Sapta 9

Bikpaia—Em i Stap Tru o Nogat?

 1. Ol misin i lainim ol manmeri olsem wanem long “hel”?

PLANTI misin i lainim ol manmeri long bikpaia o “hel.” Ol i tok “hel” em i ples paia na ol man nogut i go long en na kisim pen oltaim. Wanpela buk (Encyclopædia Britannica) i stori olsem: “Misin Katolik i tok hel . . . bai stap oltaim; pen bilong en i no ken pinis.” Na dispela buk i tok, planti lotu Talatala tu i gat wankain bilip. Lotu Hindu na ol Budis na Moslem tu i tok, “hel” em i ples bilong kisim pen. Olsem na planti man i no laik toktok long “hel,” long wanem ol i ting “hel” em i ples nogut.

 2. God i ting olsem wanem long pasin bilong kukim ol pikinini long paia?

² Olsem na yumi laik save: Tru God i bin wokim wanpela ples bilong givim pen long ol man, olsem bikpaia? Orait, taim ol Isrel i bihainim pasin bilong ol lain i stap klostu long ol na ol i kukim pikinini bilong ol long paia olsem ofa, God i ting olsem wanem long dispela pasin ol i mekim? God i tok: “Long ples daun bilong . . . Hinom ol i wokim alta bilong Tofet bilong kukim ol pikinini man na pikinini meri bilong ol long paia, tasol mi no bin tokim ol long mekim olsem, na mi no bin tingting long mekim kain pasin olsem.”—Jeremaia 7:31, NW.

 3. Olsem wanem yumi inap save, God i no ken givim pen long ol man?

³ Orait, sapos God i no bin tingting liklik long kukim ol man long paia, yu ting em i bin wokim wanpela ples paia, olsem “hel,” bilong givim pen long ol man i no mekim wok bilong em? Baibel i tok, God “i save laikim yumi tru.” (1 Jon 4:8) Olsem na yu ting em bai givim pen oltaim long ol man long wanpela ples paia? Bai yu mekim olsem? Yumi save God i laikim yumi tru na dispela i mas kirapim yumi long lukim Baibel bambai yumi ken save, bikpaia em i stap tru o nogat.

PLES BILONG OL DAIMAN NA HEL

 4. (a) Baibel i tok wanem na yumi ken save “ples bilong ol daiman” na “hel” i makim wanpela samting tasol? (b) Baibel i tok Jisas i go long “ples bilong ol daiman” o “hel” na dispela i givim wanem save long yumi?

⁴ Taim Baibel i stori long “ples bilong ol daiman” na “hel,” Baibel i kolim wanpela tok Hibru (Sheol) na wanpela tok Grik (Hades). Sapos yu lukim tok bilong Sam 16:10 na Aposel 2:31 long piksa long hap, yu ken save dispela tupela tok i makim wanpela samting tasol. Long Sam 16:10 ol i tanim dispela tok Hibru olsem “ples bilong ol daiman,” na long Aposel 2:31 ol i tanim dispela tok Grik tu olsem. Orait, wanem dispela “ples bilong ol daiman”? Sam 16:10 na Aposel 2:31 i tok Jisas i go long dispela ples. Orait Jisas i go we? Jisas i dai na i go long matmat. (Sam 16:10 namba tu hap) Na long sampela Baibel, long Aposel 2:31 ol i tanim dispela tok Grik (Hades) olsem “hel.” Tasol yu ting Jisas i go long wanpela ples paia bilong kisim pen? Nogat, a? Em i dai na i go long matmat. Olsem na “ples bilong ol daiman” o “hel” (Sheol, Hades) i makim wanpela samting tasol, em matmat.

 5, 6. Baibel i stori olsem wanem long Jekop na Josep na Jop na yumi ken save, “ples bilong ol daiman” o “hel” em matmat tasol?

⁵ Jenesis 37:35 i stori long Jekop i krai long pikinini bilong em, Josep, long wanem em i ting Josep i dai pinis. Jekop i tok: “Mi mas krai long em inap mi go i stap wantaim em long ples bilong ol daiman [hel].” Yu ting dispela “ples bilong ol daiman” o “hel” em i ples bilong kisim pen? Yu ting Jekop i ting Josep bai stap oltaim long kain ples olsem na em i laik i go i stap wantaim Josep long dispela ples? O yu ting Jekop i tingim dispela pikinini bilong em i dai pinis na em i stap long matmat?

