Ol Bikpela Blesing Moa Long Rot Bilong Nupela Kontrak
“Jisas . . . i stap namelman bilong strongim nupela kontrak, na dispela kontrak i winim tru kontrak bilong bipo.”—HIBRU 8:6.
1. Husat dispela ‘pikinini bilong meri’ God i tok promis long en long Iden? Olsem wanem Satan i ‘kaikaim lek bilong em’?
TAIM Adam na Iv i mekim rong pinis, Jehova i kolim strafe bilong Satan, em dispela ensel i bin giamanim Iv, na Jehova i tok: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem pikinini] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:15) Taim Jisas i kisim baptais long wara Jordan long yia 29 C.E., dispela Pikinini God i bin tok promis long en long Iden, em i kamap. Taim em i dai long pos long yia 33 C.E., wanpela hap bilong dispela tok profet bilong bipo yet i kamap tru. Satan i “kaikaim lek” bilong dispela Pikinini.
2. Olsem Jisas yet i tok, olsem wanem indai bilong em i helpim ol manmeri bilong graun?
2 Tru, dispela i givim bikpela pen moa yet long Jisas, tasol gutpela tru, em i orait gen. Jisas i kirap bek long matmat na kamap wanpela spirit i no inap i dai, na em i go antap long Papa bilong em long heven, na nau em i givim pe bilong blut bilong em long God “bilong baim bek planti manmeri.” Long dispela rot tok bilong em yet i kamap tru, em i tok: “Ol bai i litimapim Pikinini Bilong Man. Olsem bai olgeta man i bilip long em, ol i ken kisim laip i stap gut oltaim oltaim. God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Matyu 20:28; Jon 3:14-16; Hibru 9:12-14) Nupela kontrak i gat bikpela wok insait long truim bilong tok profet bilong Jisas.
Nupela Kontrak
3. Wanem namba wan taim ol i lukim olsem nupela kontrak i kirap pinis long mekim wok?
3 Klostu long taim Jisas i dai, em i tokim ol disaipel bilong em olsem blut bilong em i kapsait, em “blut bilong [em] bilong mekim [nupela] kontrak.” (Matyu 26:28; Luk 22:20) Tenpela de bihain long taim em i go antap long heven, ol i lukim olsem nupela kontrak i kirap pinis long mekim wok taim spirit holi i kam daun long 120 disaipel ol i bung long wanpela rum antap long Jerusalem. (Aposel 1:15; 2:1-4) Taim ol dispela 120 disaipel i go insait long nupela kontrak, dispela i makim olsem “namba wan” kontrak, em kontrak bilong Lo, nau em i pinis.—Hibru 8:13.
4. Ating olpela kontrak i no bin mekim wok bilong en o olsem wanem? Stori long dispela samting.
4 Olsem wanem? Ating olpela kontrak i no bin mekim wok bilong en? Nogat, i no olsem. Tru, nau i gat senis bilong en, olsem na lain Israel bilong skin i no stap moa olsem lain manmeri bilong God stret. (Matyu 23:38) Tasol as bilong dispela, em lain Israel i no bihainim tok bilong Jehova na ol i sakim Man God i Makim. (Kisim Bek 19:5; Aposel 2:22, 23) Tasol taim senis bilong Lo Bilong Moses i no kamap yet, Lo i mekim planti wok. Inap planti handet yia em i givim rot long lain bilong God ol i ken go klostu long Em, na Lo i banisim ol na bai lotu giaman i no ken bagarapim ol. Na Lo i gat sampela samting long en i olsem piksa bilong nupela kontrak, na Lo i kolim ol ofa ol Israel i mas mekim long olgeta taim, na dispela i kamapim long ples klia olsem ol man i mas i gat wanpela samting bilong kisim bek ol long sin na indai. Tru tumas, Lo i stap olsem “waspapa bilong [ol], bilong bringim [ol] i kam long Krais.” (Galesia 3:19, 24; Rom 3:20; 4:15; 5:12; Hibru 10:1, 2) Tasol dispela blesing God i tok promis long en long Abraham, em bai kamap tru olgeta long rot bilong nupela kontrak.
Ol Blesing Bai Kamap Long Rot Bilong Pikinini Bilong Abraham
5, 6. Kontrak God i bin mekim wantaim Abraham, long truim bilong en long ol samting bilong spirit husat em i Pikinini bilong Abraham? Wanem lain i namba wan lain bilong kisim blesing long rot bilong em?
