Sampela Bai Wok King, Planti Bai Kisim Helpim
KIRAP long taim bilong ol aposel na i kam, God i bin makim sampela gutpela Kristen namel long ol manmeri, na adoptim ol olsem ol pikinini bilong em. Bikpela senis tru i kamap long ol dispela pikinini, olsem na Baibel i tok ol i bon gen. Ol i bon gen bambai ol dispela bon-agen wokman bilong God i ken mekim wok king long heven. (2 Timoti 2:12) Bilong mekim wok king, ol i mas kirap bek long matmat na kisim laip long heven. (Rom 6:3-5) Long heven, ol bai i stap king wantaim Krais na bosim ol manmeri bilong graun.—KTH 5:10; 11:15.
Baibel i tok ol lain i bon gen bai kisim laip oltaim, tasol i gat sampela narapela manmeri tu em ol bai kisim laip oltaim. Long Baibel (long Ol Skripsa Hibru na long Ol Skripsa Grik tu), i gat tok i kamapim olsem God i laik kisim bek tupela lain manmeri—liklik lain em ol bai mekim wok king long heven, na bikpela lain manmeri em ol bai stap aninit long Kingdom hia long graun. Tingim tok aposel Jon i raitim long ol wanbilip Kristen husat i bin bon gen. Em i tok long Jisas olsem: “Em yet i bin mekim wok bilong tekewe sin bilong yumi [liklik lain]. Na em i no mekim dispela wok bilong helpim yumi tasol. Nogat. Em i mekim bilong helpim olgeta manmeri [bikpela lain] i stap long graun.”—1 Jon 2:2.
Aposel Pol tu i tok: “Olgeta samting [bikpela lain] God i bin wokim, ol i wetim taim God i makim bilong kamapim ples klia yumi ol pikinini bilong en [liklik lain].” (Rom 8:19-21) Wanem mining bilong ol dispela tok bilong aposel Jon na aposel Pol? Olsem: Ol lain i bon gen ol bai insait long wanpela gavman long heven. Bilong mekim wanem? Bilong helpim planti milion manmeri inap oltaim oltaim, em ol manmeri husat bai i stap long graun aninit long gavman bilong God. Olsem na Jisas i skulim ol disaipel bilong em long beten olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:10.
Dispela wankain tok i tru olsem tupela lain bai kisim laip oltaim, em i stap tu long Ol Skripsa Hibru. Tingim tok Jehova i mekim long tumbuna papa bilong Jisas, em Abraham. Em i tok: “Long rot bilong pikinini bilong yu [liklik lain] olgeta lain bilong graun [bikpela lain] bai kisim blesing.” (Stat 22:18, NW ) Yes, olgeta lain manmeri bai kisim blesing long rot bilong “pikinini” bilong Abraham.
Husat dispela “pikinini”? Em Jisas Krais wantaim ol lain i bon gen, em ol pikinini God i bin adoptim. Aposel Pol i tok: “Sapos yupela i stap lain bilong Krais, orait yupela i stap pikinini bilong Abraham tu.” (Galesia 3:16, 29) Na ol lain manmeri bai kisim wanem ol blesing long rot bilong dispela “pikinini”? Ol i ken stap stret long ai bilong God na kisim laip oltaim long Paradais long graun. Man bilong raitim song, Devit, em i tok: “Ol stretpela man bai i kisim graun God i givim ol, na bai ol i stap oltaim long en.”—Song 37:29; Aisaia 45:18; KTH 21:1-5.
Tru tumas, sampela bai mekim wok king long heven, tasol planti manmeri tru bai kisim helpim long rot bilong dispela gavman long heven—ol bai kisim laip oltaim long graun na ol narapela blesing tu. Gutpela sapos yu na famili bilong yu i insait long dispela lain manmeri em ol bai kisim ol blesing bilong i stap oltaim em Kingdom Bilong God bai kamapim.
[Piksa long pes 12]
Planti milion manmeri bai kisim laip oltaim long graun. Yu bai insait long dispela lain?