Laik Bilong God Long Dispela Graun—Klostu Nau Bai Kamap
TAIM Adam na Iv i stap yet long Paradais, ol i kisim tok long God, olsem: “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.”—Stat 1:28.
Bilong bosim graun, ol i no ken lukautim wanpela liklik hap bilong en na em tasol, nogat. Adam na Iv na ol pikinini bilong ol i mas skruim Paradais i go inap long olgeta hap bilong graun. Tasol namba wan man na meri i mekim sin na God i rausim ol long gaden Iden. (Stat 3:23, 24) Tasol dispela i no makim olsem graun i no inap kamap Paradais, nogat.
God bai mekim gut long ol manmeri i bihainim tok bilong em, olsem na bai ol inap bosim gut ol samting i stap long graun. Taim God i mekim gut long lain Israel bilong bipo, gaden bilong ol i kamapim planti gutpela kaikai na prut. Wankain samting bai kamap taim graun bilong yumi i wok long kamap wanpela paradais. Olsem Baibel i tok promis long en, ‘planti gutpela kaikai bai kamap long graun. God, em i God bilong mipela, em bai mekim gut tru long mipela.’ (Song 67:6) Tru tumas, ol gaden na maunten, ol diwai na plaua, ol wara na raunwara, olgeta bai amamas. (Song 96:11-13; 98:7-9) Long olgeta hap bilong graun bai i gat ol gutpela diwai na plaua, ol pisin i gat kain kain kala, ol gutpela animal, na ol manmeri i gat pasin sori.
Nupela Taim i Kam Klostu!
Klostu nau nupela taim God Jehova i bin tok promis long en bai kamap. Aposel Pita i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13) Taim ol i ritim pinis dispela tok bilong Pita, ating sampela bai ting dispela graun i no inap kamap wanpela paradais. Ol i ting skai na graun i stap long nau bai pinis na nupela skai na graun bai kamap. Olsem wanem? Dispela samting inap kamap?
Dispela “nupela skai” i makim wanem samting? Em i no skai tru God i bin wokim. (Song 19:1, 2) Long ol ves paslain long ves 13, Pita i bin stori long dispela “skai”—em ol gavman ol man i bin kamapim, ol i stap antap long ol man na i bosim ol. (2 Pita 3:10-12) Dispela “skai” i no bin bosim gut ol man na em bai pinis. (Jeremaia 10:23; Daniel 2:44) “Nupela skai” em Kingdom Bilong God, em bai kamap olsem senis bilong ol gavman bilong nau. Insait long dispela Kingdom i gat King Jisas Krais na 144,000 manmeri, em ol i kirap bek na kisim laip long heven.—Rom 8:16, 17; KTH 5:9, 10; 14:1, 3.
“Nupela graun” em Pita i toktok long en, em i no wanpela nupela graun tru. Jehova i bin wokim dispela graun bambai ol man i ken stap long en inap oltaim oltaim. (Song 104:5) Taim Baibel i stori long “graun,” sampela taim em i makim ol manmeri. (1 Stori 16:31) Dispela graun, em klostu nau God bai bagarapim, i makim ol manmeri i insait long ol pasin nogut bilong dispela graun. Long taim bilong Noa tu, ol manmeri i bin givim baksait long God ol i bin kisim bagarap long Bikpela Tait. (2 Pita 3:5-7) Olsem na dispela “nupela graun” i makim wanem samting? Em wanpela nupela lain manmeri—ol manmeri i lotu tru long God, em ol “i save bihainim ol lo” bilong God. (Song 125:4; 1 Jon 2:17) Olgeta lo bilong dispela “nupela graun” bai kam long “nupela skai.” Sampela gutpela bilipman long graun bai mekim na ol manmeri bai bihainim ol dispela lo.
Ol Nupela Gutpela Samting Bai Kamap!