⁶ Tru tumas, ol gutpela man i save go long “hel,” em “ples bilong ol daiman” o matmat. Tingim Jop. Jop i stap gut long God na taim em i kisim bikpela pen na hevi, em i beten askim God long helpim em. Jop i tok: “Plis, haitim mi long [ples bilong ol daiman o hel] . . . na yu ken makim wanpela taim na bai yu tingim mi!” (Jop 14:13, NW) Sapos dispela “ples bilong ol daiman” o “hel” i wanpela ples paia bilong kisim pen, yu ting Jop i laik i go long en na wetim God i tingim em? Nogat, a? Jop i laik bai em i dai na em i go long matmat na bai em i no ken pilim pen moa.

 7. (a) Ol manmeri i stap long “ples bilong ol daiman” ol i stap olsem wanem? (b) Olsem na “ples bilong ol daiman” o “hel” i wanem samting?

⁷ Tru, Baibel i kolim dispela tok “ples bilong ol daiman” (Sheol), tasol i no gat wanpela tok long Baibel i tok, man i stap long dispela ples em i gat laip o em i mekim wok. Baibel i tok, man i stap long “ples bilong ol daiman” em i stap long matmat; em i dai pinis na em i no inap mekim wok moa. Eklisiastis 9:10 (NW) tok: “Olgeta wok han bilong yu i laik mekim, yu mas wok strong long mekim; long wanem i no gat wok o tingting o save o savepasin long Sheol [matmat], em bai yu go long en.” Olsem na dispela “ples bilong ol daiman” o “hel” (Sheol, Hades) em matmat tasol, em ples “ol daiman” i go long en. (Sam 6:5) Gutpela man wantaim man nogut ol i save go long dispela ples.

LUSIM “PLES BILONG OL DAIMAN” O “HEL”

 8, 9. Taim Jona i stap insait long bel bilong pis, bilong wanem em i tok em i stap long “ples nogut bilong ol daiman”?

⁸ Orait, ol manmeri i dai pinis, ol inap lusim “ples bilong ol daiman” o “hel”? Tingim Jona. God i salim bikpela pis i kam daunim Jona. Jona i stap long bel bilong pis na em i beten olsem: “O Bikpela, mi . . . stap long ples nogut bilong daiman [hel], na mi krai long yu. Na yu harim krai bilong mi.”—Jona 2:2.

⁹ Bilong wanem Jona i tok em i stap “long ples nogut bilong ol daiman”? Yumi save, bel bilong pis i no wanpela ples paia. Tasol sapos Jona i no lusim, orait bel bilong pis bai kamap olsem matmat bilong em. Jisas i tok: “Olsem bipo Jona i stap tripela de na tripela nait insait long bel bilong bikpela pis, olsem tasol bai Pikinini Bilong Man i stap tripela de na tripela nait insait long graun.”—Matyu 12:40.

10. (a) I gat wanem samting na yumi ken save, ol manmeri inap lusim “ples bilong ol daiman” o “hel”? (b) I gat wanem samting moa na yumi save, “hel” em i matmat?

¹⁰ Jisas i dai pinis na em i stap long matmat tripela de. Tasol Baibel i tok: “God bai i no lusim em i stap long ples bilong ol daiman [Hades]. . . . dispela Jisas God i kirapim pinis.” (Aposel 2:31, 32) Na olsem tasol God i no lusim Jona i stap long “ples nogut bilong ol daiman,” olsem long bel bilong pis, em dispela ples inap kamap olsem matmat bilong em. God i tok na pis i trautim Jona long nambis. Tru tumas, ol manmeri inap lusim “ples bilong ol daiman” o “hel.” Olsem na yumi ken amamas tru long tok promis bilong Revelesen 20:13: “Dai wantaim Hel [Hades] i givim bek olgeta daiman i stap long dispela.” Tok bilong Baibel long ol samting i painim ol man i dai pinis em i narapela kain long tok bilong ol misin!

GEHENNA NA BIKPELA HUL I GAT PAlA

11. Wanem narapela tok Grik i kamap 12-pela taim long Nupela Testamen na ol i tanim olsem “hel” o “paia bilong hel”?

¹¹ Tasol sampela man i tok, ‘Baibel i tok long paia bilong hel na long bikpela hul i gat paia, olsem na ating i gat wanpela ples nogut i stap na i gat paia long en bilong givim pen long ol man.’ Tru long sampela Baibel ol i tanim tok Grik Gehenna olsem “paia bilong hel” na ol i tok dispela “paia i no save pinis.” (Matyu 5:22; Mak 9:45, 46) Dispela tok Grik Gehenna i kamap 12-pela taim long Nupela Testamen, na long tok Pisin ol i tanim olsem “hel” na “paia bilong hel.” Olsem wanem? Dispela tok Gehenna i makim wanpela ples nogut i gat paia?

