Abraham—Gutpela Piksa Bilong Olgeta Man i Laik Kamap Pren Bilong God
“Bilip bilong en i stap strong na i no slek. . . . na em i save pinis olsem, God em inap mekim olsem em i bin promis long mekim.”—ROM 4:19-21.
1. Bilong wanem Satan i wok long daunim stori bilong Abraham?
TOK bilong God long Baibel “i gat laip, na em i wok strong i stap.” (Hibru 4:12) Olsem na stori bilong ol samting Jehova i bin mekim long Abraham, maski ol i bin raitim 3,500 yia bipo, em inap strongim bel bilong olgeta man i laik kamap pren bilong God. (Rom 15:4) Bikpela birua, em Satan, em i save long dispela samting, olsem na long rot bilong ol pris pasto samting em i bin wok long daunim dispela stori bilong Abraham bambai ol man i ting em stori nating tasol.—2 Korin 11:4, 15.
2. Ol disaipel bilong Jisas i ting olsem wanem long Abraham?
2 Stori bilong Abraham em i hap bilong “olgeta tok i stap long buk bilong God” em “spirit bilong God yet i bin kamapim.” Olsem na dispela stori em i tru na em i “gutpela samting tru bilong skulim yumi [ol Kristen] long tok tru.” (2 Timoti 3:16; Jon 17:17) Ol disaipel bilong Jisas bilong pastaim ol i bilip olsem, na inap 74 taim long Nupela Testamen ol i kolim nem bilong Abraham. Long Hibru sapta 11 i gat ol gutpela tok bilong strongim bilip na dispela sapta i gat bikpela stori moa long Abraham, na i no gat bikpela stori olsem long ol narapela wokboi bilong God i bin i stap paslain long taim bilong ol Kristen.
3. Abraham i kisim wanem bikpela wok long Jehova?
3 Abraham em i wanpela “profet” bilong Jehova, tasol em i narapela kain profet. Jehova i givim wok long em bilong mekim sampela samting i olsem piksa. Abraham i kisim bikpela wok tru, long wanem long dispela piksa em i makim God yet. (Stat 20:7; Galesia 4:21-26) Olsem na taim Jisas i stori long man i stap gut long ai bilong Jehova, em i tok bokis olsem dispela man “i stap wantaim Abraham.”—Luk 16:22.
Namba Wan Samting Bilip i Kirapim Em long Mekim
4. Wanem namba wan wok God i givim long Abram, olsem Baibel i tok?
4 Pastaim nem bilong Abraham em Abram. Em i go bikpela long “taun Ur long hap bilong Kaldia.” Taim em i stap long dispela hap, God i tokim em: “Yu lusim graun bilong yu na ol brata bilong yu, na ol lain bilong papa bilong yu, na yu go long wanpela graun bai mi soim yu long en. Bai mi mekim ol lain tumbuna bilong yu i kamap bikpela lain tru. Na bai mi mekim gut long yu na mekim yu i gat biknem tru. Olsem na taim ol manmeri i laik mekim gutpela tok long ol arapela man, ol bai i tokim ol olsem, ‘God i ken mekim gut long yu, olsem em i bin mekim long Abram.’ Bai mi mekim gut long ol man i save mekim gutpela pasin long yu. Tasol bai mi yet mi bagarapim ol man i tok long bagarapim yu. Na long yu, bai mi mekim gut long olgeta lain manmeri bilong graun.”—Stat 12:1-3; 15:7; Aposel 7:2, 3.
5. (a) Bilong wanem Abram i pilim tru tok promis bilong God? (b) Olsem na Abram i mekim wanem?