5 Jehova i tok promis long Abraham olsem: “Long rot bilong pikinini bilong yu olgeta lain bilong graun bai kisim blesing.” (Stat 22:18, NW) Aninit long olpela kontrak, planti manmeri bilong ol narapela kantri ol i gat pasin daun ol i kisim blesing taim ol i bung wantaim ol Israel, em lain pikinini bilong Abraham. Tasol long truim bilong dispela long ol samting bilong spirit, Pikinini bilong Abraham em wanpela man tasol, em i gutpela olgeta. Pol i kamapim klia dispela samting taim em i tok: “Bipo God i bin tok long gutpela samting bai i kamap bihain. Dispela promis God i givim long Abraham wantaim pikinini bilong en. Buk bilong God i no tok olsem, ‘Long ol pikinini bilong yu.’ Em i no tok long planti pikinini. Nogat. Em i tok long wanpela tasol, na i tok olsem, ‘Long pikinini bilong yu.’ Dispela pikinini em Krais.”—Galesia 3:16.
6 Em nau, Jisas em i Pikinini bilong Abraham, na long rot bilong Em ol manmeri bilong olgeta lain bai kisim wanpela blesing i winim tru blesing ol Israel bilong skin ol inap kisim. Namba wan lain bilong kisim dispela blesing em Israel yet. Bihain liklik long Pentikos bilong yia 33 C.E., aposel Pita i tokim wanpela lain Juda: “Yupela i lain pikinini bilong ol profet, na yupela i man bilong kisim ol samting God i bin promis long givim taim em i mekim dispela kontrak wantaim ol tumbuna bilong yupela. Em i bin tokim Abraham olsem, ‘Long tumbuna pikinini bilong yu mi bai mekim gut long olgeta lain manmeri bilong graun.’ Orait God i kirapim dispela wokman bilong en, na i salim em i kam long yupela pastaim, bilong mekim gut long yupela na helpim yupela olgeta wan wan long lusim ol pasin nogut bilong yupela.”—Aposel 3:25, 26.
7. Wanem ol narapela lain ol i kisim blesing long rot bilong Jisas, em Pikinini bilong Abraham?
7 I no longtaim na ol Samaria i kisim dispela blesing, na bihain ol manmeri bilong ol narapela lain i kisim. (Aposel 8:14-17; 10:34-48) Namel long yia 50 na 52 C.E., Pol i raitim pas i go long ol Kristen long Galesia long hap bilong Esia Maina, na em i tok: “Bipo yet God i save olsem, bihain ol arapela lain bai i bilip long gutnius, na em i ting long em bai i kolim ol stretpela manmeri. Olsem na bipo tru em i autim gutnius long Abraham, olsem buk bilong God i tok, ‘Long yu God bai i mekim gut long olgeta lain manmeri.’ Abraham i bilip na God i bin mekim gut long em. Na olsem tasol God bai i mekim gut long olgeta manmeri i bilip.” (Galesia 3:8, 9; Stat 12:3) Tru, planti Kristen long Galesia ol i bilong “ol arapela lain,” tasol long rot bilong Jisas ol i kisim blesing, long wanem, ol i bilip. Ol i kisim blesing olsem wanem?
8 Pol i givim tok long ol Kristen bilong Galesia, maski ol i bilong wanem wanem lain, na em i tokim ol: “Sapos yupela i stap lain bilong Krais, orait yupela i stap pikinini bilong Abraham tu. Em yupela tasol ol lain bilong kisim ol dispela samting bipo God i bin promis long givim long ol lain bilong Abraham.” (Galesia 3:29) Sampela bilong dispela blesing ol Galesia i bin kisim long rot bilong Pikinini bilong Abraham i olsem, ol i insait long nupela kontrak, na tu, ol i bilong i stap king wantaim Jisas, olsem ol wanwok bilong Jisas long lain pikinini bilong Abraham. Yumi no save, i gat hamas manmeri insait long lain Israel bilong skin. Yumi save tasol olsem ol i bin kamap planti tru, “inap olsem wesan bilong nambis.” (1 King 4:20) Tasol yumi save hamas wanwok bilong Jisas bai stap long lain pikinini bilong spirit—em 144,000. (KTH 7:4; 14:1) Ol dispela 144,000 ol i bilong “olgeta lain man, na bilong olgeta tok ples, na bilong olgeta kain skin, na bilong olgeta kantri,” na ol i insait long wok bilong givim ol blesing bilong kontrak God i bin mekim wantaim Abraham i go long ol narapela manmeri.—KTH 5:9.