Taim Jehova i bin redim dispela graun bilong ol manmeri i ken i stap long en, em i bin givim wanpela gutpela ples tru long yumi. Taim em i wokim pinis dispela graun, em yet i bin tok long en olsem em i “gutpela.” (Stat 1:31) Satan i kirapim Adam na Iv long bikhet long God. (Stat 3:1-5; KTH 12:9) Tasol i no longtaim na God bai mekim na ol stretpela man bai kisim “laip em i laip tru.” Em “laip i stap gut oltaim oltaim” long gutpela ples Paradais. (1 Timoti 6:12, 19) Orait nau yumi ken stori long sampela gutpela samting ol manmeri bai kisim long dispela taim.
Long Taim Bilong Wan Tausen Yia Bilong Krais i Stap King, Satan bai kalabus na em bai i no inap long mekim nogut long ol manmeri. Aposel Jon i tok: “Mi lukim wanpela ensel [em nambawan ensel Maikel, olsem Jisas Krais] i lusim heven na i kam daun. Long han bilong en em i holim ki bilong hul i no gat as. Na em i holim bikpela sen tu. Em i holimpas dispela bikpela snek, em snek bilong bipo tru, em Satan, dispela ‘Man I Save Kotim Olgeta Man.’ Na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as, na i pasim dua bilong dispela hul na i lokim strong. Olsem na Satan bai i no inap giamanim moa ol manmeri bilong olgeta lain. Em i mas wetim 1,000 yia i pinis pastaim, na bihain ol i mas lusim em.” (KTH 20:1-3; 12:12) Taim Satan i kalabus em bai i no inap pulim moa ol man, na ol bai kisim planti gutpela samting aninit long Kingdom.
Pasin nogut, pasin bilong pait na bagarapim man, na woa bai pinis. Baibel i tok promis olsem: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap. Ol stretpela man bai i kisim graun God i givim ol, na bai ol i stap oltaim long en.” (Song 37:10, 11, 29) God Jehova bai “mekim i dai pait long olgeta hap graun.” (Song 46:9) Man! Em gutpela tok promis long ol manmeri bai i gat gutpela sindaun na stap bel isi!
Bai i gat planti gutpela kaikai bilong strongim skin. Man bilong raitim song i tok: “Planti rais na wit samting i ken kamap long ol gaden bilong ol manmeri.” (Song 72:16) Long dispela taim bai i no gat man i stap hangre.
Bai i no gat man i gat sik. Tru tumas, “no gat man . . . bai i tok olsem, ‘Mi gat sik.’ ” (Aisaia 33:24; 35:5, 6) Taim Jisas Krais i stap long graun, em i oraitim ol man i gat sik lepra na ol lek nogut na ol aipas. (Matyu 9:35; Mak 1:40-42; Jon 5:5-9) Tingim ol gutpela samting em bai mekim long nupela taim! Tingim bikpela amamas bai stap taim ol aipas, yaupas, lek nogut na ol mauspas bai orait gen.
Ol manmeri i bihainim tok bilong God bai kamap gutpela olgeta, olsem na ol hevi bilong i go lapun bai pinis. Bai i no gat wok moa long ol aiglas, stik bilong wokabaut, wilsia, haus sik, na marasin. Bikpela senis tru bai kamap taim yumi kisim bek strong olsem long taim yumi bin stap yangpela! (Jop 33:25) Bai yumi slip gut long nait na long olgeta moningtaim bai yumi kirap wantaim nupela strong na redi long mekim ol gutpela wok.
Kirap bek bilong ol famili na ol narapela bai mekim bel bilong yumi i amamas tru. (Jon 5:28, 29; Aposel 24:15) Bai yumi amamas tru long lukim gen Abel, Noa, Abraham, Sera, Jop, Moses, Rut, Devit, Elaija, Esta, na planti narapela! Na planti milion manmeri moa bai kirap bek. Planti bilong ol i no save liklik long Jehova, tasol bai i gat ol manmeri i amamas long skulim ol long God, long ol samting em bai mekim, na long Pikinini bilong em, Jisas Krais. Taim ol manmeri i kirap bek i kisim save long Man Bilong Wokim ol, save bilong Jehova bai inapim olgeta hap bilong graun.