5 God i singautim Abram bilong mekim wanpela samting i hatwok long Abram i mekim! Sapos Abram i bihainim tok bilong God, em i mas lusim gutpela ples em i stap long en na lusim lain bilong papa bilong em na i go i stap long wanpela hap longwe em i no save long en. Tasol Abram i pilim tru long bel bilong em gutpela tok promis God i mekim long em. Em i lapun pinis na meri bilong em i no inap karim pikinini, na i olsem nem bilong em bai lus olgeta. Tasol God i mekim gutpela tok promis long em, olsem: “Long yu God bai i mekim gut long olgeta lain manmeri.” Na taim God i mekim dispela tok promis i olsem em i autim gutnius long olgeta manmeri long wanem em i tok, bihain bai olgeta lain man i kisim blesing. (Galesia 3:8) Abram i bilipim tok promis bilong Jehova na em i lusim ples bilong em i gat planti wok bisnis samting long en na em i go, maski em i “no save em bai i go we.”—Hibru 11:8.
6. (a) Bilong wanem Stat 11:31 i tok, Tera i kisim dispela lain i go? (Aposel 7:2-4) (b) Olsem wanem Sara em i gutpela piksa bilong ol meri Kristen long nau?
6 Bilip bilong Abram i kirapim ol narapela long bihainim em. Olgeta wanhaus bilong em, na papa bilong em Tera, na Lot, em pikinini bilong brata bilong em, ol i bihainim em i go. Tasol Tera em i tumbuna papa bilong dispela lain, olsem na Baibel i tok, Tera i kisim dispela lain i go. (Stat 11:31) Meri bilong Abram, em Sarai, bihain ol i kolim em Sara, em i olsem gutpela piksa, long wanem em i harim tok bilong man bilong em. Em i bihainim Abram na ol i stap long ol haus sel long kem. Em i stap olsem i go inap long taim em i dai. Em i no gat gutpela sindaun moa olsem long taim ol i bin i stap long taun Ur. (Stat 13:18; 24:67) Abram i pilim tru dispela gutpela pasin bilong Sara, olsem na taim Sara i dai, Abram “i krai long em.” (Stat 23:1, 2) Sara em i gat strongpela bilip na em i daun tru long man bilong em, olsem na Baibel i tok em i makim gutpela pasin ol meri Kristen i mas bihainim.—Hibru 11:11, 13-15; 1 Pita 3:1-6.
7. Sampela Kristen long nau ol i bin mekim wanem na ol i kamapim long ples klia olsem ol i gat strongpela bilip wankain olsem bilong Abraham na Sara?
7 Planti Kristen long nau tu i gat wankain strongpela bilip na ol i bin lusim ples bilong ol na i go autim tok bilong God long ol ples i sot long ol man bilong autim tok bilong Kingdom, o ol i bin i go long narapela hap bilong helpim wok bilong sanapim ol nupela haus bilong wokim na salim i go ol buk na nius bilong Baibel, o ol i bin i go wok long ol dispela haus. (Matyu 24:14) Ol i bihainim tok olsem: “Yupela i mas i go mekim olgeta lain manmeri i kamap disaipel bilong mi.” Ol i bin i go long longwe ples ol i no save long en, na planti ol i mas lain long kisim narapela kain sindaun i no gutpela olsem sindaun bilong ol long bipo. Na sampela ol i no lusim ples bilong ol, tasol ol i lusim bikpela mani samting bilong ol bambai ol inap kamapim ol disaipel long hap ol i stap long en.—Matyu 28:19, 20.
Sampela Samting Moa Em i Mekim na i Kamapim Bilip Bilong Em
8. Wanem ol samting i bin kamap na nau Jehova i kamap long Abram long namba tu taim?
8 Abram i go long ples Haran na em i stap long dispela ples inap long taim papa bilong em, Tera, i dai pinis. (Stat 11:31, 32) Bihain em i kisim lain bilong em i go na ol i brukim Wara Yufretis, na ol i wokabaut i go long hap bilong saut. Bihain bihain ol i kamap long “taun Sekem” i stap long namel bilong graun bilong ol Kenan. Ating Abram i amamas tru long lukim dispela gutpela ples! Taun Sekem i stap long ples daun i gat gutpela graun bilong wokim gaden na i stap namel long tupela lain maunten; Maunten Ebal na Maunten Gerisim em tupela bikpela maunten long dispela hap. Sampela man i tok, dispela hap i olsem “ples paradais bilong Graun Holi.” Olsem na i stret Jehova i kamap gen long Abram long dispela gutpela ples na tokim em: “Bai mi givim dispela graun long ol lain pikinini bilong yu.”—Stat 12:5-7.
