Baibel i Tok Wanem?

Long Nau Ol Juda i Lain Bilong God Stret, o Olsem Wanem?

LONG 1948 ol Juda i kisim hap graun bilong ol i ken sindaun long en, olsem kantri bilong ol. Ol tisa bilong ol lotu ol i kolim Kristen ol i kirap nogut long dispela samting na ol i tingting planti. Long wanem, inap planti handet yia pinis planti man bilong lotu i bin skulim ol man olsem: Taim ol Juda i bin kilim i dai Krais, ol i gat bikpela rong tru, na God i givim strafe long ol na ol i no gat graun moa bilong sindaun long en​—ol i mas i go nabaut long ol narapela narapela hap bilong graun. Tasol nau ol i gat wanpela kantri bilong ol yet, na ol i no gat wok moa long raun raun long ol narapela hap.

Nau planti samting i wok long kamap long hap bilong Midel Is, em hap ol Juda i sindaun long en, olsem na nau planti man i tingim ol Juda na ol i laik save: Long nau God i kisim bek ol Juda na ol i stap lain bilong Em gen? Nau God i mekim gut long ol Juda, winim ol narapela lain?

Planti handet handet yia bipo God i bin tokim ol Israel: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret. Na bai yupela i stap lain manmeri i save mekim wok bilong mi olsem ol pris. Na bai yupela i stap ol manmeri tru bilong mi.” (Kisim Bek 19:​5, 6) Tru olgeta lain manmeri ol i bilong God, tasol ol Juda inap kamap lain bilong God stret, na bai ol i mekim wok bilong em olsem pris bilong helpim olgeta lain bilong graun.

Tasol olsem wanem? God inap makim ol nating bilong kamap lain bilong em stret? Nogat tru! Em i bin tokim ol: “Sapos nau yupela i holim strong kontrak bilong mi na bihainim tok bilong mi, . . . bai [mi] makim yupela i stap lain manmeri bilong mi stret.” Olsem na sapos ol i laik i stap lain bilong God stret long olgeta taim bihain, orait ol i mas i stap gut long em na bihainim tok bilong em.

Samting i Painim Ol i Truim Tok Bilong Jehova

Dispela samting i kamap klia long taim bilong profet Hosea, olsem 750 yia paslain long Krais. Jehova i bin mekim gut tru long ol Israel, tasol bihain planti Israel i lusim Jehova na ol i no lotu moa long em long pasin em i laikim. Orait Jehova i ting olsem wanem long dispela? Em i tok: “Mi no moa laikim ol Israel na mi no inap lusim sin bilong ol. . . . yupela Israel i no ol manmeri bilong mi. Na mi no inap i stap God bilong yupela.” (Hosea 1:​6, 9) Olsem na taim ol Israel i lusim God na ol i kisim ol narapela god, em i no laikim ol moa. Bihain God bai kisim bek ol wan wan Israel i bin i stap gut long em, na em bai mekim gut tru long ol olsem bipo em i bin mekim.​—Hosea 1:10.

Orait God i truim dispela tok profet bilong em na em i larim ol birua i kam kalabusim ol Israel na kisim ol i go, na ol i bagarapim haus lotu bilong ol Israel. Dispela samting i kamapim long ples klia tru olsem God i no laikim ol moa, na ol i no stap lain bilong em moa. Long yia 537 paslain long Krais, liklik hap lain tasol i lusim kalabus na ol i kam bek long graun bilong ol, na ol i kirap wokim gen haus lotu bilong Jehova, na em laikim gen ol na ol i stap lain bilong em. (Long dispela taim ol i kolim ol olsem lain Juda.)

Wan Wan Tasol i Stap Gut long God

Tasol sampela handet yia bihain, ol Juda i kisim sampela tingting bilong ol Grik, olsem wanpela bilip Pleto i kamapim, olsem yumi gat tewel, na taim yumi dai tewel bilong yumi i stap yet. Ol dispela kain bilip giaman ol i kisim i bagarapim tru lotu bilong ol, na nau ol tok bilong Moses na bilong ol profet Hibru i no as bilong lotu bilong ol.

