Tok Bilong Jehova i Gat Laip
Sampela Bikpela Tok Bilong Buk Stat—Namba 2
KIRAP long taim God i wokim namba wan man, Adam, na i go inap long taim Josep, pikinini man bilong Jekop i dai, Buk Stat i stori long i stap bilong ol man insait long 2,369 yia. Stori i kamap paslain long dispela i kamapim stori bilong sapta 1-10, na tu, sapta 11 ves 1-9 Stt 1:1–11:9, ol dispela sapta i stori long taim God i wokim ol samting i go inap long taim ol man i wokim taua bilong Babel.a Dispela stori bai kamapim sampela bikpela tok bilong ol narapela sapta bilong Buk Stat em yumi no stori yet long en, em ol samting God i mekim long Abraham, Aisak, Jekop, na Josep.
ABRAHAM I KAMAP PREN BILONG GOD
Inap 350 yia bihain long Bikpela Tait, wanpela man i kamap long lain bilong pikinini bilong Noa, em Siem, na God i laikim em. Nem bilong em, Abram, bihain nem bilong em i senis i go Abraham. God i tokim em long lusim taun Ur na em i kamap wanpela tripman na i stap long ol haus sel long wanpela hap graun em God i tok promis long givim long em na ol lain famili bilong em. Em i bilip na bihainim tok bilong God, olsem na God i kolim em, ‘pren bilong em.’—Jems 2:23.
Jehova i bagarapim ol man nogut bilong Sodom na ol taun i stap klostu, tasol Lot na tupela pikinini meri bilong em i abrusim bagarap. Truim bilong tok promis bilong God i kamap tru taim Aisak, pikinini bilong Abraham i kamap. Sampela yia bihain, Jehova i tokim Abraham long givim dispela pikinini bilong em olsem ofa, na dispela i traim bilip bilong Abraham. Abraham i redi long bihainim tok tasol wanpela ensel i pasim em long kilim pikinini bilong em. Tru tumas, Abraham em i man bilong bilip, olsem na God i tokim em olsem long rot bilong pikinini bilong em, olgeta lain bai kisim blesing. I dai bilong meri bilong em, Sara, i mekim em i bel hevi tru.
Bekim Bilong Ol Askim Bilong Baibel:
12:1-3—Wanem taim kontrak bilong Abraham i kirap? Dispela kontrak i stap inap long wanem taim? Kontrak Jehova i mekim wantaim Abram olsem ‘long yu [Abram] bai mi mekim gut long olgeta lain manmeri bilong graun,’ i kirap taim Abram i brukim wara Yufretis na i go long Kenan. Dispela samting i kamap long Nisan 14, 1943 B.C.E.—430 yia paslain long taim ol Israel i lusim Isip. (Kisim Bek 12:2, 6, 7, 40, 41) Kontrak bilong Abraham em i bilong “i stap oltaim oltaim.” Dispela kontrak bai i stap inap long olgeta manmeri bilong graun i kisim blesing na i go inap long taim God i bagarapim olgeta birua bilong em.—Stat 17:7; 1 Korin 15:23-26.
15:13—Truim bilong tok profet long ol pikinini bilong Abraham bai karim hevi inap 400 yia i kamap long wanem taim? Dispela taim bilong karim hevi i kirap long yia 1913 B.C.E. taim pikinini bilong Abraham, em Aisak, i gat 5-pela krismas na brata bilong em Ismael i gat 19 krismas i “tok bilas” long em. (Stat 21:8; 21:9, NW; 21:10-14; Galesia 4:29) Dispela taim bilong hevi i pinis taim God i kisim bek lain Israel long kalabus long Isip long yia 1513 B.C.E.
16:2—I stret Sara i givim wokmeri bilong em, Hagar, long Abram olsem meri bilong em o nogat? Pasin Sara i mekim i stret wantaim kastam bilong ol long dispela taim bipo—sapos wanpela meri i no inap karim pikinini orait em i mas givim narapela meri long man bilong em bambai dispela meri inap karim pikinini bilong em. Pasin bilong maritim planti meri i kirap long famili bilong Kein. I no longtaim na dispela pasin i kamap olsem kastam bilong ol man long dispela taim bipo na sampela man i save lotuim Jehova i bin bihainim dispela pasin tu. (Stat 4:17-19; 16:1-3; 29:21-28) Tasol Jehova i no lusim pasin em i makim long pastaim, olsem man i mas i gat wanpela meri tasol. (Stat 2:21, 22) God i tokim Noa na ol pikinini man bilong em, em olgeta bilong ol i gat wanpela meri tasol, long ol i mas ‘karim planti pikinini na pulapim olgeta hap bilong graun.’ (Stat 7:7; 9:1; 2 Pita 2:5) Na Krais Jisas i kamapim gen dispela lo bilong pastaim olsem man i mas i gat wanpela meri tasol.—Matyu 19:4-8; 1 Timoti 3:2, 12.