9. (a) Abram i mekim wanem bikpela samting i kamapim bilip bilong em? (b) Dispela i lainim yumi long wanem samting?
9 Nau Abram i kirap mekim narapela samting i kamapim bilip bilong em. Baibel i tok: “Abram i wokim alta bilong lotu long Bikpela long dispela hap Bikpela i bin kamap long em.” (Stat 12:7) Ating em i bin kilim wanpela animal tu na givim long Jehova olsem ofa, long wanem insait bilong tok Hibru ol i kisim tok “alta” long en, em olsem: “ples bilong mekim ofa.” Bihain, Abram i mekim gen dispela samting i kamapim bilip bilong em; em i wokim alta bilong Jehova long ol narapela hap tu, na em i “lotu” long Jehova. (Stat 12:8; 13:18; 21:33) Insait bilong tok Hibru ol i tanim olsem “lotu” i olsem: ‘kolim nem bilong Jehova’ o ‘autim nem bilong em.’ Lain bilong Abram na ol lain bilong Kenan i bin harim Abram i autim nem bilong God bilong em, Jehova; em i no pret long autim. (Stat 14:22-24) Olsem tasol long nau, olgeta man i laik kamap pren bilong God, ol i mas bilip na kolim nem bilong Jehova na singaut long em. Na ol i mas autim nem bilong em long ol man—ol i mas givim maus bilong ol long God olsem ofa na “litimapim nem bilong en.”—Hibru 13:15; Rom 10:10.
10. (a) Abram i mekim wanem samting dispela tu i kamapim bilip bilong em? (b) Abram i makim wanem gutpela pasin ol papa long nau i mas bihainim? (1 Timoti 3:12)
10 Abram i bilip long Jehova na em i mekim planti samting moa i kamapim bilip bilong em. Em i bin daunim laik bilong em yet bambai em inap mekim i dai kros, tasol taim hevi i kamap em i no pret long mekim ol samting em i mas mekim bilong stretim dispela hevi. (Stat 13:7-11; 14:1-16) Em i gat planti samting, tasol em i no tingim tumas mani kago. (Stat 14:21-24) Em i save singautim ol man i kam long haus bilong em na mekim gut long ol; na em i save givim planti samting bilong helpim lotu bilong Jehova. (Stat 14:18-20; 18:1-8) Na bikpela samting tru em olsem: Em i mekim gutpela wok papa. Em i mekim olsem Jehova i tokim em long mekim—em i lainim ol pikinini bilong em na ol wanhaus bilong em na ol lain tumbuna bilong em long bihainim tok bilong Jehova, na bai ol i “bihainim gutpela na stretpela pasin.” (Stat 18:19) Olsem na lain bilong Abram i bihainim narapela kain pasin long ol lain bilong Kenan i stap klostu long ol long Sodom na Gomora, em ol i man bilong mekim pasin i gat sem. Abram i no ken larim lain bilong em i mekim kain pasin nogut olsem i gat bikpela rong long en. Em i bin bosim gut lain bilong em na soim stretpela rot long ol. Yumi inap save long dispela samting, long wanem ol i bihainim pasin bilong em na ol tu i bilip long Jehova na singaut long Em na kolim nem bilong Em.
