok promis em i bin mekim. Abraham “i bilipim tok bilong Bikpela.” (Stat 15:5, 6) Tasol i no olsem Abraham i amamas long dispela tok em i harim na long dispela as em i bilip, nogat. Bilip bilong em i gat strongpela as tru bilong en.
11. (a) Taim Abraham i gat klostu 100 krismas, em i ting olsem wanem long tok promis bilong God olsem lapun Sara bai karim wanpela pikinini man? (b) Abraham i gat wanem kain bilip taim God i tokim em long kisim pikinini bilong em i go long maunten Moria na kilim em i dai olsem ofa?
11 Taim Abraham i gat klostu 100 krismas na meri bilong em, Sara, i gat klostu 90 krismas, Jehova i kolim gen tok promis em i bin mekim, olsem Abraham bai i gat wanpela pikinini man na Sara bai karim dispela pikinini. Abraham i tingim i stap bilong ol. “Tasol bilip bilong en i stap strong na i no slek. God i bin promis long mekim ol dispela samting, na Abraham i ting long dispela promis na em i no tubel na em i no lusim bilip. Nogat. Bilip bilong en i strongim em. Em i litimapim nem bilong God na em i save pinis olsem, God em inap mekim olsem em i bin promis long mekim.” (Rom 4:19-21) Abraham i save pinis, tok promis bilong God i no inap lus nating. Abraham i bilip, olsem na bihain, taim God i tokim em long kisim pikinini bilong em Aisak na bringim em i go long hap bilong Moria na kilim em i dai olsem ofa, Abraham i bihainim dispela tok. (Stat 22:1-12) Abraham i bilip tru olsem dispela God i bin wokim mirakel na strongim em long kamapim dispela pikinini man, em inap tu long givim laip gen long dispela pikinini bilong truim ol narapela tok promis Em i bin mekim long dispela pikinini.—Hibru 11:17-19.
12. Abraham i bilip na wokabaut inap long hamas yia? I gat wanem gutpela pe i wetim em na ol manmeri long famili bilong em ol i bin kamapim long ples klia olsem ol i gat strongpela bilip?
12 Abraham i kamapim long ples klia olsem bilip i bosim wokabaut bilong em long olgeta taim, na i no long wan wan taim tasol. Taim Abraham i stap laip, God i no bin givim wanpela hap bilong Graun Bilong Promis long em. (Aposel 7:5) Tasol Abraham i no les na go bek long Ur bilong ol Kaldia. Inap 100 yia, i go inap long taim em i dai, em i sindaun long ol haus sel long graun God i bin stiaim em i go long en. (Stat 25:7) Hibru 11:16 i stori long em na meri bilong em Sara, na pikinini bilong ol Aisak, na tumbuna pikinini bilong ol Jekop, olsem: “Ol dispela man i save tokim God olsem, ‘Yu God bilong mipela.’ Na God i no sem long dispela tok bilong ol, long wanem, em i redim pinis wanpela taun bilong ol dispela man i bilip long em, bai ol i ken i stap long en.” Tru tumas, Jehova i redim ples bilong ol long graun aninit long Kingdom bilong em i stap long han bilong Krais.
13. Husat namel long ol wokboi bilong Jehova long nau ol i kamapim klia olsem ol i gat bilip kain olsem bilong Abraham?
13 I gat sampela man namel long ol wokboi bilong Jehova long nau em ol i kain olsem Abraham. Inap planti yia pinis ol i bilip na wokabaut. Long strong God i save givim long man, ol i bin winim ol bikpela hevi tru i kain olsem maunten. (Matyu 17:20) Maski ol i no save wanem taim stret God bai givim ol samting long ol olsem em i tok promis pinis long en, ol i no lusim bilip. Ol i save, tok bilong Jehova i no inap lus nating, na ol i ting em i gutpela samting tru long ol inap i stap insait long lain Witnes bilong em. Yu tu yu pilim olsem?
