Hau Yumi Inap Stap Klin Long Ai Bilong God?

Piksaim wanpela mama i redim pikinini man bilong em bilong go long skul. Em i sekim olsem pikinini i waswas pinis na klos em i werim i klin. Dispela i mekim pikinini i stap helti na i soim olsem papamama bilong em i lukautim em gut. Olsem tasol, gutpela Papa bilong yumi, Jehova, i laik bai yumi stap klin long skin, tingting, toktok, na pasin bilong yumi. Taim yumi stap klin, dispela i helpim yumi na i givim biknem long em.

1. Olsem wanem yumi ken stap klin long skin?

Jehova i tokim yumi: “Yupela i mas i stap holi.” (1 Pita 1:16) Bilong i stap holi, yumi mas i stap klin long skin, tingting, na pasin bilong yumi. Yumi ken stap klin long rot bilong waswas olgeta taim, wasim klos, na klinim haus na kar bilong yumi. Na tu, yumi mas klinim Haus Kingdom bilong yumi. Taim yumi stap klin long skin, yumi givim biknem long Jehova.​—2 Korin 6:3, 4.

2. Bilong i stap klin, yumi mas abrusim wanem ol pasin?

Baibel i tokim yumi long “rausim olgeta pasin doti bilong skin na bilong tingting.” (2 Korin 7:1) Olsem na yumi wok strong long abrusim ol pasin we inap bagarapim bodi na tingting bilong yumi. Ol samting yumi tingting long en i mas amamasim Jehova, olsem na yumi mas wok strong long sakim ol tingting i no klin. (Buk Song 104:34) Na tu, yumi mas wok strong long mekim ol tok i klin.​—Ritim Kolosi 3:8.

Wanem ol narapela samting inap mekim yumi stap doti long skin, tingting, na pasin bilong yumi? Sampela samting inap mekim bodi bilong yumi i kamap doti. Olsem na yumi sakim ol samting olsem smok, buai, na ol drak. Taim yumi sakim ol dispela samting, yumi bai stap helti na yumi soim rispek long laip em presen yumi kisim. Na tu, yumi wok strong long sakim ol pasin i no klin olsem pasin bilong pilai long sem na pasin bilong lukim ponografi. (Buk Song 119:37; Efesus 5:5) Ating i hatwok long lusim ol dispela pasin, tasol Jehova inap helpim yumi long lusim ol dispela pasin.​—Ritim Aisaia 41:13.

KISIM SAMPELA SAVE MOA

3. Pasin bilong i stap klin long skin i givim biknem long Jehova

Yumi inap kisim save long tingting bilong Jehova long pasin bilong i stap klin long rot bilong skelim ol lo em i bin givim long ol Israel bilong bipo. Ritim Kisim Bek 19:10 na 30:17-19, na stori long ol dispela askim:

• Olsem wanem ol dispela ves i kamapim tingting bilong Jehova long pasin bilong i stap klin long skin?

• Yu ken mekim wanem long olgeta taim bilong i stap klin long skin?

Yumi mas lusim haptaim na strong bilong mekim ol samting bilong i stap klin long skin. Yumi inap mekim olsem maski yumi stap long wanem hap o yumi gat planti samting o nogat. Pilaim VIDIO, na stori long dispela askim.

VIDIO: God i Laikim Ol Manmeri i Stap Klin (4:10)

• Taim yumi lukautim ol samting bilong yumi na klinim ol, olsem wanem dispela bai givim biknem long wok autim tok bilong yumi?

4. Wok strong long lusim ol pasin i no klin

Sapos yu save smok o kisim drak, ating yu save olsem em hatwok long lusim dispela pasin. Wanem samting inap helpim yu? Yu ken skelim ol samting em dispela pasin i mekim long yu. Ritim Matyu 22:37-39, na stori long ol samting em pasin bilong smok o kisim drak inap mekim long  . . .

• pasin pren bilong man wantaim Jehova.

• famili bilong man na ol arapela.

Mekim ol samting bilong lusim wanpela pasin i no klin.a Pilaim VIDIO.

VIDIO: Bosim Gut Bodi (2:47)

Ritim Filipai 4:13, na stori long dispela askim:

• Olsem wanem pasin bilong beten, stadi long Baibel, na go long ol miting inap givim strong long man long lusim pasin i no klin?

5. Wok strong long sakim ol tingting na pasin i no klin

Ritim Kolosi 3:5, na stori long ol dispela askim:

• Olsem wanem yumi save pasin bilong lukim ponografi, sekstim,b na pasin bilong pilai long sem, ol i pasin doti long ai bilong Jehova?

• Yu ting i stret Jehova i laik yumi mas i stap klin long tingting na pasin bilong yumi? Bilong wanem?

Kisim save long olsem wanem yu ken wok strong long sakim ol tingting i no klin. Pilaim VIDIO.

VIDIO: Mekim Ol Samting Bilong i Stap Klin (1:51)

Jisas i mekim wanpela tok piksa bilong soim olsem yumi mas wok strong long mekim ol samting bilong i stap klin long pasin na tingting bilong yumi. Ritim Matyu 5:29, 30, na stori long dispela askim:

• Tru, Jisas i no tok long yumi mas bagarapim bodi bilong yumi yet, tasol tok bilong em i makim olsem yumi mas mekim sampela samting. Man i mas mekim wanem samting bilong sakim ol tingting i no klin?c

Sapos yu wok strong long sakim ol tingting i no klin, Jehova bai amamas long hatwok yu mekim. Ritim Buk Song 103:13, 14, na stori long dispela askim:

• Sapos yu hatwok long lusim wanpela pasin i no klin, olsem wanem dispela skripsa bai strongim yu long wok yet long lusim dispela pasin?

Taim yu pundaun, no ken givap!

Em isi long ting olsem, ‘Mi pundaun, em orait maski mi givap.’ Tasol tingim dispela samting: Man i ran long wanpela resis, sapos em i bamim wanpela samting na em i pundaun, dispela i no makim olsem em i lus long resis, na em bai i no inap go bek long kirap na stat gen long ran, nogat. Olsem tasol, sapos yu pundaun gen long mekim pasin i no klin, dispela i no makim olsem yu no inap lusim dispela pasin. Na dispela i no makim olsem olgeta samting yu mekim pinis bilong kamap strong i lus nating, nogat. Taim yu wok long stadi i go, yu inap pundaun, tasol no ken givap! Jehova bai helpim yu long lusim dispela pasin i no klin.

OL BIKPELA POIN

Yumi amamasim Jehova taim yumi mekim ol samting na bai bodi, tingting, na pasin bilong yumi i stap klin.

Riviu

• Wai na em i bikpela samting long i stap klin?

• Olsem wanem yu ken i stap klin long skin?

• Yu mas mekim wanem na bai tingting na pasin bilong yu i stap klin?

MEKIM WOK PAINIMAUT

Yu inap mekim wanem ol samting bilong i stap klin long skin maski yu no gat planti samting?

Helt na Stap Klin​—Wasim Han (3:01)

Kisim save long sampela rot yu ken bihainim bilong lusim smok.

“Olsem Wanem Yu Ken Lusim Smok?” (Kirap!, Julai 2010)

Skelim ol hevi em pasin bilong lukluk long ponografi i save kamapim.

“Ponografi​—Em Bai Bagarapim Man o Nogat?” (Wastaua, Ogas 1, 2013)

Kisim save long hau wanpela man i stop long lukim ponografi.

“Mi Pundaun Planti Taim Tasol Mi Winim Hevi” (Wastaua No. 4 2016)