“Bilip Bilong En i Stap Strong na i No Slek”
11. Olsem wanem Abram inap karim ol hevi “long graun bilong arapela lain” inap 100 yia?
11 Abram i stap inap 100 yia namel long ol man i tok graun em i stap long en em i bilong ol, olsem na planti hevi i bin painim em. Tasol em i gat strongpela bilip na dispela i helpim em long karim ol dispela hevi. (Stat 12:4; 23:4; 25:7) Baibel i tok: “Em i bilip na i go sindaun long dispela graun bipo God i tok long givim em. Na em i stap long dispela graun olsem man bilong narapela lain. Em i sindaun long haus sel wantaim Aisak na Jekop, em olgeta ol man God i bin promis long givim dispela graun long ol. Oltaim Abraham i bilip na i wet long lukim dispela taun [Kingdom bilong God] i stap strong tru, em dispela taun God wanpela tasol i bin tingim pasin bilong wokim na em yet i bin wokim. Na sapos [Abraham] i bin tingting tasol long dispela graun [em] i bin lusim na i kam, orait [em] inap i go bek long en.”—Hibru 11:9, 10, 15; lukim tu Hibru 12:22, 28.
12. Wanem samting i kamap na i gat rot bilong Abram i go bek long taun Ur? Tasol em i mekim wanem?
12 Abram i go i stap long Kenan na i no longtaim na bikpela hangre i kamap. Orait, nau em “inap i go bek” long ples bipo em i stap long en, em taun Ur. Long taun Ur, maski i gat ren o nogat, i gat bikpela wara i stap, em Wara Yufretis. Tasol Abram i no go bek. Em i bilip long Jehova na em i wokabaut i go long narapela hap olgeta, em hap bilong Isip. Tasol hevi inap painim em long Isip, long wanem em i man bilong narapela ples na meri bilong em i gat gutpela skin. Nogut ol Isip i mangal long meri bilong em na ol i kilim em i dai. Em nau, bagarap inap painim em long dispela graun bilong arapela lain. Olsem na em i tokim Sarai, em i no ken tok tupela i marit. Jehova i blesim Abram, long wanem Abram i bilip long em, na liklik taim bihain em inap i go bek gen long Graun Bilong Promis, na taim em i go bek em i gat planti samting moa, winim bilong pastaim.—Stat 12:10–13:2; 20:12.
13. Sarai i no bin karim pikinini na dispela i olsem piksa na i makim wanem samting? Abram i no laik tokaut olsem em i marit long Sarai, em i haitim dispela samting, na dispela i makim wanem samting?
13 Abram i no save ol dispela samting tu em i mekim i olsem piksa na i makim samting i mas kamap bihain. Long dispela taim, Sara i no bin karim yet wanpela pikinini, olsem na em i makim ‘meri’ bilong Jehova, em lain ensel long heven ol i stap gut long em. Dispela gutpela meri bilong Jehova i mas wet inap 4,000 yia moa na bai em i kamapim pikinini tru bilong dispela Man I Winim Abraham, em God Jehova. Insait long dispela bikpela hap taim ol man i bin mekim nogut long ol gutpela wokboi bilong Jehova na sampela taim i olsem Jehova i no laik tokaut olsem em i gat meri bilong em; i olsem em i laik haitim dispela samting.—Stat 3:15; Aisaia 54:1-8; Galesia 3:16, 27, 29; 4:26.
14. (a) Sarai i no inap karim pikinini na em i bel hevi na em i mekim wanem? (b) Taim Abram i gat 99 krismas pinis, wanem samting i bin kamap? Wanem as bilong dispela samting?
14 Abram i sindaun long graun bilong arapela lain inap 10-pela yia pinis na em wantaim Sarai i no gat pikinini. Bel bilong Sara i bagarap stret long dispela samting, olsem na em i tokim Abram em i mas kisim wokmeri bilong em, Hega, na kamapim pikinini long dispela meri. Abram i orait long dispela samting na em i kamapim Ismal. (Stat 12:4; 16:1-4, 16) Tasol pikinini God i bin promis long em, em i mas kamap long rot bilong narapela meri. Abram i gat 99 krismas pinis na nau God i senisim nem bilong em na kolim em Abraham, long wanem, olsem God i tok: Bai “mi mekim yu i kamap tumbuna bilong planti lain manmeri.” Na God i senisim nem bilong Sarai na kolim em Sara na em i tok, Sara bai karim wanpela pikinini man.—Stat 17:1, 5, 15-19.