19:8—I stret Lot i givim tupela pikinini meri bilong em long ol man bilong Sodom? Long hap bilong Is, em wok bilong papa bilong haus long lukautim ol man i kam long haus bilong em, na em bai helpim ol maski em i mas i dai bilong mekim olsem. Lot i redi long mekim olsem. Em i strongim bel na em yet i go ausait, na em i pasim dua bilong haus na toktok wantaim ol man i raunim haus bilong em. Ating taim Lot i tok long givim tupela pikinini meri bilong em long ol dispela man, em i luksave olsem dispela tupela man i stap long haus bilong em, God yet i bin salim ol i kam, na ating em i ting olsem God bai lukautim tupela pikinini meri bilong em olsem God i bin mekim long anti bilong em Sara, long Isip. (Stat 12:17-20) Olsem na Lot na tupela pikinini meri bilong em i abrusim bagarap.
19:30-38—Olsem Wanem? Yu ting Jehova i no gat tok long Lot i dring planti na i spak na em i kamapim tupela pikinini man long tupela pikinini meri bilong em? Jehova i no orait long pasin bilong mekim maritpasin wantaim wanblut na pasin bilong dring spak. (Wok Pris 18:6, 7, 29; 1 Korin 6:9, 10) Lot i bel hevi tru long pasin bilong ol lain bilong Sodom long “sakim lo.” (2 Pita 2:6-8) Tupela pikinini meri bilong Lot i mekim em i spak na dispela i kamapim klia olsem tupela i save olsem papa bilong tupela bai i no inap orait long slip wantaim tupela sapos em i no bin spak. Ol i no bilong dispela ples, olsem na tupela pikinini meri i ting i gat wanpela rot tasol na lain bilong Lot i no ken pinis, em long rot bilong slip wantaim papa. Stori bilong dispela samting i stap long Baibel bilong soim olsem lain Moap (long rot bilong Moap) na ol lain Amon (long rot bilong Benami) ol i wanblut bilong ol pikinini bilong Abraham, em ol Israel.
Skul Yumi Kisim:
13:8, 9. Abraham i stap gutpela piksa long pasin bilong stretim hevi! Yumi no ken larim pasin bilong tingting long kisim planti samting o tingim laik bilong yumi yet tasol o pasin antap i mekim na yumi lusim gutpela pasin pren bilong yumi wantaim ol narapela.
15:5, 6. Taim Abraham i wok long i go lapun na em i no gat wanpela pikinini man yet, em i toktok wantaim God long dispela samting. Jehova i givim tok long em bilong strongim bilip bilong em. Orait wanem samting i kamap? Abraham “i bilipim tok bilong Bikpela.” Sapos yumi beten na kamapim bel bilong yumi long Jehova, na yumi bilip long ol tok promis bilong em long Baibel, na bihainim tok bilong em, orait Jehova bai strongim bilip bilong yumi tu.
15:16. Jehova i no givim strafe long lain Amon (o lain Kenan) i go inap long namba 4 lain tumbuna pikinini i kamap. Bilong wanem em i mekim olsem? Long wanem em i God bilong isi long ol man. Em i wet i go inap long taim i no gat rot moa long ol i stretim pasin bilong ol. Olsem Jehova, yumi tu i mas wet i stap na no ken les.
18:23-33. Jehova i no save bagarapim nating ol manmeri. Em i save lukautim ol stretpela man.
19:16. Lot “i no hariap,” olsem na ol ensel i mas holim han bilong em wantaim meri na tupela pikinini bilong em na bringim ol i go ausait long Sodom. Yumi bihainim savepasin sapos yumi no lusim tingting olsem taim i sot pinis taim yumi wet long pinis bilong dispela taim nogut bilong nau.