Orait olsem wanem? Jehova bai laikim yet ol Juda na bai ol i stap yet olsem lain manmeri bilong em stret? Jisas i save, planti Juda ol i givim baksait gen long Jehova na ol i kisim ol bilip giaman, na ol i no lotuim Jehova long pasin em i laikim. Olsem na Jisas i tok: “God bai i rausim Kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” (Matyu 21:43) Tasol planti ol i no putim yau long dispela tok bilong Jisas​—ol i wok yet long mekim pasin bikhet, na ol i sakim Jisas na ol i no bilip olsem em i dispela man Jehova i bin makim bilong kamap King. Olsem na bihain liklik, olsem long yia 70, God i larim ol birua i kam bagarapim dispela haus lotu bipo ol i bin wokim gen. (Matyu 23:​37, 38) Orait olsem wanem? Dispela samting i makim olsem Jehova i no laikim moa olgeta Juda wantaim?

Pol em i wanpela Juda, na em i wanpela aposel bilong Krais, na em i tok klia olsem: “Dispela lain bipo tru God i tok pinis long ol bai i stap lain manmeri bilong en, em i no bin givim baksait long ol. . . . Olsem tasol nau long dispela taim tu i gat hap lain i stap, God i bin marimari long ol na makim ol bilong em yet.” (Rom 11:​2, 5) Yumi ken tok piksa long wanpela bung bilong marit​—ating ol i singautim planti manmeri i kam, tasol wan wan tasol ol i kam. Orait i wankain tasol long samting God i mekim long lain Juda​—em i bin singautim olgeta Juda i kam insait long wanpela kontrak wantaim em na kamap lain bilong em stret, tasol hap lain tasol i stap gut long em na ol i stap lain bilong em. Tru tumas, dispela pasin isi God i mekim long ol i kamapim klia bikpela pasin marimari bilong em!

“Ol Manmeri Bipo Ol i No Lain Bilong Mi” Ol i Kamap “Lain Bilong Mi”

I gat sampela man bilong ol narapela lain ol tu i laik mekim wok bilong God, na ol i kam bung wantaim dispela hap lain Juda ol i stap gut long God. Ol tumbuna bilong ol dispela narapela lain i no bin i stap insait long kontrak wantaim God na i stap lain bilong em, tasol nau Jehova i orait long kisim ol dispela lain em ol i stap gut long em, na ol i ken i stap lain bilong em. Pol i tingim dispela samting na em i tok: “Yumi no kam long lain bilong Juda tasol. Nogat. Yumi kam long ol arapela lain tu [i no bilong lain Juda]. . . . Long buk bilong profet Hosea, God i bin tok olsem, ‘Dispela ol manmeri bipo ol i no lain bilong mi, bai mi kolim ol lain bilong mi.’ ”​—Rom 9:​22-25.

Olsem na sampela bilong lain Juda na bilong ol narapela lain tu ol inap i stap lain bilong God stret, na bai ol i ken mekim wok olsem pris bilong helpim ol narapela man bilong graun. Pita, em wanpela aposel Kristen na em i bilong lain Juda, na em i bin raitim pas i go long ol manmeri i lotu tru long Jehova na ol i bilong ol narapela narapela lain. Em i tokim ol: “God i makim yupela pinis, na yupela i stap lain manmeri bilong em stret. Yupela i stap ol pris bilong lain bilong king. Yupela i stap lain manmeri i holi, em ol lain manmeri tru bilong God. . . . Bipo yupela i stap ol manmeri nating. Tasol nau yupela i stap lain manmeri bilong God.” (1 Pita 2:​9, 10) Jisas i tok, dispela “lain” manmeri em ol i bihainim stretpela pasin bilong God, ol yet bai kamapim ‘kaikai bilong Kingdom bilong God,’ na bai ol i stap lain bilong em stret.​—Matyu 21:43.

Taim God i laik makim dispela lain bilong i stap pris, em i tingim ol manmeri ol i bilip tru long em na ol i bihainim stretpela pasin​—em i no tingim ol tumbuna bilong ol i bilong wanpela lain. Olsem Pita i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”​—Aposel 10:​34, 35.

Olsem na God i no tingim moa wanpela man i bilong wanem lain na long dispela as God i mekim gut long em; nogat. Nau em i wokim rot bambai ol man bilong olgeta lain ol i ken i kam insait long lain bilong em. Orait sapos yumi laik i stap lain bilong God, yumi mas bilip long em na stap gut long em na bihainim stretpela pasin.