12. Gehenna i wanem kain ples? Bipo ol Isrel i mekim wanem long dispela ples?

¹² Orait, wanem insait bilong dispela tok Grik Gehenna? Long Olpela Testamen Gehenna i olsem ‘ples daun bilong Hinom.’ Yu tingim? Dispela ples daun i stap ausait long Jerusalem, na long dispela ples ol Isrel i bin kukim ol pikinini bilong ol long paia olsem ofa. Tasol bihain gutpela King Josaia i bagarapim dispela ples bambai ol i no ken mekim moa dispela pasin nogut long en. (2 King 23:10) Dispela ples i kamap ples bilong tromoi pipia.

13. (a) Long taim bilong Jisas ol i mekim wanem wok long Gehenna? (b) Ol i no save tromoi wanem samting long Gehenna?

¹³ Olsem na taim Jisas i stap long graun, Gehenna em i ples bilong tromoi pipia na i gat paia long en bilong kukim pipia. Ol i save tromoi marasin salfa long en bambai paia i no ken i dai. Wanpela buk (Smith’s Dictionary of the Bible) i stori long en olsem: “Em i kamap ples pipia bilong dispela taun, na ol i tromoi skin bilong ol man nogut i dai pinis na ol animal i dai pinis na ol narapela kain pipia i go daun long en.” Ol i no save tromoi samting i stap laip yet. Nogat.

14. I gat wanem samting na yumi ken save, Gehenna i makim man i dai na pinis olgeta?

¹⁴ Ol manmeri i stap long Jerusalem ol i save long dispela ples bilong tromoi pipia (Gehenna), olsem na ol i save long insait bilong dispela tok Jisas i givim long ol man nogut i bosim lotu, em i tok: “Yupela snek nogut! God bai i kotim yupela na bai yupela i go long hel [Gehenna].” (Matyu 23:33) Jisas i no tok God bai givim pen oltaim long ol dispela bos bilong lotu. Nogat. Bipo ol Isrel i kukim pikinini long dispela ples Gehenna taim pikinini i stap laip yet. Tasol God i no bin tingting long mekim kain pasin nogut olsem! Olsem na Jisas i tok piksa long Gehenna bilong makim man i dai na i pinis olgeta. Em i makim ol dispela man nogut i bosim lotu ol i no inap kirap bek. Ol manmeri i harim dispela tok Jisas i mekim, ol i save, ol man i go long Gehenna ol i olsem pipia nating na ol i dai na bagarap olgeta.

15. “Bikpela hul i gat paia” i makim wanem samting? Olsem wanem yumi inap save long dispela samting?

¹⁵ Orait, wanem dispela “bikpela hul i gat paia,” em Revelesen i stori long en? Dispela “hul” i makim wankain samting olsem Gehenna. Em i makim man i dai na i pinis olgeta. Baibel yet i tok olsem long Revelesen 20:14: “Em i tromoi Dai wantaim Hel [matmat] i go daun long dispela bikpela hul i gat paia. Dispela bikpela hul i gat paia em i namba tu dai.” Olsem na dispela “bikpela hul i gat paia” i makim man i dai na i pinis olgeta, na em i no ken kirap bek moa. Yumi save, dispela tok long “bikpela hul i gat paia” em i tok piksa, long wanem ol bai tromoi “Dai wantaim Hel” long en. Dai wantaim Hel [matmat] i no wanpela samting em inap paia tru. Tasol ol bai pinis olgeta na i no gat moa.

16. Wanem insait bilong dispela tok olsem Seten bai karim pen oltaim long “bikpela hul i gat paia”?

¹⁶ Tasol sampela man i tok, ‘Tru, tasol Baibel i tok, bai Seten i karim pen oltaim long bikpela hul i gat paia.’ (Revelesen 20:10) Wanem insait bilong dispela tok? Bipo ol i kolim wasman bilong haus kalabus olsem “man bilong givim pen.” (Matyu 18:34) Ol man i stap long “bikpela hul i gat paia” o “namba tu dai” ol i no inap kirap bek. I olsem dai i kalabusim ol i stap inap oltaim. Long tok piksa i olsem ol i stap oltaim long han bilong “man bilong givim pen.” Tasol ol man nogut i no gat pen tru. Ol i kalabus tasol long dai. Yumi save pinis, ol man i dai ol i no inap pilim pen. Ol i dai olgeta na ol i no save long wanpela samting.