19:26. Em pasin kranki tru sapos yumi larim ol samting bilong dispela graun i pulim yumi o yumi laikim tumas ol samting em yumi lusim pinis.
JEKOP I GAT 12-PELA PIKININI MAN
Abraham i stretim rot bilong Aisak i ken maritim Rebeka, em wanpela meri i save bilip long Jehova. Rebeka i karim tupela pikinini man, Iso na Jekop. Iso i ting namba bilong em olsem namba wan pikinini i no bikpela samting na em i salim long Jekop, na bihain Jekop i kisim blesing long papa bilong em. Jekop i ranawe i go long Mesopotemia, na long hap em i maritim Lea na Resel na em i lukautim ol sipsip bilong papa bilong tupela inap 20 yia na bihain em i kisim famili bilong em na lusim dispela hap. Long rot bilong Lea, Resel, na ol wokmeri bilong tupela, Jekop i kamapim 12-pela pikinini man na ol pikinini meri. Jekop i pait wantaim wanpela ensel na em i kisim blesing, na nem bilong em i senis i go Israel.
Bekim Bilong Ol Askim Bilong Baibel:
28:12, 13—Dispela “lata” em Jekop i lukim long driman bilong em i makim wanem samting? Dispela “lata,” ating i luk olsem ol step ston, i makim olsem ol lain long heven i toktok wantaim ol lain long graun. Ol ensel bilong God i go antap na i kam daun long en i makim olsem ol ensel i mekim sampela bikpela wok namel long Jehova na ol man em God i orait long ol.—Jon 1:51.
30:14, 15—Bilong wanem Resel i orait long larim Lea i slip wantaim Jekop sapos Lea i givim ol pikinini bilong wanpela kain plaua long em? Long bipo, ol i save yusim pikinini bilong dispela plaua olsem marasin bilong tekewe pen na bilong pasim skin bilong man long guria. Na ol i ting olsem dispela pikinini bilong plaua i save kirapim laik bilong skin long mekim maritpasin na helpim meri long kisim bel. (Song Bilong Solomon 7:13) Baibel i no tokaut long as na Resel i kisim pikinini bilong dispela plaua, tasol ating em i ting olsem dispela pikinini bilong plaua bai helpim em long kisim bel na pinisim hevi bilong em long em i no inap karim pikinini. Tasol sampela yia bihain Jehova i “mekim Resel inap long karim pikinini.”—Stat 30:22-24.
Skul Yumi Kisim:
25:23. Jehova inap skelim ol samting bilong pikinini i stap yet long bel bilong mama na em inap luksave long ol samting bai kamap bihain. Na paslain long pikinini i kamap, Jehova inap makim husat em bai mekim wok long en bilong kamapim samting em i tingting pinis long mekim. Tasol em i no save makim ol samting bai painim ol man wan wan.—Hosea 12:3; Rom 9:10-12.
25:32, 33; 32:24-29. Laik bilong Jekop long kisim namba olsem namba wan pikinini na em i pait wantaim wanpela ensel long nait olgeta bilong kisim blesing, dispela i kamapim klia olsem em i tingim tru ol samting i holi. Jehova i givim yumi sampela samting i holi. Olsem: Yumi inap pas gut wantaim em na oganaisesen bilong em, na em i givim ofa bilong baim bek yumi, na Baibel, na yumi wetim ol gutpela samting Kingdom bai mekim. Olsem Jekop, yumi tu yumi mas soim olsem yumi tingim tru ol samting i holi.
34:1, 30. Jekop i kisim “bikpela hevi,” long wanem, Daina i bin poromanim ol man i no save laikim Jehova. Yumi mas makim gut ol man yumi laik poromanim.