15. (a) Taim Abraham i harim tok olsem em wantaim Sara bai kamapim pikinini, bilong wanem Abraham i lap? (b) Abraham i mekim wanem samting moa na dispela tu i kamapim strongpela bilip bilong em?
15 Abraham (na bihain Sara) i lap taim em i harim tok olsem em wantaim Sara bai i gat pikinini, long wanem tupela i lapun pinis na i no inap moa long kamapim pikinini. (Stat 17:17; 18:9-15) Tasol i no olsem em i no bilip na em i lap; nogat. Baibel i tok: “Bilip bilong en i stap strong na i no slek. God i bin promis long mekim ol dispela samting, na Abraham i ting long dispela promis na em i no tubel na em i no lusim bilip. Nogat. Bilip bilong en i strongim em. Em i litimapim nem bilong God na em i save pinis olsem, God em inap mekim olsem em i bin promis long mekim.” (Rom 4:18-21) Long dispela de stret Abraham i mekim wanpela samting i kamapim long ples klia olsem em i gat strongpela bilip. Jehova i tokim em, em i mas katim skin bilong em yet na bilong olgeta man long lain bilong em, olsem mak bilong kontrak God i bin mekim wantaim em. (Stat 15:18-21; 17:7-12, 26) Sapos Abraham i bihainim dispela tok bilong Jehova, bai em i kisim bikpela pen, tasol em i mekim wanem? “Long dispela de yet, Abraham i bihainim tok bilong God, na em i katim skin bilong kok bilong olgeta man long lain bilong en.”—Stat 17:22-27.
16. (a) Long de Aisak i lusim susu, wanem samting i bin kamap? Abraham i rausim Hega na Ismal na dispela i makim wanem samting?
16 Long yia bihain Sara i karim Aisak, insait bilong dispela nem i olsem “Lap.” (Stat 21:5, 6) Sampela yia bihain, de i kamap bilong Aisak i lusim susu, na Abraham i wokim bikpela kaikai. Long dispela kaikai Ismal i mekim nogut long Aisak, long wanem em i bel nogut long Aisak. Olsem na Sara i strong long tokim Abraham, em i mas rausim wokmeri Hega wantaim pikinini bilong em. God Jehova i helpim Sara long dispela tok bilong em. Abraham i bel hevi, tasol em i kirap kwik na bihainim tok. (Stat 21:8-14) Long Galesia 4:21-30 Baibel i tok, dispela i olsem piksa na i makim ol samting Man I Winim Abraham bai mekim bilong pinisim kontrak em i bin mekim wantaim lain Israel bilong skin. Ol dispela Israel na olgeta narapela man tu ol i wok kalabus long sin; taim mama i karim ol, ol i gat sin. (Rom 5:12) Tasol ol dispela Israel i gat narapela rong: Taim Krais Jisas, em Pikinini tru bilong Abraham, i kam bilong helpim ol long lusim kalabus bilong sin na i stap fri, ol i sakim em. (Jon 8:34-36; Galesia 3:16) Olsem Ismal i bin mekim nogut long Aisak, olsem tasol ol dispela Israel i bin mekim nogut long kongrigesen Kristen bilong lain Israel bilong spirit. Taim dispela kongrigesen i kamap nupela, ol Israel i bin mekim nogut long ol dispela namba tu pikinini bilong Abraham.—Matyu 21:43; Luk 3:7-9; Rom 2:28, 29; 8:14-17; 9:6-9; Galesia 3:29.
Nambawan Bikpela Traim Bilong Bilip Bilong Em
17. Wanem samting i bin traim tru bilip bilong Abraham?
17 Ating i no gat narapela papa long graun i winim lapun Abraham long laikim tumas pikinini bilong em. Olsem na yumi save, Abraham i bin kirap nogut tru taim God i tokim em: “Yu gat wanpela pikinini tasol, Aisak, na yu laikim em tumas. Yu mas kisim dispela pikinini na yu go long hap bilong Moria, na bai mi soim yu wanpela maunten. Na long dispela maunten yu mas givim Aisak long mi olsem ofa bilong paia i kukim olgeta.”—Stat 22:1, 2.