Bilip i Bin Kirapim Moses
14. Wanem samting i bin kamap na i olsem as bilong bilip bilong Moses?
14 Narapela man i gat strongpela bilip, em Moses. Wanem samting i olsem as bilong bilip bilong em? Em i kirap long kisim bilip taim em i liklik yet. Tru, pikinini meri bilong king bilong Isip i bin painim Moses insait long basket long wara Nail na i kisim em olsem pikinini bilong em, tasol mama bilong Moses yet, em wanpela Hibru, nem bilong em Jokebet, em i givim susu long Moses na i lukautim em long taim em i liklik yet. Jokebet i bin skulim em gut long laikim tru Jehova na pilim tru ol tok promis Em i bin givim long Abraham. Bihain Moses i stap olsem wanpela wanhaus bilong king, na em i “skul long olgeta gutpela save bilong ol Isip.” (Aposel 7:20-22; Kisim Bek 2:1-10; 6:20; Hibru 11:23) Tasol maski Moses i gat bikpela namba, bel bilong em i pilim tru hevi bilong lain bilong God ol i stap olsem kalabus.
15. Taim Moses i kamapim long ples klia olsem em i bilong lain bilong Jehova, dispela i mekim wanem long em?
15 Taim Moses i gat 40 krismas, em i kilim i dai wanpela Isip bambai em i ken helpim wanpela Israel em ol i mekim nogut long em. Dispela samting Moses i mekim i kamapim tingting bilong em, em i ting olsem wanem long lain bilong God. “Moses i bilip long God, na taim em i kamap bikpela pinis, em i no laik bai ol i kolim em pikinini bilong pikinini meri bilong king bilong Isip. Nogat.” Em i no laik bihainim “pasin bilong sin na kisim amamas inap sotpela taim tasol” olsem wanpela man i stap long haus bilong king bilong Isip, nogat. Bilip i kirapim em na em i kamapim long ples klia olsem em i bilong lain bilong God em ol Isip i mekim nogut long ol.—Hibru 11:24, 25; Aposel 7:23-25.
16 Moses i laik tru long kirap mekim sampela samting bilong helpim lain bilong em, tasol taim bilong God long kisim bek ol i no kamap yet. Moses i mas ranawe lusim Isip. Inap olsem 40 yia bihain, long maus bilong wanpela ensel, Jehova i tokim Moses long go bek long Isip na bringim ol Israel i go lusim dispela ples. (Kisim Bek 3:2-10) Orait Moses i mekim wanem? Em i no tok em i gat tupela tingting long strong bilong Jehova long kisim bek ol Israel, tasol em i pilim olsem em i no inap mekim dispela wok God i givim long em. Long pasin sori Jehova i mekim ol samting bilong strongim bel bilong Moses. (Kisim Bek 3:11–4:17) Bilip bilong Moses i kamap strong. Em i go bek long Isip na planti taim em i go tokim king long pes stret bilong em long ol bikpela hevi bai kamap long Isip sapos king i no larim ol Israel i go bilong lotuim Jehova. Moses yet i no gat strong bilong kamapim ol dispela bikpela hevi. Em i bilip na wokabaut—em i no tingim ol samting em i lukim long ai na em i wokabaut. Em i bilip long Jehova na long tok bilong em. King i tok long bagarapim Moses, tasol Moses i sanap strong. “Moses i bilip long God, olsem na em i kirap na i lusim Isip. King bilong Isip i belhat long em, tasol em i no pret long dispela king. Tru, yumi man i no inap lukim God long ai, tasol Moses i mekim wankain pasin olsem man i bin lukim God, na em i stap strong tru.” (Hibru 11:27) Moses i no gutpela man olgeta. Em i bin mekim sampela popaia. (Namba 20:7-12) Tasol taim God i givim pinis wok long em, bilip i bosim olgeta wokabaut bilong em.
17. Noa na Abraham na Moses i bilip na wokabaut, maski ol i no bin lukim nupela taim i kamap long taim ol i stap laip yet, na ol i kisim wanem gutpela samting long en?
17 Gutpela sapos bilip bilong yu i wankain olsem bilip bilong Noa na Abraham na Moses. Tru, nupela taim God i laik kamapim, em i no kamap long taim bilong ol. (Hibru 11:39) Taim God i bin makim i no kamap yet; i gat sampela samting moa God i mas mekim bilong kamapim laik bilong em. Tasol ol i bilip strong long tok bilong God na ol i no lusim bilip liklik, na nem bilong ol i stap long buk bilong laip.