JEHOVA I BLESIM JOSEP LONG ISIP
Ol pikinini man bilong Jekop i jeles long brata bilong ol Josep na ol i salim em olsem wanpela wokboi nating. Taim em i stap long Isip, ol i putim Josep long kalabus, long wanem, em i stap gut long God na em i strong long bihainim ol lo bilong God long stretpela pasin. Bihain, ol i kisim em i go bilong kamapim insait bilong driman bilong Fero, em dispela driman i soim olsem 7-pela yia bai i gat planti kaikai na bihain 7-pela yia bai i gat hangre. Fero i makim Josep long i stap bos bilong bosim olgeta kaikai. Ol brata bilong em i kam long Isip bilong painim kaikai, long wanem, ples bilong ol i gat hangre. Famili olgeta bilong Jekop i bung gen na ol i sindaun long gutpela graun long Gosen. Paslain long em i dai Jekop i blesim ol pikinini man bilong em na em i mekim wanpela tok profet long ol gutpela blesing bai kamap long taim bihain bihain. Ol i kisim bodi bilong Jekop i go bek long Kenan na planim em. Taim Josep i gat 110 krismas em i dai, na ol i putim olkain marasin long bodi bilong em na bai bodi i no ken bagarap, na bihain tru ol i kisim ol bun bilong em i go planim long Graun Bilong Promis.—Kisim Bek 13:19.
Bekim Bilong Ol Askim Bilong Baibel:
43:32—Bilong wanem pasin bilong kaikai wantaim ol Hibru em i samting nogut tru long ai bilong ol Isip? Ating ol i mekim olsem, long wanem, ol i birua long ol narapela lotu o ol man bilong narapela skin. Na tu, ol Isip i no laikim tru ol man i save lukautim ol sipsip. (Stat 46:34) Bilong wanem? Ating ol man bilong lukautim sipsip ol i no gat nem long Isip. O ating graun bilong ol i no bikpela tumas inap long ol i planim ol kaikai samting, olsem na ol i no laikim ol man i painim ples bilong lukautim animal samting.
44:5—Yu ting tru tru Josep i bin yusim wanpela kap bilong kisim save long ol samting i stap hait? Dispela kap silva na tok ol i mekim long en ol i hap tasol bilong wanpela trik. Josep em i wanpela man i save lotu tru long Jehova. Em i no save yusim dispela kap bilong kisim save long ol samting i stap hait, na Benjamin tu i no bin stilim dispela kap.
49:10—Wanem mining bilong dispela tok “stik i makim strong bilong king”? Jekop i stori long dispela stik bilong makim bikpela namba na strong bai i stap long lain bilong Juda i go inap long taim Silo i kam. Dispela tumbuna pikinini bilong Juda em Jisas Krais, Jehova i makim em bilong mekim wok king long heven. Krais i gat namba na strong bilong mekim wok king.—Song 2:8, 9; Aisaia 55:4; Daniel 7:13, 14.
Skul Yumi Kisim:
38:26. Ol samting Juda i mekim long tambu meri bilong em, Tamar i no stret. Tasol taim Juda i kisim save olsem em i givim bel long Tamar, long pasin daun Juda i tokaut olsem em i gat asua. Yumi tu, yumi mas tokaut kwik long asua bilong yumi.
39:9. Pasin Josep i mekim long meri bilong Potifar i soim olsem tingting bilong em i stret wantaim tingting bilong God long stretpela pasin na ol stiatok bilong God i stiaim maus bilong bel bilong em. Yumi tu, yumi mas larim ol stiatok bilong God i stiaim yumi.
41:14-16, 39, 40. Jehova inap mekim ol samting bilong senisim i stap bilong ol man i daun long em. Taim hevi i kamap, em i savepasin long bilip long Jehova na i stap gut long em.
Bilip Bilong Ol i Stap Strong Oltaim
Abraham, Aisak, Jekop na Josep, ol i man bilong bilip na ol i daun long God. Stori bilong laip bilong ol i stap long Buk Stat i strongim tru bilip bilong yumi na i skulim yumi long planti gutpela samting.
Dispela stori bai helpim yu taim yu mekim Baibel ritim bilong miting bilong Skul Tiokratik Bilong Autim Tok long olgeta wan wan wik. Taim yu skelim ol dispela stori mipela i kamapim pinis, bai yu pilim tru ol dispela stori.
[Futnot]
a Lukim stori “Tok Bilong Jehova i Gat Laip—Sampela Bikpela Tok Bilong Buk Stat—Namba Wan” long Wastaua bilong Janueri 1, 2004.
[Piksa long pes 26]
Jehova i blesim Josep
[Piksa long pes 26]
Abraham em i man bilong bilip
[Piksa long pes 26]
Stretpela man Lot na tupela pikinini meri bilong em i abrusim bagarap
[Piksa long pes 29]
Jekop i tingim tru ol samting i holi. Yu tu i save mekim olsem?