MANIMAN NA LASARAS

17. Olsem wanem yumi ken save, stori bilong Jisas long maniman na Lasaras em wanpela tok piksa tasol?

¹⁷ Tasol Jisas i mekim wanpela tok piksa na em i tok: “Bihain dispela rabisman i dai, na ol ensel ol i karim em i go na putim em i stap wantaim Ebraham. Na dispela maniman em tu i dai, na ol i planim em. Na em i stap long hel [Hades] na i gat bikpela pen. Em i lukluk i go antap, na i lukim Ebraham i stap longwe tumas, na Lasaras i stap wantaim em.” (Luk 16:19-31) Wanem insait bilong dispela tok? Yumi save pinis “hel” (o Hades) em i matmat tasol. Olsem na Jisas i tok piksa tasol. Long wanem, sapos tru i gat wanpela ples paia, olsem “hel,” yu ting man i stap long dispela ples em i stap klostu long heven na em inap toktok wantaim man i stap long heven? Nogat, a? Na sapos tru dispela maniman em i stap long paia, yu ting liklik hap wara long pinga bilong Lasaras inap mekim kol tang bilong em? Nogat, a? Olsem na yumi save Jisas i tok piksa tasol. Orait, dispela tok piksa bilong Jisas i makim wanem samting?

18. Long dispela tok piksa (a) maniman i makim husat? (b) Lasaras i makim husat? (c) Maniman i dai, dispela i makim wanem samting? Lasaras i dai, dispela i makim wanem samting? (d) Pen bilong maniman i makim wanem samting?

¹⁸ Dispela maniman em i makim ol bikpela man i bosim lotu, em ol i hambak na kilim Jisas i dai. Lasaras i makim ol man nating ol i bilip long Jisas. Maniman na Lasaras tupela i dai, dispela i makim bikpela senis i kamap long ol. Dispela senis i kamap taim Jisas i givim kaikai bilong spirit long ol manmeri Lasaras i makim ol; ol i no i stap rabis moa long ol samting bilong spirit, na nau Bikpela Ebraham, God Jehova, em i laikim ol. Tasol em i no laikim moa ol dispela bikpela man i bosim lotu giaman; i olsem ol “i dai.” God i sakim ol na taim ol disaipel bilong Jisas i kamapim pasin nogut bilong ol ol i pilim bikpela pen. (Aposel 7:51-57) Olsem na dispela tok piksa i no tok sampela man i dai pinis ol i go long bikpaia o “hel” na ol i kisim pen. Nogat.

SETEN I AS BILONG OL DISPELA TOK

19. (a) Seten i as bilong wanem ol tok giaman? (b) Olsem wanem yumi ken save, tok bilong klinpaia em i tok giaman?

¹⁹ Seten i bin tokim Iv: “Yutupela i no ken dai.” (Jenesis 3:4; Revelesen 12:9) Tasol Iv i dai; em i dai olgeta, no gat wanpela liklik hap bilong em i stap laip moa. Seten i as bilong dispela tok giaman olsem yumi gat tewel na taim yumi dai, tewel i stap laip yet. Na Seten i as bilong dispela tok giaman olsem tewel bilong ol man nogut i go long bikpaia (hel) o long klinpaia (pegatori) bilong kisim pen. Baibel i tok klia, ol man i dai pinis ol i dai tru; ol i no save long wanpela samting. Olsem na ol dispela narapela tok i no stret. Tok bilong klinpaia i no stap long Baibel.

20. (a) Ol dispela tok i lainim yumi long wanem samting? (b) Dispela save yu kisim i mekim wanem long yu?

²⁰ Orait, yumi skelim pinis ol dispela tok na yumi save, “ples bilong ol daiman” o “hel” (Sheol, Hades) em matmat tasol. Gutpela man na man nogut i go long en na wetim God i kirapim bek ol. Na Gehenna i no ples tru bilong kisim pen; nogat. Baibel i tok piksa long Gehenna bilong makim man i dai na i pinis olgeta, i no ken kirap bek. Na dispela “bikpela hul i gat paia” i makim wankain samting; em “namba tu dai.” God i no bin tingting liklik long wokim wanpela ples paia. Na sapos God i givim pen long man oltaim oltaim bilong bekim pasin nogut man i bin mekim inap liklik taim tasol, em i no stret, a? Nau yumi save long ol samting tru i painim ol man i dai pinis! Tok i tru i helpim yumi long i stap gutpela. Yumi no pret, na ol bilip giaman i no kalabusim yumi moa.—Jon 8:32.

[Blok long pes 83]

Dispela tok Hibru na dispela tok Grik i makim wanpela samting tasol, em matmat

Nupela Testamen na Ol Sam

Sam 16:10

Aposel 2:31

31 Bipo Devit i lukim pinis samting God i laik mekim, na em i tok long Krais bai i kirap bek. Em i tok, ‘God bai i no lusim em i stap long ples bilong ol daiman. Na bodi bilong en bai i no sting.

[Piksa long pes 84, 85]

Taim pis i daunim pinis Jona bilong wanem Jona i tok: ‘Mi stap long ples nogut bilong ol daiman’?

[Piksa long pes 86]

Gehenna em i ples daun i stap ausait long Jeruslem. Em i makim man i dai na i pinis olgeta