Wanpela Tok Profet i Kamap Tru
9 Taim Jeremaia i tok profet long nupela kontrak, em i raitim tok olsem: “Dispela nupela kontrak mi [Jehova] laik mekim wantaim ol manmeri bilong Israel, em i olsem. Bai mi putim lo bilong mi long tingting bilong ol na bai mi raitim tok bilong lo long bel bilong ol.” (Jeremaia 31:33) Pasin bilong dispela lain i stap insait long nupela kontrak i olsem: Ol i save mekim wok bilong Jehova, long wanem, ol i laikim em tru. (Jon 13:35; Hibru 1:9) Lo bilong Jehova i stap long bel bilong ol, na ol i gat bikpela laik tru long mekim wok bilong em. Tru, long Israel bilong bipo, sampela bilipman ol i laikim tumas lo bilong Jehova. (Song 119:97) Planti ol i no laikim. Tasol ol i stap yet insait long lain Israel. Tasol i no gat wanpela man inap i stap insait long nupela kontrak sapos lo bilong God i no stap long bel bilong em.
10, 11. Ol manmeri insait long nupela kontrak, olsem wanem Jehova i kamap “God bilong ol”? Olsem wanem olgeta bai save long em?
10 Na Jehova i tok moa long ol manmeri i insait long nupela kontrak: “Bai mi stap God bilong ol na bai ol i stap lain manmeri bilong mi.” (Jeremaia 31:33) Long Israel bilong bipo planti ol i lotuim ol god bilong ol narapela lain, tasol ol i stap yet olsem lain Israel. Long nupela kontrak Jehova i kamapim wanpela lain bilong spirit, em “lain Israel tru bilong God,” olsem senis bilong lain Israel bilong skin. (Galesia 6:16; Matyu 21:43; Rom 9:6-8) Tasol i no gat wanpela man inap i stap insait long dispela nupela lain bilong spirit sapos em i no lotu moa long Jehova.
11 Jehova i tok tu olsem: “Olgeta bai i save pinis long mi, maski ol i man nating o ol i gat biknem.” (Jeremaia 31:34) Long Israel, planti ol i givim baksait long Jehova, na i olsem ol i tok: “God i save sindaun nating. Em i no helpim ol gutpela man na em i no bekim pe long ol man nogut. Olsem na maski long em.” (Sefanaia 1:12) Sapos wanpela man i givim baksait long Jehova o em i mekim sampela pasin i bagarapim trupela lotu, em i no inap i stap insait long Israel bilong God. (Matyu 6:24; Kolosi 3:5) Ol Israel bilong spirit em “ol manmeri i save aninit tru long God.” (Daniel 11:32) Ol i amamas long kisim ‘save long God, em wanpela tasol i God tru, na long Jisas Krais.’ (Jon 17:3) Ol i save long Jisas na dispela i helpim ol long save moa yet long God, long wanem, Jisas “wanpela tasol i bin soim God long yumi.”—Jon 1:18; 14:9-11.
12, 13. (a) Wanem samting i mekim na Jehova i save lusim sin bilong ol manmeri i insait long nupela kontrak? (b) Olsem wanem nupela kontrak i winim olpela kontrak long lusim sin bilong man?
12 Bihain Jehova i tok promis olsem: “Bai mi lusim sin bilong ol na mi no ken tingim moa.” (Jeremaia 31:34b) Lo Bilong Moses i gat planti handet lo ol i bin raitim, em ol Israel i mas bihainim. (Lo 28:1, 2, 15) Olgeta man i brukim Lo Bilong Moses ol i mas ofaim wanpela bulmakau samting bilong tekewe ol rong bilong ol. (Wok Pris 4:1-7; 16:1-31) Planti Juda i kisim tingting olsem ol inap kamap stretpela man long ol wok bilong ol yet olsem Lo i makim. Tasol ol Kristen i save, long wok bilong ol yet ol i no inap kamap stretpela man, olsem pe bilong dispela wok, nogat. Ol i no inap abrusim pasin bilong mekim rong. (Rom 5:12) Aninit long nupela kontrak, ol inap kamap stretpela man long ai bilong God long rot bilong ofa bilong Jisas tasol—i no gat narapela rot. Tasol God i marimari long ol na i givim dispela samting long ol olsem presen. (Rom 3:20, 23, 24) Long nau tu, Jehova i strong yet long ol wokboi bilong em i mas bihainim tok bilong em. Pol i tok, ol manmeri i insait long nupela kontrak, ol i mas “bihainim lo bilong Krais.”—1 Korin 9:21.