Gutpela samting moa, bai yumi inap lotuim dispela wanpela God tru inap oltaim oltaim. Bai yumi “belgut long Bikpela na lotu long em,” na bai yumi wok gut wantaim bilong wokim ol naispela haus na gaden, na bosim gut olgeta samting i stap long graun. (Song 100:1-3; Aisaia 65:21-24) Bai yumi amamas tru long i stap oltaim long wanpela gutpela, naispela, paradais we bel isi i stap, em graun i litimapim tru nem holi bilong Jehova!—Song 145:21; Jon 17:3.
Laspela Traim
Long Taim Bilong Wan Tausen Yia Bilong Krais i Stap King, Jisas bai mekim wok long ofa bilong em bilong helpim olgeta man i bihainim tok bilong em. Bihain, sin bai pinis, na olgeta manmeri bai stap gutpela olgeta. (1 Jon 2:2; KTH 21:1-4) Taim ol samting nogut bilong sin bilong Adam i pinis olgeta, ol man i gutpela olgeta bai winim ol mak olsem God i laikim, long ol samting bilong skin, tingting, pasin, na spirit. Taim ol i no gat moa sin na i stap gutpela olgeta, ol bai “kisim laip” tru. (KTH 20:5) Dispela samting na gutpela Paradais bai litimapim tru nem bilong Jehova!
Taim Wan Tausen Yia Bilong Krais i Stap King i pinis, Satan na ol spirit nogut bai lusim hul i no gat as we ensel i bin tromoi ol i go insait inap 1,000 yia bipo. (KTH 20:1-3) Inap liklik haptaim, Jehova bai larim ol i traim wanpela taim moa long pulim ol man long lusim God. Tru, sampela man bai larim ol laik nogut bilong skin i pulim ol, tasol Satan bai no inap long pulim olgeta manmeri. Jehova bai bagarapim olgeta man i bihainim laik bilong ol yet na bikhet long em, na em bai bagarapim tu Satan na olgeta spirit nogut. I no gat wanpela taim bihain na pasin nogut bai kamap gen. Ol man nogut bai pinis olgeta, na ol stretpela man bai kisim laip oltaim.—KTH 20:7-10.
Bai Yu Stap?
Rot i op long ol manmeri i laikim tru God Jehova long ol i ken stap amamas inap oltaim oltaim. Bai ol i no les long i stap oltaim long Paradais, nogat tru. Taim ol yia i kam na i go ol bai amamas moa yet, long wanem, i no gat pinis long save bilong God Jehova. (Rom 11:33) Long olgeta taim bai yu inap lainim ol nupela samting, na bai yu gat bikpela haptaim long kisim save long ol samting. Bilong wanem? Long wanem, yu bai stap inap oltaim oltaim, i no 70 o 80 yia tasol.—Song 22:26; 90:10; Saveman 3:11.
Sapos yu laikim tru God, long olgeta taim bai yu amamas long bihainim laik bilong em. Aposel Jon i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jon 5:3) Olsem na yu no ken larim wanpela samting i pasim yu long mekim ol samting i stret na bai God Jehova i amamas long yu. Tingim ol gutpela samting bai kamap long bihain, em Baibel i tok promis long givim long yu. Tingting strong long mekim laik bilong Jehova, na no ken lusim dispela pasin. Sapos yu mekim olsem, bai yu stap taim God i inapim laik bilong em long dispela graun, na graun bilong yumi bai kamap wanpela paradais i stap oltaim oltaim.
[Piksa long pes 4]
Taim God i mekim gut long ol Israel, ol gaden bilong ol i kamapim planti kaikai
[Piksa long pes 7]
Yu laik kisim wanem ol gutpela samting long Paradais?