18 Aposel Pol i tok: “Bipo yet God i redim wanpela gutpela samting moa yet bilong yumi.” Em i olsem: God i bin redim samting i gutpela moa bilong ol man i olsem aposel Pol, em God i bin singautim ol bilong kisim laip long heven wantaim Krais. (Hibru 11:40) Pol i tingim ol dispela lain taim em i raitim tok i stap long 2 Korin 5:7: “Nau yumi bilip tasol long em na yumi wokabaut. Yumi no lukim em yet.” Taim Pol i raitim dispela tok, i no gat wanpela bilong dispela lain i kisim pinis gutpela pe bilong ol olsem laip long heven, nogat. Ol i no inap lukim long ai tru bilong ol, tasol bilip bilong ol long dispela samting i gat as tru bilong en. Krais i kirap bek pinis long matmat paslain long ol narapela man em ol i bilong kisim laip long heven—em i olsem namba wan kaikai i redi long gaden; na taim em i no go antap yet long heven, planti man ol i bin lukim em, winim 500. (1 Korin 15:3-8) I gat as tru na ol i larim dispela bilip i bosim olgeta wokabaut bilong ol. Na i gat as na yumi tu i mas bilip na wokabaut.
19. Olsem Hibru 1:1, 2 i tok, God i bin givim tok long yumi long rot bilong husat?
19 Long nau Jehova i no givim tok long lain bilong em long rot bilong wanpela ensel, olsem em i bin mekim long Moses long diwai i paia. God i bin givim tok long yumi long rot bilong Pikinini bilong em. (Hibru 1:1, 2) Ol tok God i mekim long rot bilong em, God i bin kirapim sampela man long raitim long Baibel, na ol man i tanim ol dispela tok bilong Baibel i go long ol tok ples bilong ol manmeri i stap long olgeta hap bilong graun.
20 Yumi gat planti tok moa bilong God, winim Noa na Abraham na Moses. Yumi gat Baibel olgeta—na planti tok bilong en i kamap tru pinis. Baibel i mekim planti tok long ol man na meri ol i stap gut long Jehova olsem witnes bilong em, maski kain kain hevi i bin painim ol, olsem na Hibru 12:1 i tok strong long yumi olsem: “Yumi [tu] mas lusim olgeta kain samting i mekim yumi i no inap ran strong, na [dispela] sin i save pas long yumi. Na yumi mas strongim bel na ran strong long dispela resis God i bin makim bilong yumi ran long en.” Yumi no ken ting olsem yumi bilip pinis na em tasol. Dispela “sin i save pas long yumi” em pasin bilong lusim bilip. Yumi mas taitim bun na wok strong tru bambai yumi ken wok yet long ‘bilip na wokabaut.’
[Futnot]
a Lukim buk The Bible—God’s Word or Man’s?, Sosaiti Wastaua bilong Nu Yok i wokim.
Yu Laik Bekim Wanem Tok?
◻ Yumi mas mekim wanem bambai yumi ken ‘bilip na wokabaut’?
◻ Pasin bilong Noa long bilip, dispela inap helpim yumi olsem wanem?
◻ Pasin bilong Abraham long bilip, em i helpim yumi olsem wanem?
◻ I gat wanem as na Baibel i makim Moses olsem gutpela piksa bilong man i bilip?
16. (a) Jehova i givim wanem wok long Moses? God i helpim em olsem wanem? (b) Taim Moses i mekim dispela wok God i bin givim long em, olsem wanem em i soim olsem em i bilip?
18. Ol man God i bin singautim ol long kisim laip long heven, bilong wanem ol i mas bilip na wokabaut?
20. Yumi gat wanem samting na Noa na Abraham na Moses ol i no gat?
[Piksa long pes 10]
Abraham i bilip na wokabaut
[Piksa long pes 10]
Taim Moses na Aron i sanap long ai bilong king bilong Isip, ol i kamapim klia olsem ol i gat bilip