13 Olsem na i gat wanpela ofa bilong tekewe sin bilong ol Kristen tu, tasol dispela ofa i winim tru ol ofa ol i bin mekim aninit long kontrak bilong Lo. Pol i tok: “Olgeta pris [i stap aninit long kontrak bilong Lo] ol i save sanap na mekim wok bilong ol long olgeta de. Na ol i save mekim ol dispela wankain ofa planti taim moa, em ol dispela ofa i no inap tru long tekewe sin. Tasol Krais em i mekim wanpela ofa tasol bilong tekewe sin, na dispela ofa em inap long i stap olgeta taim. Em i mekim olsem pinis, orait em i sindaun long han sut bilong God.” (Hibru 10:11, 12) Ol Kristen i insait long nupela kontrak ol i bilip long ofa bilong Jisas, olsem na Jehova i kolim ol olsem stretpela man, i no gat sin, na long dispela as em inap makim ol olsem pikinini bilong em long spirit. (Rom 5:1; 8:33, 34; Hibru 10:14-18) Taim ol i popaia na mekim wanpela rong, ol inap krai long Jehova long lusim rong bilong ol, na long ofa bilong Jisas, Jehova i save lusim ol dispela rong bilong ol. (1 Jon 2:1, 2) Tasol sapos long laik bilong ol yet ol i bihainim pasin bilong mekim rong, ol i no stap moa olsem stretpela man long ai bilong Jehova, na ol i no inap i stap insait moa long nupela kontrak.—Hibru 2:2, 3; 6:4-8; 10:26-31.
Olpela Kontrak na Nupela Kontrak
14. Wanem pasin bilong katim skin ol man i mas bihainim aninit long kontrak bilong Lo? aninit long nupela kontrak?
14 Ol man insait long olpela kontrak ol i mas katim skin bilong makim olsem ol i stap aninit long Lo Bilong Moses. (Wok Pris 12:2, 3; Galesia 5:3) Taim kongrigesen Kristen i kamap nupela, sampela i ting olsem ol Kristen i no bilong lain Juda ol tu i mas katim skin. Tasol Tok Bilong God na spirit holi i stiaim ol aposel na elda i stap long Jerusalem, na ol i kisim tingting olsem i no gat wok long ol dispela Kristen i mas mekim olsem. (Aposel 15:1, 5, 28, 29) Sampela yia bihain Pol i tok: “Sapos man i stap Juda long nem tasol, em i no Juda tru. Na pasin bilong katim skin, em i no samting bilong bodi tasol. Nogat. Man i stap Juda long bel na tingting bilong en, em i Juda tru. Na pasin tru bilong katim skin, em tu i mas kamap insait long bel na tingting bilong man. Em i no save kamap long pasin bilong bihainim ol tok ol i bin raitim long lo. Nogat. Em i samting Spirit bilong God i save kamapim.” (Rom 2:28, 29) Pasin bilong katim skin tru tru, maski ol Juda bilong skin i mekim, em i no bikpela samting moa long ai bilong Jehova. Long ol man i insait long nupela kontrak, pasin bilong katim skin em ol i mas mekim long bel, na long skin tru nogat. Olgeta tingting, na laik bilong bel, na ol tingting i kirapim ol long mekim ol samting, sapos em i no stret o i no klin long ai bilong Jehova, orait ol i mas katim na rausim.a Planti manmeri bilong nau ol i stap olsem gutpela piksa i kamapim long ples klia strong bilong spirit holi long senisim tru tingting bilong man.—1 Korin 6:9-11; Galesia 5:22-24; Efesus 4:22-24.
