Wanem Mining Bilong Dispela Tok “Laikim . . . Ol Birua Bilong Yupela”?

Bekim bilong Baibel

Long Bikpela Tok Long Maunten Jisas i bin mekim, em i tok: “Yupela i mas laikim . . . ol birua bilong yupela.” (Matyu 5:44; Luk 6:27, 35) Tok bilong em i makim olsem yumi mas mekim pasin laikim long ol man i heitim yumi o mekim nogut long yumi.

Jisas i soim pasin laikim long ol birua bilong em taim em i fogivim ol man i mekim nogut long em. (Luk 23:33, 34) Tok em i skulim yumi long laikim ol birua bilong yumi i stret wantaim tok i stap long Ol Skripsa Hibru, em ol i kolim olsem Olpela Testamen.​—Kisim Bek 23:4, 5; Provep 24:17; 25:21.

“Yupela i mas laikim yet ol birua bilong yupela na beten long ol man i save mekim nogut long yupela.”​—Matyu 5:43, 44.

Long dispela atikol

• Wai yu mas laikim ol birua bilong yu?

• Wanem sampela rot bilong laikim ol birua bilong yu?

• I stret yu mas insait long woa na pait long ol birua bilong yu?

• Ol tingting kranki long pasin bilong laikim ol birua bilong yu

• Ol ves bilong Baibel i stori long pasin bilong laikim ol birua bilong yu

Wai yu mas laikim ol birua bilong yu?

• God em gutpela eksampel. God “i save mekim gutpela pasin long ol man i no gat pasin bilong tok tenkyu na ol man nogut.” (Luk 6:35) Em “i save mekim san bilong em i kam antap long ol man nogut.”​—Matyu 5:45.

• Pasin laikim inap kirapim birua long senisim pasin bilong em. Baibel i tok yumi mas mekim gutpela pasin long birua bilong yumi, taim yumi mekim olsem, yumi “hipim hatpela sit bilong paia antap long het bilong em.” (Provep 25:22) Dispela tok piksa i makim pasin bilong kukim ol ain bilong rausim ol pipia na kisim ol gutpela ain. Olsem tasol sapos yumi soim gutpela pasin long man i heitim yumi, i olsem yumi helpim em na isi isi pasin bilong em long kros i wok long pinis na gutpela pasin bilong em i kamap ples klia.

Wanem sampela rot bilong laikim ol birua bilong yu?

• “Mekim gutpela pasin long ol man i heitim yupela.” (Luk 6:27) Baibel i tok: “Sapos birua bilong yu i hangre, orait givim kaikai long em. Na sapos em i nek drai, orait givim wara long em.” (Rom 12:20) Yu ken painim ol rot bilong soim pasin laikim long birua taim yu bihainim ol tok bilong What Is the Golden Rule?, em i tok: “Ol pasin yupela i laik bai ol man i mekim long yupela, yupela i mas mekim wankain pasin long ol.”​—Luk 6:31.

• “Askim God long blesim ol man husat i tok olsem ol samting nogut i ken kamap long yupela.” (Luk 6:28) Yu askim God long blesim ol birua bilong yu, taim yu mekim gutpela tok long em na tingim gut ol, maski ol i mekim ol tok i nogutim yu. Baibel i tok: “Yupela i no ken bekim tok nogut narapela i mekim long yupela, nogat. Yupela i mas toktok wantaim ol long gutpela pasin.” (1 Pita 3:9) Dispela edvais inap helpim yumi long lusim pasin bilong heitim narapela.

• “Beten long ol man i mekim ol tok i bagarapim bel bilong yupela.” (Luk 6:28) Sapos man i mekim tok i bagarapim bel bilong yu, no ken bekim “pasin nogut long man i mekim pasin nogut” long yu. (Rom 12:17) Tasol, askim God long fogivim dispela man. (Luk 23:34; Aposel 7:59, 60) What Does the Bible Say About Revenge?, tasol larim God yet i bihainim stretpela pasin bilong em na stretim dispela man.​—Wok Pris 19:18; Rom 12:19.

“Yupela i mas laikim yet ol birua bilong yupela na mekim gutpela pasin long ol man i heitim yupela. Na askim God long blesim ol man husat i tok olsem ol samting nogut i ken kamap long yupela. Na beten long ol man i mekim ol tok i bagarapim bel bilong yupela.”​—Luk 6:27, 28.

• “No save les kwik, na . . . gutpela pasin.” (1 Korin 13:4) Long tok aposel Pol i mekim long pasin laikim, em i yusim wankain tok Grik (a·gaʹpe) i stap long tok bilong Matyu 5:44 na Luk 6:27, 35. Yumi soim pasin laikim Kristen tu long ol birua bilong yumi taim yumi no les kwik long ol na mekim gutpela pasin, yumi no jeles, mekim pasin antap, o mekim hatpela pasin long ol.

“Man i gat pasin laikim em i no save les kwik, na em i save mekim gutpela pasin. Em i no save jeles, em i no save hambak, em i no gat pasin antap, em i no save bikhet nabaut, em i no save tingim em yet, na em i no save belhat kwik. Em i no save tingim rong ol arapela i mekim long em. Em i no save amamas long ol pasin i no stret, nogat, em i save amamas long ol pasin i tru. Em i no save larim wanpela samting i daunim em, em i save bilip long olgeta samting, em i save wetim ol gutpela samting i kamap, na em i save sanap strong long olgeta hevi i kamap long em. Pasin laikim i no inap pinis.”​—1 Korin 13:4-8.

I stret yu mas insait long woa na pait long ol birua bilong yu?

Nogat, bikos Jisas i tok ol disaipel bilong em i no ken insait long woa na pait long ol birua bilong ol. Olsem, taim Jisas i givim tok lukaut long ol birua bai kam pait long Jerusalem, em i no tokim ol disaipel long stap bek na pait, nogat, em i tokim ol long ranawe. (Luk 21:20, 21) Jisas i tokim tu aposel Pita: “Putim bainat bilong yu i go bek long ples bilong en, long wanem, ol man i yusim bainat, ol bai dai long rot bilong bainat.” (Matyu 26:52) Tok bilong Baibel na bilong ol saveman i soim olsem ol disaipel bilong Jisas long taim bilong ol aposel ol i no bin insait long woa na pait wantaim ol birua bilong ol, nogat.a—2 Timoti 2:24.

Ol tingting kranki long pasin bilong laikim ol birua bilong yu

Tingting kranki: Lo Bilong God i tok ol Israel i mas heitim ol birua bilong ol.

Tingting kranki: Pasin bilong laikim ol birua bilong yu i min olsem yu orait long pasin nogut bilong ol.

Stori tru: Tok bilong Baibel i soim olsem yu ken laikim man, tasol yu no orait long pasin nogut bilong em. Olsem, Jisas i no orait long pasin bilong pait na bagarapim man, tasol em i beten long God i ken fogivim ol man i bin kilim em i dai. (Luk 23:34) Na em i heitim tru pasin bilong brukim lo, o mekim sin, tasol em i bin givim laip bilong em bilong helpim ol sinman.​—Jon 3:16; Rom 6:23.