18. Taim Jehova i tokim Abraham em i mas kilim i dai Aisak olsem ofa, Abraham i mekim wanem?
18 Abram i bel hevi na em i no save bilong wanem Jehova i laik bai em i mekim olsem: Tasol em i kirap bihainim kwik tok bilong God, olsem em i save mekim long olgeta taim. (Stat 22:3) Inap tripela de Abraham wantaim Aisak i wokabaut i go long dispela maunten God i bin makim. Taim Abram i wokabaut i go, ating bel bilong em i hevi tru. Antap long maunten em i wokim alta na em i putim paiawut long alta. Yumi save, em i bin stori pinis long Aisak long dispela samting God i laik bai em i mekim. Aisak inap ranawe, tasol nogat. Em i larim lapun papa i pasim han lek bilong em na slipim em antap long alta. (Stat 22:4-9) Wanem samting i mekim na Aisak i no bikhet long papa?
19. (a) I gat wanem as na Aisak i no pret na em i daun long papa bilong em? (b) Long stori bilong Abraham na Aisak, pasin papa i mekim long pikinini na pikinini i mekim long papa, dispela i givim wanem save long ol famili Kristen long nau?
19 Abraham i bin lainim gut Aisak, olsem Stat 18:19 i tok em i mas mekim. Na yumi save, em i bin lainim Aisak long laik bilong Jehova, em i laik kirapim bek ol man i dai pinis. (Stat 12:3; Hibru 11:17-19) Na Aisak i save, papa i laikim em tumas, na dispela i kirapim em long mekim olgeta samting bambai papa i ken amamas long em. Na samting papa i tokim em long mekim, sapos dispela em i laik bilong God, orait Aisak i redi moa yet long mekim. Dispela inap lainim gut ol papa Kristen na pikinini Kristen long nau!—Efesus 6:1, 4.
20. Abraham i mekim wanem na em i bihainim tok bilong God? Na em i kisim wanem gutpela pe?
20 Nau bikpela traim tru i kamap long Abraham. Em i mas kilim i dai pikinini bilong em. Em i holim naip na i laik kilim pikinini, tasol Jehova i pasim em. Jehova i tok: “Yu gat dispela wanpela pikinini tasol, na yu no pasim em. Nogat. Yu redi tasol long givim em long God. Olsem na mi save, yu man bilong aninit long God.” (Stat 22:11, 12) Abraham i kisim bikpela blesing tru—em i harim Jehova yet i tok em i man bilong bihainim stretpela pasin! Em i ken amamas, long wanem em inapim mak bilong stretpela pasin em Jehova i putim long ol sinman. Na bikpela samting i olsem: Ol samting Abraham i mekim i kamapim long ples klia olsem Jehova i no popaia taim em i bin tingim bilip bilong Abraham na kolim em stretpela man. (Stat 15:5, 6) Bihain Jehova i wokim mirakel na kamapim wanpela sipsip man olsem senis bilong Aisak na Abraham i kilim dispela sipsip na mekim ofa long Jehova. Na nau em i harim Jehova i mekim wanpela tok tru antap o tok promis long em, olsem wanpela kontrak. Na bihain em i kisim nem olsem pren bilong Jehova.—Stat 22:13-18; Jems 2:21-23.
21. Dispela i olsem piksa na i makim wanem samting? Na dispela i mas strongim bel bilong yumi na kirapim yumi long wok long kamap wanem samting?
21 Ofa bilong Abraham i olsem piksa o “tok bokis.” (Hibru 11:19) Dispela ofa i makim bikpela ofa God Jehova yet i mekim. Em i laikim tumas Pikinini bilong em, tasol em i salim em i kam long graun bilong i dai olsem “Pikinini Sipsip Bilong God,” em i “tekewe sin bilong olgeta manmeri bilong graun.” (Jon 1:29) Na Aisak em i redi long i dai, dispela i olsem piksa na i makim gutpela pasin sori na pasin daun Man I Winim Aisak, em Krais Jisas, em i mekim—em i bihainim laik bilong Papa bilong em na em i larim ol man i kilim em i dai. (Luk 22:41, 42; Jon 8:28, 29) Na Abraham i kisim bek pikinini bilong em long alta na pikinini i stap laip, dispela i makim Jehova i kisim bek Pikinini bilong em long i dai na Pikinini i stap laip olsem spirit. (Jon 3:16; 1 Pita 3:18) Olgeta dispela samting i strongim bel bilong olgeta man long nau em ol i laik kamap pren bilong God!