15. Skelim wok king long lain Israel bilong skin na lain Israel bilong God.
15 Long kontrak bilong Lo, Jehova i stap King bilong Israel, na bihain em i bosim lain Israel long rot bilong sampela man ol i stap king long Jerusalem. (Aisaia 33:22) Na Jehova i stap King bilong lain Israel bilong God, em Israel bilong spirit, na kirap long yia 33 C.E., em i mekim wok king long rot bilong Krais Jisas, em i bin kisim “bikpela namba na strong bilong bosim olgeta samting long heven na long graun.” (Matyu 28:18; Efesus 1:19-23; Kolosi 1:13, 14) Long nau, lain Israel bilong God i luksave olsem Jisas em i King bilong Kingdom bilong God long heven i bin kamap long yia 1914. Jisas em i gutpela King tru, winim Hesekia, Josaia, na ol narapela gutpela king long Israel bilong bipo.—Hibru 1:8, 9; KTH 11:15.
16 Lain Israel i no olsem wanpela kantri, o kingdom tasol, nogat; ol i gat wanpela lain pris tu. Long yia 33 C.E., lain Israel bilong God i senisim Israel bilong skin na i kamap “wokman” bilong Jehova, olsem “witnes” bilong em. (Aisaia 43:10) Kirap long dispela taim, ol tok Jehova i mekim long ol Israel na i stap long Aisaia 43:21 na Kisim Bek 19:5, 6, em i makim lain Israel bilong God. Nau dispela nupela lain bilong God ol “i stap lain manmeri bilong em stret. [Ol] i stap ol pris bilong lain bilong king. [Ol] i stap lain manmeri i holi, em . . . lain manmeri God i bin makim bilong em yet,” na ol i gat wok long “tokaut long olgeta gutpela pasin em i bin mekim long [ol].” (1 Pita 2:9) Olgeta wan wan insait long lain Israel bilong God, ol man na meri, ol i wanpela lain pris. (Galesia 3:28, 29) Ol i olsem ol nambatu pikinini bilong Abraham, olsem na nau ol i tok: “Ol manmeri bilong ol arapela kantri, yupela i mas litimapim nem bilong [olsem amamas wantaim] ol manmeri bilong God.” (Lo 32:43) Ol manmeri bilong lain Israel bilong spirit em ol i stap yet long graun, olgeta wantaim em dispela “wokboi i gat gutpela tingting.” (Matyu 24:45-47) Bilong mekim wok holi bilong God na em i ken orait long en, yumi mas mekim wantaim dispela lain.
Kingdom Bilong God—Laspela Truim Bilong En
17. Ol manmeri i insait long nupela kontrak ol i kamap nupela olsem wanem?
17 Ol Israel em mama i karim ol bihain long yia 1513 B.C.E., ol i stap aninit long kontrak bilong Lo taim mama i karim ol. Orait ol manmeri Jehova i kisim ol i go insait long nupela kontrak, ol tu i kamap olsem nupela pikinini—ol i kamap nupela long spirit. Jisas i bin tokim Farisi Nikodemus long dispela samting taim em i tok: “Tru tumas mi tokim yu, sapos man i no kamap nupela gen, em i no inap lukim kingdom bilong God.” (Jon 3:3) Ol dispela 120 disaipel i bin bung long Pentikos bilong yia 33 C.E. ol i namba wan lain bilong graun long kamap nupela gen. Ol i stap aninit long nupela kontrak na God i kolim ol olsem stretpela manmeri, olsem na ol i kisim spirit holi bilong makim olsem bihain bai ol i kisim namba olsem king, em “God i bin promis long givim long ol.” (Efesus 1:14) Spirit holi i mekim ol i kamap nupela bambai ol i ken kamap pikinini bilong God, na dispela i mekim na ol i kamap brata bilong Jisas, olsem na ol i bilong kisim ‘ol samting Krais i kisim pinis.’ (Jon 3:6; Rom 8:16, 17) Taim ol i “kamap nupela gen,” dispela i opim rot bilong ol gutpela samting tru bai painim ol.
18 Taim Jisas i kamap namelman bilong nupela kontrak, em i mekim narapela kontrak wantaim ol disaipel bilong em. Em i tok: “Papa bilong mi em i givim kingdom long mi, olsem tasol mi givim kingdom long yupela.” (Luk 22:29) Dispela kontrak bilong Kingdom i redim rot bilong kamapim truim bilong wanpela piksa olsem driman i narapela kain tru, i stap long Daniel 7:13, 14, 22, 27. Daniel i lukim “wanpela man i wankain olsem yumi man bilong graun,” na “Man bilong bipo bipo yet,” em God Jehova, i givim namba long em bilong kamap king. Orait nau Daniel i lukim olsem “ol manmeri bilong God i kamap olsem king.” Jisas yet em i dispela “man i wankain olsem yumi man bilong graun,” na long 1914 em i kisim Kingdom bilong heven long God Jehova. Ol disaipel bilong em God i bin makim long spirit holi, em dispela “ol manmeri bilong God” ol i bilong i stap king wantaim em long dispela Kingdom. (1 Tesalonaika 2:12) Olsem wanem ol inap mekim olsem?
19, 20. (a) Bilong ol manmeri i insait long nupela kontrak, wanem laspela gutpela truim bilong tok promis Jehova i bin mekim long Abraham bai kamap? (b) I gat wanem narapela askim yumi mas skelim?
19 Taim ol i dai pinis, ol dispela manmeri God i bin makim, ol i bilong mekim wankain samting olsem Jisas—ol i mas kirap bek long matmat na kamap olsem ol spirit i no inap i dai moa, na ol i bilong mekim wok wantaim em olsem king na pris long heven. (1 Korin 15:50-53; KTH 20:4, 6) Em gutpela samting tru ol i wetim! “Bai ol i stap king na bosim ol manmeri bilong graun,” na i no graun bilong Kenan tasol, nogat. (KTH 5:10) Olsem wanem? Bai ol i “bosim dua bilong taun bilong ol birua bilong ol”? (Stat 22:17, NW) Bai ol i mekim olsem. Ol bai daunim ol tru taim ol i lukim dispela pamukmeri bilong lotu i save birua long ol, em Bikpela Babilon, i bagarap olgeta, na taim ol dispela manmeri God i bin makim na ol i kirap bek pinis ol i wok wantaim Jisas long bosim strong ol lain manmeri bilong graun “long stik ain” na bagarapim het bilong Satan. Olsem na ol bai insait long wok bilong truim laspela hap bilong tok profet i stap long Stat 3:15.—KTH 2:26, 27, NW; 17:14; 18:20, 21; Rom 16:20.
20 Tasol yumi gat askim olsem: Kontrak God i bin mekim wantaim Abraham, na nupela kontrak, ol i samting bilong ol dispela 144,000 manmeri tasol? Nogat. I gat sampela moa em ol i no insait tru long ol dispela kontrak, tasol ol bai kisim ol gutpela samting long rot bilong ol, olsem yumi bai lukim long stori i kamap bihain long dispela.
[Futnot]
a Lukim buk Insight on the Scriptures, Volyum 1, pes 470, em Sosaiti Wastaua bilong Nu Yok i wokim.
Yu Tingim Yet?
◻ Wanem namba wan taim ol i lukim olsem nupela kontrak i kirap pinis long mekim wok?
◻ Wanem ol samting i bin kamap long rot bilong olpela kontrak?
◻ Husat em i Pikinini bilong Abraham? Husat ol i namba wan lain bilong kisim blesing long rot bilong Pikinini bilong Abraham, na wanem ol narapela lain i bilong kisim blesing bihain long ol?
◻ Bilong lain 144,000, wanem laspela truim bilong kontrak Jehova i bin mekim wantaim Abraham na nupela kontrak?
8. Wanem sampela blesing ol Kristen long taim bilong Pol ol i kisim long rot bilong Pikinini bilong Abraham? Bihain, hamas ol bai kisim kain blesing olsem?
9. Ol manmeri i insait long nupela kontrak, olsem wanem lo bilong Jehova i stap long tingting bilong ol?
16. Lain Israel bilong God i wanem kain lain pris?
18. Ol manmeri i insait long nupela kontrak ol i kamap nupela gen na dispela i opim rot long ol bilong kisim wanem gutpela samting long bihain?
[Piksa long pes 15]
Bilong ol manmeri i stap aninit long nupela kontrak, pasin bilong lusim sin bilong man i gat as tru bilong en, winim ol manmeri i stap aninit long olpela kontrak