22. Olsem wanem bikpela pasin sori bilong God i bin helpim liklik lain long graun em God i bin makim ol?
22 Liklik lain long graun ol i bilip long dispela bikpela pasin sori Man I Winim Abraham, em God Jehova, em i bin mekim, na long dispela rot God i bin kolim ol stretpela man na ol i kamap pikinini bilong em. (Rom 5:1; 8:15-17) Em i kisim ol dispela manmeri long lain Juda pastaim, na bihain em i kisim sampela long ol arapela lain, na ol i bin kisim bikpela blesing long rot bilong Pikinini bilong Abraham, em Krais Jisas. (Aposel 3:25, 26; Galesia 3:8, 16) Na ol tu i kamap pikinini bilong Abraham, olsem ol namba tu pikinini bilong em. (Galesia 3:29) Lain bilong ol i mas kamap inap olsem 144,000, na olsem Jisas i bin mekim, ol tu i mas i stap gut long God i go inap long taim ol i dai na bai ol i kirap bek na kisim laip long heven.—Rom 6:5; Kamapim Tok Hait 2:10; 14:1-3.
23. (a) Olsem wanem bikpela lain manmeri long nau i kisim blesing long wok bilong lain remnan? (2 Korin 5:20) (b) ‘Bikpela lain’ bai kisim wanem ol blesing long bihain?
23 Na i gat sampela milion manmeri bilong olgeta lain ‘ol i kisim blesing,’ long wanem ol i harim gutpela tok lain remnan i autim long ol long gutpela pasin sori, em lain remnan i olsem liklik hap lain bilong ol pikinini bilong Abraham ol i stap yet long graun. (Stat 22:18) Ol i amamas tru long kisim save olsem i gat rot na ol sinman bilong graun inap kamap pren bilong God. I gat sampela samting ol i ken mekim na bai God i kolim ol olsem stretpela man na pren bilong em. Olsem na i gat bikpela lain manmeri “bilong olgeta lain man” em God i orait long ol long nau. Ol i bin “wasim ol klos bilong ol long blut bilong Pikinini Sipsip, na ol klos i kamap waitpela.” Liklik lain remnan ol i go pas na bikpela lain ol i bihainim ol na olgeta wantaim ol i mekim wok bilong God “long san na long nait.” Dispela bikpela lain manmeri ol inap kisim gutpela blesing tru—ol inap kisim laip i stap oltaim long Paradais long graun na i stap “pikinini bilong God” long graun. (Kamapim Tok Hait 7:9-17; 21:3-5; Rom 8:21; Buk Song 37:29) Tasol i gat sampela bikpela samting moa yet i mas kamap pastaim na bihain bai ol inap kisim ol dispela blesing. Stori i kamap bihain long dispela bai helpim yumi long save long ol dispela bikpela samting i mas kamap pastaim.
Sampela Askim Bilong Kamapim Gen Ol Bikpela Tok
◻ Wanem samting i bin traim bilip bilong Abraham na lain bilong em?
◻ Sampela Kristen long nau i bin mekim wanem na dispela i kamapim long ples klia olsem ol i gat wankain strongpela bilip?
◻ Abraham i mekim wanem samting moa na dispela i kamapim bilip bilong em?
◻ Olsem wanem Abraham na Sara na Aisak i gutpela piksa bilong ol papa na mama na pikinini Kristen i ken bihainim pasin bilong ol?
◻ Nambawan bikpela samting Abraham i mekim bilong kamapim bilip bilong em, dispela i makim wanem samting?